Isaías 54 - Dios Iwene

Yemidanö Jerusalennö tjö̧jakwa̧ jawa, Isaias yöawina jawa

¹ Baikwö wanedö yöawobe Isabenö Jo̧ma: Ökwö kwitji̧mu debuju, la'akatjöda kwitji̧munö eminökujuma, lo̧köbo. Jau Jerusalen, ökwö la'akatjöda tjemunö emawa nii̧ niinokokoma, labinö kwo̧'wo ösöwachibanö lo̧köbo, baikwö yötawa: Ökwö kwömöledö debuju o̧'wo tjoachujuma, jilekwenö ju̧ju̧tjö bajalekwönönö ba̧jȩkwadö kwitji̧munö kwujuna̧lakwujuja.

² Jo̧kwajabetjö̧ kweju sabana'wotjö otikweju jalamachibanö kwotido. Jwiinö jaleju baibanö kwotido, sabana o'wiju ödöinö kwotido, ja̧danö bö'ödö opjia ödöinö kwotido, ja̧danö di̧atakwawa ö̧'iya 'diinö kwotidö, kwitji̧muma jwiinö tjö̧ba̧jekwachakobetjö̧.

³ Jau, kwöwaisobekwöchobebi, wajwiköbobekwöchobebi kweju jaleju baibanö kwotidobö jo̧be. Ja̧danö kwitji̧muma, ba̧jȩkwadö batjibanö ju'wedö tjitebo nijibi 'döbebö tjemakwedö, ja̧danö jojodö deobe comunidadma, kwitji̧muda jobe tju̧ju̧kwakwedö, jö̧ba̧lö wanedö yöawinobe Diosma, Jerusalen comunidad jawama.

⁴ Tupakwö Jerusalen comunidad jawa wanedö yöawinobe Diosma, jojosujunö yöa̧li̧danö: Yebabökönui Jerusalen, bemi tupakwö tabakwö kwöjökakwujuja. Kwo̧'wo tjo̧kekwobö jwiobe, isabenö ökwönö tabakwö kwö̧jobö wetjökakobetjö̧. Jau, ina möayuju kwö̧jayi, tabakwö kwö̧jinajayonö, ja̧ tabakwö kwö̧jina kwo̧'wo jwikibakwujuja. Ja̧danö, —Bisuma jilekwe wobekwinuju mikwawökuju, —jö̧ba̧lö yötja̧lioko taba lö̧jinajayonö, bemi tupakwö ja̧ sulabenö tjomukwatioko taba lö̧jinö kwö̧jinama la'akatjöda kwomukwatibökakwujuja.

⁵ Jau, ökwö kwilekwedanöbo̧ma, ökwönö otidina Isabenö Jo̧ Okobe Jwiinö Juluwo̧ Dios jö̧ba̧lö mikwo̧da. Ökwönö kwö̧ji̧binö pjabato̧ma, Israel jojodö tjösödökwe Suli̧ Jwibo̧ Dios, okobe deinö bö̧jȩnö ju̧kwadö tjuluwo̧ Dios jö̧ba̧lö ötjabökweda kwilekwedanöbo̧ma, jo̧kwajabetjö̧ tabakwö kwö̧jobö jwibujuja.

⁶ Jau, ajayinö bakwo̧ ilekwo kaatibinoko jwiinö jo̧'wo tjo̧achujudanö kwichejekwijatö, ina möayuju jö̧jayi eminoko kaatibinokodanö. Jo̧kwaijayonö ötjö Isabenö Jo̧ma yemidanö ötjökwö tjekachajobö jwötajabe, tabakwö kwö̧jo jö̧ka̧laja̧ma 'dö̧ibajabe.

⁷ Isabenö ja'yubenö ökwönö le'dedö lotijatö Jerusalen taba lö̧joko bakibanö. Jo̧kwaijayonö lekwemaökö ökwönö le'dedö lotinama, ja̧danö babema jwiinö lȩlö̧jinö edö, tjekachajobö ötibakwö.

⁸ Jau, jwiinö ökwönö chödameakwobetjö̧, juluwanö lekwökönö jelobekwö chöjalachibijatö, ökwönö öpöjödö, jo̧kwaijayonö lekwemaökö. Ja̧danö ökwönö lȩlöjinö edö ile 'di̧tebi̧ma, ba̧kwelöjatebö 'dö̧ibajökönö ökwönö ile 'di̧tebakwo̧sa, jö̧ba̧lö wanedö yöa̧lobe Isabenö Jo̧, Jerusalen jojodönö tjö̧jibinö pjabato̧ma, Jerusalennö ju̧kwadönö.

⁹ Tupakwö Jerusalen comunidad jawa wanedö yöawinobe Diosma, jojosujunö yöa̧li̧danö: Ökwönö lȩbebö katatibinama, sule bakwötanöda lȩekwa jawa Jerusalen, Noe ö̧jinena lȩtebinadanö. Ja̧ möle bö̧jȩnö ju̧kwadönö lȩbebajo̧, yöbawö chujunijatö Noenö, —La'akatjöda wetökakwo̧sa, ojwema bö̧jȩ ba̧kwemeachibanö okwatiboböma, —jö̧ba̧lö. Ja̧danö jo̧banö yöbawö chujuninadanö yöbawö chujunakwö: Bemi tupakwö la'akatjöda ökwönö chödameakwökakwo̧sa, ja̧danö la'akatjöda dameakwö lȩtebökakwo̧sa.

¹⁰ Isabenö jwaikwöda ile 'di̧bebö chösödakwujuja, baikwö wanedö yöta̧la: Mösa'iju pjolachibö laebitjö̧bi, mösa'iju pjei̧ o'iju tjö̧bawö meitjö̧bi, ökwönö ile 'di̧tebi̧ma la'akatjöda katatibökakwo̧sa. Ökwönö yöbawö chujunajabe, dösölö̧jinö pjabatö chö̧jakwa̧ wenema, ja̧danö ja̧ yöbawö chujunina wenema la'akatjöda söbebö loawökakobe, jö̧ba̧lö ötjö Isabenö Jo̧, ökwönö lȩlöjinö edo̧ma yöta̧lakwö.

¹¹ Ökwö Jerusalen, isabenö jwa̧le'epjo labinö töokoja, ja̧danö usula kwemawelö kwo̧'wo ösöwachibanöma pjatjatokokoja. Jo̧kwaijayonö baikwö yötawakwö Jerusalen comunidad, isabenö yemidanö otiwanö chotidakwujuja, mikwawi̧ inawiyanö. Otiwi̧ 'diatakwawa jawanö, kwitea inawiya wanawinö chotidakwo̧sa, ja̧danö la'akama, zafiros ötjabawatjö chotidakwo̧sa.

¹² Ja̧danö rubies ötjabawatjö a̧petukwöchobe tjöekwemi chotidocha, ja̧danö apjudebiyama, salöi̧ inawiya ji̧nö chotidocha, ja̧danö ju'wi tjöekwemitenia, inawa nöinö mikwawatjö chotidocha.

¹³ Ja̧danö ötjö Isabenö Jo̧ Diosda kwitji̧munö chöba̧ja̧dakwo̧sa, ja̧danö kwi̧tji̧muma isabenö jwiinö otiwanö tjö̧jakwedö.

¹⁴ Ja̧danö weti̧ otiwanö a̧ja̧kwö ja̧nö, 'diinö kwö̧jakwujuja. Ja̧danö usula tjemawinö webadö tjö̧jelö ödö kwöjobetjö̧, yebabökönö kwö̧jakwujuja. Ja̧danö inesö yeabikwawa jawatjö̧ ödö kwöjakwujuja, yeabikwawa jawama kwö̧jobekwö yöne ichibökönö.

¹⁵ Ja̧danö ju'wedö ökwönö metjibitjö̧ma, ötjö wetajawö metjibökakwedö, ja̧danö okobe deinö ökwökwö tjölakwabikwawakwedöma, kwöba a'otjö metjakwedö.

¹⁶ Jau Jerusalen, bi̧ya wene kwomukwato: Ölakwabikwawa jawa otido̧ma, ökwöla ubö̧'a pjubö tubedö otido̧, ölakwabikwawa jawa otidakobetjö̧, jo̧kwaijayonö jo̧banö otidinama ötjödasa. Ja̧danö jojodönö ölakwabikwawö suli̧ waedadönö otidinabi ötjödasa.

¹⁷ Ja̧danö, ötjö jobadönö otidinada ökwönö tjöbeba̧lo pjatatobetjö̧, okobe jwiinö ölakwabikwawa jawa tjotidi̧teniama, kwöba a'otjö suli̧ waekwakobe, ju'wi jawabi ökwönö suli̧ waedobö jwiakobe. Ja̧danö lȩekwa luwedö tjöba a'otjö, ju'wedö ökwönö wanedö yötja̧litjö̧ma, okobe deinö jobekwö wanedö yöba̧ladö yötja̧li̧ otiwanö i̧sȩbö kwatadakwujuja, —Omöna, lȩekwa yötjawobö jwia, —jö̧ba̧lö. Jobekwö pjabato̧sa ötjöda chömöayedönö Jerusalen, ja̧danö wene jwibadö tjö̧ji̧ i̧sȩkwama, ötjö tjuluwo̧ Isabenö Jo̧ Diostjö ichi̧, jö̧ba̧lö wanedö yöa̧lobe Diosma, Jerusalen comunidad jojodönö.