Isaías 65 - Dios Iwene

Dios lȩebakwa̧bi, tjö̧jibinö pjaatakwa̧bi Isaias i̧wȩyudina jawa

¹ Baikwö yöawobe Isabenö Jo̧ma: Isabenö chömöledönö cha̧ja̧kwobö chiteada̧lijatö, jo̧kwaijayonö atjebinokobe chömöledöma. Ja̧danö ötjönö tjöbadekwajobö chi̧sȩkwijayonö, ötjönö tjisakwinokobe chömöledöma. Chömöledö israel jojodö ötjönö, —Isabenö Jo̧, pjabati, —jö̧ba̧lö atjebököjayonö, jobadönö pjatatotö jö̧ba̧lö yöta̧lijatö, —Bai chö̧ja chömöledö, akebaduwotjö, —jö̧ba̧lö.

² Jau, möle baledibanö, chömöledönö pjatatotö jö̧ba̧lö, chömamu kabebö debatö chö̧jijatö, jo̧kwaijayonö ötjönö öpöjödö kabatibadö israel jojodöma. Ötjönö öpöjödö, idöda sulabenö tjo̧mukwati̧danö, sulabenö ja̧bö ju̧kwadö.

³ Isabenö chödameakwinö ja̧tjotö jö̧ba̧lö, jwaikwöda chöba a'otjö sulabenö ja̧bö ju̧kwadö. Batjotjö sulabenö o̧'wo jawa ösödö, kwabö juwö iyadö, bloquetjö otikwemi iyawemitjö̧, ju'wedö tjösödawö̧nö kwabö juwö iyadö.

⁴ Ja̧danö yöte abökönö, yöte baledibanö wobiakonö ju̧kwawabinö ba̧ja̧dö, ö'wö babibinadökwö yötja̧lakwawotö jö̧ba̧lö. Ju'wibi tjukwobö wetinökö jawa sulabenö kwanö ju̧kwadö, kusi̧ itebiyabi kwadö, ja̧danö ju'wi wetökö kwakwawabi tobö kwadö.

⁵ Jobekwö sulabenö ja̧bö tjö̧jijayonö, yayonö otiwadösa jö̧ba̧lö omukwatadö. Otiwadösa jö̧ba̧lö, tjömöledönö yöba̧ladö, —Chö̧jobekwö yöne ichibökönaduwi, ötjöma ökwödötjö bajalekwönönö otiwo̧sa, yȩtekwapji jö̧ba̧lö ichibökönaduwi, —jö̧ba̧lö. Jobekwö sulabenö ja̧bö tjö̧ji̧ma, jwiinö chöpöjöda, ja̧bö tjö̧ji̧ma chi̧su̧nö imiyupjo sulabenö 'dö̧ekwapjodanö 'dö̧ekwi̧, möle baledibanö sulabenö 'dö̧ekwinö ubola ökwöla imiyupjodanö.

⁶ Jobekwö sulabenö ja̧bö tjö̧ji̧ wajwitenaji̧? Isabenö waiso̧sa, ja̧bö tjö̧ji̧ wȩyukwa'yema chöba a'o juna̧lo̧sa chömöledö, ja̧danö baikwö yötawaduwakwö, jobekwö sulabenö ja̧bö tjö̧ji̧tjö, wi̧inö chö̧jökakwo̧sa. Ja̧bö tjö̧ji̧ mikwa baibanö, isabenö balekwa mikwa lȩtebocha, ba̧jȩkwachenanö baibanö isabenö lȩtebakwo̧sa.

⁷ Jau, tja'dödö sulabenö ja̧bö tjö̧jinabi, idö sulabenö ja̧bö tjö̧ji̧bi jobadönö lȩtebocha. Tja'dödö sulabenö ja̧tjinadanö, jobadöbi mösa'ijutjö sulabenö omewi̧ jawa juwö, ötjönö obö tjö̧jinobe, ja̧danö jobekwö sulabenö ja̧tji̧ mikwa baibanö, ba̧jȩkwachinö jwiinö lȩtabakwo̧sa, jö̧ba̧lö yöa̧lobe Isabenö Jo̧ma.

⁸ Jo̧kwaijayonö, ju'wibi baikwö yöawobe Isabenö Jo̧ma: Baikwö wanedö yöta̧la, sula'wo ö'wejetjö uba waji̧ ocho badekwajadö, ikwö loböködö jojodöma, —Ja̧tjö ubasobu demobö jo̧be, —jö̧ba̧lö, jö̧tö? Ötjöbi ja̧danö chömöledö, israel jojodönö lȩtebijayonö, bakobe okobe deinö jobadönö söbebö lotökakwo̧sa. Jau, sulabedö tjö̧'da̧de, ötjö chömöayedö ina tjuju̧kwobe, jo̧kwajabetjö ju'wedönö lȩtebenama chiteada̧lakwo̧sa, okobe deinö jobadönö söbebö lotapji jö̧ba̧lö.

⁹ Jacob itji̧mu tupadanö jojodö, Juda jojodötjö ji̧badönö tjetatakwo̧sa Juda nijibe, ja̧danö jobadönö chiyocha, ötjö chitea mösa'iju, Juda niji mösa'ijunö tjö̧jakobetjö̧. Ötjöda omudawö chujunajawö̧ma, ja̧ niji tjomudaibakwedö, ja̧danö ötjö chömöayedöma jobe tjö̧jakwedö.

¹⁰ Jobekwö chiyakwo̧sa, ötjönö isakwadönö, ja̧danö chiyajawö̧, Saron ba̧ba̧lawemima yemidanö tja̧jwi̧mu obejadötjö su̧'bȩ baibakobe, ja̧danö Acor wabekoma, tjajwimu pakayadö tjabakwemi ja̧kobe.

¹¹ Jo̧kwaijayonö ökwödötjö ju'wedöma ötjö Isabenö Jo̧ Diosnö kabatibadöja, ja̧danö cheju ja̧'o mösa'o kwo̧'wo jwibibadöja. Ötjönö ösödökönö, ju'wedö tjösödawö̧ Fortuna mikwo̧nöbi, Destino mikwo̧nöbi ösödö, kwakwawa iyawabi, ubasobu o̧'do̧bu iyawabi otidö iyadöja, —Jo̧badöda ökwödönö baledakwa̧ omudawö tjujunakwedö, —jö̧ba̧lö.

¹² Jo̧kwaijayonö, ötjödasa ökwödönö baledakwa̧ omudawö juno̧ma, jobadömaökö. Ja̧danö jobekwö sulabenö ja̧köbaduwi̧tjö̧, ökwödönö baledakwa̧ma baikwö yötawaduwakwö: Ökwödönö jwötenama, atadökönö ji̧nadöja, ja̧danö ökwödönö yötawenama, a̧ja̧kwinöködöja. Weti̧ öpöjödö, chöba a'otjö sulabenö ja̧binadöja, jwaikwöda inesö chöpöjödi̧ jawada ja̧köbaduwobö omudawö juninadöja. Jo̧kwajabetjö̧, ökwödönö baledakwa̧ baikwö omudawö chujunajabe, ökwödönö dȩdȩbö lotjakwa̧ omudawö chujunajabe, ja̧danö dȩdȩbö lotjajawö̧ meköbaduwakwedöja.

¹³ Sulabenö ja̧köbaduwi̧tjö̧, ötjö Isabenö Jo̧ Diosma baikwö yötawaduwakwö ökwödö weti̧ a̧ja̧kwöködönö: Ötjö chömöayedö otiwanö tjukwonö, ökwödöma a̧wi̧chi̧ tjököbaduwakwedöja. Ja̧danö chömöayedö otiwanö tjowonö, ökwödöma o̧ti̧ tjököbaduwakwedöja. Ja̧danö chömöayedö tjo̧'wo ösöwachibanö tjö̧jonö, ökwödöma taba lö̧jawö kwö̧jaduwakwedöja.

¹⁴ Ja̧danö chömöayedö tjo̧'wo ösöwachibanö jwötjeba̧lonö, ökwödöma kwo̧'woduwi tjo̧bekwö budekwö jwökeba̧laduwakwedöja, —Dakwö ja̧dakwajö, —jö̧ba̧lö.

¹⁵ Isabenö jwiinö usula kwemawaduwinö lȩtebakwawö̧ja, ökwödönö söbebö lotenanö baibanö. Jau, jwiinö ökwödönö söbebö lotobetjö̧, jojodö tjöpöjojodönö lȩtebakwa̧ atjebenama, ökwödönö wanedö atjebakwedö, —Jobadönö lȩkebinadanö döpöjojodönöbi lȩkebo, —jö̧ba̧lö. Jo̧kwaijayonö isabenö chömöayedöbedönö, 'yayi tjimi ötabikwawö̧, jwiinö otiwanö jobadönö pjatatobetjö̧.

¹⁶ Ja̧ möle israel jojodönö chödameakwi̧ katatibakwo̧sa, ja̧danö cho̧'wo jwitibakwo̧sa, ajayinö israel jojodö sulabenö ja̧bö tjö̧jinama. Ja̧danö, ja̧ möle ju'wedö diosböködönö atjebökakwedö, sule ötjö isabenö Diosbo̧nöda atjebakwedö. Ja̧danö ja̧tja̧kwa̧ yöbawö tjujunenama, sule ötjö isabenö Diosbo̧ chiminöda yöbawö tjujunakwedö, jö̧ba̧lö yöawobe Diosma.

Dios mölejȩ 'yayöjȩbi, bö̧jȩ 'yayöjȩbi otidakwa̧ jawa

¹⁷ Tupakwö yöawobe Diosma: Isabenö yötawaduwakwö, mölejȩ 'yayöjȩbi, bö̧jȩ 'yayöjȩbi chotidakwo̧sa, ja̧danö jemi ikenama ajayinö wene kwujuna̧laduwa jawa omukwatöma kwomukwatibaduwökakwedöja.

¹⁸ Ja̧ möle jobekwö chotidiawö̧, kwo̧'woduwi ösöwanö, ba̧kwelöjatebö kwo̧'woduwi ösöwachibanö kwö̧jaduwakwedöja. Jau chömöledö, Jerusalen comunidad chotidocha, tjo̧'wo ösöwachibanö tjö̧jemi comunidad baibanö, ja̧danö jobe ju̧kwadöma jwaikwöda tjo̧'wo ösöwanö tjö̧jakwedö.

¹⁹ Ja̧danö ötjöma cho̧'wo ösöwanö chö̧jakwo̧sa, —Chitebo comunidad Jerusalenma isabenö otiwobe, ja̧danö chömöledö Jerusalennö ju̧kwadöma isabenö otiwadö, —jö̧ba̧lö. Ja̧danö jemi tupakwö, o̧'wo tjoachö tjubudekwökakwedö Jerusalennö ju̧kwadöma, jemi tupakwö tjubudekwobe ökwöi̧ma, la'akatjöda ökwöökakobe.

²⁰ Ja̧ möle tjemu pjebadöma, la'akatjöda juluwanö ö'wö batjibökakwedö, ja̧danö damöma, la'akatjöda damö babibökönö ö'wö batjibökakwedö. Cien o̧biya juna̧ladönö, —Möayedöda, —jö̧ba̧lö tjomukwatakwawö̧, cien o̧biyada juna̧ladö ö'wö babibadönö, —Dios lȩebawö̧, —jö̧ba̧lö ötjabikwawö̧, okobe deinö lekwe mö̧lȩ tjö̧jakobetjö̧.

²¹ Ja̧ möle, o̧do otidajadö, idöda tjotidajejunö otiwanö tjö̧jakwedö, ja̧danö batjo otidajadö̧, idöda tjotidajayutjö otiwanö tjukwakwedö.

²² Jau, ajayinö baledinadanö baledökakobe la'akatjöda. Jelobetjö ichajadöma mebibö tjejubiya tjönaukwökakwedö, ja̧danö tjöbatjiju tjönaukwökakwedö. Ja̧ möle chömöledöma isabenö lekwe möle tjö̧jakwedö, towibiya lekwe möle ji̧danö, isabenö lekwe möle tjö̧jakwedö. Jau, ja̧ möle omudawö chujuninawö̧ chömöledöma, idöda tjotidinejunö tjo̧'wo ösöwanö lekwe möle tjö̧jakwedö, ja̧danö tjotidaja̧ jawa, lekwe möle tjo̧'wo ösöwanö tjujuna̧lakwedö.

²³ Ja̧ möle tjotidi̧ma, waekwinö tjotidökakwedö, okobe jwiinö tjotidi̧tenia otiwanö laebakobe. Ja̧danö tjitji̧muma, usula tjemawakwedö batjibanö tjemökakwawö̧, otiwanö tjö̧jakwedö tjitjimuma. Jau, ötjö Isabenö Jo̧ Dios jobadönö otiwanö pjatatobetjö̧, jobekwö otiwanö tjö̧jakwedö, ja̧danö sule jobadödamaökö, tjitji̧munöbi otiwanö pjatatakwo̧sa, tjitjimubi otiwanö tjö̧jakobetjö̧.

²⁴ Ötjönö atjebakwa̧ abönö, juluwanö teada̧lökönö jobadönö pjatatakwo̧sa, ina abebö, yöba̧lö katjatakwa̧ abönö, ida̧ökö atjebakwa̧ atadö, otiwanö pjatatakwo̧sa.

²⁵ Okobe jwiinö chitea'o mösa'o ba̧kwemeachibanö, otiwanö inia tjöbökönö tjö̧jakwedö, otiwanö söbebö lotjököwö̧ tjö̧jakwedö. Ja̧ möle, tebo awilidö lobo ötjabawö̧ma, bakobe obejadökwö dösölö̧jinö ja̧nö, tju̧kwa tjukwakwedö. Ja̧danö didibadöma, meje'ye tjukwakwedö, pakayadö tjukwi̧danö. Ja̧danö a̧ko̧'döma, laböködö ja̧nö, nijinö ba̧nö nijiso̧pja̧da tjukwakwedö. Jobekwö baledakwa̧ ötjö Isabenö Jo̧ yötawajabe, isabenö yötawaja̧danö baledakobe, jö̧ba̧lö yöawobe Diosma.