Isaías 63 - Dios Iwene

Dios lȩebakwa̧ jawa Isaias i̧wȩyudina jawa

¹ —Ayö, ite Edom nijitjö icho̧, Edom niji comunidad Bosratjö, ökamijido̧ duwa̧do̧ 'dubawo̧ma, tida? Jo̧ba baikwö icho̧ma, inesö la'aka luwo̧ 'duawajiadanö 'dubawö, inesö ujulunö kwebacho̧ma, tida? —jö̧ba̧lö abebö cha̧jakwökwe, icho̧ma baikwö atado̧: —Ötjöma kwö̧jibaduwinö pjatatobö juluwo̧ Diossa, chujulunö kwö̧jibaduwinö pjatataja̧ wene yöbawö icho̧sa, —jö̧ba̧lö.

² Ataditjö̧, —Kwökamiji̧do̧ma, tajawedö duwobeda? Tajawedö ubasobu ja̧tö otidadö tjö̧kamijido̧danö ichejekwobeda? —jö̧ba̧lö abebö cha̧ja̧kwökwe, atadö, baikwö wanedö yöa̧lobe:

³ —Jo̧dawa'ye ja̧nö, ubasobu ja̧tawelö chö̧jatajabe, jojodötjö bakwo̧bi pjaatokonö, chö̧jatajabe. Dameakwö ja̧nö jobadönö chö̧jatijatö, jwiinö dameakwö ja̧tö lotijatö. Jau, ja̧tö lotawö̧, tjökwösobu dödeibinobe chökamijido̧ duwaibanö, ja̧danö tjökwösobutju okobe jwiinö chökamisima duwawajabe.

⁴ Jau, tjitebotenia jojodö chömöledö israel jojodönö sulabenö ja̧tji̧ omukwatö, balekwa mikwa lȩtebobö jö̧ta̧lijatö, ja̧danö chömöledö tjö̧jibinö pjatatakwa̧ o̧ba ida̧ökö badekwachajabe.

⁵ Ja̧danö pjaatakwo̧nö chisakwonö, bakwo̧bi deijatö, –Tajijö, bakwo̧bi chömöledönö pjabato̧ma tajawedö deobejö, –jö̧ba̧lö pjabato̧nö chisakwijayonö, bakwo̧bi deijatö. Jo̧kwajabetjö̧, jobekwö dei̧tjö̧, ötjöda chujulunö, chömöledönö tjö̧jibinö pjatatijatö, bakwo̧bi ötjönö pjabato̧ deijayonö, ötjöda jwiinö chödameakwobetjö̧, tjöpöjojodönö chujuluwobö ji̧nobe.

⁶ Jwiinö dameakwö ja̧nö, chömöledö tjöpöjojodö tjitebotenia jojodönö ja̧tö lotijatö. Jau, inesö chödameakwi̧ ji̧ owawa chojwebijatö jobadönö, ja̧tjö jwiinö 'dukwachawö̧ batjibanö, ja̧danö tjökwösobuma, nijinö tobebö lotijatö, jö̧ba̧lö wanedö atadobe Diosma.

Diosma isabenö iteda ömöledönö lȩlöjinö edo̧, jö̧ba̧lö Isaias i̧wȩyudina jawa

⁷ Isabenö Jo̧ jwaikwöda iteda ömöledönö ile nibebö ösödina jawa yötawocha, jo̧banö ösödö yöta̧locha. Jau, Isabenö Jo̧ma isabenö otiwanö iyinawö̧sa, isabenö jwiinö otiwanö pjaatinobe israel jojodönö. Jo̧bama inesö lȩlöjinö edo̧obetjö̧, ja̧danö jwaikwöda ile nibebö ösödo̧obetjö̧, jobekwö otiwanö pjaatinobe.

⁸ Israel jojodönö yöa̧linobe, —Isabenö ötjöda chömöledö bidö israel jojodöma, chitji̧mu ja̧nö, la'akatjöda ötjönö katjatibökakwedö, —jö̧ba̧lö. Ja̧danö tjö̧jibinö pjabato̧ baibanö, jobadönö pjaatinobe.

⁹ Isabenö okobe jwiinö usula emawö tjö̧jitjö̧, Diosda jobadökwö ja̧nö pjaatinobe. Jau, sule ömöayo̧nöda webö, —Chömöayo̧ angel, tjö̧jibinö pjabati, —jö̧ba̧lödamaökö, iteda da'dödökwö ja̧nö, tjö̧jibinö pjaatinobe. Jo̧bada ile nibebö, lȩlöinö edö pjabatinama, ja̧danö okobe jwiinö damötjö kwetjachinama, jo̧bada a̧la̧pedö kweatinobe.

¹⁰ Jo̧kwaijayonö, jobekwö otiwanö pjaatinajayonö, jo̧banö katjatibinobe, ja̧danö Dios O̧'wo Luwo̧ o̧'wo tjo̧ekwobö sulabenö ja̧tjinobe. Jobekwö sulabenö ja̧tjiökwe, tjöpöjojo baibinobe Diosma, ja̧danö jo̧bada da'dödönö ölakwabikwawö ö̧jinobe.

¹¹ Jobekwö balediawö̧, da'dödöma tjomukwatibinobe damötjö tjö̧jina jawa, Moises da'dödönö öibina jawa tjomukwatibinobe. Ja̧ omukwatö yötja̧lakwawinobe: —Egipto nijitjö da'dödö latjebinena, jwaibalawa duwobu ö'wejenö tjöbaledobö pjabatinama, daida? Iteda O̧'wo Luwo̧ da'dödökwö ö̧jobö webinama, daida?

¹² Iteda inesö ujulunö, Moises inesö juluwi̧ ji̧ jawa i̧sebobö pjabatinama daida? Jobama da'dödö tjöba a'otjö, ojwiyo 'da̧batö ujuninobe, jwaibalawa ö'wejenö otiwanö tjöbaledobö, ba̧kwelöjatebö jo̧banö otiwanö tjomukwatakobetjö̧,

¹³ ja̧danö jobadönö öibinobe, da̧kwinemi ö'wejenö wene jwiinö tjöbaledobö, jobekwö pjabatinama daida?—jö̧ba̧lö bajalianö omukwatibö yötja̧lakwawinobe. Isabenö otiwanö pjabatinaja chuluwo̧. Da'dödönö otiwanö ökibobetjö̧, kabayu otiwanö ba̧ba̧lawobe töbökönö kweachi̧danö, otiwanö töbökönö kwetjachinobe.

¹⁴ Ja̧danö ajikwakwawedö wabekobe 'ya̧nö, otiwanö ö'wachö tjö̧ji̧danö, ökwö Isabenö Jo̧ Kwo̧'wo Luwo̧ öibawö̧, otiwanö wene jwiinö tjö̧jinobe. Jobekwö otiwanö kwömöledönö öbibinaja chuluwo̧, otiwanö ökwönö tjomukwatakakobetjö̧, —Isabenö Jo̧ma isabenö otiwanö pjabato̧, —jö̧ba̧lö.

Dios lȩlöinö edö pjaatobö aekwa jawa, Isaias i̧wȩyudina

¹⁵ Chuluwo̧ Dios, mölejebe kwö̧jelö kwedo, inesö otiwobe, suli̧ jwiobe kwö̧jelö dö̧jobekwö kwedo ökwödö kwömöledö israel jojodönö. Chuluwo̧, ajayinö kwujulu i̧sȩbö, ökwödönö pjakatobö jö̧ba̧linaja, yemidanö ökwödönö pjakatökenaji̧? Ajayinö ökwödönö ile nibebö, ökwödönö lȩlöjinö kwedinajayonö, babe ökwödönö lȩlöjinö kwedökiji̧?

¹⁶ Ökwöma dabe'doja chuluwo̧. Da'dömine Abrahamma ökwödönö wajwibo̧, ja̧danö da'dömine israel mikwo̧bi ökwödönö omukwatö̧kö̧, jo̧kwaijayonö ökwö Isabenö Jo̧ma, ökwödaja dabe'dobo̧ma. Jau chuluwo̧, damötjö baikwö bajalenö, Israel jojodönö tjö̧jibinö pjabato̧, jö̧ba̧lö mikwo̧ja, isabenö ökwöda dabe'do jo̧ja.

¹⁷ Chuluwo̧ Isabenö Jo̧, tajawedö weköbi̧ a̧ja̧kwökönö dö̧jobö weköbaja̧da? Tajawedö domajade 'diachibanö, ökwönö yebabökönö dö̧jobö weköbaja̧da? Tjebachajö, yemidanö ökwödö, ökwöda kwömöledö badibanö kweminawö̧nö pjakatobö atebakwö. Ökwödö kwömöayedönö omukwatö, yemidanö pjakatobö atebakwö.

¹⁸ Chuluwo̧, ökwödö kwömöledö badibanö 'da̧batö kwujuninawö̧ma, lekwema dujuna̧lijökötö ökwö kwejuma, ja'yubenö lekwe dujuna̧laja̧ ikenama, döpöjojodö ökwödönö tjujuluwinobe, ja̧danö juluwajadö, jobadöma kweju ja̧tö lotjinobe.

¹⁹ Ökwödöwe chuluwo̧, la'akatjöda ökwödönö webö kwö̧jinokobedanö ichejekwa chuluwo̧, ökwödöma la'akatjöda, —Isabenö Jo̧ ömöledö, —jö̧ba̧lö ötjabiwö̧kö̧wö̧danö ichejekwadösa.