Isaías 58 - Dios Iwene

Israel jojodöma sule wamenöda Diosnö ösödadö, Isaias i̧wȩyudina jawa

¹ Baikwö yöawinobe Diosma: Labinö jwököbo tjo̧'omanö jwöbökönö, isabenö labinö jwököbo, trompeta labinö ökwöi̧danö, labinö jwöbeba̧lö yökawo ötjöda chömöledö Jacob itji̧mu tupadanö jojodönö, —Ökwödö ja̧bö kwö̧jaduwi̧ma sulabenö ja̧bö ju̧kwadöja, —jö̧ba̧lö.

² Wamenö otiwanö ötjönö ösödadö, mölekwena chejube ichibö, weti̧ jawa tjöwaisobö ösödinö isakwadö. Jau, wamenö tji̧sȩbi̧ edö, —Bidöma otiwanö tjösödökwe Dios wei̧ a̧ja̧kwö ju̧kwadötö, tjösödökwe Dios lȩekwa yöawi̧ma ja'yubebi kabatiböködötö, —jö̧ba̧lö jojodö edö tjomukwatena. Ba̧kwelöjatebö chöba a'o ichibö abebadö, ötjöda yötawakwa̧ lȩekwa tja̧ja̧kwobö, ja̧danö ba̧kwelöjatebö chöba a'o tjichibobö ösödadö.

³ Ja̧danö ötjönö abebö a̧ja̧kwadö, —Duluwo̧ Dios, ökwödöma du̧kwa̧ ö̧tö̧chö dö̧jijayonö, ö̧tö̧chö dö̧ji̧ma edö̧kö̧ja ichejekwa, ja̧danö kwöba a'otjö, –Mikwawöködösa, –jö̧ba̧lö di̧sȩkwajabe. Tajawedö jobekwö dö̧ji̧ edö, otiwa jö̧ba̧lö kwösödokobeda? Otiwanö di̧sȩbi̧ edö kwösödo jö̧ka̧lajabe Dios, —jö̧ba̧lö abebö a̧ja̧kwadö. Jobekwö abebö tja̧ja̧kwi̧tjö̧, baikwö chatadawö̧: Ökwödö kwu̧kwaduwi ö̧tö̧chö kwö̧jaduwenama, ökwödöda kwo̧'woduwi ösöwachibotö jö̧ba̧lö ö̧tö̧chö ja̧döja. Ja̧danö, —Dios öba a'otjö otiwanö ö̧tö̧chö ja̧dösa, —jö̧ba̧lö ö̧tö̧chö kwö̧jaduwonö, weti̧ a̧ja̧kwökönö kwömöayedöduwinö sulabenö usula tjemawi̧nö webadöja.

⁴ Jau, ö̧tö̧chö kwö̧jaduwonö, jwöjwöbakwawö ölakwabikwawadöja, ja̧danö labinö jojodönö kwabadöja, sulabenö. Kwedaduwemi, jobekwö ja̧bö kwö̧jaduwonö, ö̧tö̧chö ja̧köbaduwi̧ma, ajayitjö bajalekwönönö otiwanö akebaduwi̧ cha̧ja̧kwobö pjaatenaji̧?

⁵ Ja̧jaye ö̧tö̧chö ja̧kwawa chösödenaji̧ chömöledö? Ökwödöma sulabenö ja̧bö kwö̧jaduwonö, —Mikwawöködösa, —jö̧ba̧lö, isa'ye nijakwö bȩachibobedanö bȩbachibadöja, ja̧danö epju̧yu̧nö kalukaa̧do̧ 'dubawö, ökwölaso̧pja̧nö ba̧jadöja, —O̧'wo tjo̧achadösa, —jö̧ba̧lö kwi̧sȩkwaduwotö jö̧ba̧lö. Jobekwö ja̧bö, —Dios öba a'o ö̧tö̧chö ja̧dösa, —jö̧ba̧ladöja, kwedaduwemi weti̧ a̧ja̧kwökönö, jobekwö kwi̧sȩbaduwi̧ edö, ötjö Isabenö Jo̧ma chösödenaji̧? Chösödökö chömöledö.

⁶ Isabenö chöba a'otjö ö̧tö̧chö ja̧kwawa chösödi̧ma, baikwö yötawaduwakwö chömöledö: Sulabenö ka̧lena tjödinawö̧nö ejatö loköbaduwobö, ja̧danö sulabenö 'diinö tjotidobö weköbaduwawö̧ usula emawadönö kwejataduwobö, ja̧danö usula tjemawinö wetjawö̧ tjö̧jibinö pjakataduwobö, ja̧danö ömöki̧ jawa e'ewakwawö̧'atenia 'dabebö loköbaduwobö.

⁷ Ja̧danö ju'wibi, kwu̧kwaduwitjö a̧wi̧chi̧ tjöbadönö iyabikwawö pjakataduwobö, ja̧danö tjeju jwibanönö pjabatö, kwejuduwinö tekataduwobö, ja̧danö tjökamisi jwibadönö 'dukataduwobö, ja̧danö kwömöledöduwi tjöba a'o ju̧kwawökönö, otiwanö jobadönö pjakataduwobö. Jobekwö laebobe isabenö chösödi̧danö ö̧tö̧chö ja̧kwawa chömöledö, ökwödö kwisȩbaduwi̧danömaökö.

⁸ Jobekwö ja̧bö kwö̧jaduwitjö̧ma, baikwö wanedö yöta̧la chömöledö: Ökwödö otiwanö kwidejataduwi̧ma, yeayi dewachi̧danö otiwanö kwidejataduwakwedöja, ja̧danö 'dö̧kachaduwi̧tjö juluwanö kwö̧bibajaduwakwedöja. Ja̧danö weti̧ a̧ja̧kwö kwö̧jaduwi̧ma, kwabönöduwi tjöekwakadanö ja̧kobe, ja̧danö ötjö Isabenö Jo̧ dejatinö chujuluma, kwökömaduwikwöchobe tjöekwakadanö ja̧kobe, jö̧ba̧lö yöta̧laduwakwö.

⁹ Jobekwö ja̧bö ja̧nö ötjönö jwöbö akebaduwakwedöja, ja̧danö ötjö Isabenö Jo̧ma chatadakwo̧sa. Jwököbaduwenama, chatadocha, —Bai chö̧ja chömöledö, abebaduwitjö, —jö̧ba̧lö. Weti̧ a̧ja̧kwö kwö̧jaduwitjö̧ma, jobekwö ja̧kobe chömöledö, baikwö yöta̧la: Kwö̧'dadeduwitjö usula tjemawinö weawa 'da̧batö loköbaduwitjö̧ma, ja̧danö ju'wedönö wanedö, —Sulabenö ja̧badö, —jö̧ba̧lö omöna yöka̧laduwi̧ kakatibaduwitjö̧ma,

¹⁰ ja̧danö a̧wi̧chi̧ tjöbadönö pjabatö kwotidaduwitjö̧ma, ja̧danö usula emawadö jwitji̧ iyö pjakataduwitjö̧ma, wanedö yöta̧la: Yȩa'wo okwa kwö̧jaduwelö otiwanö kwidejataduwakwedöja, ja̧danö yö̧te kwö̧jaduwi̧ma, möle ja'ö dewi̧danö otiwanö kwö̧jaduwakwedöja.

¹¹ Ja̧danö ötjö Isabenö Jo̧ma ba̧kwelöjatebö ökwödönö jwebebö ötibakwo̧sa, ja̧danö kököemi kwö̧jaduwena, otiwanö jwiköbaduwi̧ chiyakwo̧sa, ja̧danö kwiwe'iju kwujuluwaduwachibanö pjatatakwo̧sa. Jobekwö otiwanö pjatatiawö̧, batjo otiwanö yoliwayudanö kwichejekwaduwakwedöja, ja̧danö ojwese'do la'akatjöda kököachibökö'dodanö kwichejekwaduwakwedöja.

¹² Jau chömöledö, jobekwö weti̧ a̧ja̧kwö kwö̧jaduwitjö̧ma, pjolö lotjinemi comunidad otiwanö kwotidaduwakwedöja, damötjö tjödina comunidad la'aka yemidanö kwotidaduwakwedöja, otiwemi comunidadnö kwö̧jaduwakobetjö̧. Ja̧danö ökwödönö ötjabikwawö̧ja, tjöekwemi pjolö lotjinemi 'yayi baibanö otidadö, ja̧danö jojodö tjö̧jemi mana yemidanö 'yayi baibanö otidadö, ötjabikwawö̧ja.

¹³ Jau chömöledö, otikwökö möle jawa weti̧ otiwanö a̧ja̧kwö, otidökönö ja̧nö, ökwödöda kwösödaduwi̧ ja̧bökönö kwö̧jaduwo, baikwö yöta̧la: Otikwökö möle kwösödaduwo, —Isabenö Jo̧ Dios 'da̧batö ujuninemi möle otiwa, ja̧ möle otiwanö omukwatö, dösödi̧da ja̧bö dö̧joko. Ja̧ möle ökwödöda dösödi̧ jawa omukwatökönö, ökwödöda yöda̧lakwawi̧ jawa omukwatökönö, jweinö Dios da̧batö ujunina möle omukwatö dö̧jo, —jö̧ba̧lö.

¹⁴ Jobekwö 'da̧batö chujunina möle otiwanö omukwatö kwö̧jaduwitjö̧ma, ötjö Isabenö Jo̧ Diosnö ösödö, kwo̧'woduwi ösöwachibanö kwö̧jaduwakwedöja. Ja̧danö, isabenö otiwanö pjatatakwawö̧ja, wanedö yöta̧la, inesö otiwanö tjomukwatawö̧ bakibaduwanö, bö̧jȩ möemitenia kwekachaduwobö wetakwo̧sa, ja̧danö kwa'dömine Jacobnö chiyina jawa omudawadö bakibaduwanö chiyakwawö̧ja. Jobekwö ötjö Isabenö Jo̧ma yöbawö chujunajabe chömöledö, ja̧danö weti̧ a̧ja̧kwö kwö̧jaduwitjö̧ma, jobekwö isabenö pjatatakwawö̧ja, jö̧ba̧lö israel jojodönö yötawobö weinobe Diosma.