Isaías 55 - Dios Iwene

Ötjönö ösödö kwichaduwo, jö̧ba̧lö Dios yöa̧lina jawa

¹ Baikwö yöa̧lobe Diosma: A̧ja̧kwaduwi, okobe deinö o̧ti̧ tjöbadöma, chö̧jobekwö kwichaduwo, ojwiyo jȩmibe. Ja̧danö ökwödö balada jwibadöma, ichö kwakwawa emö kwukwaduwo. Ichaduwi, ubasobu o̧'do̧bubi, lechebi kwemaduwo, balada midökönö, mikwa jwiinö ichö kwemaduwo.

² Chömöledö, tajawedö omöna jawa pan emö, kwiteaduwi balada iyö loköbaduwobeda? Ja̧danö kwotidaduwaja̧ mikwa baladanö, tajawedö kwomeawachibaduwö̧kö jawa kwemaduwobeda? Ötjö yötawi̧ teada̧lönö a̧ja̧kwö, otiwi̧ kwakwawa kwukwaduwo, inesö söi̧ kwakwawama.

³ Teada̧lönö a̧ja̧kwalö, chöjobekwö kwichaduwo chömöledö. Otiwanö kwa̧ja̧kwaduwo, tupakwö 'yaka̧laduwakobetjö̧. Jau, ötjönö kwa̧ja̧kwaduwitjö̧ma, ökwödökwö bakobe dösölö̧jinö dö̧jakwa̧ jawa yöbawö chujunocha, 'dö̧ibajökö ji̧ yöbawö junawama. Jau, damötjö Davidnö yöbawö chujunijatö, jwaikwöda 'dö̧bibajökönö jo̧banö ösödö chö̧jakwa̧ma, ja̧danö ökwödönöbi Davidnö yöbawö chujuninadanö yöbawö chujunena.

⁴ Jau chömöledö, jo̧ba Davidnö chujunijatö, tjitebotenia jojodönö chujulu i̧sȩbö yöbawo̧ baibanö, ja̧danö inesö la'aka luwo̧ baibanö, ölakwabikwawa jawa luwo̧ baibanö chujuninökwe, tjitebokwena jojodö tjuluwo̧ ö̧jakobetjö̧.

⁵ Ja̧danö, ökwödökwöbi bakobe dösölö̧jinö dö̧jakwa̧ wene yöbawö dujunitjö̧ma, jo̧banö chujuninadanö chujunakwawö̧ja. Ja̧danö ju'wedö tjitebo jojodönö jwököbaduwakwedöja, ajayinö kwa̧ja̧kwinaduwököwö̧ jojodönö jwököbaduwakwedöja. Ja̧danö, jwököbiawö̧, ajayinö ökwödönö wajwitjinajayonö, juluwanö kwö̧jaduwobekwö ö'ötakwakwedö. Jau chömöledö, ötjö kwuluwo̧duwi Isabenö Jo̧, israel jojodö tjösödökwe Suli̧ Jwibo̧ Diosma ökwödönö otiwanö tjomukwatobö chujunobetjö, jobekwö jwököbaduwiawö̧ juluwanö tjichakwedö, jö̧ba̧lö yöa̧lobe Diosma.

⁶ Chömöledö, Isabenö Jo̧ma ina yöne jo̧, ina jo̧banö tjöbadekwajobö jo̧be. Jokwajabetjö̧ babe juluwanö jo̧banö kwisakwaduwobö jo̧be chömöledö, ina jo̧banö kwöbadekwaduwobö ja̧yima. Ja̧danö ina yöne ö̧jonö, jwököbaduwonö.

⁷ Sulabenö ja̧bö ju̧kwadöma, sulabenö ja̧bö tjö̧ji̧ma katjatibo, ja̧danö sulabedöma, sulabenö tjomukwati̧ katjatibo. Kabatibajadö, yemidanö dösödökwe Isabenö Jo̧ Dios ö̧jobekwö tjetjachajo, jobadönö lȩlöjinö edö, öpöjödökönö tjusula söbebö loakobetjö̧.

⁸ Jau chömöledö, baikwö yöawobe Isabenö Jo̧ma: Ötjö chomukwati̧ma, ökwödö bö̧jȩ jojodö kwomukwataduwi̧danöma omukwatö̧kö̧sa, ja̧danö ötjö ja̧bö chö̧ji̧ma, ökwödö ja̧bö kwö̧ja̧duwi̧danöma ja̧bö jö̧kö̧sa.

⁹ Ötjö chomukwati̧ma, ökwödö kwomukwataduwi̧tjö bajalekwönönö otiwobe, baikwö wanedö yöta̧la: Mölȩjȩma, bö̧jȩtjö bajalekwönönö jwiinö mööjȩ, jö̧tö? Ja̧danö ötjö ja̧bö chö̧ji̧ma, ökwödö ja̧bö kwö̧jaduwi̧tjö̧ jwiinö bajalekwönönö otiwobe chömöledö, ja̧danö chomukwati̧ma, jwiinö ökwödö kwomukwataduwi̧tjö bajalekwönönö otiwobe.

^10-11 Ja̧danö ötjö yöta̧li̧ma, isabenö mikwawi̧ chömöledö, baikwö wanedö yötawa: Mölȩjebetjö ojwiyo o̧bi̧bi, nieve ötjabi̧ jawa tjoduwi̧bi, möakwö yemidanö tjeachajokobe, jö̧tö? Niji okwa söbibö, niji 'yoliwanö pjaati̧, batjo jawa otiwanö pokwakobetjö̧, ja̧danö otiwanö wa̧jakobetjö̧, jö̧tö? Ja̧danö, ja̧tjö̧ batjo otidadö ödebiya tjödakwedöma ödebia emadö, ja̧danö ja̧tjö kwadö jojodöma, jö̧tö? Ötjö yöbawö chujuni̧bi ja̧danö chömöledö, yöbawö chujunajabema, yöta̧laja̧danö baledökönö tjeachajokobe ötjö yötawi̧ma. Yöbawö chujunenama, omukwatö chujunaja̧danö badekwachobe chömöledö, —Bejenö baledakwa̧ yöbawö chujuna, —jö̧ba̧lö yötawenama, waekwökönö ba̧kwelöjatebö omukwatö chujunaja̧danö badekwachobe.

¹² Ja̧danö baikwö yöbawö chujunaduwakwö chömöledö: Ju'wedö tjujuluwajawö̧ kwö̧jaduwelö, kwo̧'woduwi ösöwachibanö lakebaduwakwedöja, ökwödönö ötibonö, wene jwiinö lakebaduwakwedöja. Ja̧danö jobekwö otiwanö lakebaduwobetjö̧, kwabönöduwitjö mösa'ijuma lo̧akobe ichejekwa, ja̧danö towibiyama ömamiju 'bȩakobedanö ichejekwakobe.

¹³ Ja̧danö sȩi̧ ajayinö pokwinelö, otiwowi cipres towibiya pokwakobe, ja̧danö ju'wi sȩötje pokwinelö, otiwowi mirtos ötjabowibiya pokwakobe. Jobekwö pokwi̧ma, otiwanö ötjö Isabenö Jo̧ Dios chujulu i̧sȩkwakobe, jojodö jwiinö otiwanö ötjönö tjomukwatakobetjö̧. Jau, ja̧ towibiyama ba̧kwelöjatebö i̧sȩbi̧ baibanö ja̧kwa̧ owi, yöbawö chujuninadanö badekwachaja̧ ba̧kwelöjatebö tjomukwatibakobetjö̧, jö̧ba̧lö yöawobe Isabenö Jo̧ma.