Isaías 8 - Dios Iwene

Asiria jojodö ölakwabikwawö tjichakwa̧ jawa Isaias yöawina jawa

¹ Jemi ikenama Isabenö Jo̧ma ötjö Isaiasnö weinobe: —Isaias, wȩyukwöte emibö, otiwanö öwawinö kwi̧wȩyudo, –Böte wȩyukwötema, Maher Salal Jasbaz mikwo̧ itea wȩyukwöte, –jö̧balö.

² Ja̧danö, jobekwö kwi̧wȩyudonö, ötjöma du̧ju̧taja jweinö yöbawadönö wetocha, kwi̧wȩyudaja̧ edajadö, –Isabenö Dios weaja̧danö i̧wȩyudinobe Isaiasma, –jö̧ba̧lö yötjawakwedönö. Jobadö wetakwawö̧ma, bidö, Diostjö jojodötjö ö'weje pjabato̧ Urias mikwo̧bi, Jerebequias itji̧ Zacarias mikwo̧bi, —jö̧ba̧lö weinobe.

³ Jemi ikenama, chilekwo Dios yöawi̧ yöbawujukwö chö̧jijatö, ja̧danö metu'wo bajibinobe. Jemi ikenama, jitji̧nö jemenama, Isabenö Jo̧ma ötjönö weinobe, —Kwitji̧ jemajökwenö, Maher Salal Jasbaz jö̧ba̧lö kwimidonö, –Juluwajadö, juluwanö tjujuluwajawö̧ tjitea 'döbebö emawa, –jö̧ba̧lö.

⁴ Jau Isaias, lekwökö ja̧ baledakwa̧ma, baikwö yötawa: kwitji̧ –Chabe'do, Chojo'do, –jö̧ba̧lö yöa̧lakwa̧ abönö, Asiria jojodötjö la'aka luwo̧ma kwöpöjojodönö ujuluwakobe, ja̧danö ida̧ökö juluwajo̧, Siria niji la'aka comunidad Damasconö ji̧ nöinö mikwawi̧ jawabi, israel niji la'aka comunidad Samarianö ji̧ jawabi 'döbebö e'ewakobe iteda itebobe, jo̧kwajabetjö̧ ja̧ baledakwa̧ wene i̧sȩbö jobekwö kwimido kwitji̧nö, —jö̧ba̧lö weinobe Diosma.

⁵ Jemi ikenama, Isabenö Jo̧ma yemidanö ötjö Isaiasnö yöawinobe, baikwö:

⁶ —Bidö chömöledöma, dösölö̧jinö chiteada̧li̧ öpöjödadö, baikwö wanedö yöta̧la: Chiteada̧li̧ma, ojwe buluwöködö Siloe tjo̧'omanö isuwobedanö ichejekwijayonö, jobadönö chiteada̧li̧ öpöjödadö, ja̧danö öpöjödö, tjöpöjojodö Siria niji la'aka luwo̧ Rezinnöbi, Israel niji la'aka luwo̧ Peka mikwo̧nöbi yebabinö omukwatö tjö̧bawadö.

^7-8 Jo̧kwajabetjö̧, chiteada̧li̧ tjöpöjödobetjö̧, baikwö wanedö yötawakwö: Ötjö Isabenö Jo̧ma wetocha, inesö nöödö buluwadö jobadönö okwatibobö wetocha, ja̧danö welachibanö juda nijibi okwatibanö isuwakobe, jwiinö chömöledö israel jojodönö okwatibakobe, tjulume'anö ichibenanö kabatö. Jau Isaias, Asiria niji la'aka luwo̧ma iteda ujulunö ba̧jȩkwadö ömöayedönö öbibö ichakobe, iteda ömöayedötjö Juda niji su̧'be baibenanö kabatö. Jo̧kwaijayonö jobekwö ichijayonö, ötjö Diosma ökwödökwö Jo̧sa, jadanö wanedö yöta̧la, pji̧yu tjö̧wa̧ja̧piya debatö tjiteada̧li̧danö, ökwödönö chiteada̧lakwo̧sa, —jö̧ba̧lö yöawinobe Diosma.

⁹ Jau, Diosma isabenö ökwödökwö ja̧nö iteada̧lakwo̧, jo̧kwajabetjö̧ baikwö yöta̧la döpöjojodönö: Ökwödö kwiteboduwikwena jojodö ödö ja̧dönö baikwö yöta̧laduwakwö, isabenö kwöwaekwaduwakwedöja, jö̧ba̧lö. Tjöekwa̧do̧ ölakwabikwawa jawa kamijido̧ 'dukawaduwakwedöja, ja̧danö otiwanö waisanö kwölakwabikwawaduwakwa̧ jawa kwotidaduwakwedöja, jo̧kwaijayonö waekwakobe.

¹⁰ Jau, waisanö ölakwabikwawö kwö̧jaduwakwa̧ omukwatö kwujunaduwakwedöja, –Baikwö baikwö ölakwabikwawö dujuluwakwedösa, –jö̧balö. Jo̧kwaijayonö, waekwakobe, omukwatö kwujunaduwaja̧ma badekwachökakobe, Diosma ökwödö Juda jojodökwö ja̧nö pjaatobetjö̧, jö̧ba̧lö yöta̧la döpöjojodönö.

Ju'wedö juda jojodö sulabenö ja̧bö tjö̧ji̧danö ja̧bö kwö̧joko, jö̧ba̧lö Dios Isaiasnö weina jawa

¹¹ Chömöledö, Isabenö Jo̧ma iteda ujulunö labinö weinobe ötjönö, bidö Juda jojodö sulabenö jabö tjö̧ji̧danö ötjö Isaiasbi sulabenö ja̧bö chö̧japji jö̧ba̧lö, baikwö:

¹² —Ju'wedö jojodöma ba̧kwelöjatebö ju'wedönö yöba̧ladö, –Idöma bakobe suli̧ tjöwaedakwa̧ omukwatö junadötö, –jö̧ba̧lö. Jo̧kwaijayonö ökwöma jobadö jobekwö kabatökönö yötja̧li̧danö yöka̧loko Isaias. Ja̧danö jobadö yebabinö tjomukwati̧ jawama, yebabinö kwomukwatoko, jadanö yekabökönö kwö̧jo.

¹³ Jau Isaias, ju'wedö yetjabi̧ jawama yekaboko, ötjö Okobe Jwiinö Juluwo̧ Isabenö Jo̧ Diosnö yebabinö omukwatö kwösödo, –Isabenö Jo̧ma inesö suli̧ jwibo̧, –jö̧ba̧lö. Ötjönöda omukwatö yebabinö tjö̧bawö kwö̧jo Isaias.

¹⁴ Ja̧danö, jobekwö kwösödi̧tjö̧, isabenö ökwönö chiteada̧lakwo̧sa. Jo̧kwaijayonö ju'wedö kwösödi̧danö ösödöködö israel jojodönöbi, juda jojodönöbi wainö chö̧jakwo̧sa. Jau Isaias, jobadönö inawa töbö metjobö ja̧wadanö chichejekwakwo̧sa, ja̧danö Jerusalennö ju̧kwadönö 'daliwadanö chichejekwakwo̧sa.

¹⁵ Ja̧danö jobekwö chö̧jiawö̧, jobadötjö ba̧jȩkwadö töbö metjakwedö, ja̧danö mebö 'detjawakwedö, ja̧danö 'daliwanö lö̧jajadö, tjöpöjojodö tje'ewawö̧ tjö̧jakwedö, —jö̧ba̧lö yöawinobe Diosma.

¹⁶ Ja̧danö, babema baikwö weta, böja chi̧wȩyudaja̧ 'bo̧datö kwiteada̧laduwo, ja̧danö Dios weina weyukwöja seyu dobajadö, yötawi̧ waisachadönö kwiyaduwo.

¹⁷ Jau chömöledö, babe Isabenö Jo̧ma öba muchekwö Jacobmine itji̧mu tupadanö jojodönö edökönö ö̧jobedanö ichejekwa babe döpöjojodöma ökwödönö tjujuluwobetjö̧, jo̧kwaijayonö ötjöma jo̧ba pjaatakwa̧ chiteada̧locha, —Isabenö yöawinadanö pjaatakwo̧, —jö̧ba̧lö, ja̧danö ja̧ wene cho̧'wo wana̧lö chö̧jakwo̧sa.

¹⁸ Ötjöbi, Isabenö Jo̧ iyinawö̧ chitji̧mubi i̧sȩkwa baibanö iyinawö̧sa, israel jojodö tjö̧'da̧de ja̧nö Dios yöbawö ujunina jawa di̧sebakobetjö̧. Jau chömöledö, Okobe Jwiinö Juluwo̧ Isabenö Jo̧ma, Jerusalennö ja̧'o Sion mösa'onö Jo̧, ja̧danö jobama ökwödönö ujuninobe, iteda ömöledö israel jojodönö i̧sȩkwa badibanö.

¹⁹ Ja̧danö chömöledö, wene baledi̧ edö, ju'wedöma ökwödönö wetjena: —Ö'wö babibinadö tjo̧'wo luwokwö yöa̧lakwawa jojodönöbi, ju'wedö debö 'yi̧nadökwö seboba̧lö yöa̧lakwawa jojodönöbi abebö kwa̧ja̧kwaduwo, tupakwö baledakwa̧ yötjawakobetjö̧, —jö̧ba̧lö. Jo̧kwaijayonö baikwö abebö cha̧ja̧kwaduwakwö, —Jojodöma idöda tjösödökwe Diosnö abebö tja̧ja̧kwobö jwienaji̧? Ja̧danö ina 'yaba̧ladö tjö̧ji̧ jawa tjöwaisakobetjö̧, isabenö 'debö 'yi̧nadönö abebö tja̧ja̧kwobö jȩnaji̧? Ja̧maökö chömöledö, tjösödökwe Diosnöda abebö tja̧ja̧kwobö jo̧be.

²⁰ Dios wei̧ jawabi, ju'wi Dios yöawi̧ jawabi kwaja̧kwaduwo chömöledö, i̧ya̧da mikwawi̧ma. Ja̧danö baikwö yötawaduwakwö, ju'wedöma Dios yöawinatjö wainö yötjawitjö̧ma, ja̧danö Dios weinatjö wainö wetjitjö̧ma, isabenö wajwibadö jobadöma. Wanedö yöta̧la, tjo̧'wo luwo̧ jawama: Jobadöma bakwainö yȩa'wo jȩmida, la'akatjöda dewi̧ dewachokobeda ju̧kwadö.

²¹ Jobadöma tjo̧'wo tjo̧bekwö, ja̧danö a̧wi̧chi̧ tjöbö israel niji ö'wejenö kwebachö tjö̧jakwedö, ja̧danö a̧wi̧chi̧ lö̧jawö̧ tjö̧dameakwakwedö, ja̧danö tjome suli̧nö sulabenö yötja̧lakwedö. Jau, dameakwö ja̧nö, möakwö edö sulabenö yötja̧lakwedö tjuluwo Diosnöbi, tjuluwo̧ bö̧jȩ jojo la'aka luwo̧nöbi.

²² Ja̧danö ö'öbötenia bö̧je baledi̧ edö, bakwainö wene baledi̧da, tjo̧'wo tjo̧bekwö ji̧ jawada tjedakwedö. Ja̧danö Dios yöawi̧ tjöpöjödobetjö̧, jwaikwöda jwiinö yȩa'wo okwa, jwiinö yeabikwawa ja̧'wo yȩa'wo okwa tjö̧jobö ikwö lotjakwawö̧.