Isaías 51 - Dios Iwene

Diosnö kwo̧'wo wana̧lö kwö̧jaduwo, jö̧ba̧lö Isaias i̧wȩyudina jawa

¹ Okobe deinö ökwödö Isabenö Jo̧ Diosnö isakwadö, jo̧ba wei̧ a̧ja̧kwö kwö̧jaduwobö omukwatadöma, baikwö yöta̧li̧ kwa̧ja̧kwaduwo: Wanedö yötawa, ökwödötjö ajayinö jinawa, Dios 'dȩbö otidinawa kwomukwataduwo, ja̧danö ja̧wa ajayinö ji̧nemi, löwö eminelö kwomukwataduwo.

² Jau chömöledö, ökwödötjö ajayinö ji̧na Abrahamnö kwomukwataduwo, ja̧danö ilekwo Sara ökwödönö ajayinö eminujunö kwomukwataduwo. Baikwö yöa̧lobe Diosma, kwadömine Abrahamnö: Abrahamnö jwötijatö, ötjö chömöledöso̧ baibobö, ja̧danö jobekwö jo̧banö jwötenama, bakwo̧da, itji̧mu debo̧da ö̧jinobe kwa'döduwima. Jo̧kwaijayonö, jemi ikenama jo̧banö pjatatijatö, ja̧danö pjatatiökwe, ba̧jȩkwaso baibinobe, jö̧tö?

³ Ja̧danö baikwö yötawaduwakwö chömöledö, jo̧ba itji̧mu tupadanö jojodö o̧bukwedöda tjö̧jijayonö, tja'döminenö pjatatinadanö yemidanö pjatatocha, Jerusalen jojodönö. Ja̧danö jobekwö pjatatenama, tjitebo nijima jwiinö otiwachibakobe. Jojodö deobe kö̧kö̧emima, inesö otiwayu Eden batjodanö baibanö, o̧bubiya otiwanö bo̧akobe. Ja̧ jojodö deobema, Isabenö Jo̧ itea batjo, jö̧ba̧lö ötjabayudanö baibakobe. Ja̧danö jobe ju̧kwadöma jwiinö tjo̧'wo ösöwachibanö tjö̧jakwedö, ja̧danö ötjönö ösödö lo̧tjakwedö, —Isabenö Jo̧ma otiwanö pjabato̧, —jö̧ba̧lö.

⁴ Chömöledö, yötawi̧ otiwanö kwa̧ja̧kwaduwo, yötawakwa̧ otiwanö kwa̧ja̧kwaduwobö jo̧be chö̧mö̧ledö̧. Jau chömöledö, bö̧jȩ ba̧kwemeachibanö ju̧kwadönö chö̧ba̧ja̧di̧ yötjawobö wetakwo̧sa, ja̧danö ja̧bö tjö̧jobö weti̧ma, tjitebotenia jojodönö dejuwa̧'yudanö ja̧kobe.

⁵ Chujulu chi̧sȩbakwa̧ möle juluwanö badekwachakobe chömöledö, ökwödönö kwö̧jibaduwinö pjatatakwa̧ma juluwanö badekwachakobe. Ötjöda chujulunö, juluwanö tjitebotenia jojodönö webö chö̧jakwo̧sa chömöledö, ja̧danö otiwanö webö chö̧jiawö̧, ödö ju̧kwadö jwaibalawa ö'öbö ju̧kwadöbi ötjönö tjo̧'wo tjö̧wa̧nalakwedö, ja̧danö chotidakwa̧ tjiteada̧lakwedö, inesö chujulunö otiwanö chotidakobetjö̧.

⁶ Möakwö mölejebe kwedaduwo chömöledö, ja̧danö nijakwö bö̧je kwedaduwo. Babe ji̧danöma, lekwema jö̧köjȩ chömöledö, baikwö yötawa: Imiyu'wo juluwanö debi baibidanö, juluwanö debi baibakobe mölejȩma, ja̧danö kamijido̧ damö waekwö, suli̧ waekwi̧danö, bö̧jȩ suli̧ waekwakobe. Bö̧jȩnö ju̧kwadöbi ja̧danö, okobe deinö damö waekwö debö batjibakwedö. Jo̧kwaijayonö jejenömaökö ötjö chö̧ji̧ma, ötjö tjö̧ji̧binö pjatati̧ma, ba̧kwelöjatebö ji̧ jawa chömöledö, ja̧danö otiwanö webö chö̧ji̧ma, la'akatjöda 'dö̧ibökakobe.

⁷ Ökwödö weti̧ a̧ja̧kwö ju̧kwadöma, kwomajadeduwinö, —Dios wei̧ma inesö mikwawi̧ a̧ja̧kwö dö̧jobö, —jö̧ba̧lö ösödadöma, ökwödönö yöta̧li̧ kwa̧ja̧kwaduwo: Jojodö ökwödönö obö, sulabenö yötja̧li̧jayonö, jobadönö yekabiduwoko, ja̧danö sulabenö yötja̧li̧ a̧ja̧kwö, kwo̧'woduwi tjo̧kekwaduwoko.

⁸ Jobadö ökwödönö obadöma juluwanö detjakwedö chömöledö, baikwö wanedö yöta̧la: Pjȩlȩbö̧ kamijido̧ suli̧ tjöwaedi̧danö, ja̧danö sa̧dö obejadö tjöwö'yetjö otikwa̧do̧ tjukwi̧danö, baledakwawö̧ ökwödönö obadönö, jobadönö yekabiduwoko. Jo̧kwaijayonö ötjö chujulunö kwö̧jibaduwinö pjatati̧ma, ba̧kwelöjatebö ji̧ jawa, ja̧danö kwö̧jibaduwinö pjatatobetjö̧, 'dö̧ibajökönö ba̧kwelöjatebö otiwanö ji̧bajadö kwö̧jaduwakwedöja, jö̧ba̧lö yöa̧lobe Diosma

Dios pjaatobö aebakwawa Isaias i̧wȩyudina jawa

⁹ Duluwo̧ Isabenö Jo̧, baikwö adebakwö, A̧la̧ibi, juluwanö a̧la̧ibi, inesö kwujulu kwi̧sȩbakobetjö̧. Damötjö kwujulu kwi̧sȩbinadanö, yemidanö a̧la̧ibö ökwödönö pjakatobö atebakwö. Jau duluwo̧ Dios, ökwöda damötjö Rahab ötjabökwe, inesö jwaibalawanö ji̧na labo̧nö dȩdȩbö loköbijatö, ja̧danö dȩdebö lobajo̧, pjei̧kwena kwubulabinobe, jö̧tö? Jobekwö yemidanö kwujulu kwi̧sȩbobö atebakwö.

¹⁰ Jau chuluwo̧, ökwöda damötjö jwaibalawa köködö lobinaja, inesö da̧kwawa köködö lobinaja, ökwöda kwömöledö israel jojodö, tjö̧jibinö pjakatajawö̧ma otiwanö tjöbaledakobetjö, jö̧tö? Yemidanö jobekwö pjakatobö adebakwö.

¹¹ Jobekwö pjakatakwo̧ja duluwo̧ Isabenö Jo̧, ja̧danö tjö̧jibinö pjakatajawö̧ma tjitebobe tjȩwa̧jakwedö. Tjo̧'wo ösöwachibanö lo̧awa lo̧bö, Sion mösa'obe tjichibakwedö, ja̧danö 'dö̧ibajökönö, ba̧kwelöjatebö tjo̧'wo ösöwanö tjö̧jakwedö. Ja̧ möle la'akatjöda o̧'wo tjo̧achö tjö̧jökakwedö, ja̧danö la'akatjöda usula tjemawökakwedö, pjakatiawö̧, jwaikwöda ba̧kwelöjatebö tjo̧'wo ösöwanöda tjö̧jakwedö, jö̧ba̧lö adebakwö duluwo̧ Isabenö Jo̧.

¹² Adebökwe, baikwö atadö yöba̧lo̧ Isabenö Jo̧ma: Chömöledö, kwo̧'wo tjo̧bekwö kwö̧jaduwelö, ötjödasa kwo̧'woduwi ösöwachibanö pjabato̧ma. Ja̧danö ötjöda ökwödönö pjatatobetjö̧, tajawedö bö̧jȩ jojodönö yekabiduwobö? Jobadöma meje'ye, juluwanö kököbachibö, debi baiba'yedanö ichejekwadö, juluwanö debö 'ya̧dö bö̧jȩ jojodöma, tajawedö jobadönö yekabiduwobeda?

¹³ Tajawedö ötjö, ökwödönö otidina, Isabenö Jo̧ Diosnö kwo̧'wo jwikibinaduwada chömöledö? Ötjöma isabenö juluwo̧sa, ötjödasa mölȩjȩ sedatö nöninama, ja̧danö ötjödasa bö̧jȩ la'aka lödinama, ötjönö kwomukwataduwo jö̧ka̧laduwajabe. Jo̧kwaijayonö, kwöpöjojodöduwi usula kwemawaduwinö ja̧badö tjölabena, ja̧danö ökwödönö söbebö lotjobö jö̧tja̧lenama, ötjönö omukwatökönö, bakobe yebabinö ja̧döja. Jobadönö yekabiduwobö jwiobe chömöledö, ökwödönö labinadöma ida̧ökö debi batjibajabe.

¹⁴ Isabenö yöta̧laduwakwö chömöledö, ökwödö tjö̧möayedö bakibaduwanö do̧tja̧tinawö̧ma, juluwanö ejatö lotjakwawö̧ja. Jau chömöledö, ka̧lena tjödajawö̧, ö'wö bakibaduwökakwedöja, ja̧danö a̧wi̧chi̧ lö̧jö̧kö̧wö̧ kwö̧jaduwakwedöja.

¹⁵ Jau chömöledö, jobekwö baledakobe ökwödönö, ötjö Isabenö Jo̧ma, kwuluwo̧duwi Dios chö̧jobetjö̧, ja̧danö ötjöma isabenö juluwo̧sa. Ötjödasa jwaibalawa welebö, labinö ökwöinö loobö webo̧ma chömöledö, ja̧danö Isabenö Jo̧ Okobe Jwiinö Juluwo̧ mikwo̧sa.

¹⁶ Ja̧danö ötjöma ötjöda yötawi̧ ökwödönö chijayabe, yöka̧laduwobö, ja̧danö ötjöda chömamunö ökwödönö tjöbeba̧lö chösadobe, wene jwiinö kwö̧jaduwobö. Jau chömöledö, ötjöda mölejȩ otidö nöninasa, ja̧danö ötjöda bö̧jȩ la'aka lödinasa, ja̧danö ötjö jobekwö otidinama ökwödö Jerusalen jojodönö yöta̧lajabe, —Ökwödöma ötjöda chömöledöja, —jö̧ba̧lö, jo̧kwajabetjö̧ isabenö kwöpöjojodöduwitjö kwö̧jibaduwakwedöja.

Jerusalen jojodöma Dios lȩebi̧tjö tjemajabe, jö̧ba̧lö Isaias i̧wȩyudina jawa

¹⁷ Ökwödö 'dukwachawö̧danöbedö Jerusalen jojodöma, wilubaduwi, wilubö a̧la̧ibaduwi. Wanedö yöta̧laduwakwö, Isabenö Jo̧ma iteda ödameakwi̧ a̧ja̧'do̧ deja'do̧tjö kwowaduwobö iyinobe, ja̧danö iyajawö̧, okobe jwiinö kwowaduwajabe, ja'yubebi ji̧bökönö kwowaduwajabe, inesö yeabikwawa jawa deja'do̧ a̧ji̧ma.

¹⁸ Ja̧danö kwi̧tji̧muduwi tjö̧ba̧jekwinajayonö, ida̧ökö kwitji̧muduwi ina 'yaba̧ladö debadöja, kwömamuduwi do̧ba̧lö, ökwödönö öbibö pjatjatakobetjö̧.

¹⁹ Jau chömöledö, inesö labi̧ jawa dötölataja jawa baledajabe kwiteboduwitjö̧: A̧wi̧chi̧ jwiinö lö̧jajabe, a̧wi̧chi̧tjö kwöwaekwaduwenanö baibanö, ja̧danö ju'wibi kwöpöjojodö ökwödönö ölakwabikwawö metjibajabe, kwiteboduwi söbebö lotjenanö baibanö. Ja̧danö jobekwö baledijayonö, kwo̧'woduwi ösöwachibanö pjabato̧ma deinö ji̧badöja.

²⁰ Kwitji̧muduwima, 'dö̧bachajadö, comunidad mana ö'wejenö nijinö ba̧jadö, ja̧danö jobe ba̧nö, yama mayanö do̧tja̧tajökwedanö ichejekwadö, tjö̧jiboböma jwitjobetjö̧. Jau, jobadönö baledaja̧ma, baikwö labebö lobö yöta̧la, kwuluwo̧duwi Isabenö Jo̧ Diosma jwiinö ödameakwobe jobadönö, ja̧danö jobadönö lȩbebö, inesö ödameakwi̧ jobadönö lȩebajabe.

²¹ Jo̧kwaijayonö babe bi̧ya yöta̧lakwa̧ kwaja̧kwaduwo, ökwödö nio ojwiyo kwo̧wa̧laduwököjayonö 'dukwachawö̧danö ichejekwadöma.

²² Baikwö yöawobe kwuluwo̧duwi Isabenö Jo̧ Diosma ökwödönö: Chömöledö, babe kwömamuduwitjö 'dötebajabe inesö dameakwö lȩtebi̧ a̧ja̧'do̧ deja'do, 'dukwachawö̧danö bakibaduwanö suli̧ waeda'do̧ma. Bemi tupakwö ja̧'do̧tjö kwowaduwökakwedöja chömöledö,

²³ babe balekwedönöda tjowobö chiyakwo̧sa, kwöpöjojodöduwinö. Jau, ja̧'do̧ usula kwemawaduwinö ja̧bi̧nadönöda chiyocha, babema, jobadöda usula emawö tjowakobetjö̧. Jau chömöledö, ajayinö jobadöma bȩbachibö kwöbamataduwobö wetjinobedanö ichejekwa, ja̧danö mananö kwetjachobedanö, kwoma'aduwi ja̧tö, ökwödönö sulabenö ja̧tjinobe, ja̧danö babema balekwa mikwa jobadöda kwowinaduwa'do̧tjö̧ tjowobö wetocha, jö̧ba̧lö yöa̧lobe Diosma ökwödö usula emawadönö.