Diosnö ösödo̧ Job mikwo̧ usula emawina jawa 11 - Dios Iwene

Zofar Jobnö wajwibö yöa̧lina jawa, isabenö sulabenö ja̧bo̧ja, jö̧ba̧lö

¹ Job yöa̧liökwe, Namat niji jojo Zofar mikwo̧ma öpöjödö atadinobe baikwö:

² —Bakwo̧ nöinö yöa̧litjö̧ma, jelo̧ atadobö jwienaji̧? Bakwo̧ nöinö yöa̧liawö̧, –Bitema isabenö wene jwibo̧, –jö̧ba̧lö tjomukwatobö jȩnaji̧?

³ Ökwöma nöinö mikwa jwii̧ jawa yöka̧li̧tjö̧, 'wiinö dö̧bobö jȩnaji̧? Sulabenö obö yöka̧litjö̧, bakwo̧bi atadö jweebobö jwienaji̧? ¡Ja̧maökö!

⁴ Ökwö yöka̧laja̧, –Bakwainö otiwanö yöbawo̧sa, Dios öba a'otjö wene jwibo̧sa, –jö̧ba̧lö yöka̧lajabe Job, jo̧kwaijayonö omöna.

⁵ Jejenö yöka̧li̧tjö̧, Diosda ökwönö atadobö chösöda. Sulabenö yöka̧liökwe, Diosda atadö jweebobö chösöda.

⁶ Okobe jwiinö waisanö omukwato̧ Diosma Job, jo̧kwajabetjö̧ jo̧bada ökwönö ataditjö̧ma, waisanö omukwatakwawa okwa jawa labebö lobö yöawena. Ja̧danö, baikwö yötawakwö Job, –Wene jwibo̧sa —jö̧ba̧lö yöka̧lajayonö, isabenö wene juna̧lo̧ja, ja̧danö, –Nöinö lȩebökwesa, –jö̧ba̧lö budekwö yöka̧lijayonö, ja'yubeda Dios lȩebökweja. Sulabenö ja̧köbiökwe, isabenö babe lȩebi̧tjö̧ bajalekwönönö labinö ökwönö lȩebobö jo̧be.

⁷ —Isabenö Dios öwaisi̧tjö̧ baikwönönö wajwibo̧ja Job, baikwö yötawa: Dios jawa, ju'wedö wajwitji̧ jawama, ökwö kwöwaisachibobö kwujuna̧lobeji̧? Okobe jwiinö juluwo̧ Dios ujulu, dokwa nöinö ujuluwojobö jö̧balö kwöwaisachibobö kwujuna̧lobeji̧?

⁸ Ja̧maökö Job, Dios jawama, yelösöda nöinö jo̧be, tjöwaisachibökenanö, baikwö wanedö yötawa: Dios jawama, mölȩjȩbetjö bajalekwönönö möi̧, ja̧danö wobinadö tjö̧jemitjö bajalekwönönö okwa ji̧,

⁹ ja̧danö bö̧jȩ bajaletjö tupakwönönö ji̧, ja̧danö jwaibalawatjö bajalekwönönö jalobe ji̧, okobe jwiinö Dios jawa tjöwaisachobö jwii̧, la'akatjöda.

¹⁰ —Jau Job, Dios ichibö, ju'wedönö ka̧lena öditjö̧ma, ja̧danö lödajo̧, lȩekwa luwedö tjöba a'o ujunitjö̧ma, bakwo̧bi tjöbeba̧lö, –Bidönö lȩkeboko, –jö̧ba̧lö bakwo̧bi tjöbeba̧lo̧ ö̧jȩnaji̧? Deobe.

¹¹ Jau Job, Diosma waiso̧, sulabedö mikwawöködönöma, jadanö bakwo̧ sulabenö ja̧i̧ edenama, sulabenö ja̧aja̧ omukwatö, lȩebökenaji̧? Isabenö lȩebena.

¹² Ja̧ wene omukwatö, jweinö kwomukwato jö̧ka̧lajabe Job, jo̧kwaijayonö wajwibö sulabenö omukwato̧ja, baikwö wanedö yötawa: Tebonö ju̧kwadö bulu̧dö tji̧tji̧munö tjemenama, jojoso̧nö tjemenaji̧? Bulu̧döma la'akatjöda jojodönö emöködö, jö̧tö? Ja̧danö, ökwö wajwibö sulabenö kwomukwati̧danö omukwatadöma, la'akatjöda waisanö omukwatadö babiböködö.

¹³ —Isabenö sulabenö kwomukwati̧ kabatibö, kwöbalewacho Job, ja̧danö balewachajo̧, Diosnö akebo.

¹⁴ Sulabenö ja̧köbi̧ kakatibo Job, ja̧danö ju'wedö kwejunö ju̧kwadöbi sulabenö ja̧tjoböma weköboko.

¹⁵ Jejenö yöta̧laja̧danö otiwanö ja̧köbitjö̧ma, tabakwökönö kwa̧la̧ibobö jȩna Job, ja̧danö isabenö yebabökönö, 'diinö kwö̧jobö jȩna.

¹⁶ —Jau Job, yötawaja̧danö ja̧köbitjö̧ma, isabenö otiwanö kwö̧jakwo̧ja, babe usula kwemawi̧ jawa kwo̧'wo jwiköbenanö baibanö. Kwöwaisa, juluwanö tjo̧'wo jwibibadö jojodöma, tjöba a'o ojwe isuwajobuma, jö̧tö? Ökwö usula kwemawi̧bi ja̧danö, jwiinö otiwanö kwö̧jakobetjö̧, juluwanö kwo̧'wo jwikibakwo̧ja, babe usula kwemawi̧ma.

¹⁷ —Jau Job, isabenö otiwanö kwö̧jakwo̧ja, baikwö wanedö yötawa: Jawo̧ jweinö ö̧jena dewi̧tjö bajalekwönönö otiwanö dewemi kwö̧jakwo̧ja, la'akatjöda yȩa'wo kwöjökakwo̧ja, baikwö yöta̧la, kwö̧ji̧ yȩi̧ma, sule yȩayi̧ yȩi̧danö yȩena, ja'yubeda yȩena, isabenö otiwanö kwö̧jakobetjö̧.

¹⁸ —Jau Job, isabenö yötawaja̧ otiwanö kwa̧ja̧kwitjö̧ma, isabenö otiwanö wene jwiinö kwö̧jakwo̧ja, –Isabenö Dios pjaatökwesa, –jö̧ba̧lö. Isabenö otiwanö pjaatobetjö̧, wene jwiinö kwotidaja̧tjö̧ kwö'wachena.

¹⁹ Kwabobö kwöbamatenama, bakwo̧bi ökwönö yekaibobö ja̧ökakwo̧, ja̧danö ba̧jȩkwadö kwö̧jobekwö tjichakwedö, –Kwömöledö dö̧jobö ösödadösa, –jö̧ba̧lö.

²⁰ Jejenö baledakobe Job, yötawaja̧ otiwanö kwa̧ja̧kwitjö̧ma, jo̧kwaijayonö jejenö baledökakobe, sulabedönöma. Jobadöma tjöbajale tjewawadö batjibanö tjö̧jakwedö, ja̧danö Dios lȩebi̧tjö tjö̧jibobö jwitjakwedö. Jobadöma jwiinö usula tjemawakwedö, –Ökwödöwe, debö di̧'yobe, –jö̧ba̧lö omukwatö tjö̧jenanö, —jö̧ba̧lö yöa̧linobe Zofarma.