Isaías 48 - Dios Iwene

Israel jojodöma otiwanö a̧ja̧kwökönö, tjuu 'dibadö jö̧ba̧lö Isaias i̧wȩyudina jawa

^1-2 Baikwö laebobe Dios yöawi̧, Judasaso jojodönö: Ökwödö Jacob ömöledö, israel jojodö ötjabawö̧ma, ökwödönö yötawi̧ kwa̧ja̧kwaduwo. Ökwödöma Juda itji̧mu tupadanö jojodöja, ja̧danö ökwödö yöbawö kwujunaduwenama, ötjö Isabenö Jo̧ Dios chiminö yöbawö junadöja, ja̧danö yöba̧ladöja, —Ökwödöma Israel jojodö tjösödökwe Diosnö ösödadösa. Ja̧danö iteda itebo comunidad baibanö Dios 'da̧batö ujuninemi comunidad jojodösa. Isabenö Jo̧ Okobe Jwiinö Juluwo̧ Dios jö̧ba̧lö mikwo̧nö do̧'wo wana̧ladösa, —jö̧ba̧lö yöba̧ladöja. Jo̧kwaijayonö, jobekwö wamenö yöka̧laduwijayonö, omöna, ökwödöma ötjö weti̧ a̧ja̧kwöködöja.

³ Ja̧danö, ökwödö weti̧ a̧ja̧kwöködönö, baikwö yötawaduwakwö: Damötjö ökwödönö yötawijatö, —Baikwö baledakobe, —jö̧ba̧lö. Ötjöda yöbawö chujunijatö, baledakwa̧ma, ja̧danö jemi ikena yöbawajo̧, ju'wibi juluwanö chotidijatö yötawaja̧danö badekwachakobetjö̧.

⁴ Ajayitjöda ökwödönö chöwaisijatö chömöledö, ökwödöma kwuuduwi 'dibadöja, otiwanö weawa a̧ja̧kwöködöja jö̧ba̧lö. Jau, wanedö yöta̧la, ökwödönö chöwaisijatö, kwulume'aduwi 'dii jawatjö otikwö kwö̧jaduwi̧ma, ja̧danö kwöbaduwi broncetjö otikwö kwö̧jaduwi̧ma.

⁵ Ja̧danö, jobekwö ida̧ökö ökwödönö chöwaisobetjö̧, baledakwa̧ma ajayitjö ökwödönö yötawijatö. Jau, ökwödönö chöwaisijatö, —Ajayinö baledakwa̧ yötawökötjö̧ma, o̧'wo jawa tjösödawö̧nö yötja̧lakwedö, –Baledi̧ma, dösödökwe o̧'wo jawada baledobö weajabe, –jö̧ba̧lö yöka̧laduwena. Ötjönö omukwatökönö, kwösödaduwawö̧ towisa'otjö otikwedö o̧'wo jawabi, 'dii jawatjö otikwedö o̧'wo jawabi kwomukwataduwena, —jö̧ba̧lö. Ja̧danö, jobekwö ötjöda chotidi̧ma, jobadöda tjotidi̧ jö̧ba̧lö yöka̧laduwapji jö̧ba̧lö, baledakwa̧ abönö yötawijatö.

⁶ Jau chömöledö, okobe jwiinö babe baledi̧ma, baledakwa̧ abönö yötawijatö, badedö kwedadaduwo, isabenö ötjöda yötawinadanö badekwachajabe, jö̧tö? Jo̧kwajabetjö̧ tajawedö, —Isabenö Dios yöawinadanö badekwachobe, —jö̧ba̧lö jweinö yöka̧laduwobö kwö̧pöjödaduwobeda? Ja̧danö chömöledö, babema bemi tupakwö baledakwa̧bi yötawaduwakwö, ina wajwiköbaduwi̧, la'akatjöda kwa̧ja̧kwinökö jawa yötawaduwakwö.

⁷ Jau chömöledö, 'yayi jawa yötawaduwakwö, bakwo̧bi ajayinö yöawinökö jawama. Babe möle abönö, la'akatjöda kwa̧ja̧kwinaduwökö jawama yötawaduwakwö, yötawakwa̧ a̧ja̧kwajadö, —Jau, ida̧ökö ja̧ jawa waisadösa, —jö̧ba̧lö obö yöka̧laduwapji jö̧ba̧lö.

⁸ Ja̧u, babe ökwödönö yötawi̧ma, ina kwa̧ja̧kwinaduwökö jawa, ina wajwiköbaduwii̧ jawa, ina ökwödönö yötjawinökö jawada yötawocha, a̧ja̧kwajadö, —Ida̧ökö chöwaisi̧ jawada yöawajabe Diosma, —jö̧ba̧lö yöka̧laduwapji jö̧ba̧lö. Ökwödönö chöwaisawö̧ja chömöledö, omöna yöba̧ladö kwö̧jaduwi̧ma. Ja̧danö israelsaso bakibinaduwelö, baikwö bajalenö ba̧kwelöjatebö, Dios wei̧ a̧ja̧kwöködö jö̧ba̧lö ötjabi̧wö̧ja, jö̧ba̧lö chöwaisawö̧ja.

⁹ Ja̧danö, sulabenö ja̧bö kwö̧jaduwitjö̧, ökwödönö lȩbebo̧sa chömöledö, ja̧danö ökwödönö söbebö loto jö̧ta̧lena. Jo̧kwaijayonö ötjöma Isabenö Jo̧ jö̧ba̧lö chimi omukwatö, bakobe söbebö lotökakwo̧sa ökwödönö. Ötjönö otiwanö omukwatö tjösödakobetjö̧, bakobe ökwödönö söbebö lotökakwo̧sa. Ökwödönö söbebö loto jö̧ta̧lijayonö, chöjamatajabe, ökwödönö söbebö lobökönö.

¹⁰ Jau chömöledö, sulabenö ja̧bö kwö̧jaduwitjö̧, ökwödönö iyö lotajabe, kwöpöjojodöduwi ökwödönö tjujuluwobö. Ja̧ ökwödönö iyö lotaja̧ma, plata jawa tjimidi̧tjö iyö lotijökötö chömöledö, sulabenö ja̧köbaduwi̧tjö̧ ökwödönö lȩbebö ökwödönö tjujuluwobö wetajabe, ja̧danö tjujuluwajawö̧, usula emawö, tubinö otikwaka ö'wejenö kwöbaledaduwobedanö ichejekwa. Ja̧danö ökwödönö lȩbebajo̧, babema usula kwemawaduwi̧tjö kwö̧jibaduwinö pjatatocha.

¹¹ Ina tupakwönönö ökwödönö usula kwemawaduwinö weto jö̧ta̧lena chömöledö, jo̧kwaijayonö, ötjöda chimi chomukwatobetjö̧, tjo̧wita, babe kwö̧jibaduwinö pjatatakwo̧sa. Jau, bakobe ökwödö ötjöda chömöledönö söbebö lotitjö̧ma, kwöpöjojodöma idöda tjösödawö̧nö tjomukwatena, —Ökwödö dösödawö̧ma, Dios ömöledö israel jojodönö tjujuluwajabe, —jö̧ba̧lö. Jobekwö ötjönöda otiwanö tjo̧mukwato jö̧tja̧li̧ma, ju'wedönöda tjomukwatapji jö̧ba̧lö a̧'dȩlo̧sa, ja̧danö ju'wedönö omukwatökönö, ötjönöda otiwanö tjomukwatakobetjö̧, kwö̧jibaduwinö pjatatakwo̧sa.

¹² Chömöledö Jacob itji̧mu tupadanö jojodö, ötjöda chömöledö bakibaduwanö jwötinawö̧ israel jojodö, yötawi̧ kwa̧ja̧kwaduwo, baikwö: Ötjödasa ba̧kwelöjatebo jo̧ Diosma. Ajayitjöda ji̧nasa̧ chömöledö, ja̧danö bajaleapo löji mölebi chö̧jakwo̧sa.

¹³ Jau chömöledö, ötjöda chömamunö bö̧jȩ la'aka chödijatö, ja̧danö ötjöda chömamu chöwaisobekwöchobesamunö mölȩjȩ sedatö chönijatö. Ja̧danö si̧li̧'idönö jwötenama, weti̧ a̧ja̧kwö bakobe labebö la̧matinadö si̧li̧'idöma.

¹⁴ Jobekwö ötjöda chujulunö otidinasa̧ chömöledö, jo̧kwajabetjö ökwödönö yötawonö, bakobe ko̧ko̧kwö kwa̧ja̧kwaduwo. Bi̧ya ökwödönö yötawi̧ma, ju'wedö tjösödawö̧tjö, bakwo̧bi yöawinaji̧? Yöawinokobe chömöledö, ötjöda bi̧ya̧ wene yötawaduwakwö: Ötjöma bakwo̧nö omudawö chujunajabe, ötjökwö bakobe pjabatakwawö ö̧jakwo̧nö. Ja̧danö wetökwe, Babilonia jojodönö ujuluwakobe, ömöayedö ölakwabikwawadönö öbibö, Caldeo jojodö ötjabawö̧ Babilonia jojodönö ujuluwakwo̧.

¹⁵ Ötjödasa jobekwö baledakwa̧ yötawajabe chömöledö, ja̧danö ötjöda jo̧banö jwötajabe, ja̧danö ötjöda jo̧banö öbibö pjatatakwo̧sa, ja̧danö okobe jwiinö ja̧o jö̧a̧li̧ma, badekwachinö ja̧obö pjatatakwo̧sa.

¹⁶ Chö̧jobekwö yöne ichibö, yötawi̧ kwa̧ja̧kwaduwo chömöledö. Ötjöma la'akatjöda tja̧ja̧kwokonö yöbawö̧kö̧sa, öwawinö baledakwa̧ yöbawo̧sa, ja̧danö ba̧kewelöjatebö yötawaja̧danö badekwachinö otidö lobo̧sa, jö̧ba̧lö yöawobe Diosma, Juda jojodönö. Ja̧danö chömöledö, babema Isabenö Jo̧ Diosma ötjönö weajabe, Dios O̧'wo Luwo̧ma ötjönö weajabe, iteda yöawi̧ ökwödönö yötawobö.

¹⁷ Isabenö Jo̧, ökwödönö tjöbeba̧lö pjabato̧, Israel jojodö dösödökwe Suli̧ Jwibo̧ Diosma baikwö yöawobe ökwödönö: Ötjöma kwösödaduwökwe Isabenö Jo̧ Diossa. Ötjöda ökwödönö ba̧ja̧dö pjabato̧ma, otiwanö ja̧kwawa kwöwaisachibaduwakobetjö̧. Ja̧danö ökwödönö jwebebö öbibo̧ma ötjödasa, kwi̧'yaduwo jö̧ka̧laduwi̧danö otiwanö kwi̧'yaduwakobetjö̧.

¹⁸ Chömöledö, isabenö ökwödönö weti̧ kwa̧ja̧kwaduwo jö̧ka̧linaduwobe. Weti̧ a̧ja̧kwö kwö̧jinaduwatjö̧ma, isabenö otiwanö kwö̧jaduwo jö̧ka̧linaduwobe. Baikwö wanedö yöta̧la, ojwe tjo'omanö kabatibökönö isuwi̧danö, ja̧danö jwaibalawa kabatibökönö ba̧kwelöjatebö loidanö, ba̧kwelöjatebö wene jwiinö ja̧nö, otiwanö kwö̧jaduwo jö̧ka̧laduwena.

¹⁹ Ja̧danö kwitji̧muduwima, otiwanö tjö̧ba̧jekwacho jö̧tja̧lena, so̧bi̧apu inaso ba̧jȩkwi̧danö, so̧bi̧apu inaso tjö̧ba̧jadobö jwii̧danö, kwitji̧muduwinö tjö̧ba̧jadökenanö tjö̧ba̧jȩkwachena. Ja̧danö weti̧ a̧ja̧kwö kwö̧jinaduwatjö̧ma, la'akatjöda kwitji̧muduwinö lȩteboko jö̧ta̧lena, ja̧danö la'akatjöda chöba a'otjö jobadönö a'dewö lotoko jö̧ta̧lena.

²⁰ Ja̧danö babema yemidanö ökwödönö pjatatakwo̧sa, babe baikwö wetaduwakwö: Babilonia nijitjö labebaduwi, caldeo jojodö tjö̧jelö döbibajaduwi. Kwo̧'woduwi ösöwachibanö, bö̧jȩ ba̧kwemeachibanö jwöbeba̧lö yökawaduwo, —Isabenö Jo̧ma iteda ömöayedö Jacob ömöledönö tjö̧jibinö pjaatajabe.

²¹ Ja̧danö otiwanö pjaatawö̧, kököelö ö'wejenö tjöbaledijayonö, o̧ti̧ tjöbökönö kwebachadö, ojwiyo jwitjena, inawatjöda ojwiyo döobö webo̧, ojwiyo jwienama inawa 'dabebö, okwatjö ojwiyo isuwobö webo̧ Diosma, —jö̧ba̧lö yökawaduwo, jö̧ba̧lö yöawobe Diosma.

²² Ja̧danö ju'wibi yöawobe Isabenö Jo̧ma, —Sulabenö ja̧bö ju̧kwadöma, la'akatjöda otiwanö wene jwiinö tjö̧jökakwedö, —jö̧ba̧lö yöawobe.