Isaías 66 - Dios Iwene

Diosnö ösödadösa jö̧ba̧lö omöna yöba̧ladönö lȩebakwa̧ jawa Isaias i̧wȩyudina jawa

¹ Baikwö yöawobe Isabenö Jo̧ma: Chömöledö, mölejȩma, sule ötjö chiteaka inesö la'aka luwo̧ ö̧bakadanö jö̧jȩ, ja̧danö bö̧jȩma sule chömasapiya chöwanemidanö jö̧je. Jo̧kwajabetjö̧, ötjö chö̧jakwejuma, dakwö kwotidaduwobö? Otiwanö chö'wachemi ötjönö kwiyaduwobö jȩnaji̧?

² Okobe jwiinö mölejȩnö ji̧bi, bö̧jȩnö ji̧bi, ötjöda chotidijatö chömöledö, ja̧danö okobe jwiinö kwedaduwi̧ma, ötjö chiteada edadöja. Jo̧kwajabetjö̧ cheju baibanö kwiyaduwobö jwibadöja chömöledö. Jobekwö ötjö Isabenö Jo̧ma yötawaduwakwö. Ju'wibi baikwö yötawaduwakwö: Ötjö otiwanö edö pjatatakwawö̧ma, bidö: Tjomajadenö, —Mikwawöködösa, —jö̧ba̧lö omukwatadö, yötawi̧ a̧ja̧kwö, yebabinö tjö̧bawö, sulabenö tjomukwati̧ kabatibö balewachadöma.

³ Jo̧kwaijayonö idöda tjösödi̧ jawa omudawö junadö inesö sulabenö ja̧awa ja̧tjobö ösödadönö, ösödö̧kö̧sa. Jobadönö baikwö yöta̧la: Pakayaso̧nö kwabö juwö ötjönö tjiyijayonö, ju'wibi jojodönö kwabö lobadö. Ja̧danö obejanö kwabö juwö ötjönö tjiyijayonö, ju'wedö o̧'wo jawa tjösödawönöbi ösödö, awili u̧lu̧me'a 'debatö iyadö. Ja̧danö trigoso̧pja̧ iyawa ötjönö tjiyijayonö, ju'wibi ju'wedö o̧'wo jawa tjösödawö̧nö kusi̧ ökwösobu iyadö. Ja̧danö chöba a'o omewi̧ jawa juwadöma, ju'wibi o̧'wo jawa ösödadö. Jau, —Diosnö ösödadösa, —jö̧ba̧lö tji̧sȩbijayonö, weti̧ a̧ja̧kwöködö, ja̧danö la'akatjöda tjiyi̧ chösödökakwo̧sa, —Otiwanö iyadö, —jö̧ba̧löma.

⁴ Isabenö labinö lȩtebakwo̧sa jobadönö. Weti̧ öpöjödö, idöda tjösödi̧ ja̧tjobö omudawö tjujuninobetjö̧, jobadönö lȩtebakwa̧ omudawö chujunakwo̧sa, inesö yetjabi̧ jawa jobadönö baledobö omudawö chujunakwo̧sa. Isabenö jobekwö lȩtebobö jo̧be, baikwö yöta̧la: Jobadönö jwötenama, atadinöködö, ja̧danö yötawenama, a̧ja̧kwinöködö. A̧ja̧kwökönö, ju'wida omudawö juninadö, chöba a'otjö sulabenö ja̧tjoböda omudawö tjujuninobe. Ötjö chösödi̧ jawa tjöwaisijayonö, ja̧ jawa ja̧bökönö, inesö chöpöjödi̧ jawada sulabenö ja̧badö, jo̧kwajabetjö̧ isabenö jobadönö lȩtebobö jo̧be, jö̧ba̧lö laebobe Isabenö Jo̧ yöawi̧ma.

Dios Jerusalennö ju̧kwadönö pjaatakwa̧ Isaias iwȩyudina jawa

⁵ Ökwödö Isabenö Jo̧ yöawi̧ a̧ja̧kwö, otiwanö yebabinö a̧ja̧kwö ju̧kwadönö, baikwö yötawaduwakwö Isabenö Jo̧ ökwödönö yöawi̧ma: Ökwödöma ötjö Isabenö Jo̧ Diosnö ösödadö kwö̧jaduwiawö̧, ju'wedö kwömöledöduwi israel jojodöma ökwödönö öpöjödadö, ja̧danö tjö'da̧detjö a'dewö lobadö. Ökwödönö obö, —Kwösödaduwökwe Isabenö Jo̧ma isabenö ujuluwitjö̧ma, iteda dejatinö ujulu i̧sȩbo, ökwödö jo̧banö ösödadö kwo̧'woduwi ösöwachibakobetjö̧, —jö̧ba̧lö ökwödönö obö yöba̧ladö. Jo̧kwaijayonö baikwö yötawa jobadönö, Jobadöda taba lö̧jawö̧ tjö̧jakwedö, jö̧ba̧lö.

⁶ Jau, ju'winö Jerusalen comunidadtjö ökwöi̧ kwa̧ja̧kwaduwakwedöja, ja̧danö chejutjö bakwo̧ jwöeba̧lobe kwa̧ja̧kwaduwakwedöja. Ja̧ kwa̧ja̧kwaduwakwa̧ma, ötjö Isabenö Jo̧ chiwene ökwöi̧da kwa̧ja̧kwaduwakwedöja, chöpöjojodö sulabenö ja̧tji̧tjö̧, balekwa mikwa jobadönö lȩekwa yöba̧lö jwöteba̧lobe kwa̧ja̧kwaduwakwedöja, jö̧ba̧lö yöawobe Isabenö Jo̧ma, yöawi̧ otiwanö a̧ja̧kwö ju̧kwadönö.

⁷ Isabenö otiwanö pjabato̧ Diosma Jerusalen comunidadnö ju̧kwadönö, baikwö wanedö yötawa: Ina tjemunö emawa nii̧ niököjayonö, Jerusalenma juluwanö jijti̧nö jemajabe.

⁸ Jobekwö baledi̧ma, dakwö baledobejö? Bakwo̧bi jobekwö juluwanö tjemobema edinaji̧? Edajiböködö jobekwöma, jö̧tö? Ja̧danö, bakwöta möleda, tjitebosaso ba̧jȩkwaso juluwanö batjibenaji̧? Juluwanö babiböködö, lekwe o̧biya ba̧jȩkwachibajadö, ba̧jȩkwaso babibadö, jö̧tö? Jo̧kwaijayonö, Jerusalen jitji̧munö jemenama juluwanöda jemakobe, ina niakwa̧ abönö jemakobe.

⁹ Ja̧danö baikwö wanedö yöa̧lobe Isabenö Jo̧ma: —Jerusalen jemakwa̧ möle badekwachajabema, jitji̧nö jemobö wetökenaji̧? Ötjödasa tjitji̧munö tjemobö webo̧sa, jemobö webökönö jukwa'wo chipje'datenaji̧? Ja̧maökö chömöledö, isabenö jemobö wetakwo̧sa, —jö̧ba̧lö wanedö yöawobe kwösödaduwökwe Diosma.

¹⁰ Jobekwö juluwanö jemobetjö̧, okobe deinö ökwödö Jerusalennö ösödadöma, jobujukwö kwo̧'woduwi ösöwanö kwö̧jaduwo. Okobe deinö ökwödö jobujunö ile nibebö ösödadöbi, jobujunö budekwadöbi, bakobe Jerusalenkwö kwo̧'woduwi ösöwachibanö kwö̧jaduwo.

¹¹ Wanedö yötawa ökwödö Jerusalennö ju̧kwadö ötiwanö kwö̧jaduwakwa̧ma: Ökwödöma kwojo'doduwi Jerusalen jo̧do̧'bi̧tjö kwowaduwakwedöja, kwomeawaduwachibanö, nöinö jojwi̧tjö, kwo̧'woduwi ösöwanö otiwanö kwowaduwakwedöja, jö̧ba̧lö wanedö yötawa, ökwödö Jerusalennö ju̧kwadö otiwanö kwujuna̧laduwakwa̧ma.

¹² Baikwö yöawobe Diosma: Baikwö wanedö yötawaduwakwö: Isabenö otiwanö pjatatocha Jerusalennö, ojwe kabatökönö isuwi̧danö, otiwanö jö̧jobö pjatatocha, ja̧danö tjitebotenia jojodö tjitea nöinö mikwawi̧ma, ojwe okwatibi̧danö jobujunö welachobö wetocha. Ja̧danö ökwödö jitji̧muma, otiwanö kwö̧jaduwakwedöja. Kwojo'doduwi Jerusalenma otiwanö jo̧do'bi̧ ojwö jiteada̧lakwawö̧ja, ja̧danö jö̧dö̧lö'anö apjö̧alö je'ewakwawöja, ja̧danö ji̧sȩ'bonö wananö döjeabikwawö̧ kwö̧jaduwakedöja.

¹³ Jau chömöledö, isabenö otiwanö pjatatakwawö̧ja ökwödö Jerusalen jojodönö. Jojosuju jitji̧munö tjo̧'wo tjo̧a̧chajelö tjo̧'wo ösöwanö pjajati̧danö, kwo̧wo tjo̧achajelö kwo̧'woduwi ösöwachibanö pjatatakwo̧sa, jö̧ba̧lö yöawobe Diosma.

¹⁴ Ja̧danö chömöledö, jobekwö baledobe edö, kwo̧'woduwi ösöwachibanö kwö̧jaduwakwedöja. Dios otiwanö pjaatobetjö̧, meje'ye juluwanö pokwi̧danö, juluwanö kwujuluwachibaduwakwedöja. Jau, ja̧ möle iteda ömöayedönö otiwanö pjaatiawö̧, okobe deinö edö tjöawaisakwedö, —Diosma isabenö juluwo̧, iteda ömöayedönö otiwanö pjaatakobetjö̧, —jö̧ba̧lö. Ja̧danö ju'wibi edö tjöwaisakwedö, —Diosma isabenö dameakwö lȩbȩbo̧, iteda öpöjojodönöma, —jö̧ba̧lö.

¹⁵ Isabenö labinö lȩebakwo̧ iteda öpöjojodönö chömöledö. Isabenö Jo̧ma ökwölanö ichakwo̧, ja̧danö itea kolukiyama juluwanö labinö ökwöinö ichakobe, labinö Dios inesö ödameakwi̧ lȩebakobetjö̧, ja̧danö iteda öpöjojodönö juwö loakobe ökwölanö.

¹⁶ Jau chömöledö, bö̧jȩ ba̧kwemeachibanö ju̧kwadönö lȩebakobe Isabenö Jo̧ma, ökwölanöbi, iteda itea kwölöte'onöbi labinö lȩebakobe, isabenö ba̧jȩkwadönö lȩbebö loakobe Isabenö Jo̧ma.

¹⁷ Baikwö yöawobe Isabenö Jo̧ma, lȩebakwa̧ jawama: Ökwödötjö ju'wedöma yȩtjekwi̧ dichawadö, bakwainö yȩbekwöködö batjibobö ja̧badö, ja̧danö jemi ikenama batjobe o̧'wo jawanö tjösödobö 'ya̧dö. Ja̧danö, jobe jo̧banö ösödö, kusi̧ itebiabi, duwo itebiyabi, ju'wi kwukwaduwobö wetinökö itebiabi, tjösödökwe o̧'wo jawanö ösödö kwadö. Jobadö, jobekwö wetökö jawa sulabenö ja̧badönö baikwö yöta̧la, Isabenö labinö lȩtebakwa̧wö̧, jö̧ba̧lö.

¹⁸ Ötjöma jobadö ja̧tji̧ edo̧sa, ja̧danö tjomukwati̧ waiso̧sa. Bö̧jȩ ba̧kwemeachibanö tjitebotenia jojodö, tjiwenetenia yöba̧ladönö ko̧ko̧dö lȩtebakwa̧ möle badekwachakwa̧ma yöneawachibobe chömöledö, ja̧danö ja̧ möle chöba a'o ja̧nö, ötjö dejatinö chujulu tjedakwedö.

¹⁹ I̧sȩkwa jawa baibanö, labinö lȩtebakwo̧sa jobadönö. Ja̧danö lȩtebaja̧tjö ji̧badönö wetocha, tjitebotenia jojodönö yötjawobö, Tarsis nijibebi, Fut nijibebi, 'böawa waisadö tjitebo Lud nijibebi, Tubal nijibebi, Javan nijibebi yöbawö tji̧'yobö. Ja̧danö ötjönö a̧ja̧kwajiböködö, ja̧danö dejatinö chujulu edajiböködö tjitebo jwaibalawa ö'öbö nijibebi tji̧'yobö wetocha, ja̧danö tjitebotenia jojodönö chujulu yötjawakwedö, —Isabenö Jo̧ Diosma isabenö dejatinö juluwo̧, —jö̧ba̧lö.

^20-21 Chujulu jawa yötjawiawö̧, tjiteboteniatjö kwömöledöduwi israel jojodönö tjichejebakwedö, batjo waji̧ iyawa tjichejebi̧danö, tjö̧'da̧de ju̧kwadö chömöledö israel jojodönö otiwanö iyö tjichejebakwedö, —Isabenö Jo̧, bidö kwömöledönö ichejebö diyakwö, —jö̧ba̧lö. Jau, kabayudö tjoma'anöbi, kolukiyanöbi, tjöböbe'onö wanawa ökiyanöbi, cameyodö tjoma'anöbi tjichejebakwedö. Wanedö yötawa, ökwödö israel jojodö otiwanö tjidichajapa̧ dȩja̧panö, batjo jawa kwiyaduwakwa̧ chejube e'ewö kwi̧'yaduwidanö, kwömöledö israel jojodönö tjitebotjö tjichejebakwedö. Ja̧danö jobadötjö ju'wedönö 'da̧batö chujunocha, ötjötjö jojodötjö ö'weje pjabatadö batjibanö, ja̧danö ju'wedönö weti̧ otidadö Levita jojodö batjibanö chujunocha, jö̧ba̧lö yöawobe Isabenö Jo̧ma.

²² Tupakwö yöawobe Isabenö Jo̧ma: Chömöledö, mölejȩ 'yayöjȩbi, bö̧je 'yayöjȩbi chotidocha, ja̧danö chotidaja̧ma, ba̧kwelöjatebö 'dö̧bibajökönö chöba a'o ja̧kwö̧jȩ. Ja̧danö, ja̧ ba̧kwelöjatebö ji̧danö, baikwö yöbawö chujunaduwakwö, ökwödö kwi̧tji̧muduwibi ba̧kwelöjatebö chöba a'o tjö̧jakwedö, ja̧danö ba̧kwelöjatebö ökwödö israel jojodönö otiwanö tjomukwatakwedö.

^23-24 Ba̧kwelöjatebö ötjönö ösödö tjichakwedö, jawo̧ 'yabayo̧kwena, ja̧danö otikwökö mölekwena, tjitebotenia jojodöma okobe deinö chöba a'o ichibö tjösödakwedö. Ja̧danö, chö̧jelö labebö, Jerusalen comunidadtjö latejebenama, ötjö weti̧ tja̧ja̧kwobö öpöjödinadö tjiteba'iju tjedakwedö. Jobe ba̧nö, tjiteba'iju kwadö sa̧döma, wobökönö ba̧kwelöjatebö tjukwobe tjedakwedö, ja̧danö tjiteba'iju ubola ökwölama, la'akatjöda tiibökakwola ubobe tjedakwedö, —Ayö, inesö labi̧ Dios wei̧ a̧ja̧kwökönö ja̧kwawama, —jö̧ba̧lö, laebobe Isabenö Jo̧ yöawi̧ma.