Isaías 43 - Dios Iwene

Isabenö kwö̧jibaduwinö pjaatakwo̧ Diosma jö̧ba̧lö, Isaias israel jojodönö i̧wȩyudina jawa

¹ Sulabenö ja̧diökwe, ökwödö Jacob itji̧mu tupadanö jojodönö otidina, israelsaso badibanö otidina Isabenö Jo̧ Diosma ökwödönö lȩebinobe. Jo̧kwaijayonö, ökwödönö lȩbebajo̧, baikwö yöawobe: Ökwödö Israel jojodöma, yekabiduwoko, ötjöma kwö̧ji̧baduwinö pjatatinobetjö̧. Isabenö ötjöda chömöledöja, ja̧danö ötjöda chömöledököbaduwobetjö̧, otiwanö jweinö kwimiduwi yöba̧lö ökwödönö jwötajabe, jo̧kwajabetjö̧ yekabiduwoko.

² Jau, wene kwöbaledaduwenama, pjatatakwo̧sa, baikwö wanedö yöta̧la: Ojwiyo da̧kwemi kwöbaledaduwena, ökwödökwö chö̧jakwo̧sa, ja̧danö ojwe da̧kwödö pekibaduwijayonö o̧kibaduwökakwedöja, ötjöda tjöbeba̧lö pjatatobetjö̧. Ja̧danö ökwöla nöinö ubola ö'wejenö kwöbaledaduwijayonö, kwubaduwökakwedöja, ökwöla neawanima suli̧ öwaedökakwawö̧ja.

³ Jau chömöledö, ötjöma kwuluwo̧duwi Isabenö Jo̧ Diossa, ötjöma ökwödö Israel jojodö kwösödaduwökwe Suli̧ Jwibo̧ kwö̧jibaduwinö pjabato̧ Diossa, jo̧kwajabetjö̧ isabenö jobekwö pjatatakwo̧sa ökwödönö. Isabenö chösödaduwakwö ökwödö israel jojodönö, baikwö yöta̧la: Ökwödö kwö̧jibaduwoböma, Egipto jojodönö iyö lotajabe, ja̧danö Cus jojodönöbi, Seba jojodönöbi iyö lotajabe, ökwödöda kwö̧jibaduwakobetjö̧.

⁴ Jau chömöledö israel jojodö, ökwödönö otiwanö omukwatö, jwiinö ile nitebawö̧ja, —Chömöledö Israel jojodöma nöinö mikwawadö, —jö̧ba̧lö. Jo̧kwajabetjö̧ ökwödöda kwö̧jibaduwakobetjö̧, balekwedönö iyö lobo̧sa, jelesokwena jojodö balekwedö batjibanö iyö lobo̧sa ökwödöda kwö̧jibaduwakobetjö̧.

⁵ Yekabiduwoko, isabenö ökwödökwö chö̧jobetjö̧. Ja̧danö, ökwödötjö kwitji̧mu tupadanö jojodöma, bö̧jȩ ba̧kwemeachibanö tjipjelekwachibanö tjö̧jijayonö, jawo̧ laebobekwötjöbi, meajobekwötjöbi jobadönö ko̧ko̧dibö tjetatakwo̧sa kwiteboduwi Israel nijibe.

⁶ U'dakwö ju̧kwadönöbi, a̧li̧kwö ju̧kwadönöbi ja̧danö. U'da wetocha, –Chömöledö israel jojodönö iyitjö, –jö̧ba̧lö, ja̧danö a̧li̧ wetocha, –Chömöledö tjȩwa̧japji jö̧ba̧lö tjöbeba̧lökönui, –jö̧ba̧lö. Jobekwö bö̧jȩ bakwachö̧jetjöbi chitji̧mu ömadönöbi, ya̧dönöbi tjebatajö ödötjö chichejebakwo̧sa.

⁷ Jau, okobe deinö ötjö chiminö ötjabawö̧, —Bidöma Isabenö Jo̧ ömöledö israel jojodö, —jö̧ba̧lö ötjabawö̧nö chichejebakwo̧sa. Ötjöda jobadönö dadö chotidijatö, ötjöda tjitebosaso batjibanö chotidijatö, ötjö Diosnö tjösödakobetjö̧. Jo̧kwajabetjö̧ jobekwö tjebatajö chichejebakwo̧sa, chömöledö pjelekwachibö ja̧dönö, jö̧ba̧lö yöawobe Diosma, israel jojodönö.

Israel jojodöma edö waisadö, isabenö juluwo̧ Diossa, jö̧ba̧lö Dios yöa̧lina jawa

⁸ Tjöbajale tjujuna̧lijayonö, tjöbajale tjewawadödanöbedö, ja̧danö tjölakiyu tjujuna̧li̧jayonö, tjölakiyu a̧ja̧kwöködödanöbedönö jwöbö kwichejebaduwo, ko̧ko̧kwö yöda̧lakwawobö.

⁹ Okobe deinö bö̧jȩnö ju̧kwadö, tjitebotenia jojodönö ko̧ko̧dö kwichejebaduwo, bakobe ko̧ko̧kwö yöda̧lakwawobö. Ko̧ko̧kwajadö, okobe deinö tjösödawö̧nö abebö kwa̧ja̧kwaduwo, jobadö tjösödawö̧tjö bakwo̧bi babe baledi̧ jawa baledakwa̧ abönö yötjawinojobö jö̧ba̧lö. Isabenö jweinö baledakwa̧ yötjawinatjö̧ma, yötjawina waisadö ichibö yötja̧lobö jo̧be, —Isabenö waisanö yöbawinadötö, —jö̧ba̧lö waisachibö yöda̧lakobetjö̧. Jo̧kwaijayonö okobe deinö tjösödawö̧tjö jobekwö waisanö yöbawinama deobe, jö̧tö?

¹⁰ Jo̧kwaijayonö ökwödö israel jojodöma, Isabenö Jo̧ i̧sȩbina edö waisadösa. Baikwö yöa̧lobe Isabenö Jo̧ma: Ökwödö israel jojodöma isabenö chi̧sȩbina edö waisadöja, isabenö Diosbo̧ chö̧ji̧ma. Jau, chömöayedö bakibaduwanö omudawö chujuninawö̧ja, ötjönö kwöwaisaduwobö, ja̧danö ötjönö kwösödaduwobö, ja̧danö okwa jawa otiwanö kwöwaisachibaduwobö, —Okobe deinö tjösödawö̧tjöma, Isabenö Jo̧ Diosda isabenö Diosbo̧, —jö̧ba̧lö. Jau, ötjö chö̧jakwa̧ abönö tjotidinökwema deobe la'akatjöda, ja̧danö chö̧jaja̧ ikena ö̧jakwo̧ diosbo̧bi deakobe la'akatjöda, ötjödasa Diosbo̧ma.

¹¹ Jau, ötjödasa Isabenö Jo̧ Diosma, ötjödasa isabenö tjö̧jibinö pjabato̧ma, jelo̧ma deobe.

¹² Ötjöda abönö yötawijatö kwö̧jibaduwakwa̧ma, ja̧danö yöbawajo̧, ötjöda kwö̧jibaduwinö pjatatijatö, ja̧danö pjabatajo̧, kwö̧jibaduwinö pjatataja̧ wene yötawijatö. Ötjöda jobekwö ja̧binasa chömöledö, jelo̧ diosbo̧ma deinobe chömöledö, ja̧danö ökwödö israel jojodöma ja̧ edinadö waisadöja, —Isabenö Jo̧ Diosda isabenö Diosbo̧ma, —jö̧ba̧lö.

¹³ Jau, ötjödasa ba̧kwelöjatebö ji̧na Diosma, ja̧danö ba̧kwelöjatebö 'dö̧jibajökönö ö̧jakwo̧ Diosma ötjödasa. Ötjö chotidobö jö̧ta̧lenama, bakwo̧bi tjöbeba̧lo̧ma deobe, ja̧danö ötjö chotidaja̧ma, bakwo̧bi chotidajokobedanö balewö loobö jwiobe, ötjödasa Diosbo̧chobetjö̧, jö̧ba̧lö yöa̧lobe Diosma.

Babilonia jojodönö tjujuluwakwa̧ jawa Isaias i̧wȩyudina

¹⁴ Baikwö yöa̧lobe Isabenö Jo̧ kwöjibaduwinö pjabato̧, ökwödö israel jojodö kwösödaduwökwe Suli̧ Jwibo̧ Diosma: Ökwödö Israel jojodönö pjabatö, ölakwabikwawadönö wetocha, Babilonia comunidad mebibö tjujuluwobö. Ja̧danö Babilonia jojodöma isowibiyanö dötjibajakwedö. Ajayinö tjisowibiya nöinö ösödinadö, —Inesö otiwowi juna̧ladösa, —jö̧ba̧lö, ja̧danö ja̧ owibiyanöda tjöpöjojodö tjöba a'otjö dötjibakwedö.

¹⁵ Ötjöma kwösödaduwökwe Isabenö Jo̧ Suli̧ Jwibo̧ Diossa. Ötjödasa bakwaso Israelsaso bakibaduwanö webinama, ötjödasa inesö la'aka kwuluwo̧duwima.

¹⁶ Ötjö Isabenö Jo̧ma baikwö yöta̧laduwakwö: Ötjöma jwaibalawanö ö'wejenö, labinö buluwawa ö'wejenö mana lamatinö webinasa.

¹⁷ Ötjödasa kwöpöjojodöduwi ölakwabikwawadö, kolukiyanö ölakwabikwawadöbi, kabayudönö wanö ölakwabikwawadöbi, ju'wedö ölakwabikwawadöbi ja̧ mananö kwetjachobö öbibinasa̧, ja̧danö jobekwö ötibajawö̧, jobeda la'akatjöda tja̧laibökenanö metjobö webinasa. Wanedö yötawa, dȩju̧wa'yu ubopja titjebi̧danö, jobeda jobadönö tibebö lobinama ötjödasa.

¹⁸ Jobekwö damötjö otidinasa chömöledö, jo̧kwaijayonö sule ja̧ damötjö baledina jawada kwomukwataduwoko chömöledö.

¹⁹ 'Yayi jawa, babeda chotidakwa̧ jawa kwomukwataduwo. Ida̧ökö ja̧ 'yayi jawa jamatö chotidajabe chömöledö, edö kwomukwataduwökiji̧? Ötjöma jojodö deobe kököobe ö'wejenö mana chotidocha, ja̧danö ojwebiya jobe kököajemi lamatobö wetocha.

²⁰ Jobekwö ojwe lamatobö wetiawö̧, tebonö ju̧kwadö chacales ötjabawö̧bi, nöbo̧ patubi ötjönö tjösödakwedö, —Otiwanö dowobö kwiyajabe, —jö̧ba̧lö. Ja̧ chotidi̧ma, baikwö labebö lobö yötawaduwakwö: Ökwödö israel jojodönö chösödobetjö̧, jobekwö jojodö deobe kököajelö ojwe lamatobö webo̧sa, ökwödö ötjöda chömöledö bakibaduwanö omudawö chujuninawö̧ o̧ti̧ tjöbadöma, jödötjö otiwanö kwowaduwakobetjö̧.

²¹ Ökwödö ötjöda chömöledö bakibaduwanö chotidinawö̧nö pjabatö, jobekwö chotidakwo̧sa chömöledö, ja̧ baledi̧ edö, —Diosma isabenö iteda ömöledönö otiwanö pjabato̧, —jö̧ba̧lö ötjönö ösödö yöka̧laduwakobetjö̧, jö̧ba̧lö yöa̧lobe Diosma, ökwödö Israel jojodönö.

Sulabenö ötjönö ösödöködöja, jö̧ba̧lö Dios israel jojodönö yöa̧lina jawa

²² Tupakwö yöa̧lobe Diosma, israel jojodönö: Jobekwö ökwödönö pjabato̧sa chömöledö, jo̧kwaijayonö ökwödö Jacob itji̧mu tupadanö jojodöma ötjönö abeböködöja. Ötjönö ösödakwawama kwöpöjödaduwachibajabe, ökwödö israel jojodöma.

²³ Jau chömöledö, jwiinö ubinö iyawa baibanö, obejadönö kwiyaduwo jö̧ka̧laduwijayonö, iyöködöja, ja̧danö ötjönö otiwanö omukwatö, ötjökwö bakobe ösökwö ja̧kwawa iyawabi iyöködöja. Ömöki̧ jawa baibanö, nöinö iyawa kwiyaduwoböbi, nöinö omewi̧ jawa kwujuwaduwoböbi wetinököjayonö, yayonö ötjönö kwösödaduwoböma kwöpöjödaduwachibajabe.

²⁴ Jau chömöledö israel jojodö, omewi̧ jawa isa'ye ötjönö kwiyaduwoböma emöködöja, ja̧danö bakobe ötjökwö ösökwö ja̧kwawa iyawedö tjo̧tema, chomeawachibanö iyöködöja, ju'wida sulabenö ja̧badöja. Ötjönö ömöki̧ jawa baibanö, jwaikwöda sulabenö ja̧bö kwö̧jaduwajabe, jwaikwöda suli̧ jawa ja̧bö, chime'dawachibenanö baibanö ja̧badöja.

²⁵ Ötjöma Isabenö Jo̧ Dioschobetjö, kwusuladuwi̧ söbebö lobo̧sa chömöledö, ötjödachobetjö̧ sulabenö ja̧köbaduwi̧ omukwatökönö, ökwödönö lȩlöjinö edo̧sa chömöledö,

²⁶ tajawedö ötjönö kwöpöjödaduwobeda? Kwedaduwemi ökwödönö sulabenö ja̧tinaji̧? Jobekwö kwomukwataduwitjö̧ma, bakobe yöda̧lakwawo, isabenö kwomukwataduwi̧danö, ökwödönö sulabenö ja̧tinojobö, jö̧ba̧lö. Isabenö sulabenö ja̧tinatjö̧ma, yöbawö kwi̧sȩbaduwotjö, —Aaa, jweinö omukwatadö Israel jojodöma, —jö̧ba̧lö chöwaisachibakobetjö̧. Jobekwö kwi̧sȩbaduwobö jo̧beji̧?

²⁷ Kwöwaisaduwa chömöledö, jobekwö kwi̧sȩbaduwoböma jwiobe. Ökwödö Israel jojodöma la'akatjöda ba̧kwelöjatebö weti̧ kwa̧ja̧kwaduwobö öpöjödadöja, ajayi möletjö, babe baibanö. Jau, ökwödö israel jojodötjö ajayi ji̧nabi chöba a'otjö sulabenö ja̧bina chömöledö, ja̧danö jo̧ba ikena, okobe deinö ju'wedö kwuluwedöduwibi weti̧ a̧ja̧kwökönö tjö̧jajabe chömöledö.

²⁸ Ja̧danö, jobekwö sulabenö ja̧bö kwö̧jaduwi̧tjö̧, ökwödönö lȩtebocha chömöledö. Chejunö otidadö ö'wejenö pjabatadönö, jo̧kwadabedö batjibanö meatö lotocha, ja̧danö ökwödö Jacob itji̧mu tupadanö jojodönö 'da̧batö lotocha, kwöpöjojodöduwi ökwödönö söbebö lotjobö, ja̧danö ökwödö israel jojodönö obö yötja̧lobö, jö̧ba̧lö yöa̧lobe Diosma, israel jojodönö.