Diosnö ösödo̧ Job mikwo̧ usula emawina jawa 10 - Dios Iwene

Job tupakwö o̧'wo sulinö Diosnö ubudekwina jawa

¹ Tupakwö yöawinobe Jobma: —Ötjöwe, tupakwö bejenö chö̧joböma chöpöjöda. 'Wiinö chö̧jökakwo̧sa, cho̧'wo suli̧nö ja̧nö, labinö yöta̧lakwo̧sa, –Sulabenö ja̧tinököjayonö, usula emawo̧sa, –jö̧ba̧lö.

² Jau, Diosnö yöta̧locha, –Labebö lobökönö, sule Letebakwö jö̧ba̧löma lȩkeboko, jweinö labebö lobö yökawo kwöba a'otjö sulabenö ja̧taja̧ma, -Bejenö sulabenö ja̧köbi̧tjö̧ lȩtebakwö, -jö̧ba̧lö.

³ Jau chuluwo Dios, ötjöma ökwöda kwotidinökwesa, kwedemi ötjö kwotidinökwenö usula chemawinö weköbobö otiwobeji̧? Bejenö kwotidinökwenö, mikwawö̧kö̧ jö̧ba̧lö kwöpöjödobö otiwobeji̧? Ötjönö pjabatökönö, sulabedönöda pjakatobö otiwenaji̧, jobadö sulabenö tjösödi̧danö baledakobetjö̧?

⁴ —Ökwö kwöbajalebiyama, bö̧je jojodö tjöbajalebiyadanö kwujuna̧lobeji̧? Wamenöda dedi̧danö, sule wamenöda kwedobeji̧?

⁵ Ökwöma bö̧je jojodö lekwökönö tjö̧ji̧danö, lekwe jö̧kö̧köbobeji̧?

⁶ Ja̧maökö chuluwo̧ Dios, jejenöbö̧kö̧ja ökwöma, jo̧kwajabetjö̧ baikwö abebö cha̧ja̧kwakwö: Tajawedö wene chujuna̧li kwisakwobeda? Tajawedö sulabenö ja̧tinojobö jö̧ba̧lö kwisakwobeda?

⁷ —Ökwöma ida̧ökö edö waiso̧ja chuluwo̧, isabenö sulabenö ja̧binö̧kö̧ chö̧jima, ja̧danö ju'wibi kwujulutjö chö̧jibanö pjabato̧ma deobe jö̧balö waiso̧ja chuluwo̧, jo̧kwajabetjö̧ abebö cha̧jakwakwö, tajawedö ina chusula kwisakwobeda?

⁸ —Ötjöma ökwöda kwömamunö kwotidinökwesa chuluwo, ja̧danö ökwöda ötjönö kwotidinajayonö, babema jwiinö ötjönö söbebö loköbobö jö̧ka̧liji̧?

⁹ Kwomukwatibobö atebakwö chuluwo̧, lete'otjö kwotidinobe ötjönö, jö̧tö? Babema yemidanö nijiso̧pja̧ batibanö loköbobö kwomukwatobeji̧?

¹⁰ Ökwöda chojo'do metu'wo bajibobö weköbijatö, jadanö jukwa'wo okwa chö̧jonö, ökwöda dadö kwotidinobe ötjönö, jö̧tö?

¹¹ Ökwöda chi̧sȩdo̧bi, chitebiyabi, chiwe'ijubi, chö̧lö̧bö'dabiyabi bakobe otidinaja chuluwo̧.

¹² Ökwöda 'yata̧lobö webinaja chuluwo̧, ja̧danö ökwöda jwaikwöda ötjönö ösödö, cho̧'wo luwo̧nö kwiteada̧lijatö chuluwo̧.

¹³ —Jobekwö pjabatinaja̧ chuluwo̧, ja̧danö tupakwö suli̧ kwöwaedakwa̧ tojö kwujuninobe chuluwo̧, babe usula chemawinö weköbakwa̧ma. Jau chuluwo̧, chöwaisa, la'akatjöda bejenö ötjönö ja̧köbobö omukwatinaja.

¹⁴ Sulabenö ja̧takwojobö jö̧ba̧lö edo̧ja chuluwo̧, ja̧danö sulabenö ja̧titjö̧ma, sulabenö ja̧taja̧ söbebö lobökönö, jwaikwöda lȩbebo̧ja chuluwo.

¹⁵ Jau, sulabenö ja̧bo̧ chö̧jitjö̧ma, ötjöwe, isabenö lȩkebi̧tjö chö̧jibobö jwiena. Jo̧kwaijayonö, sulabenö jatinökötjö̧bi, yayonö usula emawö tabakwö jo̧sa. Jau chuluwo̧, isabenö usula emawö chö̧ji̧ edö, tabakwö jo̧sa babema.

¹⁶ —Chuluwo̧ Dios, tabakwö jo̧sa. Tabakwökönö ja̧nö, isabenö sulabenö ja̧binö̧kö̧sa jö̧ba̧lö chö̧jitjö̧ma, didiba lui̧danö lubo̧ja ötjönö chuluwo̧, ja̧danö ökwöda inesö kwujulunö, labinö lȩbebo̧ja ötjönö.

¹⁷ Kabatökönö ju'wedönöbi, ju'wedönöbi kwöbadekwajobedanö ichejekwa, ötjönö –Jobma sulabenö ja̧bo̧, –jö̧ba̧lö yötja̧lakwedönö, ja̧danö ajayitjö bajalekwönönö ötjönö kwödameakwobe ichejekwa. Wanedö yötawa, ötjönö ölakwabikwawö, ba̧kwelöjatebö yabayedö ölakwabikwawadö weköbobedanö ichejekwa, ötjönö metjibakobetjö̧.

¹⁸ —Ötjöwe! Chuluwo̧ Dios, tajawedö chojo'do ötjönö jemobö weköbinada? Bakwo̧bi ötjönö edakwa̧ abönö, ö'wö batibinatjö̧ma otiwo jö̧a̧linena.

¹⁹ Jau, babe chö̧jitjö̧ bajalekwönönö otiwo jö̧a̧linena, chojo'do jukwa'wotjö jweinö wobiakobe chi̧'yobö, la'akatjöda 'yata̧linökötjö̧ma otiwo jö̧a̧linena.

²⁰ Chuluwo̧ Dios, ötjö chö̧ji̧ma, lekwökönö chö̧jakwo̧sa, juluwanö debö chi̧'yakwo̧sa, jö̧tö? Jo̧kwajabetjö̧ atebakwö, ötjönö lȩkebi̧ kakatibobö, debö chi̧'yakwa̧ abönö ja'yubenö cho̧'wo ösöwachibakobetjö̧.

^21-22 —Jau chuluwo̧, debö chi̧'yaja̧ ikenama, la'akatjöda tjetachökakwo̧sa. Juluwanö wobadö tjö̧jemibe chi̧'yakwo̧sa, yȩa'wo jȩmi nijibe. Jobema jwiinö yȩa'wo jȩmi, ja'yubebi dewi̧ jwiemi, ja̧danö jobe chi̧'yakwa̧ abönö, ja'yubenö cho̧'wo ösöwachibobö atebakwö, —jö̧ba̧lö yöa̧linobe Jobma.