Isaías 7 - Dios Iwene

Isaias la'aka luwo̧ Acaznö yöawina jawa, yebabökönuwi, jö̧ba̧lö

¹ Juda niji inesö la'aka luwo̧ Acaz mikwo̧ webö ö̧jena baledina jawa baikwö laebobe. Acazma ajayi inesö la'aka luwo̧ Uzias mikwo̧ ö̧'dö̧ ö̧jinobe, ja̧danö ikena la'aka luwo̧ Jotan mikwo̧ itji̧ ö̧jinobe, ja̧danö jo̧ba Acas inesö la'aka luwo̧ ö̧jemi ja'ötjö, siria niji la'aka luwo̧ Rezin mikwo̧bi, israel niji la'aka luwo̧ Peka mikwo̧bi tjömöayedö ölakwabikwawa jojodökwö Jerusalen comunidadbe tjichibinobe, Jerusalennö ju̧kwadönö tjujuluwobö. Jo̧kwaijayonö, tjujuluwobö jö̧tja̧lima waekwinobe. Baikwö laebobe ja̧ baledina jawama:

² David itji̧ tupadanö jojo Acaznö yötjawinobe, —Siria niji jojodöma bakobe israel niji jojodökwö pjabatakwawö ja̧dötö, —jö̧ba̧lö. Jobekwö yötja̧liökwe, la'aka luwo̧ Acazbi, ömöayedö juda jojodöbi jwiinö yetjaibinobe, baikwö wanedö yöta̧la, jwa̧le'epjo labinö jwa̧le'ewena, towibiya tjö̧awi̧danö, tjomajadenö yebabinö ja̧nö, jwiinö tjö̧bawö tjö̧jinobe Acazbi, ömöayedöbi.

³ Jejenö yetjaibiökwe, Isabenö Jo̧ma iteda yöawi̧ yöbawo̧ Isaiasnö weinobe: —Isaias, kwitji̧ Sear Yasub mikwo̧nö öbibö, Acaznö kwöbadekwajobö 'ya̧wi, ojwese'dotjö i̧sa̧la̧ sobö tjotidinemi bajalebe, möakwöchobe o̧pesobu jȩmi. Acazma jobe kamijido̧ dichawemi mananö ö̧jakwo̧, jo̧kwajabetjö̧ jobetjö jo̧banö kwöbadekwajobö kwi̧'yo.

^4-5 Acaznö badekwajo̧, yökawonö: –Teada̧lönö ja̧nö, yebabökönui. Kwomajadenö tjö̧bawökönö, idö juluwöködö la'aka luwedönö yebabökönö kwö̧jo. Jau Acaz, jobadö siria niji la'aka luwo̧ Rezinbi, israel la'aka luwo̧ Pekabi jwiinö tjö̧dameakwijayonö, juluwöködö, sule ökwöla ubö̧'a, juluwanö tiibö̧'adanö ichejekwadö. Isabenö jobadöma ökwönö suli̧ tjöwaedotö jö̧ba̧lö omukwatö tjujunajabe,

⁶ -Juda nijibe 'ya̧nö, yetjaibanö dölakwabikwawaduwo, ja̧danö dujuluwajaduwo, jobe ju̧kwadöma ökwödöda dömöayedö batjibanö. Ja̧danö, jobekwö dujuluwaja̧ ikenama, dömöledöso̧ Tabel mikwo̧ itji̧nö dujuno, jo̧bada Juda niji inesö la'aka luwo̧ ö̧jakobetjö̧, -jö̧balö omukwatö tjujunajabe.

⁷ Jo̧kwaijayonö, jobekwö omukwatö tjujunajayonö, baikwö yöawobe Isabenö Jo̧ Diosma: Omukwatö tjujunaja̧ma waekwakobe, tjomukwati̧danöma baledökakobe.

⁸ Jau, chöba a'otjö juluwöködö jobadö bö̧je luwedöma, baikwö yöta̧la: Siria nijitjö la'aka comunidadma, sule Damasco comunidadda, ja̧danö Damasco comunidad la'aka luwo̧ma, sule Rezin mikwo̧da. Ja̧danö israel niji baikwö yöta̧la, ja'yubeda lekwajabetjö̧ tjöpöjojodöma söbebö lotjakobe israel nijima, israelsaso ötjabawö̧ma deinö baibanö.

⁹ Jau Acaz, israel niji la'aka comunidadma, sule Samaria comunidadda, ja̧danö Samaria comunidad la'aka luwo̧ma, sule Peka mikwo̧da, jo̧kwajabetjö̧ jobadönö yekaboböma jwiobe Acaz. Jau Acaz, jobadönö yebabökönö, jwaikwöda ötjö Isabenö Jo̧ Diosnöda kwo̧'wo wana̧lö kwö̧jo, 'diinö kwö̧jakobetjö̧. Isabenö 'diinö kwö̧jaduwobö jo̧be Acaz, jo̧kwaijayonö ötjönö kwo̧'woduwi wana̧lökönö kwö̧jaduwitjö̧ma, 'diinö kwö̧jaduwö̧kakwedöja, –jö̧ba̧lö yökawo Acaznö, —jö̧ba̧lö weinobe Isaiasnö.

Emanuel ötjabökwenö jemakwa̧ Isaias yöawina jawa

¹⁰ Ja̧danö, Isabenö Jo̧ma yemidanö iteda yöawi̧ weinobe Acaznö, baikwö:

¹¹ —Acaz, isabenö ökwödönö pjatatakwa̧ wene chi̧sȩbakwo̧sa, jokwajabetjö̧ ötjö kwuluwo̧ Isabenö Jo̧ Diosnö akebo, isabenö pjatatakwa̧ i̧sȩkwa baibanö chi̧sȩbakobetjö̧. Jau Acaz, ökwöda kwedobö kwösödi̧danö akebo, isabenö waiyi̧ jawa jojodö edajitjökö jawa kwedobö jö̧ka̧litjö̧ma akebo, jadanö isabenö akebaja̧danö chi̧sȩbakwo̧sa, isabenö yötawaja̧danö pjatatakwo̧sa, —jö̧ba̧lö Isaias Dios weaja̧ yöawinobe Acaznö.

¹² Weökwe, —Jobekwö atebökakwo̧sa, isabenö yöawaja̧danö pjaatakwojobö, pjaatökakwojobö jö̧ba̧lö i̧seboböma atebökö Isabenö Jo̧nö, —jö̧ba̧lö atadinobe Acazma.

¹³ Atadiökwe, Isaiasma yöa̧linobe: —Jobekwö akebobö kwöpöjödobetjö̧, baikwö yötawaduwakwö ökwödö David itji̧mu tupadanö jojodönö, ja̧danö isabenö yötawakwa̧ otiwanö kwa̧jakwaduwobö jo̧be: Ökwödöma ida̧ökö sulabenö israel jojodönö tjime'dawachibanö jabadöja, tjo̧'wo 'dibachiböködö batjibanö. Ja̧danö, chuluwo̧ Dios o̧'wo 'dibachibö, lekwe ökwödönö iteada̧lijayonö, babe chuluwo̧ Dios ime'dawachibanö, o̧'wo 'dibachibö̧kö̧ baibanö ja̧köbobö sulabenö ja̧bo̧ja.

¹⁴ Jobekwö sulabenö ja̧köbiökwe, i̧sȩbakwa̧ jawa Dios i̧sȩbobö akebököjayonö, yayonö Dios i̧sȩbakwa̧ jawa yötawakwö baikwö: Möayujuma metu'wo babibaju, jitji̧nö jemakobe, ja̧danö emaju, Emanuel jö̧ba̧lö jimidakobe jitji̧nö, Diosma ökwödökwö jo̧ jö̧ba̧lö.

¹⁵ Ja̧danö, jitji̧ jemajökwema, öda̧peachakobe, suli̧ jawa öpöjödö, otiwi̧ jawa ösödö omudawö ujunobö öwaisenanö baibanö, jadanö jobekwö omudawö ujunobö öwaisenama, babe jwii̧ kwakwawa lechesa'bebi, wayo̧bi otiwanö ukwakwo̧.

¹⁶ Jau Acaz,babe kwöpöjojodö tjichibinobetjö̧, ja̧jaye kwakwawa jwiobe, jo̧kwaijayonö, juluwanö debi batjibakwedö. Jo̧kwajabetjö̧ tjemu jobekwö da̧peachajo̧, otiwi̧ma suli̧tjö böjö omudawö ujunobö öwaisachibakwa̧ abönö, idö du̧ju̧taja la'aka luwedö yekabiwö̧ma ida̧ökö deakobe, ja̧danö tjitebokwenama, ida̧ökö jojodö deobe ji̧bakobe, —jö̧ba̧lö yöawinobe Isaiasma, Acaznö.

Asiria la'aka luwo̧ söbebö lobö ichakwa̧ Isaias yöawina jawa

¹⁷ Tupakwö yöawinobe Isaiasma, Acaznö: —Isabenö Jo̧ma wene kwöbaledaduwobö weakobe, kwömöledö israel jojodönöbi, yöne kwömöledönö kwabe'do itji̧mu tupadanö jojodönöbi. Jau Acaz, damötjö ju'wedö israel jojodö Juda jojodötjö 'da̧bachibö tji̧'yinelö baikwö baibanö wene kwöbaledaduwinelö bajalekwönönö wene kwöbaledaduwakwedöja, Asiria la'aka luwo̧ma ölakwabikwawö ichakobetjö̧.

¹⁸ Jau Acaz, ja̧ möle Isabenö Jo̧ma su̧wiba̧lö jwöakobe ichejekwa, ödö Asiria nijitjöbi, Egipto nijitjöbi ölakwabikwawa jojodö tjichakobetjö̧, ja̧danö bajwö̧ ja̧tji̧danö tjichibakwedö Asiria jojodöma, ja̧danö ma̧tu̧lö ja̧tji̧danö tjichibakwedö Egipto jojodöma, tjölakwabikwawobö.

¹⁹ Ja̧danö ichibajadö, israel niji ba̧kwemeachibanö tjö̧jakwedö, yalikwawenabi, inawa ötöla jenabi, sȩöte jenabi, mejenöbi.

²⁰ —Jau Acaz, wanedö yötawa, ja̧ möle duluwo̧ Diosma israel jojodönö lȩbebö, jwoawa luwo̧ Asiria la'aka luwo̧nö midö weakobe ichejekwa, Eufrates ojwe bakwachödötjö ichö jwobö loakobetjö̧, ja̧danö jobekwö jwobö ichenama, sule tjuunö ja̧'yedama jwobö loökakwo̧, tjöwö'yebi, tjaasa'yebi, tjötadesa'yebi jwobö loakwo̧, jwiinö taba lö̧jawö̧da tjö̧jakobetjö̧.

^21-22 —Jejenö balediawö̧, o̧bukwedöda israel nijinö tjö̧jibakwedö, ja̧danö tja̧jwi̧munö o̧bukwedönöda tjajwikwakwedö. Jau, bakwo̧ sule pakayasuju bakwujunöda, ja̧danö obejadö du̧ju̧tajanöda ajikwena, jo̧kwaijayonö nöinö lechesobu tjiyobetjö̧, otiwanö lechesa'be ukwakwo̧. Jau, okobe deinö ja̧ mölȩ israel nijinö ji̧badöma, lechesa'bebi, wayo̧bi tjukwakwedö.

²³ —Ja̧danö, israel niji ba̧kwemeachibanö, batjo jinelötenia suli̧ waekwakobe, sȩötjebi, ju'wi sula'wo pokwi̧bi jȩna baibenanö. Jau, nöinö mikwawina batjo, mil ö'biya ubasa'ba jinayu, ajayinö mil plata ö̧piya mikwawinajayonö, batjo jwiemi, sula'woda pokwemi baibanö ji̧bakobe.

²⁴ Jo̧kwajabetjö̧ jojodö jobe batjo ajayinö jinemi tjichibenama, jwiinö labiawö̧ 'böpöbi, nayu̧nubi kwebatö tjichibakwedö, niji ba̧kwemeachibanö sȩi̧ jawada pokwobetjö̧.

²⁵ Ja̧danö mösa'o ö'öbö, ajayinö niji soawapinö batjo tjotidinelö, yebabinö tjichibökakwedö, –Bakwainö sȩi̧ pokwemida, –jö̧ba̧lö. Ja̧danö jobe batjo ajayinö ji̧nemi, tja̧jwi̧mu pakayadönöbi, obejadönöbi ejatö wetjakobe, jobe kwebachö tju̧kwa tjisakwakobetjö̧, —jö̧ba̧lö yöawinobe Isaiasma Acaznö.