Isaías 49 - Dios Iwene

Dios ömöayo̧ bö̧jȩ ba̧kwemeachibanö ju̧kwadönö pjaatakwa̧ jawa, Isaias i̧wȩyudina

¹ Baikwö laebobe Dios ömöayo̧ yöa̧li̧ma: Ökwödö ödö ju̧kwadö jwaibalawa ö'öbö ju̧kwadöbi ju'wedö bö̧jȩ bakwachö̧jȩ ju̧wkadöbi, yötawi̧ kwa̧ja̧kwaduwo. Chojo'do jukwa'wo ina cha̧ja̧yi, Isabenö Jo̧ma ötjönö jwöinobe, iteda ömöayo̧ batibakobetjö̧, ina ötjönö jemakwa̧ abönö, chimi imidinobe Isabenö Jo̧ma.

² Ja̧danö ötjönö otidö ujuninobe iteda ömöayo̧ batibanö, baikwö wanedö yötawa: Chaama, kwölöte'o sȩa'o baibanö otidinobe, ja̧danö iteda ömamunö otiwanö tjöbeba̧lö iteada̧linobe ötjönö. Ju'wibi, iteda 'böakwanu nayunu batibanö otidinobe, ja̧danö otidajo̧, iteda itea nayunu a̧ja̧pjonö aninobe.

³ Ja̧danö, ötjönö yöa̧linobe Isabenö Jo̧ma: —Ökwöma ötjöda chömöayo̧ Israel mikwo̧ja, ja̧danö ökwönötjö ötjöda dejatinö chujulu chi̧sȩbakwo̧sa, —jö̧ba̧lö.

⁴ Yöa̧li̧tjö̧, —Chuluwo̧, nöinö chotidinajayonö, mikwawinokobe. Chime'dawachibenanö baibanö labinö chotidinajayonö, chotidaja̧ma jwiobe, mikwawökö chotidaja̧ma, —jö̧ba̧lö. Jo̧kwaijayonö Isabenö Jo̧ Diosda chotidina mikwa̧wi̧ waiso̧ma, ja̧danö chotidaja̧ mikwama, jo̧bada iyakwo̧, wei̧ a̧ja̧kwö chö̧jiökwe, balekwa mikwa chemo jö̧tja̧li̧danö otiwanö iyakwo̧.

⁵ Isabenö Jo̧ Diosda ötjönö otidinama, chojo'do jukwa'wo okwa cha̧ja̧yi, iteda ömöayo̧ batibanö otidinobe, ötjönötjö iteda ömöledö Jacob itji̧mu tupadanö jojodönö pjaatobö, yemidanö jo̧bakwö tjichibakobetjö̧. Jau, israel jojodöma tjebachajö jo̧bakwö batjibanö o̧ko̧kodakobetjö̧, iteda ömöayo̧ batidanö otidinobe, ja̧danö Isabenö Jo̧ öba a'otjö, isabenö otiwanö tjomukwatökwe chö̧jakwo̧sa, chuluwo̧ Diosda chujuluwachibanö pjaatobetjö̧. Ja̧danö, babema ötjönö otidina Isabenö Jo̧ma ötjönö yöawobe, baikwö:

⁶ —Ötjö chömöayo̧ ja̧nö, Jacob itji̧mu tupadanö jojodö sasokwena jojodönö, yemidanö ajayi tjitebonö Israel nijinö tjö̧jobö tjekatobö otiwa. Jo̧kwaijayonö ja̧ otikwa otiwijayonö, ja̧ otikwadama ba̧jȩkwachökena, jemi tupakwöbi kwotidobö chösöda. Jo̧kwajabetjö̧ ju'wibi tjitebotenia jojodönö dejato̧ bakibanö chujunakwo̧sa, tjö̧jibinö pjatatakwa̧ma, bö̧jȩ bakwachö̧jȩ ju̧kwadönöbi tjö̧jibinö pjatatakobetjö̧, —jö̧ba̧lö babe yöawobe ötjönö, jö̧ba̧lö laebobe Dios ömöayo̧ yöa̧li̧ma.

⁷ Isabenö Jo̧, Israel jojodönö tjöbeba̧lö pjabato̧, tjösödökwe suli̧ jwibo̧ma, baikwö yöa̧lobe tjitebotenia jojodö tjöpöjödökwe, ajayinö mikwawö̧kö̧ jö̧ba̧lö tjomukwatökwe la'aka luwedö tjö̧möayo̧nö: Ötjö ba̧kwelöjatebö yötawi̧danö ja̧bö jo̧ Isabenö Jo̧, Israel jojodö tjösödökwe Suli̧ Jwibo̧ Diosma ökwönö omudawö chujuninökweja, ötjöda chömöayo̧ bakibanö. Jo̧kwajabetjö̧, ju'winö inesö la'aka luwedöma ökwönö edö, kwöba a'o a̧la̧ibö tjöjamatakwedö, –Ökwöma mikwawo̧ja, –jö̧ba̧lö, ja̧danö ju'wedö luwedö kwöba a'o bȩbachibö tjö̧jakwedö, jö̧ba̧lö yöa̧lobe Diosma, iteda ömöayo̧nö.

Dios yemidanö israel jojodönö pjaatakwa̧ Isaias i̧wȩyudina jawa

⁸ Baikwö yöa̧lobe Isabenö Jo̧ma, iteda ömöayo̧nö: Lȩlöjinö edö pjatatakwa̧ möle badekwachenama, akebi̧ a̧jakwö pjatatajabe, tjö̧jibinö pjatatakwa̧ möle badekwachenama, ökwönö pjatatajabe. Ja̧danö, ökwönö tjöbeba̧lö pjatatakwo̧sa, ja̧danö ökwönö chujunocha, tjitebokwena jojodötjö, ötjötjö ö'weje pjabato̧ bakibanö. Ja̧danö ju'wibi ökwönö chujunocha, israel niji yemidanö otiwachibanö kwotidakobetjö̧, ja̧danö tjitebo niji, jojodö deinelö nijima, 'da̧batö junö, ja̧ niji tjö̧jakwedönö kwiyabobö chujunajabe.

⁹ Jobekwö chujunajökwe, ka̧lena ba̧jadönö weköbakwo̧ja, —Labebaduwi, —jö̧ba̧lö, ja̧danö yȩa'wo okwa ju̧kwadönö, —Dewobekwö labebö, öwawachaduwi, —jö̧ba̧lö. Jobekwö lakebiawö̧, chajwimu obejadö otiwanö tjö̧ji̧danö tjö̧jakwedö, baikwö wanedö yöta̧la: Mana ö'öbö, otiwanö meje'ye tjukwakwedö, ja̧danö mösa'iju ö'öbötenia, otiwanö tju̧kwa̧ tjöbadekwakwedö.

¹⁰ Ja̧danö a̧wi̧chi̧bi, ojwiyo o̧ti̧bi tjötjökakwedö, ja̧danö jawo̧ma labinö tubinö idejatökakobe jobadönö. Jau, ötjö jobadönö lȩlö̧inö edo̧ma otiwanö tji̧'yakwa̧ jwetebakwo̧sa, ja̧danö otiwanö ötibakwo̧sa, ojwese'dobe ichibö tjowakobetjö̧.

¹¹ Ja̧danö mösa'ijuma, mana ba̧ba̧lawama baibanö ja̧takwo̧sa, ja̧danö mana jalama chotidakwo̧sa, otiwanö kwetjachakobetjö̧. Jobekwö wanedö yöta̧la chömöledö israel jojodönö pjatatakwa̧ma .

¹² Ja̧danö pjatatiawö̧, ödötjö tjichakobe chömöledöma, u'dakwötjöbi, jawo̧ meajobekwötjöbi, Asuan nijitjöbi otiwanö tjebachajö tjichakwedö, chömöledö israel jojodöma.

¹³ Jobekwö otiwanö baledobetjö̧, mölejȩbi o̧'wo ösöwachibanö jwöeba̧lobö jo̧be, ja̧danö bö̧jȩbi o̧'wo ösöwachibobö jo̧be, ja̧danö mösa'iju lo̧obö jo̧be, Isabenö Jo̧ma iteda ömöledönö pjaatobetjö̧. Jau, Diosma iteda ömöledö israel jojodönö tjo̧'wo ösöwachibanö pjabato̧, ja̧danö iteda ömöledötjö usula emawadönö, lȩlöinö edakwo̧, jö̧ba̧lö laebobe Dios yöa̧li̧ma.

Jerusalennö ju̧kwadönö o̧'wo jwibibö̧kö̧ Diosma, jö̧ba̧lö Isaias i̧wȩyudina jawa

¹⁴ Jerusalennö ju̧kwadöma yötja̧lajabe, —Isabenö Jo̧ma ökwödönö lededö loajabe, duluwo̧ma o̧'wo jwiibajabe ökwödö jo̧ba ömöledönö, —jö̧ba̧lö.

¹⁵ Jo̧kwaijayonö, jobekwö yötja̧liökwe, baikwö atado̧ Isabenö Jo̧ma: Ja̧maökö chömöledö, ökwödönö cho̧'wo jwibibö̧kö̧sa. Baikwö wanedö yöta̧la chömöledö: Jojosuju, jitji̧ ja'yuwo̧, jo̧do'bi̧ jojwebökwenö jo̧'wo jwijibenaji̧? Isuda jitji̧ jemajökwenö, lȩlöjinö jedökenaji̧? Kwöwaisaduwa chömöledö, ja̧maökö, jö̧tö? Ja̧danö baikwö yöta̧laduwakwö, jojosuju jitji̧nö o̧'wo jwibibökönö jö̧ji̧tjö̧ bajalakwönönö, jwaikwöda ökwödönö chomukwatibo̧sa, la'akatjöda ökwödönö o̧'wo jwibibö̧kö̧sa chömöledö.

¹⁶ Jau chömöledö, ötjöma kwimiduwi 'dȩbö wȩyudö chödinobe ötjöda chömamijunö, ja̧danö ba̧kwelöjatebö kwiteboduwi Jerusalen tjöekwemi edö jo̧sa, la'akatjöda ökwödönö cho̧'wo jwitiboböma jwibo̧sa.

¹⁷ Ja̧danö chömöledö, Jerusalen jojodö, juluwanö kwitji̧muduwima kwiteboduwibe tjebachajö tjichakwedö, ja̧danö kwiteboduwi Jerusalen comunidad söbebö lobinadöma latjebakwedö.

¹⁸ Jau chömöledö, möakwö edö, kwitji̧muduwinö kwedaduwakwedöja, ja̧danö kwitji̧muduwi ko̧ko̧kwo kwö̧jaduwobekwö tjichobe kwedaduwakwedöja. Ötjöma Isabenö Jo̧ Diossa chömöledö, ja̧danö ötjöda isabenö yöbawö chujunaduwakwö, kwitji̧muduwima isabenö ökwödökwö tjö̧jakwedö, baikwö wanedö yötawa: Jilekwenö jemakwujuma otikwi̧ jawa nönuju, sasiyubi, ju'wi otikwi̧ jawabi, ja̧danö jobuju otikwi̧ jawa jöni̧danö, ökwödöma kwitji̧muduwinö ökwödökwö yöne kwujuna̧laduwakwedöja.

¹⁹ Babema kwiteboduwi Juda nijima, isabenö suli̧ waekwobe, jojodö deobe chömöledö, jo̧kwaijayonö ja'yubenö lekwajabetjö̧ ökwöda kwömöledötjö su̧'bȩ baibakobe kwiteboduwima, kwiteboduwitjö jojodö deobebi tjö̧ba̧jekwachenanö baibanö. Ja̧danö ja̧ möle, kwöpöjojodöduwi, tjö̧möayedö bakibaduwanö ökwödönö juluwinadöma, kwö̧jaduwelö ödö tjö̧jakwedö.

²⁰ Ja̧danö, kwiteboduwitjö a'dewö lotjajawö̧, ju'wedö tjitebonö ja̧nö kwitji̧muduwi kweminaduwawö̧ma, a̧dekwanö kwiteboduwibe tjichibakwedö. Ja̧danö ichibö, jwiinö tjö̧ba̧jȩkwachobetjö̧, yötja̧lobe kwa̧ja̧kwaduwakwedöja, —Yelösöda ba̧jȩkwadö dö̧jobetjö̧, bemi nijinö dobiökö, jalemi niji diya, dobiakobetjö̧, —jö̧ba̧lö yötja̧lobe kwa̧ja̧kwaduwakwedöja.

²¹ Ja̧danö jobekwö a̧ja̧kwö, kwomukwataduwakwedöja, —Tajijö, bidö chi̧tji̧mu ba̧jȩkwadöma, ti iyinada, bejenö ba̧jȩkwadönö chujuna̧loböma. Ötjö chi̧tji̧mutjö ba̧jȩkwadönö kwabö lotjinawö̧, ja̧danö ji̧badönö jelobe ötjibinawö̧, ju'wedö tjitebonö tjö̧jobö. Jobekwö baledi̧tjö̧, bemi nijinö jo̧dawa'ye chö̧jibijatö, bidö ba̧jȩkwadö chi̧tji̧muma, detjö tjichinajö, ja̧danö ti jobadönö ubutjatinajö? —jö̧ba̧lö kwomukwataduwakwedöja, jwiinö kwö̧ba̧jȩkwachaduwinö otiwanö pjatatobetjö̧, jö̧ba̧lö atadobe Diosma.

²² Baikwö yöa̧lobe Isabenö Jo̧ Diosma, ökwödö israel jojodönö pjaatakwa̧ma: Baikwö yötawaduwakwö chömöledö, ötjöma chömamu kabebö, tjitebotenia jojodönö weti̧ chi̧sȩbocha, ja̧danö chi̧sȩbiawö̧, kwitji̧muduwinö tjebatö, baikwö tjichejebakwedö. Jau, kwitji̧mu ömadönö apjö̧a̧lö tjichakwedö, ja̧danö tjöböbe'onö kwitji̧mu ya̧dönö e'ewö tjichejebakwedö.

²³ Jau, inesö la'aka luwedötjö ömadöma, kwitji̧muduwinö ba̧ja̧dö tjiteada̧lakwedö, ja̧danö inesö la'aka luwedötjö̧ ya̧döma kwitji̧muduwi pjebadönö o̧do'bi̧ ojwö tjiteada̧lakwedö. Jau, wetajawö̧, jobadö tjitebokwena inesö la'aka luwedöma, kwöba a'oduwi bȩbachibö tjöbamatakwedö, kwömöayedöduwi batjibanö, ja̧danö, —Isabenö kwömöayedö mikwawöködösa, —jö̧ba̧lö, kwömasapiyaduwitjö nijiso̧pja 'dȩtjakwedö. Ja̧danö, jobekwö baledenama, otiwanö kwöwaisachibaduwakwedöja ötjönö, Isabenö Jo̧ Diossa, jö̧ba̧lö. Ja̧danö ju'wibi kwöwaisachibaduwakwedöja, ötjönö tjo̧'wo wa̧nalö ja̧döma, la'akatjöda tabakwö tjö̧jökakwedö, jö̧ba̧lö yöa̧lobe Diosma.

²⁴ Isabenö juluwo̧ Diosma chömöledö, baikwö yöta̧la: Bakwo̧ ölakwabikwawa juluwo̧, ujujulajawö̧ tjitea 'döbebö emaja̧ma, bakwo̧bi jo̧batjö 'döebobö jȩnaji̧? Ja̧danö bakwo̧ inesö la'aka luwo̧ labo̧, ölakwabikwawö öpöjojodönö juluwajo̧nö bakwo̧bi weobö jȩnaji̧, —Kwömöayedö batjibanö kwujuluwajawö̧nö ejati, wainö tjewa̧jo̧, —jö̧ba̧lö jo̧banö weobö jȩnaji̧? Kwöwaisaduwa chömöledö, juluwadötjobetjö waekwena, jö̧tö?

²⁵ Jo̧kwaijayonö baikwö yöawobe Isabenö Jo̧ma chömöledö: Ötjöda kwöpöjojodöduwi, ökwödönö ölakwabikwawö juluwadönö chölakwabikwawakwo̧sa, ja̧danö ötjöda kwitji̧muduwinö tjujulutjö tjö̧jibanö pjatatakwo̧sa. Ötjöda chölakwabikwawobetjö̧, ölakwabikwawadö juluwö do̧tjatajawö̧ma, ejatö latjebawö̧ tjö̧jakwedö, ja̧danö inesö la'aka luwedö juluwö tjitea do̧tja̧taja jawama, jobadötjö 'döbebö tjemakwedö.

²⁶ Jau chömöledö, baikwö wanedö yötawa kwöpöjojodöduwinö chölakwabikwawakwa̧ma: Kwöpöjojodönö idöda tjiteba'o tjukwobö chiyakwo̧sa, ja̧danö ubasobu tjowi̧danö, idöda tjökwösobu owö 'dukwachawö̧ batjibobö chiyakwo̧sa, jö̧ba̧lö. Jau chömöledö, otiwanö ökwödönö pjabatö chölakwabikwawakwo̧sa, ja̧danö okobe deinö bö̧jȩnö ju̧kwadöma edö tjöwaisachibakwedö ötjönö, —Isabenö Jo̧ Diosda, Jacob ömöledö tjösödökwe juluwo̧ma, Diosda israel jojodönö tjö̧ji̧binö pjabato̧ma, jo̧bada tjöbeba̧lö pjabato̧ma, —jö̧ba̧lö edö tjöwaisachibakwedö, jö̧ba̧lö yöawobe Diosma.