Diosnö ösödo̧ Job mikwo̧ usula emawina jawa 13 - Dios Iwene

Job tupakwö atadö yöa̧lina jawa

¹ Job tupakwö yöa̧linobe: —Jau chömöledö, okobe jwiinö ja̧ yötawaja̧ jawama, chöbajalebiyanö chedajabe, ja̧danö chölakiyunö a̧ja̧kwö, okwa jawa chöwaisachibajabe.

² Isabenö ökwödötjö baikwönönöbö̧kö̧sa chömöledö, ökwödö kwöwaisaduwi̧ jawama, ötjöbi chöwaisa chömöledö.

³ Ötjö chösödi̧ma, baikwö yötawaduwakwö chömöledö, ötjöma Okobe Jwiinö Juluwo̧ Dioskwö yöta̧lakwawobö chösöda, jo̧bakwöda yöba̧lakwawö, jo̧banö yöta̧lobö jö̧ta̧la, –Chuluwo̧, isabenö kwöpöjödi̧nö ja̧binö̧kö̧sa, –jö̧ba̧lö.

⁴ —Ja̧danö, ökwödö chömöledönö, baikwö yöta̧la: Ökwödöma sulabenö omöna yöba̧ladöja, –Jobma sulabenö ja̧bo̧, –jö̧ba̧lö. Ja̧danö ökwödöma, –Pjadatakwö, –jö̧ba̧lö yöka̧laduwijayonö, pjabatöködöja, dötölödö wajwibadödanö ichejekwadöja chömöledö.

⁵ Isabenö 'wi̧inö kwöbaduwitjö̧ma, otiwo jö̧a̧lena chömöledö, 'wi̧inö yö̧ba̧lökönö kwö̧jaduwitjö̧ma, waisanö omukwatadödanö kwichejekwaduwena.

⁶ Babe ötjö yöta̧li̧ kwa̧ja̧kwaduwobö jo̧be chömöledö, ötjö chö̧ji̧ jawa labebö lobö yötawonö, kwa̧ja̧kwaduwo.

⁷ —Tajawedö omöna yöka̧laduwobeda chömöledö? Diosnö pjakataduwotö jö̧ba̧lö, omöna jawa yöka̧laduwobeji̧?

⁸ Wanedö yötawa, lȩekwa luwo̧ öba a'o ja̧nö, jweinö yöka̧laduwo jö̧ka̧laduwijayonö, Diosnö pjakataduwotö jö̧ba̧lö omöna yöka̧laduwobeji̧?

⁹ Kwedaduwemi, jejenö omöna yöka̧laduwiökwe, Dios öba a'otjö wene jwiinö kwö̧jaduwenaji̧? Kwedaduwemi, jojodö omöna yöa̧lakwawa wajwibö tjösödi̧danö, Diosbi omöna yöka̧laduwi̧ a̧ja̧kwö, –Isabenö yötja̧la, –jö̧ba̧lö, omöna yöka̧laduwi̧ ösödenaji̧?

¹⁰ Ja̧maökö chömöledö, baikwö yötawaduwakwö, Diosnö pjakataduwotö jö̧ba̧lö omöna yöka̧laduwitjö̧ma, isabenö öpöjödakwo̧ chömöledö. Jau chömöledö, ju'wedö wajwitjonö omöna yöka̧laduwijayonö, omöna yöka̧laduwi̧ öwaisakwo̧ Diosma, ja̧danö omöna yöka̧laduwiökwe, isabenö ökwödönö jwebebö, –Omöna yöka̧laduwa, –jö̧ba̧lö lȩebakobe.

¹¹ Jau chömöledö, iteda ujulu i̧sebö, yekaibaduwanö i̧sȩbakobe, isabenö i̧sȩbi̧ edö, jwiinö yekaibaduwakobe chömöledö.

¹² Isabenö mikwawökö ji̧ ökwödö yöka̧laduwi̧ma chömöledö, –Waisanö yöba̧ladösa, –jö̧ba̧lö yöka̧laduwi̧jayonö, mikwawökö ji̧ yöka̧laduwi̧ma, ökwölaso̧pjadanö mikwawökö ji̧ chömöledö. Ja̧danö, –Otiwanö Diosnö tjöbeba̧lö yöba̧ladösa, –jö̧ba̧lö kwomukwataduwijayonö, tjökeba̧laduwi̧ma sule lete'otjö otikwa tjöekwemidanö ichejekwobe chömöledö, otiwanö tjöbeböködöja.

^13-14 —Jo̧kwajabetjö̧ baikwö wetaduwakwö chömöledö, yöta̧lonö, 'wi̧inö ba̧duwi. Jweinö yebabökönö yöta̧locha, –Labi, jejenö yöka̧litjö̧ma Dios lȩebena, –jö̧ba̧lö kwomukwataduwijayonö, yayonö jweinö yöta̧locha, ja̧danö jejenö yöta̧liökwe, Dios öpöjödö, ötjönö lȩebitjö̧ma, otiwa, yöta̧li̧ öpöjöditjö̧ma, isabenö ötjönö lȩebobö otiwa.

¹⁵ Jau chömöledö, yöta̧li̧ öpöjödö kwabö loena Diosma, jo̧kwaijayonö yayonö jo̧banö ösödö, jweinö yöta̧locha. Jweinö döbabiyakwena jo̧banö yöba̧lö, chö̧ji̧ jawa labebö lobö yöta̧lobö chösöda, –Isabenö kwöpöjödi̧nö ja̧bö̧kö̧sa, –jö̧ba̧lö.

¹⁶ Sulabedö Diosnö öpöjödadöma la'akatjöda Dios öba a'o tjichiboböma jö̧ba̧löködö, ja̧danö sulabo̧ chö̧jitjö̧ma, jo̧ba öba a'o ichibö yöta̧lakwawobö chöpöjödena. Jo̧kwaijayonö jejenöbö̧kö̧sa ötjöma, jo̧kwajabetjö̧ chedemi Dios öba a'o ichibö, labebö lobö yöta̧liökwe, isabenö chö̧jibinö pjaatena, —jö̧ba̧lö atadinobe Jobma, ömöledönö.

Job Diosnö aebina jawa

¹⁷ Tupakwö yöa̧linobe Jobma, Diosnö abebö: —Chuluwo̧, otiwanö yöta̧li̧ kwa̧ja̧kwobö atebakwö, labebö lobö yöta̧lonö, kwölakiyunö kwa̧ja̧kwobö atebakwö.

¹⁸ Jau chuluwo, otiwanö teada̧lönö ökwönö labebö lobö yöta̧lakwa̧ jawa omukwatö chujunajabe, jadanö chöwaisa, yöta̧laja̧ a̧ja̧kwajo̧, ökwöbi yöka̧lakwo̧ja, –Isabenö Jobma sulabenö ja̧binö̧kö̧, –jö̧ba̧lö.

¹⁹ Yöta̧laja̧ a̧ja̧kwö, bakwo̧bi, –Omöna, –jö̧ba̧lö i̧sȩbenaji̧? Chedemi jweinö yöba̧lo̧sa, jo̧kwajabetjö̧ bakwo̧bi deakobe, –Omöna, –jö̧balö i̧sȩbakwo̧ma, jo̧kwaijayonö bakwo̧ jejenö i̧sȩbobö ji̧tjö̧ma, chusula waisachibajo̧, 'wi̧inö babibö ö'wö batibakwo̧sa, –Isabenö sulabo̧sa, –jö̧ba̧lö.

^20-21 —Chuluwo̧ Dios, labinö lȩkebi̧tjö̧ kwöba a'otjö yebabinö ju̧kwawo̧sa, jo̧kwajabetjö̧ dötölataja jawa atebakwö, baikwö: Ötjönö inesö lȩkebi̧ kakatibobö atebakwö, ja̧danö kwöba a'otjö jwiinö yetaibapji jö̧ba̧lö chujuluwachibanö pjakatobö atebakwö, ju̧kwawökönö kwöba a'otjö chö̧jakobetjö̧.

²² Jemi ikenama, jwököbotjö, ja̧danö jwököbi̧tjö̧, chatadocha. Ju'wibi, kwösöditjö̧ma, ötjöda abönö yöta̧lena, ja̧danö yöta̧liökwe, kwatadena.

²³ Yökawobö atebakwö chuluwo̧, okobe jwiinö kwöba a'otjö sulabenö ja̧tinama, kwöpöjödi̧nö sulabenö ja̧tina jawa yökawobö atebakwö. Isabenö kwöba a'otjö sulabenö ja̧tinatjö̧ma, jweinö sulabenö ja̧tina yökawobö atebakwö, chusula chöwaisachibakobetjö̧.

²⁴ —Chuluwo̧ Dios, tajawedö ötjönö le'dedö lobö, atebi̧ kwa̧ja̧kwokobeda? Tajawedö kwöpöjojo chö̧jobedanö kwi̧sȩbobeda?

²⁵ Ötjöma isabenö mikwawö̧kö̧sa, towisöja, jwa̧le'epjo e'ewiböjadanö, ja̧danö trigo sula'wo kököa'wodanö mikwawö̧kö̧sa, tajawedö ötjönö lubö, usula chemawinö lȩkebobeda chuluwo̧?

²⁶ Jau chuluwo̧, ötjönö kwiyalu'yenö kwi̧weyudobedanö ichejekwa, –Jobma baikwö baikwö sulabenö ja̧bö jo̧, –jö̧ba̧lö, damötjö̧ tjemuchayi sulabenö ja̧tina jawabi babe ötjönö lȩkebobedanö ichejekwa chuluwo.

²⁷ —Otiwanö kwetachapji jö̧ba̧lö, chömasapiya yö̧bebö kwödajabe ichejekwa, ja̧danö okobe jwiinö kwetachi̧tenia kweda̧lobedanö ichejekwa, wanedö yötawa, chö̧ja̧tajemitenia eda̧lö kwö̧jobedanö ichejekwa, chusulatenia kwöbadekwajakobetjö̧.

²⁸ Ja̧danö, jejenö ja̧köbi̧tjö, chiteba'o 'doloökwesa chuluwo̧, kamiji̧do̧ pjȩlebö suli̧ tjöwaedaja̧do̧danö ichejekwökwesa chuluwo̧, tajawedö ötjönö kwöpöjödobeda chuluwo Dios, —jö̧ba̧lö yöa̧linobe Jobma.