Isaías 44 - Dios Iwene

Dios israel jojodönö pjaatakwa̧ Isaias i̧wȩyudina jawa

¹ Tupakwö laebobe Dios israel jojodönö yöa̧li̧ma, baikwö: Chömöayedö Jacob itji̧mu tupadanö jojodö, omudawö chujuninawö̧ Israel jojodö, ökwödönö yöta̧li̧ kwa̧ja̧kwaduwo.

² Ötjö Isabenö Jo̧ma, ökwödönö otidinasa, ina kwojo'do jukwa'wo okwa kwö̧jaduwayi, ökwödönö dadö otidinasa. Ju'wibi ökwödönö otidajo̧, ökwödönö pjabatö jo̧sa chömöledö, ja̧danö babema baikwö yöta̧laduwakwö: Chömöayedö Jesurun ötabiwö̧ Jacob itji̧mu tupadanö jojodö, ötjöda omudawö chujuninawö̧, yekabiduwoko, isabenö ökwödönö pjatatakobetjö̧.

³ Jau chömöledö, kwiteboduwi niji kököijayonö, ojwiyo sa̧takwo̧sa, ja̧danö niji kököelö ö'wejenö ojwebiya lamatobö wetakwo̧sa. Ja̧danö ötjöda cho̧'wo luwo̧nö wetakwo̧sa, ökwödö kwitji̧mu tupadanö jojodönö pjaatakwo̧ baibanö, ja̧danö jwiinö otiwanö pjatatakwo̧sa kwitji̧muduwi tupadanö jojodönö.

⁴ Jobekwö pjatatiawö̧, isabenö otiwanö tjö̧jakwedö, baikwö wanedö yötawa: Towi meje'ye ö'wejenö o̧'wo 'yayinö ji̧danö, ja̧danö sauce ötjabowibiya ojwe ö'öbö otiwanö o̧'wo 'yayinö ji̧danö tjö̧jakwedö.

⁵ Ja̧danö otiwanö pjatatiawö̧, jobadötjö bakwo̧ yöa̧lena, —Isabenö Jo̧ ömöledöso̧sa, —jö̧ba̧lö, ja̧danö jelo̧, —Jacob itji̧ tupadanö jojosa, —jö̧ba̧lö yöa̧lakobe. Ja̧danö jelo̧ iteda ömamunö i̧wȩyudakwo̧, —Isabenö Jo̧ Ömöledöso̧, —jö̧ba̧lö, ja̧danö imi yöa̧lakwo̧, —Israel jojosa, —jö̧ba̧lö, jwiinö kwitjimuduwi israel jojodönö otiwanö pjatatobetjö̧.

Jelo̧ Diosdanöbo̧ma ö̧jokobe

⁶ Israel jojodötjö inesö la'aka luwo̧, Isabenö Jo̧, israel jojodönö tjöbeba̧lö pjabato̧, Okobe Jwiinö Juluwo̧ Isabenö Jo̧ Diosma baikwö yöa̧lobe: Ötjöma ju'wedötjö ajayinö ji̧nasa̧, ja̧danö ju'wedötjö ikena chö̧jakwo̧sa. Jelo̧ Diosbo̧ma deobe, ötjödasa isabenö Diosbo̧ma.

⁷ Bakwo̧bi ötjödanöbo̧ ö̧jobeji̧? Ötjödanöbo̧ bakwo̧ ö̧jitjö̧ma, yöawobö jo̧be. Labinö yöbawö, ötjödanö ö̧ji̧ chöba a'o labebö lobö yöawobö jo̧be. Jau, damötjö ötjöda chömöledö batjibanö, israel jojodönö omudawö chujunina möletjö, baikwö bajalenö otidina labebö lobö yöawobö jo̧be, —Ötjöbi baikwö otidinasa̧, —jö̧ba̧lö. Ju'wibi jweinö tupakwö baledakwa̧ jawa yöawobö jo̧be, —Yadakwö baledakwa̧ma, baikwö, baikwö baledakobe, —jö̧ba̧lö. Jo̧kwaijayonö ötjödanöbo̧ma deobe, jö̧tö?

⁸ Chömöledö, baledi̧ edö, —Ayö, taji ja̧dakwajö, —jö̧ba̧lö yekabiduwoko. Baledakwa̧ abönö ida̧ökö baledakwa̧ yötawijatö ökwödönö chömöledö, ötjöda bejenö baledakwa̧ baledobö wetijatö. Ja̧danö ökwödöma edö waisadöja isabenö Diosbo̧ chö̧ji̧ma chömöledö. Jelo̧ ötjödanö Diosbo̧ma, bakwo̧bi ö̧jobeji̧? Jelo̧ inesö inawa tjöeba̧lawa chö̧ji̧danö jo̧ bakwo̧bi deobe. Ötjöma jelo̧nö, ötjödanöbo̧nö wajwitökwe, deobe, jö̧ba̧lö yöa̧lobe Diosma.

O̧'wo jawa ösödadöma, jweinö omukwatöködö, jö̧ba̧lö Dios i̧sȩbina jawa

⁹ Okobe deinö o̧'wo jawa otidadöma, mikwawöködö, ja̧danö tjotidaja̧wö̧tjö, —Bidöma inesö mikwawadö, —jö̧ba̧lö tjomukwatawö̧bi, mikwawöködö. Ja̧danö tjösödawö̧ tjujulu yöbawadöma, tjösödawö̧ tjotidina jawa ja'yubebi edöködö, ja̧danö ja'yubebi wajwibadö, jo̧kwajabetjö̧ isabenö tabakwö tjö̧jakwedö.

¹⁰ Jau chömöledö, isabenö waisadöma la'akatöda jobekwö o̧'wo jawa tjotidökena. Sule omukwatöködö wajwibadöda tjösödawö̧ o̧'wo jawa tjotidena, sule wajwibadöda 'dii jawatjö o̧'wo jawa mikwawö̧kö̧nö tjotidena.

¹¹ Ja̧danö jobadöbi, okobe deinö tjömöledö tjotidajawö̧nö ösödadöbi bakobe tabakwö tjö̧jakwedö, tjösödawö̧nö otidadöma bö̧jȩ jojodöda tjö̧jobetjö̧. Jau, okobe deinö jobadöma, bakobe ko̧kokwö tjö̧jo, ja̧danö lȩekwa yöbawo̧ öba a'o ja̧nö, isabenö tjujulu jawa yötjawo. Jobekwö inesö la'aka luwo̧ öba a'o tjö̧jenama, yebabinö, —Taji ja̧dakwajö, —jö̧ba̧lö, tabakwö tjö̧jakwedö, tjösödawö̧ma mikwawöködötjobetjö̧.

¹² Baikwö labebö lobö yöta̧la, —Diosbedönö otidadösa, —jö̧ba̧ladö tjotidi̧ jawama. Bakwo̧ 'dii jawatjö otido̧ma, ökwöla ubö̧'a wame 'dii jawatjö otido̧. Martiyunö bȩbö, o̧'wo jawa baibanö, iteda ujulunö labinö otidobe. Ja̧danö, lekwe otidajabetjö̧, a̧wi̧chi̧ tjöbö, ime'dawachibobe. Ja̧danö ojwiyo owökönö ja̧nö, 'dö̧achibobe, jo̧ba Diosbo̧nö otido̧sa jö̧ba̧lo̧ma.

¹³ Ja̧danö, towösa'otjö otido̧ otidi̧ma baikwö yöta̧la: Otiwanö ba̧ja̧dö, jwȩakwa̧ wȩyudo̧. Ikenama wȩyudajo̧, jwȩbö otido̧. Ja̧danö compas ötjabi̧ jawanö, tupakwö jwȩakwa̧ teada̧lönö wȩyudo̧. Jojo o̧'wo jawa baibanö, jojo otiwo̧ o̧'wo jawa baibanö jobekwö jwȩbö otido̧, ja̧danö otidajo̧, ejunö juno̧.

¹⁴ Jau, otidakwo̧ma, cedro towi juena, o̧'wo jawa otidakobetjö̧. Ju'wibi, cipre towiö̧kö̧, encina towiö̧kö̧ emena, ja̧ owitjö otidobö. Tebo okwa ji̧ towibiyatjö emajo̧, otidena. Ju'wibi pino towi ujunena, ja̧danö ojwiyo o̧bena otiwanö pokwena, ja̧danö otiwanö pokwaja̧ ikena, ja̧ ujuninowi emö otidena.

¹⁵ Towi jubajo̧, tiyuwiökwe, towi ja'ö juwö 'yöakwena. Ökwöla nötedö, ukwakwa̧ pan balö otidena. Jemi ikenama, ujuwemi ji̧ba'o towisa'onö, iteda ösödakwo̧nö otido̧, ja̧danö otidajo̧, ösödo̧, —Chuluwo̧ diosbo̧ja, —jö̧ba̧lö. Jau, o̧'wo jawa otidö, bȩbachibö ösödo̧, towisa'otjö o̧'wo jawa otido̧ma.

¹⁶ Jau chömöledö, jo̧bajayo̧ otidi̧ baikwö yöta̧la: Towi ja'ö ökwölanö juwo̧, ja̧danö ja̧ ökwölanö, ukwakwa̧ söbo̧, ja̧danö söbajo̧, omeawachibanö kwo̧. Ju'wibi ökwöla yöne 'yöbakwo̧, ja̧danö ökwöla edö, —Otiwa, ökwöla edö, otiwanö 'yöbakwö jo̧sa, —jö̧ba̧lö.

¹⁷ Ja̧danö ujuwemi ji̧ba'otjö, iteda ösödakwo̧ diosbo̧nö, o̧'wo jawa otido̧, ja̧danö otidajo̧, bȩbachibö ösödo̧. Bȩbachibö ösödö abebo̧, —Ökwöma chösödökwe diosbo̧ja, chö̧jibinö pjabatitjö, —jö̧ba̧lö abebo̧.

¹⁸ Jobekwö ja̧badöma wajwibadö, ja̧danö okwa jawa waisachiböködö chömöledö. Jau, tjöbajalebiya tjewawadö ja̧nö, edöködö, ja̧danö tjomukwati̧ma, okwa jawa omukwatö waisachiböködö.

¹⁹ Jobadö otidö tjö̧ji̧ma omukwatöködö yelösöda. Jweinö tjomukwatitjö̧ma, baikwö tjomukwato jö̧tja̧lena: —Bowi towima, ja'ö ökwölanö chujuwajabe, ja̧danö ubö̧'a wame, chu̧kwa pan chöbalajabe, ja̧danö itebia söbö chukwajabe. Ji̧baja̧tjö chösödökwe o̧'wo jawanö chotidobö jwiena, la'akatjöda towisa'o bȩbachibö chösödobö jwiena, jobekwö chösöditjö̧ma, inesö suli̧ jawa otidajo̧ chösödena, —jö̧ba̧lö tjomukwato jö̧tja̧lena. Jo̧kwaijayonö jobekwö okwa jawa omukwatöködö.

²⁰ Jau chömöledö, jobekwö omukwatö otido̧ma, wajwibö ja̧bo̧. Otiwi̧ kwakwawa kwökönö, ökwölaso̧pja̧da kwo̧ ichejekwa, ja̧danö sulabenö omukwati̧ma, jelobekwö ö'öbönö öibökwe. Jo̧bajayo̧ma la'akatjöda iteda ö̧jibinö ja̧oböma jwibo̧, ja̧danö iteda ösödökwe, ömamunö do̧'alökwe o̧'wo jawanö omukwatö̧kö̧, —Bite chösödökwema, diosbö̧kö̧, omöna jawa, —jö̧ba̧lö omukwatö̧kö̧.

²¹ Ja̧ jawa kwomukwatibaduwo ökwödö Jacob itji̧mu tupadanö jojodö, la'akatjöda jobadö ja̧tji̧danö ja̧köbaduwoko ökwödö Israel jojodö, ökwödöma ötjöda chömöayedököbaduwobetjö̧. Jau, ötjöda ökwödönö otidö chujunijatö̧, ötjöda chömöayedö kwö̧jaduwobö, ja̧danö ötjöma ökwödö israel jojodönö la'akatjöda cho̧'wo jwitibökakwo̧sa.

²² Isabenö kwö̧jibaduwinö pjabato̧sa chömöledö, sulabenö weti̧ a̧ja̧kwökönö kwö̧jaduwinajayonö, kwusuladuwima söbebö lotajabe. Sulabenö ja̧bajadö wene kwujuna̧laduwima, jwa̧le'epjo ojwiyo'wo, yȩa'wo jelobekwö e'ewibi̧danö söbebö lotajabe. Isabenö ötjökwö ja̧nö tjekachaduwo chömöledö, isabenö ökwödönö tjöbeba̧lö chö̧jobetjö̧, jö̧ba̧lö laebobe Dios yöa̧li̧ma.

²³ Mölȩjȩbe ji̧bi, bö̧jȩ teebe ji̧bi, mösa'ijubi, tebobi, towibiyabi, o̧'wo ösöwachibanö jwöeba̧lobö jo̧be, Isabenö Jo̧ pjaatajobetjö̧. Jau, Isabenö Jo̧ma otiwanö tjöbeba̧lö pjabato̧ Jacob itji̧mu tupadanö jojodönö, ja̧danö Israel niji ba̧kwemeachibanö iteda dejatinö ujulu otiwanö i̧sȩbo̧.

Jerusalen comunidad yemidanö tjotidakwa̧ Isaias i̧wȩyudina jawa

²⁴ Baikwö yöa̧lobe ökwödönö tjöbeba̧lö pjabato̧, ina kwojo'do jukwa'wo okwa ina kwö̧jaduwayi dadö otidina Isabenö Jo̧ Diosma: Ötjöma okobe jwiinö otidina Isabenö Jo̧ Diossa. Ötjöda mölejȩ sedatö nöninasa, ötjöda jo̧dawa'ye bö̧jȩbi dadö otidinasa.

²⁵ Ötjöma tupakwö baledakwa̧ yöbawadösa jö̧ba̧lö omöna yötja̧li̧ waekwobö webo̧sa. Ötjöma baledi̧ edö yadakwö baledakwa̧ yöba̧ladö tabakwö tjö̧jobö webo̧sa. Ja̧danö waisadö waisanö yötjawi̧ balewö lobo̧sa waisakwawa jwii̧ yöawakwawa baibanö balewö lobo̧sa.

²⁶ Jobekwö bö̧jȩ jojodö waisadösa jö̧ba̧lö tjomukwati̧ waekwobö webo̧sa, jo̧kwaijayonö ötjöda chömöayedö, ötjöda yötawi̧ yöbawadö yötjawi̧danö badekwachobö webo̧sa. Jau, wetawö̧, —Isabenö yemidanö Jerusalen comunidadnö tjö̧jakwedö, ja̧danö Juda niji comunidadbiyama, yemidanö tjotidakwedö, —jö̧ba̧lö yöbawadö tupakwö baledakwa̧ma, ja̧danö yötjawi̧danö badekwachinö webo̧sa.

²⁷ Ja̧danö ju'wibi, ötjöda jwaibalawa webo̧sa, —Kököachibi, —jö̧ba̧lö, ja̧danö —Ojwebiya kököachibobö wetakwo̧sa, —jö̧ba̧lö yöbawajo̧, badekwachinö webo̧sa.

²⁸ Jobekwö badekwachinö webo̧sa chömöledö, ja̧danö ju'wibi yötawaduwakwö: Ötjöma Ciro jö̧ba̧lö imikwakwo̧nö yötawa, —Ciroda chömöayo̧ obejadönö teada̧lo̧danö ja̧nö, chömöledö israel jojodönö webö ö̧jakwo̧, ja̧danö okobe jwiinö weti̧ otidö ö̧jakwo̧. Wetökwe jo̧bada Jerusalen comunidad jawa weakobe, –Jerusalen comunidad tjotidobö jo̧be, –jö̧ba̧lö, ja̧danö wetökwe jo̧bada cheju jawa weakwo̧, –Dios eju la'akama, yemidanö tjotidobö jo̧be, –jö̧ba̧la. Jobekwö yötawaduwakwö baledakwa̧, badekwachinö wetakwa̧ma, jö̧ba̧lö yöa̧lobe Diosma.