Diosnö ösödo̧ Job mikwo̧ usula emawina jawa 12 - Dios Iwene

Zofar yöa̧lökwe, Job atadina jawa

¹ Zofar jejenö yöa̧lökwe, Jobma atadö yöa̧linobe:

² —Kwedaduwemi, ökwödödaja, waisanö omukwatadöma, jadanö debö kwi̧'yaduwaja̧ ikenama, waisadö deena bö̧jenöma, jö̧ba̧lö.

³ Jo̧kwaijayonö ökwödödamaökö. Isabenö ötjöbi otiwanö chomukwatobö waiso̧sa, ökwödötjö baikwönönö bö̧kö̧sa ötjöma. Ökwödö yöka̧laduwaja̧ jawama, okobe deinö tjöwaisi̧ jawa, ökwödödamaökö.

⁴ —Chömöledö sulabenö obö yötja̧lökwesa babema. Ötjöma Diosnö ösödö, ba̧kwelöjatebö jo̧banö abebinasa, jadanö atebiökwe, Dios atadiniökwesa. Isabenö Dios öba a'otjö wene jwibo̧, otiwanö ja̧bö jo̧sa, jo̧kwaijayonö yayonö ökwödö chömöledö obö yöka̧laduwökwesa batibajabe.

⁵ Ökwödö wene jwiinö ju̧kwadöma, wene juna̧ladönö obö omukwatadöja, –Wene tjujuna̧li̧ma, idöda jawa, sulabenö ja̧bö tjö̧jobetjö̧, wene juna̧ladö. Otiwanö ja̧bö tjö̧jitjö̧ma, wene tjujuna̧loko jö̧tja̧lajabe, –jö̧ba̧lö obö omukwatadöja.

⁶ —Ökwödöma sulabenö ja̧badönö omukwatadöja, jwaikwöda usula emawadö, jö̧ba̧lö, jö̧tö? Jo̧kwaijayonö ja̧maökö, baikwö labebö lobö yötawa: Jojodönö mebibö naukwabidö, Dios öpöjödi̧ jawa sulabenö jabadöma, sulabenö ja̧tjijayonö yayonö wene jwiinö ju̧kwadö tjejunö, jö̧tö? Diosnö omukwatökönö, idöda tjujuluda tjo̧'wo tjöwana̧lijayonö, yayonö wene jwiinö ju̧kwadö tjejubiyanö chömöledö. Ökwödöma yöba̧ladöja, Diosma ba̧kwelöjatebö sulabenö ja̧badönö lȩbebo̧, jö̧ba̧lö, jo̧kwaijayonö ökwödö yöka̧laduwi̧danömaökö.

^7-9 —Kwedaduwemi, babe wene chöbaledi̧ma, ötjöda jawa, jö̧ba̧lö, jo̧kwaijayonö ja̧maökö, baikwö yötawa: Tebonö ju̧kwadöbi, mönö köba̧ladö pji̧yu̧bi, bö̧jȩnö pokwi̧bi, jwaibalawanö ju̧kwadö ba̧ibi waisadö, ötjönö baledi̧ma, Isabenö Jo̧ weobetjö̧, baledobe jö̧ba̧lö. Jobadönö abebö kwa̧ja̧kwaduwitjö̧ma, yötjawo jö̧tja̧lena, ökwödönö tjö̧ba̧ja̧do jö̧tja̧lena, jobadöma okobe deinö isabenö tjöwaisobetjö̧, –Diosda weobetjö̧ baledajabe, –jö̧ba̧lö.

¹⁰ Jau chömöledö, Diosda okobe deinö bö̧jȩnö ju̧kwadö tjö̧ji̧ jawa webo̧, jo̧bada okobe deinö jojodönö iyo̧, tjo̧'wo emapjo tjemakobetjö̧, jö̧tö? Ja̧danö öwawinö öwawobe, ötjönö baledi̧ma Diosda weobetjö, baledökwesa, jö̧ba̧lö.

¹¹ —Baikwö wanedö yötawa: Kwakwawa söinö 'dö̧ekwojobö jö̧ba̧lö, jojodöma tjinenenö 'dȩbawö edadö, jö̧tö? Tjölakiyubi ja̧danö chömöledö, tjölakiyunö jojodö yötja̧li̧ a̧ja̧kwö waisadö, otiwanö yötjawojobö, sulabenö yötjawojobö jö̧ba̧lö.

¹² Ja̧danö, yöka̧laduwaja̧danö, damöma isabenö waisanö omukwatadö tjö̧jobe, ja̧danö lekwe möle tjö̧jajabetjö̧, okwa jawa tjöwaisachibobö waisadö.

¹³ Jo̧kwaijayonö isabenö waisanö omukwatö jo̧ma, Diosda. Jo̧bada isabenö juluwo̧ma, jo̧bada waisanö lȩekwa waiso̧ma, ja̧danö jo̧bada okobe jwiinö okwa jawa waisanö omukwato̧ma.

¹⁴ —Isabenö juluwo̧ Diosma, baikwö yötawa: Diosma ju'wi jaye söbebö loitjö̧ma, bakwo̧bi yemidanö otidobö jwiobe. Ja̧danö Diosma bakwo̧nö 'dö̧yatö ödajökwenö, bakwo̧bi ejatobö jwiobe.

¹⁵ Dios ojwe öibobö weenama, kököachibobe ojwebiyama, ja̧danö ojwe okwatobö weenama, niji ba̧kwemeachibanö okwatibobe.

¹⁶ —Diosda isabenö juluwo̧ma, ja̧danö isabenö waisanö omukwato̧ma, jo̧bada okobe deinö omöna yöba̧ladö tjuluwo̧ma, ja̧danö ju'wibi okobe deinö omöna yötja̧lawö̧ tjuluwo̧bi jo̧ba Diosda.

¹⁷ Diosda lȩekwa waisadö tjöwaisi̧ 'döbebö lobo̧ma, wajwibadö batjibanö, ja̧dano jo̧bada lȩekwa luwedönö balewö lobo̧, wajwibö omukwatadö batjibanö.

¹⁸ Jo̧bada inesö la'aka luwedö tjujulu 'döbebö, ju'wedö tjömöayedö batjibanö webo̧ma.

¹⁹ —Diosda ö'weje pjabatadö 'dutjawi̧ 'yobebö lobo̧ma, jo̧kwadabedö batjibanö, ja̧danö lekwe möle la'aka luwedö ji̧nadö tjujulu söbebö lobo̧ma Diosda.

²⁰ Ju'wedö, –Bidöma waisanö yöbawadö, –jö̧ba̧lö tjo̧'wo tjöwana̧lawö̧nö, yöba̧löködö batjibanö webo̧ Diosma, ja̧danö waisanö omukwatadö damöbedö wajwibö tjomukwatobö webo̧ma Diosda.

²¹ —La'aka luwedönö, ju'wedö –Bidöma mikwawöködö, –jö̧ba̧lö tjöpöjödobö webo̧ Diosma, ja̧danö juluwadönö, tjujulu jwibadö batjibanö webo̧ma Diosda.

²² Jojodö ajayinö wajwitjina jawa, yȩa'wo ji̧ jawa tjöwaisachibobö webo̧ Diosma, ja̧danö inesö yȩa'wo okwa dejato̧ma Diosda.

²³ Diosda tjitebosasokwena juluwaso batjibanö kabebö juno̧ma, ja̧danö juluwaso juluwököso batjibanö webo̧ma Diosda. Diosda tjitebo niji jalöjȩ baibanö webo̧ma, ja̧danö tjitebosaso jojodönö tjipjelekwachinö webo̧ma Diosda.

²⁴ Diosda bö̧jȩ la'aka luwedö waisanö tjomukwati̧ 'döbebö lobo̧ma, ja̧danö jojodö deobe, mana jwiobe le'dewö kwetjachobö webo̧.

²⁵ Jejenö weiawö̧, dewi̧ jwiinö yȩa'wo okwa diwanö kwebachadö, ja̧danö 'dukwachawö̧ tötöbö kwetjachi̧danö kwebachadö, Diosda jejenö weobetjö̧, —jö̧ba̧lö yöa̧linobe Jobma.