Isaías 47 - Dios Iwene

Babilonia jojodö usula tjemawakwa̧ jawa Isaias i̧wȩyudina jawa

¹ Baikwö laebobe Dios Babilonia jojodönö wanedö yöa̧li̧ma: Ökwö Babilonia jojosuju, möayujuma, la'aka luwuju jiteakanö wa̧nökönö, nijinöda kwö̧bakwujuja. Jau möayuju, ajayinö ökwönö otiwuju, ji̧sȩdo otiwanö sayuwuju jö̧ba̧lö ötjabinokoja, kweju otiwejunö wene jwiinö kwö̧jinobetjö̧, jo̧kwaijayonö bemi tupakwö jobekwö ötjabökakwujuja.

² Jau, harinaso̧pja otikwawa inawa kabebö, harinaso̧pja kwotido babema, tjömöayedö otidajitjadanö. Kwibejwa̧ öwawinö, kwa̧do̧ a̧li̧nösa̧do̧ ödöa̧do̧ yo̧bekwi, ojwe pekibobö wetjobetjö.

³ Kwa̧dobi 'yobekwö ja̧nö, kwa̧do jwibö kwö̧ji̧ öwawinö tjedobö kwö̧jakwujuja, jwiinö taba lö̧joko bakibanö. Jobekwö wanedö yöta̧la, ökwödö Babilonia jojodönö lȩtebakwa̧ma. Jau, chömöledönö sulabenö ja̧köbaduwi̧tjö̧, balekwa mikwa ökwödönö lȩtebakwo̧sa, ökwödötjö bakwo̧nöbi lȩlöinö edökönö, labinö lȩtebakwo̧sa,

⁴ jö̧ba̧lö yöawobe ökwödö israel jojodönö tjöbeba̧lö pjabato̧ma. Jau, ökwödö dö̧jibinö pjabato̧ma, Isabenö Jo̧ Okobe Jwiinö Juluwo̧ jö̧ba̧lö mikwo̧da, ökwödö Israel jojodö dösödökwe Suli̧ Jwibo̧ Diosda, ja̧danö jobekwö wanedö yöawobe Babilonia jojodönö lȩebakwa̧ma.

⁵ Tupakwö wanedö yöawobe Diosma, Babilonia jojodönö: Ökwö Babilonia jojojosujuma, wi̧inö ba̧wi̧, jelobe ju̧kwawaji. Ajayinö ökwönö, —Tjitebotenia jojodötjö inesö la'aka luwuju, —jö̧ba̧lö ötjabinokoja, jo̧kwaijayonö bemi tupakwö jobekwöma ötjabökakwedö.

^6-7 Ökwöma omukwatujuja, —Ötjödatjö la'aka luwujusa, ba̧kwelöjatebö la'aka luwuju ja̧nö, otiwanö chöjakwujusa, —jö̧ba̧lö kwomukwatobe. Jo̧kwaijayonö baikwö labebö lobö yötawakwö, ökwö luwuju kwö̧jinama: Ötjö Diosma, ötjöda chömöledö israel jojodönö chödameakwijatö, ja̧danö ötjöda chömöledö batjibanö omudawö chujuninawö̧ tjö̧jijayonö, jobadönö chödameakwobetjö̧ iyö lotijatö, ökwö jobadönö kwujuluwobö. Ja̧danö, ökwöma isabenö sulabenö ja̧köbijatö chömöledönö, lȩlöjinö edökönö, jobadötjö damönöbi labinö usula tjemawinö weköbijatö. Ötjödasa ba̧kwelöjatebö la'aka luwuju chö̧jakwujusa jö̧ba̧lö, jobekwö sulabenö ja̧köbijatö, babe baledakwa̧, ökwönö balekwa mikwa baledakwa̧ omukwatökönö.

⁸ Jobekwö omukwatujuja, jo̧kwajabetjö̧ baikwö yötawakwö, ökwö Babilonia jojosuju, ökwöda kwösödi̧danö ja̧bö, sulabenö 'da̧'da̧akwawa jawa ösödujunö. Ökwöma kwomajadenö, —Ötjödasa mikwawujuma, jelujuma dejobe. Ötjöma ba̧kwelöjatebö wene jwiinö chö̧jakwujusa, la'akatjöda chilekwenö wobekwinuju chö̧jökakwujusa, ja̧danö la'akatjöda chitji̧mu debö tji̧'yioko chö̧jökakwujusa, —jö̧ba̧lö omukwatujuja.

⁹ Jo̧kwaijayonö, baikwö yötawakwö, ja̧ dötölataja jawama juluwanö ökwönö baledakobe. Juluwanö bakwöta möle, kwitji̧mu debuju bakibakwujuja, ja̧danö kwilekwe wobö ujunibinoko bakibakwujuja. Nöinö mea bobö, —Mea boti̧ma juluwi̧ ji̧, —jö̧ba̧lö mea boköbijayonö, ja̧ baledakwa̧ma labinö baledakwujuja.

¹⁰ Jau, ökwöma sulabenö ja̧bö kwö̧jijayonö, —Wene jwibujusa, bakwo̧bi sulabenö ja̧bö chö̧ji̧ edökokosa, —jö̧ba̧lö omukwatujuja. Jo̧kwaijayonö, waisanö kwomukwati̧bi, waisakwawa kwöwaisi̧bi, ö'öbönö öibajabe ökwönö, omöna jawa kwösödakobetjö̧. Jau, —Ötjödasa mikwawujuma, jeluju bakwujubi ötjödanö ju̧juma dejobe, ötjödasa jö̧ba̧lö, —omöna jawa ösödujuja, ja̧danö kwö̧ji̧ma suli̧ waekwakobe.

¹¹ Jau, inesö suli̧ waedakwawa baledakobe ökwönö, ja̧danö nöinö mea boköbijayonö, kwö̧jibobö jwikibakwujuja. Ja̧danö ötjönö söbebö lotjapji jö̧ba̧lö, chimidobö juna̧lujusa jö̧ba̧lö kwomukwatijayonö, söbebö loawa jawa baledakobe ökwönö, ja̧danö midö kwö̧jiboböma jwikibakwujuja. Jau, baledakwa̧ wajwibö, otiwanö wene jwia jö̧ba̧lö kwomukwatemi ja'ötjö, inesö labi̧ jawa juluwanö baledakobe, suli̧ kwöwaekwi̧nö.

¹² Ökwöma omukwatö ju̧juja: —'Diinö ja̧nö, okobe jwiinö mea 'boawa jawa ja̧tocha, ja̧danö tjemu bayuju chö̧jinelö baikwö bajalenö, ba̧kwelöjatebö mea 'boawa yöa̧lakwawa jawa yöba̧liachinadanö, tupakwönönö, yöta̧locha. Jobekwö jwaikwöda mea 'botitjö̧ma, sulabenö baledakwa̧ baledökönö, chöpöjojodö yetjabobö ja̧tena, —jö̧ba̧lö omukwatujuja.

¹³ Waisanö kwomukwatobö pjabatadöma, jobekwö kwomukwatobö tjö̧ba̧jadajabe, jo̧kwaijayonö yötjawi̧ma waekwobe, ja̧danö kwujuluwachibökönö, lekwe yötjawi̧ kwa̧ja̧kwajabetjö me'dawachibuju bakibajabe. Jau, ökwönö yöbawadö, —Mölȩjȩbe edö, baledakwa̧ waisadösa, —jö̧ba̧lö omukwatö yöbawadöbi, si̧li̧'idönö edö, jawo̧kwena baledakwa̧ yöbawadöbi isabenö waisadö juluwadö tjö̧jitjö̧ma, a̧la̧ibö 'diinö ja̧nö tjöteba̧lobö jȩna. Isabenö tjujuluwitjö̧ma, ökwönö kwö̧jibinö pjatjatobö jȩna, inesö labi̧ jawa ökwönö baledökakobetjö̧.

¹⁴ Jo̧kwaijayonö juluwöködö, meje'ye kököa'yedanö ichejekwawö̧, ökwönö yöbawadöma. Jau, ökwöla ubenama, idödabi ökwölatjö tjö̧jibanö ja̧tjoböma juluwöködö. Baikwö wanedö yötawa, labi̧ jawa juluwanö baledakwa̧ma, tjejutjö 'yötjakwobö tjujuwoladanö ichejekwokola, ja̧danö ökwöla öbö̧'adanö ichejekwokola, ökwönö baledakwa̧ma, inesö labinö uboladanö ichejekwakwola, ökwönö baledakwa̧ma.

¹⁵ Jobekwö pjatjatökakwedö, okobe deinö kwömöledöma. Tjemu bayuju kwö̧jinelö ba̧kwelöjatebö jobadökwö kwotidinajayonö, okobe deinö jelobekwö, jelobekwö tjösödobekwö latjebakwedö, ökwönö omukwatökönö, ja̧danö bakwo̧bi deakobe, kwö̧jibinö pjabato̧ma. Jau, ökwönö lȩtebakwa̧ badekwachenama, bakobe ji̧kwawa jwibö kwö̧jakwujuja, ökwö Babilonia jojosujuma, jö̧ba̧lö wanedö yöawinobe Diosma, Babilonia jojodönö lȩebakwa̧ma.