Isaías 60 - Dios Iwene

Israel jojodö tupakwö otiwanö tjö̧jakwa̧ jawa

¹ Chömöledö israel jojodö, a̧la̧ibaduwi. A̧la̧ibö, Dios dejatinö ujulu i̧sȩkwaduwi. Jau chömöledö, Isabenö Jo̧ma iteda dejatinö ujulu i̧sȩbö, ökwödönö pjaatajabe, jo̧kwajabetjö̧ dejatinö ujuluma ökwödönö idejatajabe.

² Jau chömöledö, bö̧jȩ ba̧kwemeachibanö yȩa'wo la̧kobe, tjitebo tenia jojodöma inesö yȩa'wonö tjö̧jakwedö. Jo̧kwaijayonö Isabenö Jo̧ma iteda dejatinö ujulu ökwödönö idejatakobe, ja̧danö Diosda ujulu kwi̧sȩkwaduwakwedöja.

³ Jobekwö kwidewaduwiawö̧, tjitebokwena jojodöma kwö̧jaduwobekwö tjichakwedö, yȩayi dewachi̧danö salöinö kwidewaduwiawö̧, inesö la'aka luwedöbi kwö̧jaduwobekwö tjichibakwedö.

⁴ Jobekwö baledakwa̧, baikwö yöawobe Diosma: Pöbamö edö bakwachobetenia ko̧ko̧kwö tjichobe kwedadaduwakwedöja. Kwi̧tji̧muduwi ömadö ödötjö tjichobekwö kwedaduwakwedöja, ja̧danö kwitji̧muduwi ya̧dönö apjö̧alö tjichejebobekwö kwedaduwakwedöja.

⁵ Jobekwö baledi̧ edö, jwiinö kwo̧'woduwi ösöwachibanö kwö̧jaduwakwedöja, ösödachibö kwomajadeduwima tjö̧awakobe ichejekwa, jwiinö kwo̧'woduwi ösöwachibanö kwitji̧muduwinö kwedaduwobetjö̧. Jau chömöledö, inesö mikwawi̧ jawa, jwaibalawabenö tjichejebakwedö ökwödönö, tjitebotenia nöinö mikwawi̧ jawama, ökwödönö iyö tjichibakwedö, kwo̧'woduwi ösöwachibanö.

⁶ Jwiinö nöinö tjichejebobetjö̧, kameyodö tea e'ewadöma, kwiteboduwi niji su̧'be baibanö tjö̧ba̧jekwachakwedö, Madian nijitjöbi, Efa nijitjöbi ichajadö kameyodöma. Ja̧danö Saba nijitjö orobi, omewi̧nö 'dö̧ekwi̧ jawabi tjichejebakwedö. Okobe deinö Isabenö Jo̧nö ösödö, —Israel jojodö tjösödökwe Isabenö Jo̧ma jwiinö otiwo̧, —jö̧ba̧lö jobekwö tjichibakwedö.

⁷ Cedar nijitjöbi okobe deinö tjajwi̧mu obejadönö ko̧ko̧dö tjichejebakwedö, ja̧danö Nebayot nijitjö obejadö ömadönö tjichejebakwedö, kwajwimuduwi ötjö Diosnö kwiyaduwakwawö̧ batjibanö. Ja̧danö, ötjönö iyawapjotjö, jobadönö kwabö juwö kwiyaduwitjö̧, kwiyaduwaja̧ chösödakwo̧sa, —Otiwanö ötjönö ösödö iyadöja, —jö̧ba̧lö. Ja̧danö ja̧ möle ötjö cheju otiwejuma, ajayitjö bajalekwönönö jwiinö otiweju baibanö chotidocha.

⁸ Ju'wi baledakwa̧bi baikwö yötawa: Jwaibalawa lo̧bekwö edö, ojwiyo'wo pjolachö kweachi̧danö kwedaduwakwedöja, yunukudö ewa̧jö kötjobedanö ichejewi̧ma.

⁹ Ja̧ kwedaduwakwa̧ma baikwö yöta̧la, jwaibalawa bakwachawa ju̧kwadö ötjönö ösödö tjichakwedö, —Diosma isabenö pjaatakwo̧, —jö̧ba̧lö. Ja̧danö ju'wedö tjabönö, Tarsis niji isowibiyanö, kwitji̧muduwi ödö ju̧kwadönö ichejebö tjichakwedö, ja̧danö ju'wibi tjitea orobi, platabi iyö tjichakwedö. Jau, ötjö kwuluwo̧duwi Isabenö Jo̧, Israel jojodö tjösödökwe Suli̧ Jwibo̧ Diosnö otiwanö omukwatö tjösödobetjö̧, jobekwö tjichakwedö. Jau chömöledö, ja̧ möle okobe deinö otiwanö ökwödö israel jojodönö otiwanö tjomukwatobö pjatatocha, ja̧danö jobekwö pjatatiawö̧, jobekwö kwö̧jaduwobekwö tjichakwedö.

¹⁰ Ja̧ möle ju'wedö tjitebo jojodöma ichibö, kwiteboduwi comunidadbiya tjöbebö tjotidakwedö, otiwanö 'diinö tjöekwemi conmunidadnö kwö̧jaduwakobetjö̧. Ja̧danö tjitebotenia inesö la'aka luwedöma, ökwödö kwömöayedöduwi ja̧nö, weköbaduwi̧ otidö tjö̧jakwedö. Jau chömöledö, ajayinö dameakwö ja̧nö, ökwödönö lȩtebijatö, jö̧tö? Jo̧kwaijayonö lȩbebajo̧, lȩlöjinö edö pjatatakwo̧sa, ökwödönö chösödobetjö̧.

¹¹ Ja̧danö jwiinö otiwanö pjatatobetjö̧, wene jwiinö otiwanö kwö̧jaduwakwedöja. Mölebi, yö̧tebi comunidad apjudebiya kwutumataduwökakwedöja, ba̧kwelöjatebö po̧ekwakobe apjudema, tjitebotenia jojodö tjitea mikwawi̧ jawa ökwödönö iyö tjichejebakobetjö̧. Ju'wibi tjitebotenia inesö la'aka luwedöma kwömöayedöduwi batjibanö tjö̧jakwedö, ja̧danö ju'wedö ötjibawö̧ kwö̧jaduwobekwö tjichibakwedö.

¹² Isabenö okobe deinö tjitebokwena jojodötjö, ökwödö israel jojodöda inesö la'aka luwedö kwö̧jaduwakwedöja. Kwömöayedöduwi tjö̧jobö öpöjödadö inesö la'aka luwedöbi, tjitebo jojodöbi, jwiinö waekwö tjö̧jakwedö. Kwömöayedö tjö̧jobö tjöpöjödobetjö̧, tjitebo nijima bakobe söbebö loawemida ji̧bakobe.

¹³ Jo̧kwajabetjö̧ tjitebotenia jojodöma tjitea iyö tjichakwedö. Libano nijitjö nöinö mikwawi̧ jawa, cipre towi o'iyabi, olmo towi o'iyabi, abeto towi o'iyabi tjichejebakwedö, ötjö cheju jwiinö otiwanö kwotidaduwakobetjö̧. Wanedö yöta̧la, jobekwö chömasapiya wanawemi, jwiinö otiwachibanö wetakwo̧sa.

¹⁴ Ökwödönö ajayinö usula kwemawaduwinö ja̧binadö tjitji̧mu tupadanö jojodöma, ichibö kwöba a'oduwitjö nijakwö bȩbachibö tjö̧jakwedö. Ajayinö ökwödönö öpöjödö, —Israel jojodöma mikwawöködö, —jö̧ba̧lö öpöjödinadöma, kwöba a'oduwitjö̧ tjöbamatakwedö, —Duluwedöja, —jö̧ba̧lö. Ja̧danö kwiteboduwi comunidad Jerusalenma, —Isabenö Jo̧ itebo comunidad, Israel jojodö tjösödökwe Suli̧ Jwibo̧ Dios öjemi comunidad Sion, —jö̧ba̧lö ötjabikobe.

¹⁵ Ajayinö le'dedö lotjawö̧, tjöpöjödadawö̧ kwö̧jinaduwobe chömöledö, ja̧danö kwiteboduwi ö'wejenö baledinöködö jojodöma. Jo̧kwaijayonö kwiteboduwi inesö otiwobe baibanö pjatatakwo̧sa, ja̧danö ba̧kwelöjatebö 'dö̧bibajökönö, kwo̧'woduwi ösöwachibanö kwö̧jaduwakwedöja.

¹⁶ Jau, tjitebotenia jojodö tjiteabi, inesö la'aka luwedö tjiteabi, ökwödö israel jojodöda otiwanö kwujuna̧laduwakwedöja. Ja̧danö jobekwö balediawö̧, otiwanö kwöwaisachibaduwakedöja, Ötjö Isabenö Jo̧ Diosda kwö̧jibaduwinö pjabato̧ma, jö̧ba̧lö. Jau chömöledö, —Jacob ösödinökwe Inesö Juluwo̧ Diosda dö̧jibinö pjabato̧ma, —jö̧ba̧lö kwöwaisaduwakwedöja.

¹⁷ Isabenö otiwanö chiyakwawö̧ja, baikwö wanedö yöta̧la: Bronce chiyo jö̧ta̧linemi, oroda chiyocha, ja̧danö 'dii jawa chiyo jö̧ta̧linemi, platada chiyocha. Towi ötebiya chiyo jö̧ta̧linemi, bronceda chiyocha, ja̧danö inawiya chiyo jö̧ta̧linemi, 'dii jawada chiyocha. Jwiinö otiwanö wene jwiinö kwö̧jaduwobetjö̧, wene jwiinö ja̧kwawama la'aka kwuluwedödanö ichejekwakobe, ja̧danö otiwanö ja̧bö ja̧kwawama, inesö la'aka kwuluwo̧duwidanö ichejekwakobe.

¹⁸ Kwiteboduwitjö ja'yubebi jojodönö suli̧ tjöwaedökakwedö, ja̧danö kwiteboduwi bakwachobe okwama, pjolö loböbi, söbebö loböbi suli̧ tjöwaedökakwedö. Otiwanö kwö̧jibaduwinö pjatatobetjö, pjatataja̧ omukwatö, kwitebo comunidad tjöekwemima, —Ji̧kwawade, —jö̧ba̧lö kwimidaduwakwedöja, ja̧danö apjudema, —Diosnö ösödö lo̧awade, —jö̧ba̧lö kwimidaduwakwedöja.

¹⁹ Ja̧danö, ja̧ möle, möle jawo̧ma idejatökakwo̧, ja̧danö yö̧te jawo̧bi idejatökakwo̧. Ötjö Isabenö Jo̧ Diosda kwiteboduwi chidejatakwo̧sa, ötjö dejatinö chujuluda otiwanö dejatakobe, otiwanö edö kwö̧jaduwakobetjö̧.

²⁰ Jobekwö ötjöda dejatö chö̧jobetjö̧, möle jawo̧ la'akatjöda meajokobedanö ichejekwakobe, ja̧danö yöte jawo̧ dewi̧ma, la'akatjöda 'dö̧ibajöködanö ichekwakobe. Jau chömöledö, ötjöda tibibökönö, ba̧kwelöjatebö dejatö chöjakwo̧sa. Budekwö kwö̧jaduwi̧ma 'dö̧ibakobe,

²¹ ja̧danö okobe deinö kwömöledö israel jojodöma, bakobe weti̧ a̧ja̧kwö tjö̧jakwedö, ja̧danö 'döbibajökönö, ba̧kwelöjatebö otiwanö israel nijinö tjö̧jakwedö. Jau chömöledö, jojodö towi tjujuni̧danö, ötjöda israel jojodönö chujunocha, —Duluwo̧ Diosma otiwo̧, —jö̧ba̧lö ötjönö tjösödakobetjö̧. Ja̧danö chujunajawö̧, otiwanö 'diinö tjö̧jakwedö.

²² Israel jojodötjö baikwönönöbedöma, ba̧jȩkwaso baibanö otiwanö tjö̧jakwedö, ja̧danö jelesotjö baikwönönö ja'yuwasoma, tjitebosaso jwiinö juluwasö batjibakwedö. Ja̧ baledakwa̧ma, ötjö Isabenö Jo̧ Diosda yötawaduwakwö, ja̧danö baledakwa̧ möle badekwachenama, juluwanö jobekwö baledobö wetakwo̧sa, jö̧ba̧lö yöawobe Diosma.