Isaías 6 - Dios Iwene

Isaias i̧'wi̧didanö Diosnö edina jawa

¹ Juda niji inesö la'aka luwo̧ Uzias mikwo̧ ö'wö baibina o̧bama baikwö baledinobe: Ja̧ o̧bama, ötjö Isaiasma Isabenö Jo̧ Diosnö chedijatö. Inesö la'aka luwo̧ iteakanö ö̧bobe chedijatö, möakanö ö̧bobe chedijatö, ja̧danö inesö la'aka luwo̧ ö̧kamijido̧ ödöado̧ chedijatö. Ja̧do̧ ö̧kamiji̧do̧ otiwado̧ma jwiinö ödöa̧do̧ ji̧nobe, ja̧do̧tjö iteda eju su̧'be baibenanö.

² Ja̧danö jo̧ba öba a'o wamekwöchobe, ömöayedö serafines ötjabawö̧ tjuluwo̧nö tjiteada̧lobe chedijatö. Jobadö serafinesbedöma, tjöwa̧japa jelemutjö bakwapa̧ juna̧ladönö chedijatö, ja̧danö tjuluwo inesö otiwiawö̧, dö̧pa̧latajanö tjöba muchekwö tjö̧jobe chedijatö, ja̧danö dö̧pa̧latajanö tjömasapiya muchekwö tjö̧jobe chedijatö, ja̧danö dö̧pa̧latajanö kötjobe chedijatö.

³ Ja̧danö bakwo̧nökwena jwötjakwawobe cha̧ja̧kwijatö, —Bakwainö sulabe jwibö jo̧, bakwainö sulabe jwibö jo̧, bakwainö sulabe jwibö jo̧, duluwo̧ Okobe Jwiinö Juluwo̧ Isabenö Jo̧ Diosma. Jo̧bama inesö dejatinö juluwo̧obetjö̧, okobe jwiinö bö̧jema iteda dejatinö ujulutjö su̧'bȩ baibajabe, —jö̧ba̧lö bakwonökwena jwötjakwawobe cha̧ja̧kwijatö.

⁴ Jobekwö labinö yötja̧lenama, Dios eju la'aka tjöawinobe, ja̧danö imiyu'wo su̧'bȩ baibinobe Dios ejuma.

⁵ Jobekwö edö, jwiinö yetaibijatö, ja̧danö yöta̧lijatö, —Ayö, ötjöwe, isabenö debö chi̧'yakwo̧sa, ötjö sulabo̧ma chöbajalenö inesö la'aka luwo̧ Okobe Jwiinö Juluwo̧ Isabenö Jo̧ Diosnö chedajobetjö̧. Jau, sulabenö yöba̧lo̧chobetjö̧, cha̧jȩ yȩökwesa, ja̧danö chömöledö israel jojodö tja̧jȩ yȩbadö tjö̧'da̧de jo̧sa, ötjöwe, isabenö debö chi̧'yakwo̧sa, —jö̧ba̧lö yebabinö yöta̧lijatö.

⁶ Jobekwö yöta̧liökwe, serafinesbedötjö bakwo̧ma pji̧ekwakanö, Diosnö iyawötetjö ubö̧'a emibö, chö̧jobekwö köbö ichinobe,

⁷ ja̧danö ubö̧'anö cha̧jȩ mabö̧ yöa̧linobe, —Isaias, Bö̧'a ubö̧'anö kwa̧jȩ matajabe, ja̧danö bö̧'a kwa̧jȩ maajobetjö̧, wene kwujuna̧li söbebö loajabe, ja̧danö kwusula dichö loajabe, —jö̧ba̧lö.

⁸ Jemi ikenama Isabenö Jo̧ yöa̧lobe cha̧ja̧kwijatö, baikwö yöa̧li̧ma: —Tinö wetakwa̧da, chömöledö israel jojodönö yöa̧lobö? Jobadönö yöda̧lo jö̧da̧lima, tinö wetakwa̧da, jo̧bada yöawakobetjö̧? —jö̧ba̧lö. Jobekwö abebö a̧ja̧kwi̧tjö̧, ötjö Isaiasma chatadijatö, —Chuluwo̧, ötjöma bai kwöba a'o jo̧sa, ötjönöda webi, yökawo jö̧ka̧li̧ma yötawakobetjö̧, —jö̧ba̧lö.

⁹ Chatadiökwe, —Jau, 'ya̧wi. Israel jojodönö yöbawaji baikwö: –Tupakwönönö yötawi̧ kwa̧ja̧kwaduwakwedöja, jo̧kwaijayonö yötawaja̧ okwa jawama, wajwiköbaduwakwedöja. Ja̧danö chi̧sȩbi̧ jawa kwedaduwakwedöja, jo̧kwaijayonö chi̧sȩbi̧ okwa jawa edöma kwöwaisachibaduwökakwedöja, –jö̧ba̧lö yökawodönö.

¹⁰ Jau Isaias, nöinö yöka̧lawö̧, tjomajadenö omukwatöködö batjibanö yökawakwo̧ja, ja̧danö tjölakiyu a̧ja̧kwöködö batjibanö yökawakwo̧ja, ja̧danö tjöbajale tjewawadö batjibanö kwi̧sȩbakwo̧ja. Jo̧kwajabetjö̧ otiwanö yökawijayonö, tjölakiyunö otiwanö tja̧ja̧kwökakwedö, ja̧danö tjöbajalenö otiwanö tjedökakwedö, ja̧danö tjomajade okwa söinö tjomukwatökakwedö. Jobekwö otiwanö ösödö tjomukwatitjö̧ma, sulabenö tjomukwati̧ tjöbalewacho jö̧tja̧lena, ja̧danö lȩtebi̧tjö̧ tjö̧jibo jö̧tja̧lena, —jö̧balö weinobe Isabenö Jo̧ma ötjönö.

¹¹ Jobekwö yöa̧litjö̧, Isabenö Jo̧nö atadö abebö cha̧ja̧kwijatö: —Ayö Chuluwo̧ Isabenö Jo̧, dokwa lekwe yöka̧laja̧danö baledakwa̧da? —jö̧ba̧lö. Abebö cha̧ja̧kwökwe, —Tjitebo comunidadbiya söbebö loawemi jojodö deemi baibenanö kabatö jobekwö baledakobe, ja̧danö tjejubiya jojodö deejubiya baibenanö kabatö jobekwö baledakobe, ja̧danö israel niji suli̧ waekwenanö kabatö jobekwö baledakobe.

¹² Jau, jobekwö baledakobe ötjö Isabenö Jo̧ma israel jojodönö tjitebotjö labebö lobö, ödö a'dewö lotenanö baibenanö kabatö. Ja̧danö israel nijitjö jojodö deemikwena nöinö ji̧nö baibenanö kabatö jobekwö baledakobe.

¹³ Isabenö jwiinö usula tjemawakwedö israel jojodöma, baikwö yöta̧la: Yöta̧laja̧danö baledaja̧ ikenama, domulataja jawa osotjö, jelemutjö ö'wejemu jawa oso ida̧ökö deijayonö, ina bakwaso ina israel nijinö tjö̧jitjö̧ma, tjöpöjojodöma yemidanö israel niji juwö tjichakwedö. Jo̧kwaijayonö, jobekwö baledijayonö, bakobenö debö tji̧'yökakwedö israel jojodöma, baikwö wanedö yöta̧la: Encina towibi, roble towibi jutjaja̧ ikena, towi la'aka 'yebö lotjökötjö̧ma, yadakwö towi la'akatjö yemidanö pokwobö jȩna, jö̧tö? Ja̧danö, ba̧jȩkwadö debö tji̧'yijayonö, ina ji̧badö tjö̧jena, tjitjimu tupadanö jojodö inesö otiwadö chömöledöma yadakwö tjö̧jakobetjö̧, —jö̧ba̧lö yöawinobe Isabenö Jo̧ma, ötjö Isaiasnö.