Diosnö ösödo̧ Job mikwo̧ usula emawina jawa 16 - Dios Iwene

Ökwödöma sulabenö pjabatöködöja, jö̧ba̧lö Job atadina jawa

¹ Elifaz jobekwö yöa̧liökwe, Jobma atadinobe, baikwö:

² —Yöka̧laja̧danö yöa̧lakwawa nöinö cha̧ja̧kwajabe ida̧ökö. Ökwödö chömöledöma, cho̧'wo tjo̧achi̧ seachibanö pjakataduwo jö̧ba̧ladöja, jo̧kwaijayonö pjabatöködöja. Pjabatökönö, ajayitjö bajalekwönönö cho̧'wo tjo̧achobö ja̧badöja.

³ Nöinö yöka̧laduwi̧ma, jwa̧le'epjodanö sule pjuböda pjubadöja, yöka̧laduwi̧ma ja'yubebi mikwawokobetjö. Mikwa jwii̧ jawa yöka̧laduwi̧ma la'akatjöda kakataduwökenaji̧? Tajawedö kabatökönö jwöjwöbakwawö yöka̧laduwobö jö̧ka̧laduwobeda?

⁴ —Isabenö yötawaduwakwö, ötjönö baledi̧danö ökwödönöda baleditjö̧ma, ötjöbi ökwödö sulabenö yöka̧laduwi̧danö yöta̧lobö jȩna. Ökwödö yöka̧laduwi̧danö, –Ayö, ökwödöma sulabedöja, –jö̧ba̧lö ötjöbi yöta̧lobö jȩna, ja̧danö ökwödö ja̧köbaduwi̧danö chuu löwö löwö ökwödönö otobö jȩna, –Isabenö bidöma sulabedö, –jö̧ba̧lö.

⁵ Jo̧kwaijayonö, ötjönö baledi̧danö ökwödönö baleditjö̧ma, ökwödö yöka̧laduwi̧danö yöta̧loko jö̧ta̧lena chömöledö, isabenö ökwödönö kwujuluwaduwachibanö pjatatobö chisakwena chömöledö, inesö usula kwemawaduwi̧ seachibinö pjatatobö chisakwena.

⁶ Ökwödöbi jejenö pjakataduwo jö̧ba̧ladöja chömöledö, jo̧kwaijayonö pjabatöködöja jejenöma. Jau chömöledö, yöta̧litjöma, yöta̧li̧ a̧ja̧kwö, inesö usula chemawi̧ seachibobö pjabatöködöja, ja̧danö 'wi̧inö chö̧bitjöbi, bakwainö seachibobö pjabatöködöja, sulabenö pjabatöködöja chömöledö, —jö̧ba̧lö yöa̧linobe Jobma, ömöledönö.

Isabenö Dios söbebö loökwesa, jö̧ba̧lö Job yöa̧lina jawa

⁷ Tupakwö yöa̧linobe Jobma: —Isabenö jwiinö chime'dawachibanö weajabe Diosma, ötjöwe! Chuluwo̧ Dios, okobe deinö chitji̧munö kwabö loköbajabe,

⁸ ja̧danö jwiinö chö'dalökachibanö weköbajabe. Jejenö 'dalöko̧ chö̧ji̧ma, sulabo̧ chö̧ji̧ wene i̧sȩbobedanö ichejekwa, –Isabenö bite Jobma sulabo̧, –jöba̧lö.

⁹ Isabenö ötjönö ödameakwajabe Diosma ichejekwa, wanedö yötawa: Tebonö jo̧ ötjönö lubö, o'yenö ötjönö yö̧yö̧bö seebajabe ichejekwa, ja̧danö chöpöjojo ja̧nö, labinö ötjönö suli̧ öwaedotö jö̧ba̧lö eda̧lobedanö ichejekwa.

¹⁰ —Jejenö balediawö̧, jojodöma ötjönö edö obadö, ötjönö obö, chibekasa'wo 'bȩtjajabe, –Bite Jobma sulabo̧, –jö̧ba̧lö. Jau, ötjönö tjölakwabikwawotö jö̧ba̧lö, chöba a'o ko̧ko̧kwö tjö̧jobe ichejekwa.

¹¹ Isabenö Diosma ötjönö iyö loajabe ichejekwa, Diosnö öpöjödadö ötjönö suli̧ tjöwaedobö, ötjönö ikwö loajabe ichejekwa, sulabedö ötjönö do̧ba̧lö suli̧ tjöwaedobö.

¹² —Ötjöwe, ajayinö otiwanö cho̧'wo ösöwanö chö̧jijatö, jo̧kwaijayonö cho̧'wo ösöwanö chöjemi ja'ötjö, 'detawinö kwaajabe Diosma. Chulume'anö do̧balö, ötjönö ya̧ebajabe ichejekwa, jwiinö 'detawenanö batibanö. Ju'wibi ötjönö ujunajabe ichejekwa, ömöayedö ötjönö 'bötjo jö̧balö,

¹³ ja̧danö babe iteda ömöayedö 'böawa jojodöma tjösawö nayunö ötjönö 'bötjobedanö ichejekwa. Lȩlöjinö edökönö, chibiepja̧ 'wibebö po̧ebajabe ichejekwa, ja̧danö cho̧'da̧ tibatö 'da̧ebajabe, cho̧'da̧sobu nijinö ebawenanö kabatö.

¹⁴ Yemidanö, yemidanö ötjönö meibobedanö ichejekwa, ölakwabikwawa jojo meibi̧danö, chö̧jobekwö ö'öakwawobedanö ichejekwa.

¹⁵ —Jejenö baledi̧tjö, kamijido̧ epju̧yunö kalukaa̧do̧ 'dutawajabe, ja̧danö nijiso̧pja̧nö chö̧bobe, –Juluwö̧kö̧sa, jwiinö cho̧'wo tjo̧bekwo̧sa, –jö̧ba̧lö.

¹⁶ Nöinö chubudekwobetjö̧, chöbama duwamachibajabe, ja̧danö chöbajalema 'yȩamachibajabe.

¹⁷ Jejenö baledökwesa ötjöma, sulabenö ja̧tinököjayonö, ja̧danö bakwainö otiwanö omukwatö Diosnö atebijayonö, jejenö baledökwesa ötjöma, ötjöwe.

¹⁸ —Juluwanö ö'wö batibakwo̧sa ötjöma, ö'wö batibenama, niji chökwösobu tojö looböma chöpöjöda. Ja̧danö Dios öba a'o jwöteba̧li̧, –Sulabenö ja̧tököjayonö ö'wö̧ batibajabe, –jö̧ba̧lö jwöteba̧li̧ma, jwaikwöda ökwöobö chösöda, jwaikwöda jobekwö jwöteba̧li̧ otiwanö tja̧ja̧kwobö jo̧be.

¹⁹ —Chöwaisa, ja̧bö chö̧ji̧ waiso̧ma mölejebe jo̧, –Jobma isabenö wene jwibo̧, –jö̧ba̧lö lȩekwa luwo̧ öba a'o yöbawo̧ma, ja̧danö yöawakwo̧, isabenö Dios ösödi̧danö chö̧ji̧ wenema.

²⁰ Bidö chömöledöma ötjönö obö yöba̧ladö, –Bite Jobma sulabo̧, –jö̧ba̧lö, jo̧kwajabetjö̧ Diosnö budekwabinö abebo̧sa,

²¹ chö̧ji̧ waiso̧ yöbawo̧ma Dios öba a'o yöawakobetjö̧. Jau, bakwo ömöledöso̧kwö wene ujuna̧lena, baledina waiso̧ lȩekwa luwo̧ öba a'o yöbawö, pjabato̧, –Bitema sulabenö ja̧bi̧nö̧kö̧, –jö̧ba̧lö edina yöbawö, jö̧tö? Jo̧ba pjaati̧danö, ötjö chö̧ji̧ waiso̧ Dios öba a'o yöbawö pjaatobö ateba.

²² —Jobekwö ateba Diosnö, isabenö ja'yubenö lekwajabetjö ö'wö batibakobetjö̧, ja'yubeda o̧biya baledaja̧ ikenama, debö chi̧'yakwa̧ mananö kwetachakwo̧sa, ja̧danö jobetjö tjetachajökakwo̧sa, jo̧kwajabetjö̧ chö̧ji̧ waiso̧ Dios öba a'o yöbawö pjaatobö chösöda, —jö̧ba̧lö yöa̧linobe Jobma.