Isaías 57 - Dios Iwene

Israel jojodöma sulabenö o̧'wo jawa ösödadö, Isaias i̧wȩyudina jawa

¹ Dios wei̧ a̧ja̧kwö jo̧ma, ö'wö babibo̧, ja̧danö ö'wö baibiawö̧, jo̧kwadanö tjedökwe. Ja̧danö jwaikwöda Diosnö ösödö ju̧kwadöma debö 'ya̧dö. Jobekwö baledi̧ edö, wajwibadö jojojodöma, tajawedö ö'wö babibadöjö, jö̧ba̧lö. Ja̧ baled̈i̧ baikwö labebö lobö yöta̧la chömöledö: Inesö ju'wedö usula tjemawakwa̧ tjöbaledapji jö̧ba̧lö, ju'wedö tju̧ju̧kwelö Dios emawö̧ chömöledö.

² Ja̧danö, ö'wö babibajadö, wene jwiinö ju̧kwadö. Jau, wanedö yöta̧la, jobadö Dios wei̧ a̧jakwö ji̧nadöma, ö'wö babibajadö, babema wene jwiinö kamapjonö ba̧nö abö ju̧kwadö.

³ Jo̧kwaijayonö, jobekwö wene jwiböködöja, ökwödö Dios wei̧ a̧ja̧kwöködöma. Ökwödöma sulabedö mea bobadö tjitji̧mudanöbedöja, ja̧danö bakwo̧ ilekwobökujutjö itji̧kwinawö̧danöbedöja, ja̧danö jilekweböködökwö 'da̧'da̧bakwawö ju̧ju̧ jeminawö̧danöbedöja. Ökwödö Dios wei̧ a̧ja̧kwöködöma, yöne ichibö kwa̧ja̧kwaduwo.

⁴ Ökwödö oköbaduwökwenö kwöwaisaduwi̧ji̧? Ökwödöma obö, kwaaduwi alebö, kwineneduwi labebö, Diosnöda obadöja chömöledö, sulabenö. Ökwödöma sulabenö ja̧awa itji̧mudanöbedöja, ja̧danö omöna yöa̧lakwawa itji̧mudanöbedöja.

⁵ Ökwödöma Diosnöda kwösödaduwo jö̧ka̧laduwijayonö, encina towibiya jȩnabi, okobe jwiinö ju'wi towibiya teebebi, jwaikwöda o̧'wo jawa ösödadöja. Ja̧danö o̧'wo jawa ösödö, wabekotjöbi, inawa ötölatjöbi, kwitji̧muduwinö kwabö iyadöja.

⁶ Ökwödöma inawiya öwiyawi̧ wabekotjö emadöja, sayuwi̧ öwiyama, kwösödaduwawö̧ o̧'wo jawa baibanö. Ja̧danö jobadönö ösödö, owawa iyawa jawa tobebadöja, ja̧danö batjo waji̧ iyadöja. Jobekwö sulabenö ja̧köbaduwiökwe, baikwö yöa̧lobe Diosma: Sulabenö ja̧köbaduwi̧tjö̧, ökwödönö lȩtebobö jwienaji̧?

⁷ Baikwö wanedö yöta̧la, o̧'wo jawa kwösödaduwi̧ma: Israel, ökwöma mösa'o möa'o wame kwitea kamapjo kwöwanajabe ju'wedökwö 'da̧'da̧bakwawö kwö̧jobö, ja̧danö jobetjö iyawa kwiyobö kwi̧'yajabe.

⁸ Jau, apjude o̧pekwöchobebi, apjudasa'o ö'öböbi, i̧sȩkwa jawa kwujunajabe Israel, ja̧danö ötjötjö 'da̧bachibö 'ya̧nö, ju'wedökwö 'da̧'da̧bö kwö̧jotö jö̧ba̧lö, kwa̧do̧ 'yobekwö, kwitea kamapjonö kwöbamatajabe. Ja̧danö, ba̧jȩkwadökwö kwö̧jotö jö̧ba̧lö, kwitea kamapjo jalapjo kwotidajabe. Jobadö tjötade ösödinö eda̧laju, jobadökwö kwö̧jakwa jawa yöbawö kwujunajabe, ja̧danö jobadökwö 'da̧'da̧akwawa kwösödajabe.

⁹ O̧'wo jawa Moloc ötjabökwenö kwösödotö jö̧ba̧lö, olivo o̧tebi, nöinö omewi̧ jawabi e'ewö kwi̧'yajabe. Ja̧danö kwömöayedö yöbawadönö weköbajabe, ödö tji̧'yobö, ö'wö babibajadö tju̧ju̧kwemibe tjichibo jö̧tja̧lenanö baibanö.

¹⁰ Jobekwö ja̧baju, kwime'dawachibinajayonö, 'yayonö jwaikwöda o̧'wo jawa ösödö ji̧nujuja. —O̧'wo jawa ösödakwawama mikwawökö ji̧, tjo̧wita, —jö̧ba̧lö omukwatökujuja Israel, kwujuluwachibanö, kabatibökönö jwaikwöda o̧'wo jawa ösödö kwö̧jajabe. Jobekwö wanedö yötawa, ökwödö israel jojodö o̧'wo jawa kwösödaduwi̧ma.

¹¹ Chömöledö israel jojodö, tinö yekabinaduwada? O̧'wo jawa jwiinö yekabiduwobetjö ötjönö omöna yöka̧laduwaji̧? Tajawedö ötjönö kwo̧'woduwi jwikibaduwaja̧da, ja̧danö, —Dios ösödi̧ma di̧yajö, —jö̧ba̧lö tajawedö omukwatökönö kwö̧jaduwobeda? Lekwe möle ötjöma wi̧inö ja̧nö, ökwödönö lȩbebökönö chiteada̧lobetjö̧, ötjönö yebaböködö bakibaduwaji̧?

¹² Ötjöda yötawocha, weti̧ a̧ja̧kwö kwö̧jaduwojobö jö̧ba̧lö, ja̧danö otiwanö ja̧bö kwö̧jaduwojobö jö̧ba̧lö. Ja̧danö o̧'wo jawa ösödö kwö̧jaduwi̧ma, ja'yubebi pjaatökakobe chömöledö, kwö̧jibaduwobö.

¹³ Ökwödöma ba̧jȩkwadö o̧'wo jawanö ösödadöja, jobadönö jwöbeba̧lö, —Pjabataduwitjö, —jö̧ba̧lö jwököbaduwenama, ökwödönö pjatjatakwa̧ji̧? Pjatjatökakwedö chömöledö. Jobadö kwösödaduwawö̧ma, jwa̧lȩ'epjo jelobekwö e'ewakwawö̧, ja'yubenö pjutenama, jelobekwö debi batjibakwedö. Jo̧kwaijayonö ötjönö ösödadö, —Diosda tjöeba̧lakwo̧, —jö̧ba̧lö tjo̧'wo wana̧ladöma, otiwanö tjö̧jakwedö. Jobadöda otiwanö israel nijinö tjö̧jakwedö, ja̧danö jobadöda chitea mösa'o Sion mösa'o tjujuna̧lakwedö, jobe chejutjö otiwanö ötjönö tjösödakobetjö̧, jö̧ba̧lö yöa̧lobe Diosma, israel jojodönö.

Sulabenö tjomukwati̧ kabatibö balewachö, Diosnö ösödadönö pjaatakwo̧ Diosma, jö̧ba̧lö Isaias i̧wȩyudina jawa

¹⁴ Diosma weobe, —Otidaduwi, mana ba̧ba̧ladö otidaduwi. Okobe jwiinö tjöekwemitenia 'yebö lobaduwi, chömöledö otiwanö wene jwiinö kwetjachakobetjö̧, —jö̧ba̧lö.

¹⁵ Jau, baikwö yöa̧lobe inesö mööjȩ mölejȩnö jo̧, ba̧kwelöjatebö jo̧, Suli̧tjö Ödö Jo̧ jö̧ba̧lö mikwo̧ Diosma: Ötjöma inesö möemi, suli̧tjö ödö jȩmi jo̧sa. Jo̧kwaijayonö ju'wibi, bakwo̧ sulabenö ja̧bina, o̧'wo tjo̧bekwö, —Sulabo̧ mikwawö̧kö̧sa, —jö̧ba̧lo̧kwöbi jo̧sa. Jo̧bajayo̧kwö jo̧sa, o̧'wo ujuluwachibanö pjatatakobetjö̧, sulabenö omukwataja̧ kabatibö balewachajo̧nö omajade ujuluwachibanö pjatatakobetjö.

¹⁶ Jau chömöledö, ba̧kwelöjatebö jojodökwö ölakwabikwawö chö̧jö̧kakwo̧sa, ja̧danö ba̧kwelöjatebö jojodökwö chödameakwökakwo̧sa. Jobekwö ba̧kwelöjatebö chö̧jitjö̧ma, tjo̧'wo luwo̧nö tjime'dawachibena, ja̧danö tjö̧ji̧ ja̧kwawa, ötjöda otidö chiyina ja̧kwawama 'dö̧ibajena.

¹⁷ Jojodö idöda tjujuna̧lotö jö̧ba̧lö, sulabenö ja̧bö tjö̧jitjö̧, jobadönö chödameakwijatö, ja̧danö lȩbebö, jobadönö lȩtebijatö. Ja̧danö dameakwö ja̧nö, le'dedö lotijatö, —Wainö usula emawö tjö̧jo, —jö̧ba̧lö. Jo̧kwaijayonö, jobekwö jobadönö lȩtebinajayonö, sulabenö ja̧bö tjö̧ji̧ma katjatibinokobe, jwaikwöda idödada tjomajadenö tjösödi̧danö ja̧bö tjö̧jinobe.

¹⁸ Ötjöma chömöledö sulabenö ja̧bö tjö̧ji̧ chedajabe, jo̧kwaijayonö yayonö jobadönö pjatatakwo̧sa, ja̧danö tjö̧bibajinö otidö lotocha. Jobadönö öbibö jwetebocha, ja̧danö jobadö o̧'wo tjo̧achö budekwadönö, tjo̧'wo ösöwobö pjatatocha.

¹⁹ Jau, otiwanö tjo̧'wo ösöwachibanö pjatatocha, tjo̧'wo ösöwachibanö ötjönö lo̧tjenanö baibanö. Ötjö Isabenö Jo̧ma baikwö yöta̧la: Chö̧jelö ödö ju̧kwadönöbi, yöne ju̧kwadönöbi, okobe deinö chömöledönö jobekwö pjatatakwo̧sa, wene jwiinö otiwanö tjö̧jakobetjö̧, ja̧danö tjö̧bibajinö otidö lotocha.

^20-21 Jo̧kwaijayonö sulabenö ja̧bö ju̧kwadöma, wene jwibö, tjo̧'wo ösöwanöma jö̧kö̧dö. Jobadö tjö̧ji̧ma, jwaibalawa kabatökönö loidanö ichejekwobe. Jwaibalawama lobajibö, ba̧kwelöjatebö lete'obi, sula'wobi, ko̧ko̧dö ödobe jwaibalawa ö'öbönö, jö̧tö? Jobekwö ichejekwobe sulabenö ja̧bö ju̧kwadö tjö̧jima, jö̧ba̧lö yöawobe chösödökwe Diosma.