Isaías 56 - Dios Iwene

Israel jojodöböködönöbi tjö̧jibinö Dios pjaatakwa̧ jawa

¹ Baikwö yöawobe Isabenö Jo̧ma: Chömöledö, ja'yubenö lekwajabetjö tjö̧jibinö pjatatakwa̧ möle badekwachakobe, chujulu i̧sȩbö pjatatakwa̧ mölema, jo̧kwajabetjö̧ weti̧ a̧ja̧kwö, otiwanö ja̧bö kwö̧jaduwo.

² Jobekwö, —Dios wei̧ a̧ja̧kwö dö̧jo, —jö̧ba̧lö 'diinö ja̧nö, weti̧ a̧ja̧kwö ju̧kwadönöma, isabenö otiwanö pjatatakwawö̧. Jau chömöledö, —Otikwökö möle kwotidaduwoko, —jö̧ba̧lö weti̧ a̧ja̧kwö, otikwökö möle otiwanö otidöködö, ja̧danö sulabenö ja̧tjapji jö̧ba̧lö teada̧lönö ju̧kwadöma, isabenö otiwanö pjatatakwawö̧.

³ Ja̧danö Israel jojodötjöböködö ötjönö ösödadöma, —Israel jojochokobetjö̧, iteda ömöledöso̧ chö̧joböma weökakwo̧ Isabenö Jo̧ma, —jö̧ba̧lö tjomukwatoko, ötjö Isabenö Jo̧nö tjösödobetjö̧, jobadöbi chömöledö tjö̧jobö jo̧be. Ja̧danö, ömadö tjöla'yapi 'wibebö lotjinawö̧ma yötja̧loko, —Chitji̧munö 'yatebobö jwiobetjö̧, Dios öba a'otjö mikwawö̧kö̧sa, towi kököachibinowidanö ichejekwo̧sa, —jö̧ba̧lö yötja̧loko.

⁴ Jobadö tjöla'yapi 'wibebö lotjinawö̧, weti̧danö otikwökö möle otiwanö otidökönö, chösödi̧ jawa ja̧tjobö omudawö junö, —Dios wei̧ da̧ja̧kwobö jö̧ba̧ladösa, —jö̧ba̧lö israel jojodönö weti̧ a̧ja̧kwö ju̧kwadöma,

⁵ chöba a'otjö isabenö tjimikwakwedö. Jau, cheju okwa, jobadönö omukwatakwawemi baibanö chujunocha, ja̧danö otiwanö jobadönö tjomukwatobö chujunakwo̧sa. Jau, tji̧tji̧munö 'yatjebobö jwiijayonö, yayonö otiwanö tjomukwatawö̧ batjibobö wetocha. Jau, jobadönö pjatati̧ma, tji̧tji̧mu ba̧jekwadönö 'yatjebo jö̧tja̧li̧tjö bajalekwönönö otiwanö pjatatakwawö̧, ja̧danö 'döbibajökönö, ba̧kwelöjatebo otiwanö tjomukwatawö̧ tjö̧jobö wetocha.

⁶ Israel jojodöböködötjö ötjö Isabenö Jo̧nö ösödadöbi ja̧danö. Ötjökwö dötewanö tjö̧jotö jö̧ba̧lö, weti̧ a̧ja̧kwö ja̧nö, ötjönö ile nibebö ösödadönö otiwanö pjatatocha. Jau, otikwökö möle jawa weti̧ a̧ja̧kwö, otiwanö ötidökönö tjö̧jobetjö̧, ja̧danö ju'wi chömöledö israel jojodönö weti̧bi otiwanö a̧ja̧kwö tjö̧jobetjö̧, jobadönö ösödö pjatatakwo̧sa, baikwö yötawa:

⁷ Jobadönö öbibö chichejebocha, ötjöda chitea'o mösa'o Sion mösa'obe, ja̧danö jobadö cheju, ötjönö aekwejube ichibajadönö, tjo̧'wo ösöwachibanö pjatatocha. Ja̧danö jwiinö ubinö iyawabi, ötjökwö ösökwö ja̧kwawa iyawabi, ötjönö iyawapjotjö tjiyenama, tjiyaja̧ chösödakwo̧sa, —Ötiwanö ötjönö ösödö iyadöja, —jö̧ba̧lö. Jau chömöledö, ötjö chejuma, —Tjitebotenia ju̧kwadö Diosnö atjebeju, —jö̧ba̧lö ötjabikobe, israel jojodöbököböbi jobetjö ötjönö tjösödakobetjö̧, jö̧ba̧lö yöawobe Isabenö Jo̧ma.

⁸ Jau chömöledö, Isabenö Jo̧ Diosma, tjipjelekwachibanö israel nijitjö a'dewö lotjinawö̧ israel jojodönö ko̧ko̧dö tjebato̧, yemidanö tjitebo israel nijinö tjö̧jakobetjö̧. Ja̧danö israel jojodönö ko̧ko̧dö tjebato̧ Diosma, baikwö yöawobe: —Jobadö ida̧ökö cho̧ko̧kodajawö̧ israel jojodödamaökö, ju'wibi ju'wedö israel jojodöböködönöbi ko̧ko̧dö chichejebakwo̧sa, —jö̧ba̧lö.

Israel jojodötjö la'aka luwedö sulabedönö Isaias i̧wȩyudina jawa

⁹ Baikwö wanedö yöta̧la, israel jojodö tjöpöjojodönö: Ökwödö tebonö ju̧kwadöbi, mejenö ju̧kwadöbi ichö, israel niji mebibö kwukwaduwo.

¹⁰ Jau, wene jwiinö kwujuluwaduwobö jo̧be, israel jojojodötjö eda̧lö tjöbeba̧ladöma tjöbajale tjewawadö tjö̧jobetjö̧, ja̧danö bakobe wajwibadö tjö̧jobetjö̧. Jau, jobadöma awi̧li̧dö wi̧ibedö, luböködödanö ichejekwadö, labidö tjichiawö lutjo jö̧tja̧lijayonö, luböködö. Jau, eda̧lö tjöbeba̧lökönö, bakobe bamatö, abibö tji̧'wi̧dikwobö ösödadö.

¹¹ Ju'wibi awilidö a̧wi̧chikwadödanö ichejekwadö, israel jojodönö ötjibo jö̧ba̧ladöma. Awi̧li̧dö omeawachibökönö, tupakwönönö kabatibökönö tjukwobö jö̧ba̧ladödanö, idöda tjösödi̧da ja̧tjo̧bö isakwadö. Obejadönö teada̧ladö otiwanö tjajwimunö ötjibi̧danö, tjömöledö israel jojodönö jwebebö ötjibo jö̧tja̧lijayonö, wajwibö, okwa jawa omukwatöködö. Jobadöma otiwanö jwebebökönö, bakwo̧nökwena idöda tjujuna̧lotö jö̧ba̧lö isakwadö.

¹² Jau, jobadöma baikwö yöba̧lakwawadö, —Ubasobu o̧'do̧bu demaduwo, ja̧danö ju'wi nio ojwiyo do̧wa̧laduwo, owa̧lö̧ domeawachibenanö baibanö. Ja̧danö jemi ikenama, itekwai babe do̧wa̧li̧tjö bajalekwönönö dowena, do̧'wo ösöwachibanö, —jö̧ba̧lö sulabenö omukwatö yöba̧ladö, israel jojodötjö luwedöma.