Isaías 53 - Dios Iwene

¹ Jau, Dios ömöayo̧nö yödawinajayonö, o̧bukwedöda yödawi̧ tjösödajabe, —Isabenö wene, —jö̧ba̧lö. Ja̧danö o̧bukwedöda Isabenö Jo̧ Dios inesö ujulu i̧sȩbobe tjedajabe.

² Baikwö yöta̧la Dios ömöayo̧nö: Dios öba a'o ö̧da̧peachinama, a̧dekwanö pokwi̧danö, kököelö bö'diatjö pokwi̧danö ichejekwinobe. Jo̧banö edö, jo̧kwadabo̧danö ichejekwijatö, wamenö edö, otiwo̧nöma dedijökötö, ja̧danö la'aka luwo̧ ichejekwi̧danöma ichejekwinokobe. Wamenö edö, —Bitenö dösödo jö̧da̧lökwe, —jö̧ba̧lö edö domukwatijökötö, jo̧kwadabo̧danö ichejekwobetjö̧.

³ Jo̧banö edö döpöjödijatö, —Bitema mikwawö̧kö̧, inia tjöbo̧, inesö o̧'wo tjo̧bekwo̧, —jö̧ba̧lö. Jo̧banö edöbi tjedoböma tjöpöjödinökwe, —Sulabo̧, —jö̧ba̧lö, ja̧danö jo̧kwadabo̧ jö̧ba̧lö domukatijatö, jo̧ba Dios ömöayo̧nö.

⁴ Jo̧ba usula emawobe edö domukwatijatö, —Iteda sulabenö ja̧bö ö̧jobetjö̧ Dios lȩebökwe, wainö lȩebo jö̧a̧lökwe, —jö̧ba̧lö. Jo̧banö wajwidijatö, —O̧'wo tjobekwö ö̧ji̧ma, iteda jawamaökö, ökwödöda jawa emawo̧, ökwödöda inia tjödo jö̧da̧li̧ma emawo̧, —jö̧ba̧lö.

⁵ Jo̧kwaijayonö jo̧banö tjitjatinama, ökwödöda Dios wei̧ döpöjödobetjö̧ tjitjatinökwe, ökwödöda sulabenö ja̧bö dö̧jobetjö̧, inia tjöbina. Ökwödö wene jwiinö dö̧jakobetjö̧, jo̧banöda kwakwatjinobe, ja̧danö jo̧bada kwakwatji̧ eminobetjö̧, bi̧bajadösa ökwödöma.

⁶ Jau, obejadö le'dewö tji̧'yidanö, okobe deinö ökwödöma bakwo̧nökwena dösödobekwö 'ya̧nö, Diostjö 'da̧bachibö di̧'yajabe, ja̧danö 'da̧bachibö di̧'yiökwe, ökwödönö lȩebo jö̧a̧linobe. Jo̧kwaijayonö, ökwödö dusulama, joba iteda ömöayo̧nöda öwaninobe Isabenö Jo̧ma, jo̧bada lȩekwa emakobetjö̧.

⁷ Jo̧kwajabetjö̧ jwiinö inia tjöbö usula emawinobe Dios ömöayo̧ma, jo̧kwaijayonö usula emawijayonö, yöba̧lökönö wi̧inöda ö̧jinobe. Jau, obeja kwabö lotjobö ötjibökwe wi̧inö i̧'yidanö, ja̧danö obeja öwö'ye 'witjökwe wi̧inö ö̧jidanö, bakobe wi̧inö ja̧nö yöa̧linokobe.

⁸ Jo̧banö do̧batajadö, lȩekwa sulabenö yötjawinobe, ja̧danö jelobekwö ötjibinökwe. Ja̧danö, —Bitema itji̧mu tupadanö jojodö deakwo̧, —jö̧ba̧lö jo̧banö kwabö lotjinobe, Dios ömöayo̧nö. Jau, dömöledöda Dios wei̧ tja̧ja̧kwokobetjö̧, inia tjöinö ja̧tji̧nökwe, ja̧danö 'yaba̧ladö tjö̧jelö debi baibanö, kwabö lotjinökwe.

⁹ Jo̧banö kwabö lobajadö, sulabenö ja̧badönö lödawemi tjo̧tjobö jö̧tja̧linökwe, jo̧kwaijayonö ö'wö baibenama, nöinö juna̧ladökwö tjo̧tji̧nökwe. Jojodönö suli̧ öwaedinököjayonö, ja̧danö ja'yubebi omöna yöa̧linököjayonö,

¹⁰ yayonö inia tjöinö, jo̧banö lȩebobö ösödinobe Isabenö Jo̧ma, jwiinö o̧'wo tjo̧bekwo̧ baibanö. Dios ömöayo̧ma tjusula söbebö loawa iyawa baibanö iyawakwo̧, ja̧danö jobekwö iyawenama, Isabenö Jo̧ jo̧banötjö̧ otidobö omukwatö ujuninama badekwachakobe. Jemi ikenama iteda itji̧mu tupadanö jojodönö edakwo̧, ja̧danö lekwe möle otiwanö öjakwo̧.

¹¹ Ja̧danö, usula emawajo̧, otidaja̧ omukwatakobe Dios ömöayo̧ma, ja̧danö otidaja̧ okwa jawa omukwatö, o̧'wo ösöwanö omukwatakwo̧, —Chotidaja̧ma, otiwanö chotidajabe, —jö̧ba̧lö. Baikwö yöa̧lobe Diosma, iteda ömöayo̧nö: Chömöayo̧ma ba̧jȩkwadö tjusula emawajabe, jo̧kwajabetjö̧ iteda ida̧'ökö emawajobetjö̧, jobadönö lȩekwa yöawakwo̧, —Bidöma wene jwibadö, —jö̧ba̧lö.

¹² Jo̧kwajabetjö̧ ba̧jȩkwadönö jo̧banö chiyakwo̧sa, ömöayedö batjibanö. Ja̧danö juluwajo̧, inesö juluwadönö emakwo̧, iteda ömöayedö batjibanö. Jobekwö chiyocha chömöayo̧nö, öpöjödökönö, jo̧banö kwabö lotjobö iyawinobetjö̧. Jo̧banö tjomukwatinobe, —Bitebi Dios wei̧ a̧ja̧kwöködötjö bakwo̧, —jö̧ba̧lö, jo̧kwaijayonö jo̧bama ba̧jȩkwadö tjusula emawinobe, ja̧danö weti̧ a̧ja̧kwöködönö pjabatö aebinobe, jobadö tjö̧jibobö, jö̧ba̧lö yöa̧lobe Diosma, iteda ömöayo̧nö.