Diosnö ösödo̧ Job mikwo̧ usula emawina jawa 18 - Dios Iwene

Bildad Job yöa̧laja̧ öpöjödö atadina jawa

¹ Job jejenö yöa̧liökwe, Bildadma öpöjödö atadinobe, baikwö:

^2-3 —Dokwa lekwe mikwa jwii̧ jawa yöka̧lakwa̧da Job? Ja̧danö, tajawedö sulabenö kwomukwatobeda ökwödö kwömöledönö, –Bidöma wajwibadö, pa̧ka̧yadö wajwibö omukwatöködö tjö̧jidanöbedö, –jö̧ba̧lö? 'Wi̧inö babibö, jweinö kwomukwatobö jo̧be Job, ja̧danö jweinö kwomukwatenama, isabenö otiwanö pjabatö yöda̧lakwawakobe.

⁴ —Ökwöma dameakwö ja̧nö, ökwödada suli̧ jwöbekwo̧ja, kwiteba'o yö̧yö̧bakwawo̧danö suli̧ waedakwawo̧ja Job, sula. Kwedemi, ökwöda jejenö kwödameakwobetjö̧, bö̧jȩma jojodö deö̧jȩ baibobö jȩnaji̧? Kwedemi ökwöda kwödameakwobetjö̧, inawiya pjolachibobö jȩnaji̧? Ja̧maökö Job, jweinö kwomukwatobö jo̧be.

⁵ —Isabenö ökwödanö sulabedöma, Dios lȩebakwa̧wö̧ Job, baikwö wanedö yötawa: Sulabedö tjidejati̧ dȩju̧wa̧'yuma isabenö tiibakobe, ja̧danö ökwöla, tjönötedaja̧ ökwölama, dejatökakobe.

⁶ Tjeju okwa tjidejati̧ dȩju̧wa̧'yuma, yö̧te baledibanö dejatobö tjönötedajayuma, tiibakobe, tjeju okwa bakobe yȩa'wonöda tjö̧ji̧binö.

⁷ Ja̧danö ajayinö otiwanö tjujulunö kwetjachinajayonö, tji̧me'dawachibanö tjo̧'omanö kwetjachakwedö. Ju'wibi, ju'wedönö suli̧ tjöwaedobö tjomukwataja̧ma, idönöda baledakobe, suli̧ tjöwaekwi̧nö.

^8-9 —Jau Job, isabenö suli̧ waekwadö, ökwödanö sulabedöma, baikwö wanedö yötawa: Sulabo̧ma iteda ömasapiya suli̧ waedökwe: Otiwanö kwebacho̧sa jö̧a̧lijayonö, 'daliwanö li̧bo̧. Edökönö, 'daliwa jawa ja̧to̧ sulabo̧ma, ja̧danö ömasapiyanö di̧achibökwe, jobe 'daliwanöda lo̧.

¹⁰ Jau, otiwemi kwebacho̧sa jö̧a̧lijayonö, a̧la̧chi'bo ö̧la̧kwa'boma tojawibö ba̧'bo, otiwanö mananö kweachobö jö̧a̧lijayonö, i̧'yakwa̧ mananö, 'daliwama ju̧kwawö teada̧lobe.

¹¹ —Okobe jwiinö sulabo̧ kweachi̧tenia, yeabikwawa jawa meibobe ichejekwa sulabo̧nö, okobe jwiinö kweachi̧tenia, jo̧banö luanobedanö jo̧be.

¹² A̧wi̧chi̧ lö̧jökwe ja̧nö, ujulu jwibo̧ baibanö ime'dawachibobe, ja̧danö kabatökönö suli̧ waekwabinö jo̧, sulabo̧ma.

¹³ Ju'wibi i̧sȩdo̧ma, ö'wöchi̧tjö suli̧ waekwobe, inesö yetjabi̧ tjö'wöchi̧ma, öjabiyabi, i̧bȩjwiyabi suli̧ waedobe.

¹⁴ Otiwanö chejunö jo̧sa jö̧a̧lijayonö, iteda ejutjö do̧batö tje'ewökwe jo̧banö, inesö yetjabökwe la'aka luwo̧ öba a'o tjujunobö tje'ewökwe, jo̧ba sulabo̧nö.

¹⁵ Jo̧ba ejuma, iteda ömöledötjö bakwo̧bi deejuda ja̧kweju, ja̧danö inesö suli̧ jobetjö dichö lotjakobetjö̧, ubi̧ jawa azufre lilitjakwedö.

¹⁶ Jo̧bama towi bö'diya kököbachibowidanö ichejekwo̧, ja̧danö öjabiya kököbachibowidanö ichejekwo̧, jo̧ba ökwö Jobdanö ichejekwo̧ sulabo̧ma.

¹⁷ —Ökwödajayo̧ sulabo̧nö, bakobenö tjo̧'wo jwitjibakwo̧ bö̧jetjöma, iteda itebotjö bakwo̧bi omukwatibökakwo̧ jo̧banöma.

¹⁸ Jo̧banö dewi̧ jȩmitjö a'dewö lotjakwo̧, inesö yȩa'wo jȩmi nijinöda ö̧jobö, bakobenö jojodö tjujukwemitjö a'dewö lotjakwo̧ jo̧banöma.

¹⁹ Iteda itebotjö, bakwo̧bi iteda itji̧mu tupadanö jojodötjöma deakobe, ajayinö kwebachö ö̧jinemi nijinö, itji̧mutjö bakwo̧bi deakobe.

²⁰ —Jo̧ba sulabo̧nö baledi̧ edö, jawo̧ meajobekwö ju̧kwadöma tjöbajale jalaka baibanö tjedakwedö, ja̧danö jawo̧ laebobekwö ju̧kwadöbi yebabinö tjedakwedö,

²¹ –Ayö, isabenö itenö baledi̧danö baledawö̧, sulabedönöma, Diosnö öpöjödadönöma, —jö̧ba̧lö Bildad yöa̧linobe Jobnö, Isabenö sulabo̧ja, jö̧ba̧lö.