Isaías 46 - Dios Iwene

Babilonia jojodö tjösödawö̧ o̧'wo jawama mikwawöködö, jö̧ba̧lö Isaias i̧wȩyudina jawa

¹ Babilonia jojodö tjösödökwe Bel ötjabökwema, bȩbachibö ö̧jobedanö ichejekwa, ja̧danö tjösödökwe Nebo ötjabökwebi, nijakwö bȩbachibö ö̧jobedanö ichejekwa, jobadönö meatö, tjajwimu tjoma'anö tje'ewobetjö̧. Jau, jobadö tjösödawö̧ o̧'wo jawama, ömöki̧ jawa batjibajabe tjajwi̧munö, tjajwimu tjime'dawachibobö ömökadö.

² Jau, jobadö o̧'wo jawa du̧ju̧tajabedöma, bȩbachibö tjö̧jobedanö ichejekwa. Idö diosbedö jö̧tja̧lawö̧ma, idödabi tjö̧jiboböma juluwöködö, pjabatökönö sule tjajwimunö ömöki̧ jawada babibadö jobadö o̧'wo jawama. Idödabi tjö̧jibobö juluwöködö, ja̧danö o̧'wo jawabi, o̧'wo jawa ösödadöbi bakobe tjitebotjö a'dewö lotjawö̧, tjitebotjö labebö jelobe 'ya̧dö.

³ Baikwö yöa̧lobe Isabenö Jo̧ma: Chömöledö Jacob itji̧mu tupadanö jojodö, ötjöma jobadö Babilonia jojodö tjösödawö̧danöbö̧kö̧sa. Ökwödö Israel jojodötjö ina 'yaba̧ladöma, ötjönö kwe'ewaduwoböma jwibadöja, ju'wedö tjösödawö̧nö tje'ewi̧danöma. Jau chömöledö, ötjöda ökwödönö e'ewö chö̧jijatö, wanedö yöta̧la, kwojo'do ökwönö jemakwa̧ abönö, babe möle baibanö ba̧kwelöjatebö ökwödönö e'ewa̧lö jo̧sa.

⁴ Ja̧danö bemi tupakwöbi damö kwöjaduwenabi ökwödönö chiteada̧lakwo̧sa chömöledö, damö waekwö, kwöwö'yeduwi dewa'ye juna̧ladö kwö̧jaduwenama, ökwödönö che'ewakwo̧sa chömöledö. Jau chömöledö, ötjöda ökwödönö otidinasa̧, ja̧danö ötjöda meköbaduwapji jö̧ba̧lö kabebö pjatatakwo̧sa. Ötjöda ökwödönö che'ewakwo̧sa, ja̧danö kwö̧jibaduwinö pjatatakwo̧sa.

⁵ Isabenö juluwo̧sa chömöledö, ju'wedö tjösödawö̧tjö, diteda ötjödajayo̧ma? Tinö wanedö, —Isabenö Jo̧ Diosma bitedanö bakwaibo̧, —jö̧ba̧lö yöka̧laduwakwa̧da? Bakwo̧nö, —Diosdanöbo̧, —jö̧ba̧lö kwomukwataduwitjö̧ma, badedö dedo, isabenö bakwaibedö dö̧jojobö jö̧ba̧lö.

⁶ O̧'wo jawa domukwato, baikwö: O̧'wo jawa tjösödakwedöma, tjitea balada a̧ja̧'wotjö oro 'wabebadö, ja̧danö plata nönö ba̧ja̧dadö. Ikenama orotjö otikwa jojonö webadö, tjösödökwe o̧'wo jawa baibanö otidobö. Jemi ikenama, otidajökwenö bȩbachibö ösödadö, —Chuluwo̧ dios, —jö̧ba̧lö.

⁷ Ja̧danö tjösödökwenö kabebö, tjöböbe'onö e'ewadö, tjujunakwemibe tjujunobö. Ja̧danö, tjujunajökwe, jenada jo̧ tjösödökwema, tjulunajelö pjolachibö̧kö̧ tjösödökwema. Ja̧danö, bakwo̧ jo̧banö abebö, —Chö̧ji̧binö pjabatitjö, —jö̧ba̧lö aebitjö̧ma, atadö̧kö̧, ja̧danö wene ujuna̧li̧tjö̧ ö̧jibanö pjaatoböma juluwö̧kö̧. Jo̧ba o̧'wo jawa tjösödökwedanö bakwaibo̧ chö̧jobeji̧?

⁸ Chotidina kwöwaisaduwa chömöledö Juda jojodö, kwo̧'wo jwikibaduwoko. Jau, ökwödö weti̧ a̧jakwöködöma, ba̧kwelöjatebö omukwatö kwö̧jaduwo, 'diinö kwö̧jaduwakobetjö̧.

⁹ Damötjö̧ ötjö chujulu chi̧sȩbina jawa kwomukwatibaduwo chömöledö. Jelo̧ ötjödanöbo̧ ö̧jobeji̧? Deobe jö̧tö? Isabenö ötjödasa Diosbo̧ma, jelo̧ma deobe. Jau bakwo̧bi ötjödajayo̧ma deobe,

¹⁰ tupakwö baledakwa̧ jawa jweinö yöbawo̧ma. Ötjödasa ajayinö möle yöbawinama, löji möle baledakwa̧ jawama. Jau, damötjö ina badekwachakwa̧ abönö, ja̧ jawa yöbawö, —Omukwatö chujunina jawama, isabenö badekwachakobe, isabenö chösödi̧ jawa badekwachinö chotidakwo̧sa, —jö̧ba̧lö yötawijatö, ja̧danö yöbawajo̧, badekwachinö chotidijatö.

¹¹ Jau, yötawinadanö badekwachinö, wiyuli ödötjö ichi̧danö ichakwo̧nö jwötocha, ödö itebotjö jawo̧ laebobekwötjö ichobö. Jobekwö baledakwa̧ yöbawö chujunajabe chömöledö, ja̧danö ju'wibi badekwachinö ja̧takwo̧sa. Baledakwa̧ omukwatö chujunajabe, ja̧danö isabenö badekwachinö chotidakwo̧sa.

¹² Otiwanö ökwödönö yötawi̧ kwa̧ja̧kwaduwo chömöledö israel jojodö. Ökwödö kwomajadeduwinö, kwuuduwi 'dibadöja chömöledö, ja̧danö weti̧ a̧ja̧kwö ja̧kwawatjö, ödö 'da̧bachibö 'ya̧döja, jo̧kwaijayonö tjebachajö yötawi̧ kwa̧ja̧kwaduwo.

¹³ Isabenö kwö̧jibaduwinö pjatatakwo̧sa chömöledö, ja̧danö lekwökö ökwödönö pjatatakwa̧ mölema. Jau chömöledö, lekwema chiteada̧lökakwo̧sa, juluwanö pjatatakwo̧sa. Juluwanö Sion mösa'otjö kwö̧jibaduwinö pjatati̧ma chi̧sȩbakwo̧sa, juluwanö ökwödö israel jojodönö dejatinö chujulu chi̧sȩbakwo̧sa, jö̧ba̧lö yöa̧lobe Diosma.