Isaías 59 - Dios Iwene

Isabenö tjö̧jibinö pjaatobö juluwo̧ Diosma, jö̧ba̧lö Isaias i̧wȩyudina jawa

¹ Chömöledö, kwö̧jibaduwinö pjaatokobetjö̧, Diosnö kwomukwataduwena, —Dö̧jibinö pjaatoböma juluwö̧kö̧ Isabenö Jo̧ma, ja̧danö ölakiyunö otiwanö a̧ja̧kwö̧kö̧, —jö̧ba̧lö. Jo̧kwaijayonö ja̧maökö chömöledö.

² Ökwödönö pjabatökönö ö̧ji̧ma, baikwö labebö lobö yötawaduwakwö chömöledö: Ökwödö sulabenö ja̧bö kwö̧jaduwi̧ma, tjöekwemidanö ji̧, Diostjö 'da̧bachibö kwö̧jaduwakobetjö̧. Ja̧danö sulabenö ja̧bö kwö̧jaduwiökwe, kwö̧jaduwelö jelobekwö öjalachibajabe Diosma, ja̧danö akebaduwi̧ a̧ja̧kwö̧kö̧.

³ Jau chömöledö, ökwödöma isabenö Dios öba a'otjö sulabenö yȩbekwadöja. Sulabenö jojodönö kwabö lobadö kwö̧jaduwobetjö̧, kwömamuduwi tjökwösobutjö yȩekwamu jo̧be, ja̧danö kwötö'aduwima, ju'wi sulabenö ja̧köbaduwi̧tjö yȩobe. Kwa̧jȩduwinö, omöna yöka̧laduwajabe, ja̧danö kwineneduwinö suli̧ jawa yöba̧ladöja.

⁴ Lȩekwa luwedö tjöba a'o tjö̧jobö jojodönö ökibaduwenama, jweinö lȩekwa yötjawoböma isakwöködöja. Ökibaduwajökwenö lȩekwa yötjawobö jwiijayonö, tjöba a'o ja̧nö, omöna yöba̧ladöja. Ökwödöma ba̧kwelöjatebö ju'wedönö suli̧ kwöwaedaduwakwa̧ omukwatö junadöja, ja̧danö omukwatö kwujunaduwaja̧danö badekwachinö sulabenö ja̧badöja.

⁵ Jojodönö suli̧ kwöwaedaduwobö omukwatö kwujunaduwi̧ma, baikwö wanedö yöta̧la: A̧ko'da nibadö tjiyabiyadanö ichejekwi̧, ja̧danö bakwo̧ iyapo ukwobö jö̧a̧li̧tjö̧ma, tjomadebatjö ö'wö babibo̧, ja̧danö iyapo 'dabö po̧ibenama, inesö nibo̧ a̧ko'da laebobe, jobekwö ichejekwobe omukwatö kwujunaduwi̧ma. Ja̧danö kwotidaduwi̧ma, awöka acha'ba kwotidaduwobedanö ichejekwa, ja'yubebi mikwawokobetjö̧.

⁶ Jau chömöledö, awöka acha'bama, ja'yubebi mikwawokobe, awöka acha'batjö kamiji̧do̧ otidö, 'dutjawobö jwii̧, jö̧tö? Ökwödö kwotidaduwi̧bi ja̧danö chömöledö. Kwotidaduwi̧ma, bakobe sulabenö ja̧badöja, ja̧danö jojodönö sulabenö kwabö lobadöja.

⁷ Ökwödöma sulabenö ja̧köbaduwotö jö̧ba̧lö juluwanö ö'öbakwawadöja, juluwanö jojodö sulabenö ja̧böködönö kwabö lobadöja. Kwomukwataduwi̧ma, jwaikwöda sulabenö Dios öpöjödi̧ jawa omukwatadöja, ja̧danö kwekachaduwii̧tenia suli̧ waedadöja, kwekachaduwaja̧ okobe söbebö loawemida ji̧bi̧nö.

⁸ Ökwödöma wene jwiinö jojodökwö dösölö̧jinö ja̧kwawa wajwibadöja chömöledö, okobe jwiinö ja̧bö kwö̧jaduwi̧ma Dios wei̧ a̧ja̧kwökönö ja̧döja. Isabenö suli̧ waedadöja ökwödö israel jojodöma, baikwö wanedö yöta̧la: Mana kwotidaduwenama, jweinö otidökönö, wi̧su̧amada otidadöja, ja̧danö okobe deinö kwotidaduwaja̧ mananö kwebachadöma, la'akatjöda wene jwiinö otiwanö tjö̧jö̧kakwedö.

Ökwödö israel jojodöma, isabenö sulabenö ja̧badösa, jö̧ba̧lö Isaias i̧wȩyudina jawa

⁹ Jobekwö sulabenö ja̧bö ju̧kwadösa ökwödö israel jojodöma chömöledö, jo̧kwajabetjö̧ ökwödönö pjabatö̧kö Diosma. Diosnö omukwatadösa, —Diosma dö̧jibinö pjaatakwo̧, iteda ujulu i̧sȩbö pjaatakwo̧, —jö̧ba̧lö. Jo̧kwaijayonö, —Juluwanö dewachakobe, —jö̧ba̧lö teada̧lö dö̧jijayonö, yȩa'woda lo̧be. Dewobe kwedachakwa̧ diteada̧lijayonö, bakobe dewokobe, yȩobe kwebachadösa.

¹⁰ Kwedachenama, tjöekwemi madotö jö̧ba̧lö, mamabö kwebachadösa, tjöbajale tjewawadö mamabö kwetjachi̧danö. Möle ja'ö kwedachijayonö, yi̧bena yi̧atibena kwedachobedanö tötöbö kwebachadösa. Ja̧danö isabenö juluwöködösa chömöledö, 'dö̧bachöködö tjö̧'dade ja̧nö, ida̧ökö ö'wö babibajadödanö ichejekwadösa.

¹¹ Bakobe usula emawö ja̧dösa. Ojwe yawi tului̧ ökwöi̧danö, a̧wi̧chi̧ lö̧jawö dukwa'wotjö kwololo ökwöobe, ja̧danö yunuku jwöi̧ ökwöi̧danö, budekwadösa. Dios pjaatakwa̧ teada̧lö ja̧dösa, —Dios juluwanö iteda ujulu i̧sȩbö pjaatowe, —jö̧ba̧lö, jo̧kwaijayonö dö̧jibinö pjabato̧ma dö̧jelö ödö jo̧, ja̧danö bakobe usula emawadösa.

¹² Chuluwo̧ Dios, jobekwö usula emawö ja̧dösa ökwödö israel jojodöma, ökwödö sulabenö ja̧di̧ma, kwöba a'otjö ba̧jȩkwobetjö̧. Jau chuluwo̧, kwöba a'o ja̧nö, jwaikwöda sulabenö ja̧bö ju̧kwadösa, ja̧danö sulabenö ja̧di̧ma öwaetjöda öwawinö i̧sȩkwobe, kwöba a'otjö wene dujuna̧li̧ma. Ökwödöma sulabenö ja̧daja̧ waisadösa chuluwo̧,

¹³ —Ökwö Isabenö Jo̧ weköbi̧ a̧ja̧kwö dö̧jakwedösa, —jö̧da̧linajayonö, a̧ja̧kwökönö sulabenö ja̧badösa. Ja̧danö ökwö dösödökwe ökibi̧danö, kwökömanö ludo jö̧da̧lijayonö, jalachibö kadatibajabe. Ökwödöma jojodönö suli̧ waedö, sulabenö omöna yöba̧ladösa, domajadenö sulabenö omukwatajadö, omöna yöba̧ladösa. Jobekwö usula tjemawinö sulabenö ja̧badösa chuluwo̧ Dios, isabenö kwöba a'otjö wene juna̧ladösa.

¹⁴ Ja̧danö ditebotjö lȩekwa luwedö yötjawenama, lȩekwama jweinö yöbawöködö, Dios wei̧ a̧ja̧kwö ja̧kwawama, ditebotjö ödöobe ichejekwa. Jau, jojodö tjo̧ko̧kokwelö ja'yubebi jwei̧ wene yöba̧lökönö, omönada yöba̧ladösa, ja̧danö dö̧'dadetjö, otiwanö ja̧bö ja̧kwawama jwiobe.

¹⁵ Ökwödö dö̧jelöma, isabenö yöa̧lakwawama 'dö̧ibajabe, ja̧danö bakwo̧ sulabenö ja̧awa kaatibobö jö̧ba̧lo̧ma, ju'wedö suli̧ tjöwaedobö jö̧tja̧lökwe babibo̧. Jobekwö dö̧ji̧ edö, öpöjödinobe Isabenö Jo̧ma, —Israel jojodö ja̧bö tjö̧ji̧ma chöpöjöda, ja'yubebi lȩekwa jweinö yöbawöködötö, —jö̧ba̧lö.

¹⁶ Ökwödönö edö, —Tajawedö jojodö sulabenö ja̧tjawö̧nö pjabato̧ deobejö? Tajawedö bakwo̧bi tjö̧'da̧de jamatö, sulabenö ja̧tji̧ katjatibobö weokobejö? Bakobe sulabedö israel jojodöma, —jö̧ba̧lö öpöjödö edajabe. Jo̧kwajabetjö̧ jelo̧ pjabato̧ deiökwe, Diosda dö̧jibinö pjaatakwo̧. Bakwainö otiwanö ja̧bö jo̧ ö̧jobetjö̧, iteda ujulu i̧sȩbö dö̧jibinö pjaatakwo̧.

¹⁷ Wanedö yöta̧la, ölakwabikwawadö 'dutjawi̧danö 'dubawo̧ Diosma, otiwanö ja̧bö ja̧kwawama, omukonö tjöeba̧la̧do̧ baibanö 'dubawo̧, ja̧danö tjö̧jibinö pjaatakwawama, 'diebasöse tjöekwösedanö, butjawo̧. Jojodönö lȩebakwa̧ma, ö̧ka̧misi 'duawi̧danö 'dubawo̧, sulabenö ja̧bö tjö̧jiökwe ödameakwi̧ma wamesa̧do̧danö 'dubawo̧.

¹⁸ Isabenö jweinö lȩebakwo̧ Diosma, jo̧ba öpöjojodö sulabenö ja̧badönö. Sulabenö ja̧tja̧ja̧ badekwachinö, balekwa mikwa jweinö lȩebakwo̧. Dameakwö lȩebakwo̧ öpöjojodönö, sulabenö ja̧tjiökwe balekwa mikwa lȩebakwo̧, bö̧jȩ bakwachö̧jȩ ju̧kwadö öpöjojodönöbi jweinö lȩebakwo̧.

¹⁹ Jobekwö lȩebiawö̧, Isabenö Jo̧ imi omukwatö yetjaibakwedö, jawo̧ meajobekwö ju̧kwadöma. Ja̧danö jawo̧ laebobekwö ju̧kwadöbi dejatinö ujulu yetjaibakwedö. Jau, Dios lȩbebö ichakwa̧ma, juluwanö ujulunö ichakwo̧. Isabenö Jo̧ labinö pjubö, ojwe buluwanö labinö isuwobö wei̧danö, juluwanö lȩbebö ichakwo̧.

²⁰ Baikwö yöawobe Isabenö Jo̧ma: Ja̧ möle tjö̧jibinö pjabato̧ma Sion mösa'obe ichibakwo̧, ja̧danö Jacob itji̧mu tupadanö jojodötjö, sulabenö ja̧bö tjö̧ji̧ kabatibö balewachadönö tjö̧jibinö pjaatakwo̧, jö̧ba̧lö yöawobe.

²¹ Ju'wibi yöawobe Isabenö Jo̧ma: Ja̧danö, ötjöma jobadö tjö̧jibinö pjatatajawö̧nö isabenö pjatatakwa̧ wene yöbawö chujunakwo̧sa, baikwö: Ökwödökwö jo̧ cho̧'wo luwo̧ma, la'akatjöda kwö̧jaduwelö laebökakwo̧. Ja̧danö ötjö yötawi̧, yöka̧laduwobö chiyaja̧ chiwenema, ba̧kwelöjatebö yöba̧lö kwö̧jaduwakwedöja, ja̧danö kwitji̧muduwibi ba̧kwelöjatebö yöba̧lö tjö̧jakwedö, ja̧danö tji̧tji̧mu tupadanö jojodöbi ba̧kwelöjatebö chiwene yöba̧lö tjö̧jakwedö. Bemi tupakwö, ba̧kwelöjatebö 'dö̧ibajökönö, jobekwö yöba̧lö kwö̧jaduwakwedöja, jö̧ba̧lö yöawobe Isabenö Jo̧ma.