Diosnö ösödo̧ Job mikwo̧ usula emawina jawa 17 - Dios Iwene

Job Diosnö budekwö yöa̧lina jawa

¹ Tupakwö o̧'wo tjo̧achö yöa̧linobe Jobma: —Isabenö chime'dawachibajabe, wanedö yötawa, chö̧ji̧ma juluwanö tiibobe, ja̧danö wobiakoma ida̧ökö wotakwa̧ teada̧lobe.

² Okobe deinö chipjeanö ju̧kwadöma ötjönö obadö, ja̧danö otjobe edö, usula emawo̧sa.

^3-4 —Chuluwo̧ Dios, wanedö yöta̧la: Ka̧lena chö̧bobedanö ichejekwa, bakwo̧ latebakwa̧ midawa balada imidenanö kabatö. Jo̧kwaijayonö chö̧ji̧binö midö pjabato̧ deobe chuluwo̧, ötjöwe. Jau chuluwo̧ Dios, ötjönö jweinö tjomukwatapji jö̧ba̧lö, ökwöda tjökeba̧lajabe, ja̧danö jejenö tjökeba̧liawö̧, ötjönö pjatjatoböma öpöjödadö chuluwo̧. Jo̧kwajabetjö̧ ökwönö atebakwö, ökwöda latebakwa̧ jawa kwimidobö, otiwanö latebakobetjö̧. Jau chuluwo̧, jweinö omukwatöködö batjibanö, bidö tjomukwati̧ tjökeba̧lajabe, jo̧kwajabetjö̧ ötjönö tjujuluwoböma weköbökakwo̧ja chuluwo̧.

⁵ Jobadö chömöledöma isabenö sulabenö ja̧badö, wanedö yötawa, Idöda otiwanö tjemakobetjö̧, tjömöledöso̧nö sulabenö yötja̧lajabe, –Bitema sulabenö ja̧bo̧, –jö̧ba̧lö. Ja̧danö, jo̧badöjayedönö baledakwa̧ma, baikwö yöta̧la: Jobadödamaökö usula tjemakwedöma, sulabenö ja̧tjobetjö̧, tjitji̧mu tupadanö jojodöbi lekwema tjö̧jökakwedö.

⁶ —Isabenö usula emawo̧sa ötjöma, sulabenö ja̧bö chö̧jinököjayonö, Diosma jwiinö usula chemawinö weajabe, okobe deinö ötjönö obö yötja̧lenanö baibanö, –Jobma mikwawö̧kö̧, –jö̧ba̧lö okobe deinö ötjönö sutjenanö baibanö.

⁷ —Jwiinö usula emawö chubudekwobetjö̧, chöbajale tjewawökwe babibo̧sa, ja̧danö jwiinö usula emawö chö'dalökachibajabe 'dalökachina batibanö.

⁸ —Ötjönö baledi̧ edö, –Otiwadösa, –jö̧ba̧ladöma tjöbajale jalaka baibanö edadö, ja̧danö, –Wene jwibadösa, –jö̧ba̧ladöma edö, ötjönö dameakwadö, –Isabenö bitema sulabo̧, Diosnö öpöjödo̧, –jö̧ba̧lö.

⁹ –Dios ösödi̧danö ja̧badösa, –jö̧ba̧ladöma jwaikwöda idöda tjomukwati̧danö tjö̧jakwedö, ja̧danö, –Otiwanö ja̧badösa, –jö̧ba̧ladöma ajayitjö bajalekwönönö, –Jweinö omukwatadösa, –jö̧ba̧lö tjomukwatakwedö.

¹⁰ Okobe deinö jobekwö omukwatadönö, baikwö yöta̧la, –Chöba a'o ichibö, ötjökwö jwöjwököbaduwo, ötjönö kwö̧ba̧ja̧daduwakobetjö̧, –jö̧ba̧lö. Jo̧kwaijayonö, chedemi okobe deinö jobadö chöba a'ö ichibö tjö̧jitjö̧ma, jobadötjö bakwo̧bi isabenö waisanö omukwato̧nö chöbadekwajökena, –Otiwanö omukwatadösa, –jö̧tja̧lonö, isabenö wajwiböda tjomukwatobetjö̧.

¹¹ —Ötjöwe! Chöji̧ mölema juluwanö 'dö̧ibobe, ja̧danö omukwatö chujuninama waekwobe, chomajadenö omukwatö chösödi̧bi waekwobe.

¹² Chömöledöma wajwibö ötjönö yöba̧ladö, yö̧te ji̧jayonö, –Isabenö mölȩ, –jö̧ba̧ladö, yȩa'wo okwa dö̧jijayonö, –Tjo̧wi, dewi̧ yö̧neawachiba, –jö̧ba̧ladö, wajwibö. Otiwanö pjatjatobö tjösödijayonö, wajwibadö chömöledöma, ja̧danö jwaikwöda ö'öbönö yöba̧ladö.

¹³ Ötjöwe! Jwiinö usula chemawobetjö̧, ö'wö batibakwa̧da ösödi̧nö omukwato̧sa, yȩa'wo okwa ba̧nö, ö'wö batibobö ösödo̧sa.

¹⁴ —Jau, isabenö ö'wö batibobö jö̧ba̧lo̧sa, baikwö wanedö yötawa, jwiinö ö'wö batibobö chösödobetjö̧, chabe'donö chösödi̧danö wobiako chösödobe, ja̧danö chojo'donöbi, chöjawujunöbi chösödi̧danö, sa̧dönö chiteba'o tjukwakwedönö chösöda, juluwanö ötjönö tjukwowe, jö̧ba̧lö.

¹⁵ Ju'wi otiwanö baledakwa̧ma di̧ya, cho̧'wo ösöwanö chiteada̧loböma? Bakwo̧bi edö, –Isabenö Job otiwanö ö̧jobö jo̧be, –jö̧ba̧lö omukwato̧ ö̧jobeji̧? Deobe.

¹⁶ Otiwanö baledakwa̧ chiteada̧lökakwo̧sa, ö'wö babibadö tju̧ju̧kwemibe chi̧'yenabi, otiwanö baledakwa̧ chiteada̧lökakwo̧sa, —jö̧ba̧lö usula emawö yöa̧linobe Jobma.