Diosnö ösödo̧ Job mikwo̧ usula emawina jawa 1 - Dios Iwene

Job ö̧jina jawa

¹ Uz nijinö bakwo̧ ö̧jinobe, Job mikwo̧ma. Jobma otiwanö wene jwibo̧ ö̧jinobe, Dios ösödi̧danö ja̧bö ö̧jinobe. Otiwanö yebabinö omukwatö ösödinobe Diosnö, ja̧danö jwaikwöda suli̧ jawa öpöjödö ö̧jinobe, Dios öpöjödi̧ jö̧balö.

² Jo̧ba Jobma itji̧mu ömadönö jelemutjö du̧ju̧tajanö ujuna̧linobe, jadanö itji̧mu ya̧dönö wamedukwanö ujuna̧linobe.

³ Ju'wibi ba̧jȩkwadö a̧jwi̧munö ajikwinobe Jobma, obejadönö siete milbedönö ajikwinobe, ja̧danö camellodönö tres milbedönö ajikwinobe, ja̧danö pakayadönö milbedönö ajikwinobe, ja̧danö buludönö, quinientasbedö ya̧dönö ajikwinobe. Ju'wibi yelösöda ba̧jȩkwadö iteda ömöayedönö ujuna̧linobe Jobma. Okobe deinö jawo̧ laebobekwö ju̧kwadötjö, Jobda ju'wedötjö bajalekwönönö luwo̧ ö̧jinobe, isabenö nöinö ujuna̧linobetjö̧.

⁴ Job itji̧mu ömadöma, o̧bakwena, bakwo̧nökwena ba'ali juniatjinobe idöda tjejunö, ja̧danö yöne tjö̧jawodö ömadönöbi, ya̧dönöbi a̧debiatjinobe, ichö jobadökwö ba'ali kwanöbi, owöbi tjujunobö.

⁵ Jejenö ja̧biatjinobe Job itji̧muma, ja̧danö ba̧kwelöjatebö ba'ali tjujuni̧ mölebiya 'dö̧ibajenama, ikena möle ina yeayi a̧la̧ibinobe Jobma, ja̧danö itji̧mu bakwo̧nökwena tjusula dichö lootö jö̧ba̧lö, iyawa bakwonökwena kwabö juwö, jwiinö ubinö iyawa baibanö iyinobe Diosnö. Jobma omukwatinobe itedada, —Chitji̧muma Dios öpöjödi̧nö sulabenö ja̧tja̧jena, ja̧danö tjomajadenö sulabenö Diosnö tjomukwatajena, —jö̧ba̧lö omukwatinobe, ja̧danö jejenö omukwatö, iyawa kwabö juwö iyiainobe Diosnö, —Chitji̧munö tjusula söbebö loköbobö atebakwö, —jö̧ba̧lö.

Awetja Jobnö yöa̧lina wene, Omöna, isabenö Diosnö ösödö̧kö̧ Jobma, jö̧ba̧lö

⁶ Ja̧danö, ju'wi möle baikwö baledinobe: Okobe deinö Dios ömöayedö angeledö Isabenö Jo̧ Dios öba a'o tjo̧ko̧ko̧kwinobe, tjuluwo̧ öba a'o tjo̧ko̧ko̧kwobö, ja̧danö ju'wibi Awetjama jobadökwö ichinobe.

⁷ Jejenö ichibiökwe, Isabenö Jo̧ma Awetjanö abebö a̧ja̧kwinobe, —Detjö kwichaja̧da? —jö̧ba̧lö. Isabenö Jo̧ abebö a̧ja̧kwökwe, —Bö̧je ba̧kwemeachibanö kwetachajabe, bö̧jetjö baledi̧ jawa eda̧lö, ja̧danö jelobebi, jelobebi kwebachajo̧ chichajabe, —jö̧ba̧lö atadinobe Awetjama.

⁸ Atadökwe, Isabenö Jo̧ma Awetjanö abebö a̧ja̧kwinobe: —Jobe bö̧jȩ kwebachö kwö̧jonö, chömöayo̧ Jobnö kwedaji̧? Bö̧jȩ ba̧kwemeachibanö ju̧kwadötjö, bakwo̧bi Jobdanöbo̧ma deobe, jö̧tö? Jau, Jobma isabenö otiwanö wene jwibo̧, Dios ösödi̧danö ja̧bö jo̧, ja̧danö Diosnö yebabinö ösödo̧, ja̧danö suli̧ jawa öpöjödö kabatibo̧, –Suli̧, Dios öpöjödi̧, –jö̧ba̧lö, jö̧tö? —jö̧ba̧lö abebö a̧ja̧kwinobe Awetjanö.

⁹ Abebö a̧ja̧kwökwe, Awetjama atadinobe Isabenö Jo̧nö: —Yöka̧lajadanö ökwönö yebabinö ösödo̧ Jobma, jo̧kwaijayonö ja̧ ökwönö ösödi̧ma sule jo̧banö pjakatobetjö̧ ösödo̧.

¹⁰ Jau, isabenö nöinö Jobnö pjakatajabe, otiwanö tjöekwi̧danö Jobnö tjökeba̧lajabe, Jobnöbi, ömöledönöbi, ju'wi ujuna̧li̧bi suli̧ tjöwaedapji jö̧ba̧lö. Isabenö okobe jwiinö otidi̧tenia otiwanö pjakatajabe, ja̧danö jejenö pjakatökwe, nöinö junalo̧ baibajabe.

¹¹ Jejenö pjakatökwe, isabenö ökwönö ösödo̧ Jobma, jo̧kwaijayonö ösödi̧ma sule wamenöda ösödo̧, baikwö yötawa: Babe otiwanö ujuna̧li̧ma, okobe jwiinö 'döbebö kwemitjö̧ma, ökwönö öpöjödena, ja̧danö ökwönö öpöjödö, kwöba a'otjö sulabenö yöawena, –Diosma sulabo̧, chöpöjödökwe, –jö̧ba̧lö. Ökwönö ösödi̧ma, okwa jawamaökö, sule wamenöda ösödo̧ Jobma, —jö̧ba̧lö atadinobe Awetjama.

¹² Atadökwe, Isabenö Jo̧ma yöa̧linobe: —Yöka̧lajadanö wamenöda ösödojobö kwedo. Okobe jwiinö Job ujuna̧li̧ ökwö kwujuluwobö chiyakwö Awetja, yöka̧laja̧danö baledakwojobö jö̧ba̧lö. Ökwöda kwösödi̧danö okobe jwiinö ujuna̧li suli̧ kwöwaedobö wetakwö, jo̧kwaijayonö Jobnö suli̧ kwöwaedoböma wetökö, —jö̧ba̧lö atadinobe Isabenö Jo̧ma. Ja̧danö atadökwe, Awetjama Isabenö Jo̧ öjelö laebinobe, Jobnö sulabenö ja̧akobetjö̧.

Awetja Job ömöledönöbi, iteabi 'döebina wene

¹³ Jemi ikenama, baikwö baledinobe: Ju'wi möle okobe deinö Job itji̧mu ömadöbi, ya̧döbi, abönö pöe ejutjö kwanöbi, ubasobu o̧'do̧bu owöbi, ba'ali tjujuninobe.

¹⁴ Ja̧ möle bakwo̧ yöbawo̧ma Job öba a'o ichibö yöawinobe, —Ayö, chuluwo̧, kwömöayedö kwajwimu pakayadökwö batjo sobö tjotidatö, ja̧danö jobe tjipjeanö, buludöma meje'ye tjukwatö,

¹⁵ jo̧kwaijayonö jejenö tjö̧jemi ja'ötjö, Saba niji jojodöma metjibajabeta. Okobe deinö kwajwimunö tjönaukwajabeta chuluwo̧, ja̧danö okobe deinö kwömöayedönö dȩdȩbö lotjajabeta chuluwo̧, ji̧bajo̧ma ötjödasa, jadanö ökwönö yöbawö chichajabe chuluwo̧, —jö̧ba̧lö yöawinobe.

¹⁶ Ja̧danö jo̧ba ina yöawonö, jelo̧ yöbawo̧bi ichibinobe, ja̧danö ichibajo̧ Jobnö yöawinobe, —Ayö chuluwo̧, Dios weaja̧ ökwöla mölejebetjö meajabeta, ja̧danö okobe deinö kwajwimu obejadöbi, obejadönö teada̧ladöbi ubö lotjajabeta. Okobe deinö jobadötjö, ji̧bajo̧ma ötjödasa, ja̧danö ökwönö yöbawö chichajabe chuluwo, —jö̧ba̧lö yöawinobe.

¹⁷ Ja̧danö jo̧ba ina yöawonö, jelo̧ yöbawo̧bi ichibinobe, ja̧danö ichibajo̧ Jobnö yöawinobe, —Ayö chuluwo, caldeo jojodötjö wapösokwa jojodöma ichibö metjibajabeta, ja̧danö okobe deinö kwajwimu camellodönö tjönaukwajabeta, ja̧danö okobe deinö kwömöayedönö dȩdȩbö lotjajabeta. Okobe deinö kwömöayedötjö ji̧bajo̧ma ötjödasa, ja̧danö ökwönö yöbawö chichajabe, —jö̧ba̧lö yöawinobe.

¹⁸ Ja̧danö jo̧ba ina yöawonö, jelo̧ yöbawo̧bi ichibinobe, ja̧danö ichibajo̧ yöawinobe, —Ayö chuluwo̧, kwitji̧mu ömadöbi, ya̧döbi kwanöbi, ubasobu o̧'do̧bu öwöbi ba'ali tjujunatö tjöpöe abönö pöe ejunö,

¹⁹ ja̧danö jejenö ba'ali tjujunemi ja'ötjö, ayö, jwa̧le'epjo jwiinö labinö jojodö deobetjö jwa̧le'ewatö, ja̧danö ba'ali tjujuneju labinö kwabibö meajabeta, o̧do jwiinö kwaibanö. Kwitji̧mu okwa tjö̧jonö, kwaibajabeta chuluwo̧, okobe deinö kwitji̧mu debö tji̧'yinö, ja̧danö okobe deinö jobe ju̧kwadötjö ji̧bajo̧ma ötjödasa, ja̧danö ökwönö yöbawö chichajabe, —jö̧ba̧lö yöawinobe Jobnö.

²⁰ Jejenö yötjawiökwe, Jobma jwiinö o̧'wo tjoachinobe, ja̧danö a̧la̧ibö ö̧kamijido̧ kȩ'ekwö loinobe, ja̧danö öwö'ye jwobawö loinobe, jwiinö o̧'wo tjo̧acho̧sa, jö̧ba̧lö. Ja̧danö, Dios öba a'o mebö bamatö, Diosnö ösödinobe,

²¹ —Chojo'do ötjönö jemenama, chitea jwibo̧nö jemijatö, ja̧danö ö'wö batibenama, chitea jwibö chȩwa̧jakwo̧sa. Chujuna̧linama, Isabenö Jo̧ chujuna̧lobö iyinobe, ja̧danö babe Isabenö Jo̧ma chujuna̧lina 'döebajabe. Isabenö Jo̧nö dösödobö jobe, –Otiwo̧ja, –jö̧ba̧lö, —Diosnö ösödö yöa̧linobe Jobma.

²² Jobekwö okobe jwiinö jobekwö baledijayonö, sulabenö ja̧inokobe Jobma, ja̧danö Diosnö öpöjödö yöa̧linokobe, —Diosma sulabenö ja̧bo̧, —jö̧ba̧lö.