Isaías 9 - Dios Iwene

Dios weakwo̧ jö̧a̧linökwe ö̧jakwa̧ jawa

¹ Jo̧kwaijayonö, ju'wi möle ajayinö tjo̧'wo tjo̧bekwö yȩa'wo okwa ji̧nadöma, tjo̧'wo tjobekwökönö tjö̧jakwedö. Jau, ajayinö Diosma nijakwönönö ujuninobe Zabulonsaso niji jojodönöbi, Neftalisaso niji jojodönöbi, tabakwö tjö̧jakobetjö̧, jo̧kwaijayonö löji möle tabakwö tjö̧jökakwedö. Ja̧ möle salöinö dewakobe ja̧ jwaibalawa ö'öbö niji, Jordan ojwetjö jawo̧ meajobekwö nijima, Galilea niji judio jojodöböködö tjö̧jemi ötjabemi nijima, baikwö yötawa ja̧ niji ju̧kwadö tjö̧jakwa̧ma:

² Jobadö yȩa'wo okwa kwebachinadöma inesö dewi̧ tjedajabe, ja̧danö Diosnö tjöpöjödinobetjö̧ jobe bakwaida yȩa'woda ji̧najayonö, jobadönö dewinö idejatajabe.

³ Israel jojodö tjitebosaso ba̧jȩkwaso baibanö pjakatajabe Dios, tjo̧'wo ösöwachibobö pjakatajabe. Jo̧kwajabetjö̧ kwöba a'otjö tjo̧'wo ösöwachibanö tju̧ju̧kwobe, —Otiwanö pjabato̧ja, —jö̧ba̧lö. Jau, batjo waji̧ e'dö tjemena tjo̧'wo ösöwachibi̧danö, ja̧danö tjöpöjojodönö juluwajadö, tjöpöjojodö tjiteaja̧ma 'da̧batö junö tjemena tjo̧'wo ösöwachibi̧danö, kwöba a'otjö tjo̧'wo ösöwachibanö ju̧kwadö.

⁴ Jau chuluwo̧, israel jojodo ömöki̧ jawa e'ewakwawö̧'a, tjuluwedö wetjinö̧'a ö̧sö̧'ama, 'debatö loköbajabe, ja̧danö tjuluwedö usula tjemawinö webadö tjitea ö̧sö̧'a kwakwaakwö̧'ama, 'debatö loköbajabe. Damötjö madianitas jojodö israel jojodö usula tjemawinö ja̧tjena pjakatinadanö, yemidanö otiwanö pjakatajabe chuluwo̧, jo̧kwajabetjö̧ kwöba a'otjö tjo̧'wo ösöwachibanö ja̧dö kwömöledöma.

⁵ Ja̧danö ju'wibi chuluwo̧, ajayinö jobadönö juluwinadö ölakwabikwawadö, jobadönö ja̧tö lobinadö tjitea sapatubi, tjitea kamiji̧do̧ tjökwösobutjö 'bȩkwinado̧bi, imisö̧'adanö baibanö ökwölanö juwö lotjobe chuluwo̧, jo̧kwajabetjö̧ kwöba a'otjö tjo'wo ösöwachibanö tju̧ju̧kwobe, —Döpöjojodötjö dö̧ji̧binö pjaatajabeta, —jö̧ba̧lö.

⁶ Jau chuluwo̧, isabenö tjo'wo ösöwachibanö ju̧kwadö kwömöledöma, bakwuju jitji̧nö jemajobetjö̧, duluwo̧ baibakwo̧ jitji̧nö jemajobetjö̧. Ja̧danö jo̧ba jemajökwema, isabenö duluwo̧ baibanö webö ö̧jakwo̧, ja̧danö jo̧ba imi baikwö ötjabikwo̧: —Inesö waisanö tjomukwatobö pjabato̧, —jö̧ba̧lö ötjabikwo̧. Ja̧danö ju'wibi, —Juluwo̧ Dios, —jö̧ba̧lö ötjabikwo̧. Ja̧danö ju'wibi, —Dabe'do Ba̧kwelöjatebö Jo̧, —jö̧balö ötjabikwo̧. Ja̧danö ju'wibi, —Wene Jwiinö Dö̧jobö Webö Jo̧, —jö̧ba̧lö ötjabikwo̧, duluwo̧ baibanö jemajökwema.

⁷ Isabenö inesö la'aka duluwo̧ ö̧jakwo̧ jo̧ba jitji̧ma, ajayitjö bajalekwönönö, ujulu nöamachibanö ba̧kwelöjatebö 'dö̧bibajökönö webö ö̧jakwo̧. Ja̧danö webö ö̧jobetjö̧ 'dö̧bibajökönö ba̧kwelöjatebö wene jwiinö dö̧jakwedösa. Jo̧bama Davidmine iteaka inesö la'aka luwo̧ ö̧binakanö öbamatakwo̧, jadanö David webö ö̧jinemi webö ö̧jakwo̧. Jau, David webö ö̧jinemima yemidanö ditebo baibanö 'diinö 'dö̧bibajökönö ujunakobe, la'akatjöda 'dö̧ibajökö ditebo baibanö, ja̧danö babe jamatö, ba̧kwelöjatebö 'dö̧ibajökönö baibanö, jweinö jwebebö, Dios wei̧danö webö ö̧jakwo̧. Jau, ökwö Okobe Jwiinö Juluwo̧ Isabenö Jo̧ Diosma jobekwö ö̧jobö kwösödobetjö̧, jobekwö baledakobe, jo̧kwajabetjö̧ kwömöledö israel jojodöma kwöba a'otjö tjo̧'wo ösöwachibanö tju̧ju̧kwobe, jö̧balö yöta̧la, tupakwö otiwanö tjö̧jakwa̧ jawama.

Otiwadösa, ju'wedötjö bajalekwönönöbedösa jö̧ba̧lö tjomukwatiökwe, Dios israel jojodönö lȩebakwa̧, Isaias yöawina jawa

⁸ Isabenö Jo̧ma iteda yöawi̧ weajabe Jacob itji̧mu tupadanö jojodönö, iteda lȩebakwa̧ wenema, ja̧danö yöawaja̧danö baledobe israel jojodönö.

⁹ Ja̧danö, jobekwö balediawö̧ okobe deinö tjöwaisachibakwedö, Jobadönö baledi̧ma isabenö Dios lȩebi̧ usula emawadötö, jö̧ba̧lö. Isabenö sulabenö omukwatadö israel jojodöma, Dios lȩebi̧jayonö, sulabenö tjomukwati̧ balewachökönö, Samaria comunidadnö ju̧kwadöbi, ju'wedö israel jojodöbi tupakwönönö sulabenö omukwatö tjö̧jobe, —Ju'wedötjö bajalekwönönöbedösa, —jö̧ba̧lö. Jau, otiwadösa jö̧ba̧lö omukwatö, baikwö yöba̧ladö:

¹⁰ Bloketjö otikwejubiya meijayonö, wene jwia, o̧penönö otiwejubiya dotidakwedösa. Bloke ji̧nemi, inawiya nöinö mikwawawa dotidinawatjö balekwejubiya dotidakwedösa, ajayitjö bajalekwönönö otiwejubiyama. Ja̧danö ditebotjö pokwina towibiya sicamoro towibiya juwö lotjinajayonö, wene jwiya, ja̧ towibiya ji̧nemi bajalekwönönö otiwowibiya Cedro towibiyada dujunakwedösa, —jö̧ba̧lö sulabenö tjomukwati̧ balewachökönö yöba̧ladö.

¹¹ Jobekwö sulabenö tjö̧jiökwe, Isabenö Jo̧ma tjöpöjojodönö weakobe, Siria niji la'aka luwo̧ Rezin mikwo̧ öpöjojodö Asiria jojodönö, ja̧danö ju'wedö israel jojodö tjöpöjojodönö weakobe, jobadöbi israel jojodönö metji̧bakobetjö̧.

¹² Jau, jawo̧ laebobekwötjö ju̧kwadö Siria jojodöbi, jawo̧ meajobekwö ju̧kwadö Filisteo jojodöbi ida̧ökö israel jojodönö juluwajadö, tjitebo niji 'döbebö tjemajabe, wanedö yötawa: Tjaa alebö, israel niji̧ tjö̧katajabe ida̧ökö. Jobekwö ida̧ökö baledajayonö, ina inesö ödameakwi̧ kabatibö̧kö̧ Diosma, ja̧danö ina ömamu kabebö ö̧jobedanö ichejekwa, ajayitjö bajalekwönönö israel jojodönö kwaakobetjö̧.

¹³ Jau, ajayinö lȩebiawö̧, sulabenö tjomukwati̧ kabatibö, tjöbalewacho jö̧tja̧linobe, ja̧danö tjebachajö jobadönö kwabina Diosnö tjösödo jö̧tja̧linobe, ja̧danö Isabenö Jo̧ Okobe Jwiinö Juluwo̧ Diosnö abebö ta̧ja̧kwo jö̧tja̧linobe, jo̧kwaijayonö balewachökönö jwaikwöda sulabenö omukwatö ja̧dö israel jojodöma.

¹⁴ Jobekwö sulabenö tjö̧jiökwe, wanedö yöta̧la, israel jojodötjö tjuubi, tjöwali'bobi bulatö lobo̧ Isabenö Jo̧ma, ja̧danö bakwöta möle ba̧ja̧lasö̧i̧ ösöjabi, ojwenö pokwi̧ isa'yebi 'wibebö lobo̧.

¹⁵ Ja̧ wanedö yötawaja̧ma, baikwö labebö lobö yötawa: Tjuudanö ichejekwawö̧ma, la'aka luwedöbi, ju'wedö otiwanö tjomukwatawö̧ jojodöbi. Ja̧danö tjöwali'bodanö ichejekwawö̧ma, Dios yöawi̧ yöbawadösa jö̧ba̧lö, omöna jawa yöbawadöma.

¹⁶ Jau, israel jojodö tjuluwedöma sulabenö ötjibajabe israel jojodönö, ja̧danö jobekwö sulabenö ötjibiawö̧, tjömöayedö israel jojodöma wajwibö omukwatadö, —Otiwanö omukwatakwawama, diyajö, —jö̧ba̧lö.

¹⁷ Jobekwö sulabenö tjö̧jiökwe, o̧'wo ösöwanöma omukwatö̧kö̧ Isabenö Jo̧ma, israel jojodötjö möayedödanö juluwadönöma, ja̧danö lȩlöinö edö̧kö̧ löyödönöbi, tjilekwamu wobekwinadönöbi. Jau, okobe deinö israel jojodöma bakwainö Diosnö ösödökönö ju̧kwadö, ja̧danö bakobe sulabenö ja̧badö, ja̧danö bakobe sulabenö mikwawökö ji̧ jawada yöba̧ladö. Jo̧kwajabetjö̧, jobekwö ina sulabenö tjö̧jiökwe, ina jobadönö inesö ödameakwi̧ma kabatibö̧kö̧ Diosma, ja̧danö ina ömamu debatö jo̧, tupakwönönö jobadönö kwaakobetjö̧.

¹⁸ Jojodö sulabenö ja̧tji̧ma, ökwöla ubi̧danö ubi̧, wanedö yötawa, sȩi̧bi, ju'wi sȩötjebiyabi ubenama, juluwanö tebonö ji̧ towibiya nötekwajobe, ja̧danö ubenama, imiyu'wo möakwö kaamobe, jö̧tö?

¹⁹ Ja̧danö jojodö sulabenö ja̧bö tjö̧jiökwe, Isabenö Jo̧ Okobe Jwiinö Juluwo̧ Diosma jwiinö ödameakwobe, ja̧danö ödameakwobetjö̧, israel niji ubajabe, ja̧danö israel jojodöma imidanö ichejekwadö, ökwölanö ubadö batjibakwedö. Isabenö sulabenö ja̧bö ju̧kwadö israel jojodöma, ja'yubebi tjömöledönö lȩlöjinö edöködö.

²⁰ Isabenö usula emawadö israel jojodöma, tjöwaisobekwöchobe kwakwawa 'döbebö tjukwijayonö ina a̧wi̧chi̧ tjöbadö, ja̧danö wajwitjobekwöchobebi kwakwawa 'döbebö tjukwijayonö, ina tjomeawachibanö kwöködö. Ina a̧wi̧chi̧ tjöbö, tjöja tjiteba'obi kwadö, jwiinö a̧wi̧chi̧ lö̧jobetjö̧.

²¹ Ja̧danö Manasessaso jojodöma yö̧ne tjömöledö Efrainsaso jojodönö mȩbibadö, jadanö Efrainsaso jojodöma tjömöledö Manasessaso jojodönö mebibö ölakwabikwawadö, jadanö Efrainsaso jojodöbi, Manasessaso jojodöbi Judasaso jojodönö mebibadö. Jobekwö jwiinö usula emawö ju̧kwadö israel jojodöma, jo̧kwaijayonö Dios jobadönö inesö ödameakwi̧ma ina seachibokobe, jadanö ina ömamu debatö jo̧, jemi bajalekwönönö usula tjemawinö kwaakobetjö̧.