Diosnö ösödo̧ Job mikwo̧ usula emawina jawa 15 - Dios Iwene

Elifaz wajwibö Jobnö yöa̧lina jawa, wajwibo̧ sulabo̧ja, jö̧ba̧lö

¹ Job jejenö yöa̧liökwe, Elifazma öpöjödö atadinobe, baikwö:

² —Job, isabenö waisanö omukwato̧ kwö̧jitjö̧ma, yöka̧laja̧danö yöka̧loko jö̧ka̧lajena, baikwö yötawa: Isabenö waisadöma, mikwa jwii̧ jawa yöba̧löködö, –Waisakwawa jawa yötawaduwakwö, –jö̧ba̧lö. Ja̧danö, jwa̧le'epjo buluwanö jwa̧le'ewi̧danö, labinö mikwa jwii̧ jawa yöba̧löködö.

³ Isabenö waisanö omukwatadöma pjaatökö ji̧ jawa yöbawöködö, jadanö mikwawa jwii̧ jawa jwöjwöbakwawöködö.

⁴ —Jo̧kwaijayonö waisanö omukwatö yöba̧lököja̧ Job. Ökwöma Diosnö yebabökönö sulabenö yöba̧lo̧ja, ja̧danö ju'wibi ju'wedö Diosnö otiwanö tjomukwatapji jö̧ba̧lö, sulabenö tjöbeba̧lo̧ja.

⁵ Jau Job, sulabo̧köbobetjö, sulabenö yöba̧lo̧ja, sulabedö lȩekwatjö tjö̧jibotö jö̧ba̧lö omöna yötja̧li̧danö, sulabenö ja̧köbi̧jayonö, –Sulabenö ja̧bö̧kö̧sa, –jö̧ba̧lö omöna yöba̧lo̧ja Job.

⁶ Isabenö ökwöda yöka̧li̧ma öwaetjöda öwawinö i̧sȩbobe, –Isabenö Dios lȩebobö jo̧be, –jö̧ba̧lö. Jau Job, ötjö yöta̧li̧maökö, ökwöda yöba̧lö kwi̧sȩbobe, isabenö Dios ökwönö lȩebi̧ma jwea, jö̧ba̧lö.

⁷ —Ökwöda okobe deinö böjȩ jojodötjö ajayinö ji̧na kwö̧ji̧ji̧? Dios mösa'iju otidakwa̧ abönö, ida̧ökö kwö̧jinaji̧?

⁸ Dios iteda ömöayedö waisadökwö ko̧ko̧kwö yöa̧lakwawonö, ökwöbi jobe ja̧nö kwa̧ja̧kwinaji̧? Okobe deinö bö̧jȩnö ju̧kwadötjö, ökwöda waisanö omukwato̧köbi̧ji̧?

⁹ Ja̧maökö Job, baikwö yötawakwö, ökwö kwöwaisi̧ma, ökwödöbi bakwainö waisadösa, ja̧danö okwa jawa kwöwaisachibina jawama, ökwödöbi bakwainö waisachibinadösa.

¹⁰ Isabenö waisadösa ökwödöma, baikwö yötawa: Kwabe'dotjö bajalekwönönö damöbedö, ida̧ökö tjöwö'ye dewadöma, ökwödö domukwati̧danö bakwainö omukwatadö, isabenö waisadösa ökwödöma, ökwönö yödawi̧ isabenö kwa̧ja̧kwobö jo̧be Job.

¹¹ —Diosma ökwönö pjaatobö jö̧ba̧lo̧ Job, kwo̧'wo ösöwachibanö ökwönö pjaatobö jö̧ba̧lo̧. Ja̧danö ökwödöbi dösölö̧jinö ökwönö pjabatö yöda̧lajabe, tajawedö Dios pjaati̧bi, ökwödö pjadati̧bi öpöjödö, –Mikwawökö ji̧, –jö̧ba̧lö kwöpöjödobeda?

¹² Tajawedö kwödameakwobeda kwomajadenö, ja̧danö tajawedö kwöbajale duwamachibanö kwölabobeda?

¹³ Jau Job, jwiinö dameakwo̧ja, kwo̧'wo luwonö Diosnö kwödameakwawenanö baibanö, jwiinö sulabenö jo̧banö yöka̧lenanö baibanö.

¹⁴ —Job, –Dios öba a'otjö sulabenö ja̧bö̧kö̧sa, –jö̧ba̧lö yöka̧lajabe, jo̧kwaijayonö ja̧maökö, baikwö yötawa: Jojodötjö bakwo̧bi usula jwibo̧ ö̧jenaji̧? Ya̧dö tjemawö̧tjö bakwo̧bi bakwainö otiwanö ja̧bö jo̧ ö̧jenaji̧? Deobe, la'akatjöda Job.

¹⁵ Jau Job, kwöwaisa, Diosma iteda ömöayedö angeledönöbi omukwatö̧kö̧, –Bakwainö sulabe jwibadö, –jö̧ba̧lö, jobadö mölejȩnö ju̧kwadöbi Dios öba a'otjö wene juna̧ladö, jö̧tö?

¹⁶ Ja̧danö, jobadö angeledönö jejenö omukwatitjö̧ma, bö̧je jojodötjö bakwo̧nö, –Wene jwibo̧, –jö̧ba̧lö omukwatenaji̧? Ja̧maökö Job, bö̧jenö ju̧kwadöma isabenö sulabedö yȩbekwadösa, ja̧danö ojwiyo o̧ti̧tjö ojwiyo dowobö dösödi̧danö, sulabenö ja̧dobö ösödadösa ökwödö bö̧jȩ jojodöma.

¹⁷ —Isabenö yötawi̧ kwa̧ja̧kwobö jo̧be Job, kwa̧ja̧kwitjö̧ma otiwanö ökwönö chi̧sȩbocha, chedina jawa kwöwaisachibanö labebö lobö yötawocha.

^18-19 Jau Job, damötjö Diosma da'dödönö niji iyinobe, isabenö waisadönö, ja̧danö jobadöma isabenö bakwainö waisanö omukwatö tjö̧jinobe. Jelobetjö ichajadö sulabenö omukwatadötjö bakwobi tjö̧'da̧de ichibö suli̧ öwaedinokobe, ö'öbönö tjomukwatobö, isabenö bakwainö otiwanö tjomukwatinobe jobadö da'dödöma. Jobadö yötjawina jawa yötawocha ökwönö Job, tjö̧ba̧jadina jawa tojata̧lökönö, otiwanö yötawakwö Job, baikwö:

²⁰ Sulabedöma kabatökönö inia tjöbö usula emawadö, ju'wedönö sulabenö labinö ja̧badöma, ba̧kwelöjatebö ina 'ya̧tja̧layi, usula emawadö.

²¹ Jobadöma kabatökönö yetjaibanö ökwöi̧ a̧ja̧kwadö, ja̧danö otiwanö tjö̧jemi ja'ötjö, wene jwia jö̧ba̧lö tjomukwatemi ja'ötjö, söbebö lobadö ichibö jobadönö tjujuluwobe.

²² Yea'wo okwa ja̧nö, yebabinö tju̧ju̧kwobe, –La'akatjöda dö̧jibökakwedösa, ju'wedö kwabö lotjakwawö̧sa,

²³ juluwanö bo̧lö̧ tjukwakwawö̧sa, –jö̧ba̧lö. Jau, jweinö kwebachökönö, jelobebi, jelobebi kwebachadö, ja̧danö tjöwaisa, –Isabenö juluwanö wene döbaledakwedösa, –jö̧ba̧lö.

²⁴ Kabatökönö tjo̧'wo tjo̧bekwö, usula emawö tju̧ju̧kwobe sulabenö ja̧badöma, ja̧danö jelobetjö ichajo̧ la'aka luwo̧ jobadökwö ölakwabikwawi̧danö, yebabinö tjomukwati̧bi, o̧'wo tjobekwö tjö̧ji̧bi tjomajade okwa jobadönö ölakwabikwawobedanö ichejekwa, isabenö nöinö wene baledadö, sulabenö ja̧badöma.

^25-26 —Jau Job, isabenö jejenöbedö sulabenö ja̧badöma. Jobadöma Diosnö öpöjödö, Diosnö tjölakwabikwawobö jö̧ba̧ladö, baikwö wanedö yötawa: Jwaikwöda Dios wei̧ öpöjödö, tjöekwapi 'diapi e'ewö, Okobe Jwiinö Juluwo̧ Diosnö metji̧botö jö̧ba̧lö ö'öbakwawadö. Ja̧danö Dios weökö jawa sulabenö ja̧tjobetjö̧, yöta̧laja̧danö baledawö̧ sulabenö ja̧badönöma.

²⁷ Ajayinö o̧tewadö, nöinö juna̧ladö tjö̧jinajayonö, Dios wei̧ tja̧ja̧kwokobetjö̧ waekwadö.

²⁸ Tjitebo comunidadma, pjolo lotjinemi comunidadnö tjö̧jakwedö, ja̧danö jojodö deobe tjejubiyanö tjö̧jakwedö, juluwanö pjoloachö meakwejunöda tjö̧jakwedö.

²⁹ Ajayinö nöinö tjujuna̧linajayonö, 'dö̧ibakobe, ajayinö tjitebo ba̧kwemeachibanö tjitea tjujuna̧linajayonö, jwibadö batjibakwedö.

³⁰ Isabenö tjöwaekwakwedö jobadö sulabedöma, la'akatjöda yȩa'wo okwatjö latjebökakwedö, baikwö wanedö yötawa: Towitjö yayinö ötjebiya pjewökachibobö jö̧a̧lenama, ökwöla juwö loakobe, ja̧danö 'yayi öjiya pjoawaja̧ma, jwa̧le'epjo e'ewö loakobe.

³¹ —Isabenö mikwawokobe jobadö sulabedö tjo̧'wo tjö̧wana̧li̧ma. Jobadöma idöda tjujuna̧li̧ jawa tjo̧'wo wana̧ladö, –Nöinö chujuna̧lobetjö̧ otiwanö chö̧jakwo̧sa, –jö̧ba̧lö, jo̧kwaijayonö jejenö waekwakobe, ja̧ tjo̧'wo tjöwana̧li̧ katjatibobö jo̧be. Ja̧ jawa tjo̧'wo tjöwana̧litjö̧ma, isabenö waekwakobe, –Otiwanö chemakwo̧sa, –jö̧ba̧lö tjo̧'wo tjöwana̧lijayonö, ja'yubebi tjemökakwedö.

³² Ina damö tjöwaekwököjayonö, debö tji̧'yakwedö, baikwö wanedö yötawa: Towi kököachibowidanö, öjiya la'akatjöda ö̧'dö̧wokowidanö tjichejekwakwedö.

³³ Isabenö tjöwaekwakwedö, ubasa'ba waji̧ ina ö̧'döwayi tjoduwa'badanö, ja̧danö olivo towi la'akatjöda wa̧jokowidanö isabenö tjöwaekwakwedö jobadö sulabedöma.

³⁴ —Jau Job, isabenö tjöwaekwakwedö Diosnö öpöjödadöma. Jobadöma tji̧tji̧mu tupadanö jojodö ina deayi debö tji̧'yakwedö. Ja̧danö ju'wibi, ju'wedö sulabenö ja̧tjobö tjimidawö̧, tjimidi̧ balada emö sulabenö ja̧tjobö ösödadöma, ajayinö nöinö tjujuna̧lakobe, jo̧kwaijayonö waekwakobe tupakwöma, tjejubiya jwiinö ubakobe.

³⁵ Jobadöma isabenö suli̧ tjöwaedobö omukwatadö, wene jwötjeba̧lobö isakwadö, jwaikwöda sulabenö ja̧tjobö omukwatadö, kabatökönö jojodönö omöna yötja̧lobö isakwadö, jobadö sulabedöma. Jobadö ja̧bö tjö̧ji̧danö kwö̧ji̧ma kakatibo Job, —jö̧ba̧lö yöa̧linobe Elifazma Jobnö.