Isaías 45 - Dios Iwene

Ciro mikwo̧nö weakwo̧ Diosma, Israel jojodönö pjaatobö, jö̧ba̧lö Isaias i̧wȩyudina jawa

¹ Isabenö Jo̧ Diosma Ciro jö̧ba̧lö imikwakwo̧nö omudawö ujuninobe, inesö la'aka luwo̧ baibakobetjö̧, ja̧danö jo̧banö omudawö junajo̧, Diosda Ciro ömamu öwaisobekwöchobesamu do̧ba̧lö, ujuluwachibanö pjaatakwo̧, tjitebotenia jojodönö ujuluwakobetjö̧, ja̧danö tjuluwedö Ciro öba a'o tjujulu jwitjakobetjö. Dios weobetjö̧, Ciro ujuluwobö ichenama, comunidad apjude po̧ekwakobe ichejekwa, wene jwiinö tebachö ujuluwobö, ja̧danö bakwo̧bi tumatö tjöeba̧lobö jwiakobe, Ciro tebachö ujuluwapji jö̧ba̧lö. Jo̧ba omudawö ujuninökwenö, baikwö yöawobe Isabenö Jo̧ma:

² Ciro, ötjöda kwabönö 'ya̧nö, mösa'iju ba̧ba̧ladö lotocha, wene jwiinö kwi̧'yobö, ja̧danö ötjöda comunidad apjude broncetjö otikwade 'dabebö lotocha, wene jwiinö comunidad tekachobö, ja̧danö 'dii jawatjö otikwa 'diebaso̧jwa̧ ötjöda 'debatö lotocha, wene jwiinö 'ya̧nö kwujuluwakobetjö̧.

³ Ja̧danö jojodö tjitea mikwawi̧ jawa, ju'wedö tjöbadekwapji jö̧ba̧lö otiwanö tojö tjujunina jawama, ötjöda ökwönö chiyocha, chiyiökwe ötjönö kwöwaisachibakobetjö̧. Jau Ciro, ötjö ökwö a̧dekwanö kwimi yöba̧lö ökwönö jwöbo̧ma, Israel jojodö tjösödökwe Isabenö Jo̧ Diossa, ja̧danö ötjönö kwöwaisachibakobetjö̧, jobekwö pjatatakwo̧sa.

⁴ Ja̧danö ökwönö pjatatakwa̧ma, baikwö labebö lobö yötawakwö: Chömöayedö Jacob itji̧mu tupadanö jojodö Israel jojodönö, ötjöda omudawö chujuninawö̧nö chösödobetjö̧, jobekwö a̧dekwanö kwimi yöba̧lö, ökwönö omudawö chujunajabe, ja̧danö ökwönö otiwanö tjomukwatakwo̧ bakibanö ökwönö kabebö chujunajabe. Jau Ciro, ökwöma ötjönö wajwiköbijayonö, ötjöda chömöayedö israel jojodönö chösödobetjö̧, ökwönö kabebö chujunajabe.

⁵ Jau Ciro, ötjöma Isabenö Jo̧sa, ötjödanöbo̧ma bakwo̧bi deobe. Jelo̧ Diosbo̧ma bakwo̧bi deobe, ötjödasa. Ja̧danö ötjönö wajwiköbijayonö, ötjöda kwujuluwachibanö pjabato̧sa, otiwanö juluwi̧nö kwölakwabikwawakobetjö̧.

⁶ Jobekwö ökwönö pjabato̧sa Ciro, bö̧je ba̧kwemeachibanö ju̧kwadö, jawo̧ laebobekwötjö, jawo̧ meajobekwö baibanö ju̧kwadö ötjönö tjöwaisachibakobetjö̧, jelo̧ Diosbo̧ma deobe, ötjödasa Isabenö Jo̧ma, jelo̧ ötjödajayo̧ma deobe, jö̧ba̧lö.

⁷ Jau, ötjödasa dewi̧ otido̧ma, ja̧danö yȩa'wobi otido̧ma ötjödasa. Ötjödasa wene jwiinö tjö̧jobö pjabato̧ma, ja̧danö ju'wibi suli̧ waekwö wene tjujuna̧lobö webo̧bi ötjödasa. Okobe jwiinö ja̧ jawa otido̧ma, ötjö Isabenö Jo̧ Diosda, jö̧ba̧lö yöa̧lobe Diosma, omudawö ujuninökwe Cironö.

⁸ Ju'wibi yöa̧lobe Diosma: Mölȩjȩbe ji̧ ojwiyo'wotjö ojwiyo o̧benama, niji okwa söbibö, batjo otiwanö pokwobö pjaati̧, ja̧danö otiwanö wa̧jobö pjaati̧, jö̧tö? Jobekwö chömöledönö baledobö weta, baikwö wanedö yöta̧la: Mölejȩbetjö ji̧bakwawa tjoduwobö weta, mölejebetjö jojodö tjö̧jibinö pjaatakwawa tjoduwobö weta, bö̧jȩnö söibena otiwanö tjö̧jibakobetjö̧, ja̧danö otiwanö weti̧ a̧ja̧kwö tjö̧jakobetjö̧. Ötjö Isabenö Jo̧ma, jobekwö baledobö otido̧sa, jö̧ba̧lö yöa̧lobe Diosma.

Dios otidinawö̧ma, jo̧bakwö ölakwabikwawö tjö̧joko, jö̧ba̧lö Isaias i̧wȩyudina jawa

⁹ Ayö, bakwo̧ jo̧banö otidina Dioskwö ölakwabikwawö jo̧ma, isabenö wene juna̧lo̧. Jo̧bajayo̧nö baikwö wanedö yöta̧la: Jo̧bajayo̧ma, sule lete'otjö dadawayu i̧sa̧yu, jeleyubiya 'da̧de ja̧yu mikwawököyudanö ichejekwo̧. Ja̧danö, lete'oma, dadö otido̧nö, —Taji kwotida? Sulabenö otido̧ja, lete'otjö otikwa wajwibo̧ja, —jö̧ba̧lö yöa̧lobö jȩnaji̧?

¹⁰ Ja̧danö bakwo̧, ojo'do jemakwo̧ma, abe'donö, —Tijo̧nö kwitji̧kwa̧jada? Sulabenö itji̧kwo̧ja, —jö̧ba̧lö yöa̧lobö jȩnaji̧? Ja̧danö ojo'donö jo̧banö jemakwujunö, —Tijo̧nö kwemakwa̧da? Sulabenö emujuja, —jö̧ba̧lö yöa̧lobö jȩnaji̧? Jo̧bajayo̧ yöba̧lo̧ma isabenö nöinö wene ujuna̧lena, jö̧tö?

¹¹ Jau chömöledö, Israel jojodö tjösödökwe, Suli̧ Jwibo̧ Isabenö Jo̧ Diosma baikwö yöa̧lobe iteda otidinökwe, jo̧bakwö ölakwabikwawö jo̧nö baikwö yöa̧lobe: Tajawedö ötjönö abebö kwa̧ja̧kwobeda, ötjöda chi̧tji̧mu jawama? Tajawedö ötjöda chömamunö chotidi̧ jawa, —Sulabenö kwotida, wainö kwotido, —jö̧ba̧lö yöka̧lobeda? Isabenö jobekwö yöka̧lobö jwibo̧ja.

¹² Ötjödasa bö̧jȩ otidinama, ja̧danö otidajo̧, ötjödasa jojodönö chotidijatö, bö̧jenö tjö̧jakobetjö̧. Ötjödasa mölejȩ sedatö nöninama, ja̧danö ötjödasa si̧li̧'idö tjö̧lakwena tjö̧lobö webinama.

¹³ Jobekwö otidinama ötjödasa, ja̧danö ju'wibi yötawaduwakwö: Ötjöma bakwainö otiwanö ja̧bö jo̧chobetjö̧, Ciro mikwo̧nö wetocha, weti̧ otidakobetjö̧. Ja̧danö, ötjöda i̧'yakwa̧ manatenia ba̧ba̧ladö chotidocha. Jobekwö wetiökwe, chitebo comunidad Jerusalen comunidad yemidanö otidakwo̧, ja̧danö ju'wibi chömöledö, tjitebotjö ödö tjö̧jobö wetinawönö weakwo̧, yemidanö tjitebobe tjewa̧jakobetjö̧. Ja̧danö jobekwö ja̧akwa̧ma, baikwö yöta̧la, bakwo̧ imidajökwe, —Baikwö ja̧köbitjö̧ma chimidocha, —jö̧ba̧lö imidökwe, jobekwö ja̧ökakwo̧. Ötjöda jobekwö ja̧akwo̧ baibanö omudawö chujuninobetjö̧, jobekwö ja̧akwo̧, jö̧ba̧lö yöa̧lobe Isabenö Jo̧, Okobe Jwiinö Juluwo̧ Diosma.

Diosda tjö̧jibinö pjabato̧, jö̧ba̧lö Isaias i̧wȩyudina jawa

¹⁴ Baikwö yöa̧lobe Isabenö Jo̧ma, Israel jojodönö: Egipto jojodö tjitea mikwawi̧ jawabi, Etiopia jojodö mikwanö tjiyi̧ jawabi, ökwödö israel jojodö kwiteaduwi baibakobe. Ja̧danö ödöbaedö sabeos ötjabawö̧ma, kwö̧jaduwobekwö ichibö, kwömöayedöduwi batjibakwedö. Jobadöma kwökömanöduwi kwebachö, ka̧lena osijunö yö̧bekwedö kwetjachakwedö, ja̧danö kwöba a'oduwi bȩbachibö bamatö yötja̧lakwedö, —Isabenö Dios otiwanö pjaatawö̧ja. Jo̧bajayo̧ juluwo̧ma deobe, jelo̧ diosbo̧ma deobe, kwösödaduwökwe Diosda isabenö Diosbo̧ma, —jö̧ba̧lö, yöawobe Diosma, Israel jojodönö.

¹⁵ Jau chuluwo̧ Dios, isabenö ökwöma dedökökwe Diosja, jo̧kwaijayonö döbajalenö ökwönö dedobö jwiijayonö, ökwö Israel jojodö dösödökwe Diosma, isabenö dö̧jibinö pjabato̧ja.

¹⁶ Okobe deinö o̧'wo jawa otidö ösödadöma, tabakwö tjö̧jakwedö, okobe deinö jobadöma taba lö̧jawö̧ tjedakwawö̧, —Sulabenö diosböködönö ösödinadötö, —jö̧ba̧lö.

¹⁷ Jobekwö baledököwö̧ ökwö Diosnö ösödadönö. Ju'wedö tabakwö tjö̧jonö, ökwödö israel jojodönö dö̧jibinö pjabato̧ Diosma, 'dö̧ibajökö ji̧ ji̧kwawa baibanö dö̧jibinö pjabato̧. Ja̧danö jobekwö dö̧jibinö pjaatobetjö̧, la'akatjöda 'dö̧bibajökönö tabakwö dö̧jökakwedösa, la'akatjöda taba lö̧jawö̧ badibökakwedösa.

¹⁸ Jau chömöledö, Diosda bö̧jebi, mölȩjȩbi otidinama, ja̧danö bö̧jȩ otidö ujuninenama, jojodö deö̧jȩ baiboböma otidö ujuninokobe, jojodö tjuju̧kwakwemi baibo jö̧ba̧lö, bö̧jȩ otidö ujuninobe. Ja̧danö, jobekwö otidö junina Isabenö Jo̧ Diosma, baikwö yöawobe: Ötjödasa Isabenö Jo̧ma, jelo̧ ötjödanöbo̧ma deobe.

¹⁹ Ötjöma jweinö yötawajabe, yötawi̧ tojata̧lökönö wajuwanö yötawajabe. Yȩa'wo jȩmi nijitjö, tja̧ja̧kwokonö yötawijökötö, ja̧danö Jacob itji̧mu tupadanö jojodönö yötawijökötö, —Ötjönö isakwö kwö̧jaduwi̧ma, mikwawökakobe, —jö̧ba̧löma. Jobekwö yöbawinö̧kö̧sa chömöledö, ötjöma Isabenö Jo̧sa, otiwanö yötawo jö̧ta̧li̧danö yöba̧lo̧sa, omöna yöba̧lökönö, isabenö weneda yöba̧lo̧sa.

²⁰ Okobe deinö ko̧ko̧kwö kwichaduwo, bakobe kwichaduwo, tjitebotenia jojodötjö ina 'yaba̧ladöma. Baikwö yötawaduwakwö ökwödönö: Tjösödawö̧ towisa'otjö otikwawö̧ o̧'wo jawa e'ewadö, ja̧danö tje'ewawö̧nö abebö ju̧kwadöma, wajwibadö yelösöda, tjujulu jwibadö tjö̧jibinö pjatjatobö juluwöködönöda ösödö tjö̧jobetjö̧.

²¹ Jobekwö a̧ja̧kwö, jobadönö dösödi̧ma otiwa jö̧ba̧lö kwomukwataduwitjö̧ma, baikwö abebö cha̧jakwaduwakwö: Bakobe yöba̧lakwawö kwedaduwo, ökwödö kwösödaduwawö̧tjö dite babe baledakwa̧ yöawinojobö, jö̧ba̧lö. Ina baledapji, dite jweinö yöawinada, —Bejenö baledakobe, —jö̧ba̧lö? Kwösödaduwawö̧tjö bakwo̧bi yöawinokobe, jö̧tö? Ötjö Isabenö Jo̧ Diosda babe baledakwa̧ yöbawinama. Ötjödasa Diosbo̧ma, jelo̧ diosbo̧, ötjödajayo̧ma deobe yelösöda. Ötjöda bakwainö otiwanö ja̧bö jo̧sa, ötjöda tjö̧jibinö pjabato̧ma, jelo̧ma deobe.

²² Jau, ötjöda Diosbo̧ma, jo̧kwajabetjö̧ sulabenö kwomukwataduwi̧ kabatibö, balewachö ötjönö kwösödaduwo, ökwödönöbi kwö̧jibaduwinö pjatatakobetjö̧. Jau, okobe deinö bö̧jȩnö ju̧kwadö, bö̧jȩ bakwachö̧je ju̧kwadöbi ötjönö kwödösaduwo, ötjöda Diosbo̧chobetjö̧, ja̧danö jelo̧ diosbo̧ma deobetjö̧.

^23-24 Isabenö wene yötawaduwakwö, ja̧danö ötjöda chiminö yöbawö chujunaduwakwö, isabenö baledakwa̧, la'akatjöda balewachökakwa̧ wenema: Isabenö yadakwö okobe deinö chöba a'o bȩbachibö tjö̧jakwedö, ja̧danö okobe deinö chöba a'o yöbawö tjujunakwedö: —Isabenö Jo̧ Diosda bakwainö otiwanö ja̧bö jo̧ma, jo̧bada inesö juluwo̧ma, —jö̧ba̧lö okobe deinö bö̧jȩnö ju̧kwadöma bȩbachibö yöbawö tjujunakwedö, jö̧ba̧lö yöawobe Diosma. Jau chömöledö, okobe deinö Diosnö öpöjödö, jo̧banö dameakwö ölakwabikwawö ji̧nadöma, tabakwö ja̧nö Dios öba a'o yebabinö tjö̧bawö tjö̧jakwedö.

²⁵ Jo̧kwaijayonö ökwödö israel jojodönö baikwö yötawa, Isabenö Jo̧ Diosma dö̧jibanö pjaatakwo̧, döpöjojodönö dujuluwakobetjö̧. Ja̧danö jobekwö pjaatawö̧, do̧'wo ösöwachibanö yöda̧lakwedösa, —Ökwödö Israel jojodö dösödökwe Isabenö Jo̧ma, isabenö juluwo̧, —jö̧ba̧lö.