Diosnö ösödo̧ Job mikwo̧ usula emawina jawa 14 - Dios Iwene

Bö̧jȩ jojodöma lekwe möle jö̧ködösa, jö̧ba̧lö Job yöa̧lina jawa

¹ Tupakwö yöa̧linobe Jobma: —Ökwödö jojodö, dojo'dodö tjeminawö̧ma, lekwe möle jö̧ködösa, ja̧danö ina 'ya̧dalayi, ba̧kwelöjatebö wene juna̧lakwawadösa.

² O̧bubiya juluwanö kököbachibö woi̧danö, baledadösa, jawo̧ dejatö jojo o̧'wo jawa i̧sȩkwaja̧ juluwanö debi baibi̧danö, juluwanö debi babibadösa bö̧je jojodöma.

³ Jejenöbo̧sa chuluwo̧ Dios, jo̧kwajabetjö̧ tajawedö sulabenö jatakwojobö jö̧ba̧lö ötjönö kweda̧lobeda? Tajawedö ötjönö lȩkebobö kwisakwobeda?

⁴ Kwöwaisa Dios, ökwödö bö̧jȩ jojodöma okobe deinö dusula juna̧ladösa, bakwo̧bi bakwainö usula jwiinö ö̧joböma jwibo̧, jö̧tö?

⁵ —Chuluwo̧ Dios, ökwöda omukwatö kwujunajabe, bakwo̧nökwena dokwa lekwe dö̧jakwojobö jö̧ba̧lö, ökwöda omukwatö kwujunajabe, jawo̧dö dokwa ba̧jȩkwadö dö̧jakwojobö, –Bitema bemi tupakwö ö̧joböma jwibo̧, –jö̧ba̧lö, jötö?

⁶ Jo̧kwajabetjö̧ baikwö atebakwö, ökwödönö kweda̧li̧ma kabatibö, jelobekwö jalachibi, ja'yubenö lekwe wainö dö̧jakobetjö̧. Jau Dios, midö wetjökwe otidi̧danö ichejekwobe bö̧jenö dö̧ji̧ma, jo̧kwajabetjö̧ sulabenö ja̧dakwojobö jö̧ba̧lö kweda̧li̧ kakatibobö atebakwö, wene jwiinö ö'wachö do̧'wo ösöwanö ja'yubenö dö̧jakobetjö̧.

⁷ —Debö chi̧'yakwa̧ abönö, ötjönö lȩkebi̧ kakatibobö atebakwö, baikwö yöta̧la: Bakwo̧ towi jubö loitjö̧ma, towi la'akatjö ina tupakwö pokwobö jȩna, ina yayinö öjiya pjewökachibobö jȩna, jö̧tö?

⁸ Jau, bö'diya ida̧ökö lekwe möle niji okwa ji̧najayonö, ja̧danö la'aka ida̧ökö jamatö woijayonö,

⁹ niji 'yoliwitjö̧ma, yemidanö 'yayi öjiya pjoawena, ja̧danö 'yayowidanö ötjebiya pjewökachibena, jö̧tö?

¹⁰ Jo̧kwaijayonö jejenöböködösa ökwödö bö̧je jojodöma. Ökwödöma waekwö, do̧'wo emökönö ö'wö badibenama, bakobenö debö 'ya̧dösa ökwödö bö̧je jojodöma.

¹¹ Jau, o̧pesobubi, ojwebi kököbachibö, okwajobu jwiinö baibi̧danö, bakobenö debi babibadösa.

¹² Bakwo̧ ö'wö babibö öbamataja̧ ikenama, jenada ö̧bakwo̧, bö̧jȩbi mölȩjȩbi 'dö̧ibajenanö kabatö. Jau, jȩnada ba̧nö wiluböködö bö̧jȩ jojodötjö ö'wö babibadöma, jadanö bakwo̧bi jobadönö iwiludobö jwiakobe, ida̧ökö debö tji̧'yajobetjö̧, jo̧kwajabetjö̧ debö chi̧'yakwa̧ abönö, ötjönö lȩkebi̧ kakatibobö atebakwö chuluwo.

¹³ —Chuluwo̧ Dios, baikwö chösödi̧ yöta̧lakwö, ö'wö babibinadö tju̧ju̧kwemi ötjönö tojö kwujunobö chösöda, inesö ötjönö kwödameakwi̧ seachibenanö kabatö. Tupakwö yemidanö ötjönö kwomukwatakwa̧ möle omudawö kwujunobö chösöda, ja̧danö ja̧ mölȩda yemidanö ötjönö kwomukwatobö chösöda chuluwo̧.

¹⁴ Chuluwo̧, bakwo̧ ö'wö baibitjö̧ma, isabenö 'dö̧ibaji̧ möle yemidanö 'yaa̧lenaji̧? Isabenö 'dö̧ibaji möle yemidanö 'yata̧lobö ji̧tjö̧ma, usula emawö chö̧ji̧ 'dö̧ibajenanö kabatö cho̧'wo 'dibachibö chiteada̧locha, 'dö̧ibaji möle yemidanö 'yata̧lakwa̧ möle baibenanö kabatö.

¹⁵ Jau chuluwo̧, ja̧ möle ötjö kwotidinökwenö ösödö kwomukwatakwo̧ja, –Chotidinökwe Jobma yemidanö ötjökwö ö̧jobö chösöda, –jö̧ba̧lö. Ja̧danö omukwatajo̧, ötjönö jwököbakwo̧ja, ja̧danö jwököbajökwe chatadakwo̧sa.

¹⁶ Jau chuluwo̧, ja̧ möle sulabenö ja̧takwojobö jö̧ba̧lö eda̧lökönö, otiwanö ötjönö kwiteada̧lena.

¹⁷ Ja̧ möle ötjö sulabenö ja̧tina wȩyukwöja tuda'wo okwa anö loköbena, ja̧danö chusula o̧tjö̧ loköbena, jejenö baibobö chösöda chuluwo̧.

¹⁸ —Ökwödö bö̧je jojodöwe! Isabenö ökwödönö lȩbebo̧ja chuluwo̧ Dios, baikwö wanedö yötawa: Mösa'iju 'dabö inawiya nijakwö tjoduwi̧danö,

¹⁹ ja̧danö ojwe tjo̧'omanö inawiya kelachö pjo̧'yachobedanö, ja̧danö ojwe niji e'ewö loi̧danö, ökwödö bö̧jȩ jojodönö lȩbebo̧ja, –Otiwanö dö̧jakwedösa, –jö̧ba̧lö domukwati̧ waekwenanö kabatö.

²⁰ —Jau chuluwo̧, ökwödö bö̧jȩ jojodökwö ölakwabikwawö ja̧nö, bakwelöjatebö ökwödönö juluwo̧ja, ö'wö babibö döbalewachenanö baibanö, ökwödönö juluwo̧ja.

^21-22 Jwiinö juluwo̧ja ökwödönö chuluwo̧, baikwö yöta̧la, jwiinö usula demawinö kwujuluwobetjö̧, ja̧ usula demawi̧da omukwatadösa, ditji̧munöbi omukwatöködö badibenanö kabatö. Jau, ditji̧mu otiwanö tjomukwatawö̧ batjibitjö̧bi, mikwawöködö batjibitjö̧bi, jobadö tjö̧ji̧ jawa ja'yubebi omukwatöködösa, kwujuluwajawö̧ ja̧nö, usula emawö, inesö inia tjöbö dö̧ji̧da dubudekwobetjö̧, —jö̧balö yöa̧linobe Jobma Diosnö.