Isaías 5 - Dios Iwene

Isaias wanedö lo̧ina jawa, Israel jojodöma Dios öbatjo sulayudanö ichejekwadö, jö̧ba̧lö

¹ Babema lo̧tocha chösödökwenö, wanedö lo̧tocha, chösödökwe öbatjo ubasayu otidina jawama: Chösödökwema mösa'o ö'öbö iteda öbatjo ubasayu otidinobe, batjo jwiinö otiwanö pokwemi ubasayu otidinobe.

² Batjo otiwanö otidö, niji sobö otidinobe, ja̧danö okobe jwiinö inawiya pjolatö loinobe, ubasa'ba otiwanö pokwakobetjö̧. Jejenö otidajo̧, inesö otiwa'ba ubasa'ba ujuninobe. Ju'wibi batjo ö'weje isaka eda̧lö teada̧lawkawaka otidinobe, batjo otiwanö iteada̧lakobetjö̧, ja̧danö inawanö ubasobu ja̧tö otikwemibi otidinobe, uba wajena, otiwanö ubasobu otidakobetjö̧. Ikenama, jejenö otidajo̧, lekwe möle iteada̧linobe, öbatjo otidajayuma uba waji̧ otiwi̧ wa̧jakobetjö̧, jokwaijayonö waekwinobe, sule tebo jawa uba waji̧da wa̧ji̧nobe, lei̧ uba waji̧da.

³ Dios otidina jawa jobekwö wanedö lo̧taduwakwö. Ja̧danö tupakwö Dios ökwödönö abebö a̧ja̧kwi̧ abebö cha̧ja̧kwaduwakwö, baikwö: —Ökwödö Jerusalen comunidadnö ju̧kwadönö, ja̧danö ju'wedö Juda niji ju̧kwadönö abebö cha̧ja̧kwaduwakwö, sulabenö chöbatjo chiteada̧linojobö, a̧dekwanö chöbatjoda sulabenö pokwinojobö, jö̧ba̧lö.

⁴ Kwedaduwemi, ajayinö chotidinatjö bajalekwönönö chöbatjo chotidobö ji̧naji̧? Ja̧maökö, okobe jwiinö chotido jö̧ta̧lina jawa otiwanö chotidijatö, jö̧tö? Ja̧danö, jobekwö otiwanö chotidinobetjö̧, uba waji̧ otiwi̧ wa̧jobö ji̧nobe, jö̧tö? Jo̧kwajabetjö̧ baikwö abebö cha̧ja̧kwaduwakwö: Uba waji̧ otiwi̧ wa̧jobö chiteada̧lemi, tajawedö sule suli̧ tebo jawa wa̧ji̧da pokwinada? Jobekwö suli̧ jawada pokwobö jwiinobe, jö̧tö?

⁵ —Ja̧danö, jobekwö suli̧ jawada pokwobetjö̧, baikwö yötawaduwakwö chöbatjo ja̧takwa̧ma: Chöbatjo ö'öbö tjöekwi̧, ja̧danö inawatjö otikwemi tjöekwemibi 'dobö lotocha, tebonö ju̧kwadö chöbatjo tebachö, ja̧tö lotjakobetjö̧.

⁶ Jau, niji mikwawökemi baibanö söbebö lotocha chöbatjoma. Bemi tupakwö ubasa'ba bajale 'wibö chotidökakwo̧sa, ja̧danö niji sobö chotidökakwo̧sa, bakwainö tebo jawa sȩakada, ja̧danö ju'wi sula'woda chöbatjotjö pokwakobetjö. Ju'wibi ojwiyo o'wiju tjöteba̧lakwo̧sa, ja̧dano wetökakwo̧sa, chöbatjo ji̧nemi ojwiyo o̧boböma, —jö̧ba̧lö Dios ökwödönö abebö a̧ja̧kwi̧ yötawaduwakwö.

⁷ Ja̧ wanedö yötawaja̧ma, baikwö labebö lotaduwakwö chömöledö: Isabenö Jo̧ okobe jwiinö juluwo̧ Dios öbatjo wanekwachi̧ma, Israel mikwina itji̧mu tupadanö jojodönö wanekwachobe, jadanö otiwanö ubasa'ba ujunina wanekwachi̧ma, Juda jojodönö wanekwachobe. Ja̧danö, otiwanö ökwödönö pjaatinobetjö̧, ökwödönö iteada̧linobe, —Chömöledö Juda jojodöma otiwanö weti̧ a̧ja̧kwö tjö̧jo jö̧ba̧ladö, —jö̧ba̧lö. Jo̧kwaijayonö, wei̧ a̧ja̧kwö kwö̧jaduwo jö̧ka̧laduwemi, jojodönö kwabö lobadöja, jadanö otiwanö jabö kwö̧jaduwobö ji̧jayonö, sulabenö ja̧köbaduwawö̧ tjubudekwi̧da ökwöobe.

Isabenö Dios lȩebakwawö̧ sulabedönöma, jö̧ba̧lö Isaias yöawina jawa

⁸ Isabenö Dios lȩebakwawö̧, ju'wedö tjejubiyabi, ju'wedö tjitea nijibi, idöda tjujuna̧lotö jö̧ba̧lö 'döbebadönö. Ökwödö jobekwö 'döbebö emadöma, okobe deinö tjejubiyabi, tjöbatjobiyabi 'döbebö kwemaduwotö jö̧ba̧lö isakwadöja, ökwödöda israel nijinö jo̧dawa'ye kwö̧jaduwakobetjö̧.

⁹ Jobekwö ja̧bö kwö̧jaduwiökwe, isabenö lȩebakwo̧ Diosma. Jau, cha̧ja̧kwonö, Isabenö Jo̧ Okobe Jwiinö Juluwo̧ Diosma iteda lȩebakwa̧ jawa yöbawö ujuninobe, baikwö: —Isabenö ba̧jȩkwejubiyama jojodö dei ejubiya ji̧bakobe, inesö otiweju jalejubiyabi jojodö dei ejubiya ji̧bakobe, lȩtebakobetjö̧, —jö̧ba̧lö Dios yöbawö ujunina cha̧ja̧kwijatö.

¹⁰ Jau chömöledö, Dios lȩebenama, otiwanö wa̧jökakobe batjoma, baikwö yötawa: Batjo jwiinö jalayu, domulataja jawa möle baledibanö pakayadökwö sobö otikwayu uba batjoma, sule ja'yubeda uba opjiya wa̧jakobe, sule veinte litro ubasobu jenanö kwemaduwakwedöja. Ja̧danö cien kilo trigo ödebiya kwödaduwitjö̧ma, trigo waji̧ma sule diez kilo jenanö kwemaduwakwedöja.

¹¹ Ja̧danö isabenö Dios lȩebakwawö̧ja, nio ojwiyo kwowaduwotö jö̧ba̧lö isakwadönöma. Ja̧köbaduwi̧ma baikwö yöta̧la: Yȩayi a̧la̧ibadöja, nio ojwiyo kwowa̧laduwotö jö̧ba̧lö, jadanö yö̧te baledibanö ubasobu o̧'do̧bu owa̧ladöja, 'dukwachawö̧ bakibaduwenanö.

¹² Ja̧danö ba'ali junö, lo̧awa jawa arpabi, lirasbi, tamboresbi, flautasbi kwujuna̧laduwijayonö, jadanö ubasobu kwujuna̧laduwijayonö, Isabenö Jo̧ otidi̧ jawa omukwatöködöja. Jau, Diosnö omukwatö, —Isabenö inesö otiwi̧ jawa otidajabe duluwo̧ Isabenö Jo̧ma, —jö̧ba̧lö kwomukwataduwo jö̧ba̧ladöja, jo̧kwaijayonö omukwatöködöja.

¹³ Jobekwö sulabenö ja̧köbaduwiökwe, baikwö lȩbebö yöbawo̧ Diosma: —Wajwibadötjobetjö, chömöledö israel jojodöma tjitebotjö latjebakwawö̧, ju'wedö tjitebonö tjö̧jakobetjö̧. Ja̧danö jobadötjö otiwanö tjomukwatawö̧ma, a̧wi̧chi̧ lö̧jawö̧ tjö̧jakwedö, ja̧danö jokwadabedöma ojwiyo o̧ti̧tjö debö tji̧'yakwedö.

¹⁴ Wanedö yötawa, Dios ba̧jȩkwadönö lȩebobetjö̧, ö'wö babibadö tju̧ju̧kwemima nöinö ukwobö jö̧a̧lobe ichejekwa, ja̧danö ajayitjö bajalekwönönö ba̧jȩkwadönö ö̧kato jö̧ba̧lö, aa jalinö alebajabe, jadanö Jerusalen comunidad luwedönöbi, ju'wedö inesö ba̧jȩkwadö Jerusalennö ju̧kwadönöbi ö̧katakobe ö'wö babibadö tjuju̧kwemima. Jau, Dios lȩebobetjö̧, Jerusalennö ju̧kwadö ba'ali o̧wa̧ladöbi, ju'wedö Jerusalennö tju̧ju̧kwobö ösödadöbi bakobe debö tji̧'yakwedö.

¹⁵ Jau chömöledö, Dios lȩebobetjö̧, okobe deinö jojodöma nijakwönönö batjibanö jokwadabedö tjö̧jakwedö, ju'wedötjö bajalekwönönö otiwadösa jö̧ba̧lö omukwatadöbi jo̧kwadabedö batjibanö, tabakwö tjö̧jakwedö.

¹⁶ Jo̧kwaijayonö, bö̧jȩ jojodö ajayitjö nijakwönönö jo̧kwadabedö batjibonö, möakwö inesö otiwanö tjomukwatökwe baibanö ö̧jakwo̧ Isabenö Jo̧ Okobe Jwiinö Juluwo̧ Diosma. Jau, sulabedönö lȩbebö, inesö suli̧ jwibo̧ Diosma i̧sȩbakobe, inesö suli̧ jwibo̧ ö̧jima, jadanö jejenö i̧sȩbiawö̧ tjösödakwedö Diosnö, —Isabenö suli̧ jwibo̧, lȩebo jö̧a̧lidanö lȩbebo̧ Diosma, —jö̧ba̧lö.

¹⁷ Jau, Diosma isabenö söbebö loakobe Jerusalen comunidadma, ja̧danö söbebö loaja̧ okobe, meje'yetjö tjukwi̧danö, obejadöma comunidad ji̧nelö pokwi̧ isa'ye tjukwakwedö, ja̧danö chivodöma nöinö juna̧linadö tjejubiya jinelö tju̧kwa tjukwakwedö.

¹⁸ Isabenö usula tjemawakwedö, sulabenö ja̧tjotö jö̧ba̧lö omöna yöba̧ladöma. Ja̧bö tjö̧ji̧ma baikwö wanedö yöta̧la, omöna yöa̧lakwawa yöba̧lö, sulabenö ja̧awa tötjobedanö ichejekwa, koluka a̧la̧chi'bonö bö'ödö tötjebi̧danö, sulabenö ja̧awa tötjebobedanö ichejekwa.

¹⁹ Jobadöma sulabenö obö yöbaladö Diosnö, baikwö: —Dios otidobö ji̧tjö̧ma, lekwe iteada̧loko, juluwanö otidobö jo̧be, otidakwa̧ dedakobetjö̧. Jau, Israel jojodö tjösödökwe sulabe jwibo̧ Diosma iteda waisanö omudawö ujunaja̧ i̧sȩbobö jo̧be, waisanö omukwati̧ edö döwaisachibakobetjö̧, —jö̧ba̧lö sulabenö obö yöba̧ladö.

²⁰ Isabenö usula tjemawakwedö, ökömakwö sulabenö yöba̧ladöma. Jobadöma otiwi̧ jawa edö, —Suli̧, Dios öpöjödi̧, —jö̧ba̧lö yöba̧ladö, jadanö suli̧ Dios öpöjödi̧ jawa edö, —Otiwi̧, Dios ösödi̧, —jö̧ba̧lö yöba̧ladö. Ja̧danö ju'wibi yȩi̧ edö, —Isabenö dewi̧, —jö̧ba̧ladö, ja̧danö dewi̧ edö, —Yȩi̧, —jö̧ba̧ladö. Ja̧danö lei̧ jawa, —Isabenö o̧ti̧, —jö̧ba̧ladö, ja̧danö o̧ti̧ jawa, —Isabenö lei̧, —jö̧ba̧ladö, sulabenö ökömakwö yöba̧ladöma.

²¹ Isabenö usula tjemawakwedö, —Waisanö omukwatadösa, okobe jwiinö waisakwawa jawa waisadösa, —jö̧ba̧lö sulabenö omukwatadöma.

²² Isabenö usula tjemawakwedö, nöinö nio ojwiyo owa̧ladöma. Jobadöma sulabenö omukwatadö, —Ju'wedötjö bajalekwönö nöinö ubasobu o̧'do̧bu dowa̧lobö dujuluwobetjö̧, otiwadösa, ja̧danö ju'wi nio ojwiyokwö, ju'wi nio ojwiyokwö pjabatö wiwodakwawa döwaisobetjö̧, otiwadösa, —jö̧ba̧lö omukwatadö.

²³ Ja̧danö, ju'wibi ju'wedö tjimidawö̧, sulabenö ja̧badönö pjabatadö, sulabenö ja̧tjijayonö, —Bidöma wene jwibadö, sulabenö ja̧böködö, —jö̧ba̧lö omöna yöba̧ladö, ja̧danö sulabenö ja̧böködönö pjatjato jö̧tja̧lijayonö, pjabatökönö suli̧ waedadö.

²⁴ Okobe deinö jobadö yöta̧lajawö̧ma, Okobe Jwiinö Juluwo̧ Isabenö Jo̧ Dios weina a̧ja̧kwökönö öpöjödadö, —Israel jojodö tjösödökwe Sulabe Jwibo̧ Dios wei̧ma mikwawökö ji̧, —jö̧ba̧lö sulabenö öpöjödadö, jo̧kwajabetjö̧ isabenö usula tjemawakwedö. 'Witjaja̧ isa'ye juluwanö ubi̧danö, ja̧danö ökwöla öba a'otjö meje'ye kököa'ye juluwanö bȩbachibö ubi̧danö baledakwawö̧. Jau, wanedö yötawa, tjö̧ji̧ bö'diyadanö ji̧ma 'dolowakobe, ja̧danö tjö̧ji̧ o̧bubiyadanö ji̧ma kököbachibö jwiakobe, tjöpöjödiökwe Dios isabenö lȩebobetjö̧.

²⁵ Jau chömöledö, yöta̧laja̧danö sulabenö ja̧tjiökwe, isabenö ödameakwachibajabe Isabenö Jo̧ma, iteda ömöledö israel jojodönö, ja̧danö ömamu kabebö, jobadönö kwaajabe. Jobekwö kwaobetjö̧, mösa'ijuma tjö̧awobe, ja̧danö kwaajawö̧ tjiteba'ijuma, comunidad mananö bo̧be, sula'wo bi̧danö. Ja̧danö ida̧ökö bakwötanö kwaajayonö, ina seachibokobe Isabenö Jo̧ inesö ödameakwi̧ma, ja̧danö ina öja i̧sȩba̧lö jo̧, yemidanö kwaakobetjö̧.

²⁶ Jau, iteda ömöledö israel jojodönö lȩebakobetjö̧, Isabenö Jo̧ma i̧sȩbö jwöakobe ju'wedö tjitebo jojodö ödö ju̧kwadönö, bö̧je bakwachö̧je ju̧kwadö ölakwabikwawa jojodönö su̧wiba̧lö jwöakobe, ja̧danö jwöajawö̧, juluwanö tjichakwedö.

²⁷ Ja̧danö tjichenema, tjime'dawachibökakwedö, ja̧danö töbö metjö̧kakwedö, ja̧danö tjabökakwedö, abökönö juluwanö tjichibakobetjö̧. Ja̧danö koleasö̧jȩ ejachibikönö, ja̧danö sapatu di̧atakwawö̧jȩ 'döawökönö tjichobö weakobe, otiwanö tjölakwabikwawakobetjö̧.

²⁸ Jobadöma tjitea nayunu sȩayu juna̧ladö, ja̧danö 'böpöma ida̧ökö sedata̧lö ja̧dö, juluwanö israel jojodönö 'bötjakobetjö̧. Ja̧danö tja̧jwimu kabayudö tjömasapiyama, inawadanö 'diyapa juna̧ladö, ja̧danö tjiteaka kolukiya o'ijuma, jwa̧le'epjodanö juluwanö jalacha'o, juluwanö tjichibakobetjö̧.

²⁹ Ja̧danö tulubö jwötjeba̧li̧ma, 'didiba tului̧danö labinö tulubadö. Jau, 'didibadö juluwadö tjukwakwo̧nö do̧batajadö, tulubö jelobekwö tje'ewenama, bakwo̧bi do̧tjatajö̧kwe ö̧jibinö pjaatobö jwiena, jö̧tö? Ödötjö ichajadöbi ja̧danö, labinö tulubö jwöbeba̧lö metji̧bakwedö, israel jojodö tjö̧jibobö jwiinö.

³⁰ Tjichibakwa̧ mölema, isabenö labinö tjichakwedö, jwaibalawa labinö ökwöinö söbebö loi̧danö, labinö ökwöinö söbebö lobö tjichakwedö. Ja̧ möle jojodö israel niji tjedenama, yȩa'wo jo̧be, nöinö wene jo̧be tjedakwedö. Jau, ja̧ möle isabenö nöinö wene jo̧betjö̧, dewi̧bi dewokobedanö ichejekwakobe, jwiinö yȩa'wo ojwiyo o'wiju lo̧betjö̧.