Isaías 52 - Dios Iwene

Dios Jerusalen jojodönö tjö̧jibinö pjaatakwa̧ Isaias yöawina jawa

¹ Wilubi, wilubö a̧la̧ibi Sion mösa'o, yemidanö juluwachibi. Ökwö Dios itebo comunidad baibanö 'da̧batö ujuninemi Jerusalenma, otiwa̧do̧ 'dubawi, yȩbekwadöbi, Diosnö öpöjödadöbi kwitea apjude okwa tetjachökakwedö bemi tupakwöma.

² Niji̧so̧pja̧nö kwö̧belö a̧la̧ibi Jerusalen comunidad, a̧la̧ibö, niji̧so̧pja̧ pjusawi, ökwö tjujuluwinemi comunidad Jerusalen. Ja̧danö ökwö Sion mösa'o jojosujuma, kwulume'atjö ka̧lena osiju ejatö lobi.

³ Isabenö kwö̧jibakwa̧ möle badekwachajabe, baikwö yöa̧lobe Isabenö Jo̧ma: Kwitebotjö a'dewö lobö, ju'wedö tjitebobe öbibö tjemobö iyö lotenama, midökönö mikwa jwiinö tjeminokoja, ja̧danö babema balada midökönö, tjujulutjö kwö̧jibanö kwitebobe tjetatakwo̧sa, jö̧ba̧lö yöa̧lobe.

⁴ Juwibi yöa̧lobe Duluwo̧ Isabenö Jo̧ Diosma: —Damötjö chömöledö israel jojodöma, ju'wedö ötjibököwö̧ Egipto nijibe tji̧'yinobe. Ja̧danö jemi ikenama, midö emökönö, Asiria jojodöma chömöledönö öbibö tjeminobe, usula tjemawinö, —jö̧ba̧lö.

⁵ Ja̧danö ju'wibi baikwö yöa̧lobe Isabenö Jo̧ma, —Bi̧ya̧ baledi̧ma, tajijö? Midö tjemököjayonö, yemidanö chömöledö israel jojodönö naukwö öbibö tjemajabe, tajawedöjö? —jö̧ba̧lö yöa̧lobe. Ja̧danö ju'wibi yöa̧lobe, —Chömöledö israel jojodönö webö ja̧döma, labinö jwöbeba̧lö, möle baledibanö, —Isabenö Jo̧ma mikwawö̧kö̧, —jö̧ba̧lö sulabenö yöba̧ladö ötjönö.

⁶ Jo̧kwajabetjö̧ Isabenö Jo̧ chö̧ji̧ chi̧sȩbocha chömöledö israel jojodönö, —Isabenö Jo̧ mikwo̧ma isabenö juluwo̧, —jö̧ba̧lö tjöwaisachibanö chi̧sȩbakwo̧sa. Jo̧kwajabetjö̧, jobekwö chi̧sȩbiawö̧ bajalianö tjöwaisachibakwedö, ötjö jobadönö, –Bada jo̧sa, –jö̧ba̧lö yöba̧lo̧ma, Isabenö Jo̧ Diosda, —jö̧ba̧lö yöa̧lobe Diosma.

⁷ Ayö, otiwa jawa wene yötjawakwedö tjichi̧ma jwiinö otiwobe, mösa'ijutjö tjömasapiya edö, —Jwiinö otiwobe, —jö̧ba̧lö edadösa. Jau, wene jwiinö dö̧jakwa̧ wene yöbawö ichadö, do̧'wo ösöwachibanö ja̧kwawa jawa yöbawö ichadö, otiwanö dö̧ji̧bakwa̧ jawa yöbawö ichadönö edö ösödadösa. Jau, Sion mösa'o ju̧kwadönö yöbawadö, —Kwuluwo̧ Diosma webö jo̧, —jö̧ba̧lö, ja̧danö ja̧ wene yöbawadö tjichi̧ma do̧'wo ösöwachibanö edadösa.

⁸ A̧ja̧kwaduwi comunidad tjöbeba̧lö eda̧ladö jwötjeba̧li̧ma. Idöda tjöbajalenö tjedobe, Isabenö Jo̧ Sion mösa'obe tjeachajobema, ja̧danö edö tjo̧'wo ösöwachibanö jwöbeba̧ladö, ja̧danö lo̧awa lo̧badö.

⁹ Jerusalen comunidad pjolö loinemibi o̧'wo ösöwachibanö lo̧obö jo̧be, Isabenö Jo̧ma iteda ömöledönö tjo̧'wo ösöwachibanö pjaatajobetjö̧, ja̧danö itebo comunidad Jerusalen tjöpöjojodötjö ji̧binö pjaatajabe.

¹⁰ Tjitebotenia jojodö tjö̧ba a'otjö iteda ujulu öwaetjöda öwawinö i̧sȩbajabe, ja̧danö bö̧jȩ ba̧kwemeachibanö ju̧kwadöma edö tjöwaisakwedö, —Duluwo̧ Diosma iteda ömöledönö tjö̧jibinö pjaatajabe, —jö̧ba̧lö.

¹¹ Jo̧kwajabetjö̧ labebö kwȩwa̧jaduwo chömöledö, ökwödönö öbibö tjeminelö labebö kwȩwa̧jaduwo. Jobe ja̧nö, yȩekwi̧ jawa maköbaduwoko chömöledö, jobe yȩekwelö labebö kwȩwa̧jaduwo. Ökwödö Dios eju jawa deja'di̧ju jawa tje'ewakwedöma, Dios öba a'otjö yȩekwi̧ jawatjö kwidichawaduwo, Dios eju jawa otiwanö Jerusalenbe e'ewö kwȩwa̧jaduwakobetjö̧.

¹² Jau, ö'öbakwawö yebabinö lakebaduwobö jwiakobe, otiwanö tjo̧'omanö kwȩwa̧jaduwobö ja̧kobe, kwuluwo̧duwi Isabenö Jo̧ Dios kwabönöduwi 'ya̧nö, ökwödönö öbibö i̧'yakobetjö̧. Jau chömöledö, kwabönöduwi tjöbeba̧lö i̧'yakwo̧, ja̧danö ju'wibi kwökömanöduwi tjöeba̧lakwo̧, jo̧kwajabetjö̧ yebabinö dökibaduwobö jwiakobe.

Dios ömöayo̧ usula emawakwo̧nö Isaias iwȩyudina jawa

¹³ Baikwö yöa̧lobe Diosma: Baikwö yöta̧laduwakwö chömöledö: Ötjö chömöayo̧ma, otiwanö waisanö ö̧jakwo̧. Jo̧banö möakwö katebakwo̧, ja̧danö jwiinö otiwanö tjomukwatakwo̧ ötjö chömöayo̧ma.

¹⁴ Jo̧kwaijayonö ajayinö jo̧banö tjedenama, tajijö jö̧ba̧lö, tjöbajale jalaka baibanö tjedinökwe. Jau, nöinö kwakwatjökwe, öbama jojo öbadanö ichejekwinokobe, ja̧danö jwiinö usula emawo̧ ö̧ji̧ edö, jo̧banö wajwitjo jö̧tja̧linena, —Bitema jojoso̧, —jö̧ba̧lö.

¹⁵ Jo̧kwajabetjö inesö la'aka luwo̧ baibiawö̧, tjöbajale jalaka baibanö tjedakwedö tjitebotenia jojodöma, ja̧danö jo̧ba öba a'otjö, a̧la̧ibö wi̧inö tjö̧jakwedö inesö la'aka luwedöma. Jau chömöledö, chömöayo̧nö ajayinö wajwitjinobe, —Biteda Dios ömöayo̧, —jö̧ba̧lö, jo̧kwaijayonö bajalianö jo̧banö wajwitjina jawa tjöwaisachibakwedö, ajayinö tja̧ja̧kwinökö jawa tja̧ja̧kakwedö, jo̧kwajabetjö̧ öba a'o tja̧la̧ibakwedö, —Duluwo̧ja, —jö̧ba̧lö, yöawobe Diosma, iteda ömöayo̧nö.