Isaías 42 - Dios Iwene

Dios ömöayo̧ weakwo̧ jö̧a̧linökwenö yöa̧lina jawa

¹ Baikwö laebobe Dios yöa̧li̧ma: Bitema ötjöda omudawö chujuninökwe chömöayo̧, ujuluwachibanö pjatjatökwema. Jo̧bama ötjö ile 'di̧tebökwe. Jo̧banö chiyajabe ötjöda Cho̧'wo Luwo̧nö, ja̧danö jo̧bama jweinö lȩebo jö̧a̧li̧danö lȩebakwo̧ tjitebotenia jojojodönö.

² Jo̧bama labinö yöawökakwo̧, ja̧danö jwöeba̧lökakwo̧, ja̧danö comunidad manatjö, iwene ökwöi̧ tja̧ja̧kwökakwedö.

³ Ja̧danö me'dawadönöbi, tjujulu jwibadönöbi dösölö̧jinö pjaatakwo̧, ja̧danö jwaikwöda yöawo jö̧a̧li̧danö, jweinö lȩekwa yöawakwo̧, bite ötjö chömöayo̧ma.

⁴ Jwaikwöda me'dawachibökönö, waekwökönö lȩekwa yöbawö ö̧jakwo̧, bö̧jȩ ba̧kwemeachibanö ju̧kwadöma, lȩekwa yöawi̧ a̧ja̧kwö tjö̧jenanö baibanö. Ja̧danö ja̧ möle jwaibalawa ö'öbö ju̧kwadöbi jo̧ba wei̧ tja̧ja̧kwobö tjiteada̧lakwedö, —Dios ömöayo̧ webö ö̧ba̧ja̧dakwa̧ da̧ja̧kwaduwo, —jö̧ba̧lö, laebobe Dios iteda ömöayo̧nö yöa̧li̧ma.

⁵ Chömöledö, Isabenö Jo̧ Diosda mölȩjȩ otidajo̧, sedatö nöninama, ja̧danö jo̧bada bö̧jȩbi, okobe jwiinö bö̧jȩtjö pokwi̧bi otidinama. Jo̧bada okobe deinö bö̧jȩnö ju̧kwadönö tjo̧'wo emapjo iyo̧ma, bö̧jenö kwebachö ju̧kwadönö ja̧kwawa iyo̧ma Isabenö Jo̧ Diosda. Ja̧danö, jo̧bada baikwö yöawobe omudawö ujuninökwenö:

⁶ Ötjöma Isabenö Jo̧ Diossa, ötjödasa ökwönö jwöbinama, weti̧ a̧ja̧kwö kwö̧jakobetjö̧. Ötjöda kwömamu do̧ba̧lö, ökwönö chiteada̧lakwo̧sa. Ja̧danö ökwönö i̧sȩbö chiyakwo̧sa jojodönö, ökwönötjö̧ jojodökwöbi, ötjökwöbi bakobe ja̧nö dö̧jakwa̧ wene yöbawö dujunakobetjö̧, ja̧danö tjitebotenia jojodönö öbibö dejato̧ kwö̧jakobetjö̧.

⁷ Ja̧danö jobekwö chiyobetjö̧, tjöbajale tjewawadö tjöbajalema po̧kebakwo̧ja, otiwanö tjedakobetjö̧. Ja̧danö ka̧lena ba̧jadö, yȩa'wo okwa ba̧jadönö, tjö̧bajejutjö latjebobö pjakatakwo̧ja, jö̧ba̧lö laebobe Dios yöawi̧ma.

⁸ Ja̧danö ju'wibi laebobe Dios yöa̧li̧ma: Ötjöma Isabenö Jo̧sa, jobekwö, —Isabenö Jo̧, —jö̧ba̧lö mikwo̧sa. Ötjödasa otiwanö omukwatö tjösödo jö̧tja̧lökwema. Ja̧danö ötjönöda tjösödo jö̧tja̧li̧ma, jelo̧nöda tjösödoböma wetökakwo̧sa. Ötjödasa tjösödo jö̧tja̧lökwema, —Isabenö Jo̧ma otiwo̧, —jö̧ba̧lö̧. Ja̧danö ötjönöda ösödö yötja̧lo jö̧tja̧li̧ma a̧'dȩlö omukwato̧sa, ötjönöda ösödö yötja̧lo jö̧tja̧li̧ma, o̧'wo jawa ösödö yötja̧loböma webö̧kö̧sa, jö̧ba̧lö.

⁹ Ötjöma isabenö jweinö yöbawo̧sa, okobe jwiinö damötjö baledakwa̧ yötawinama, yötawinadanö badekwachajabe. Ja̧danö babema jemi tupakwö baledakwa̧bi yötawocha. Jau, baledakwa̧ abönö, jweinö yötawocha, ina baledapji, —Baikwö isabenö baledakobe, —jö̧ba̧lö jweinö yötawocha, jö̧ba̧lö laebobe Dios yöa̧li̧ma.

Isabenö Jo̧ Diosnö ösödö lo̧köbaduwo, jö̧ba̧lö Isaias i̧wȩyudina jawa

¹⁰ Okobe deinö Isabenö Jo̧ Diosnö lo̧köbaduwo, 'yayi jawa lo̧awa jo̧banö lo̧köbaduwo. Bö̧jȩ ba̧kwemeachibanö ju̧kwadö ösödö lo̧köbaduwo, —Diosma otiwo̧, —jö̧ba̧lö. Bö̧jȩ bakwachö̧je ju̧kwadöbi, jwaibalawabe kwebachadöbi, jwaibalawanö ju̧kwadöbi, ödö ju̧kwadö jwaibalawa ö'öbö ju̧kwadöbi, okobe deinö lo̧köbaduwo.

¹¹ Jojodö deobe ju̧kwadöbi, jobe ji̧ comunidadbiya ju̧kwadöbi, kwiweneduwi ökwöinö lo̧köbaduwo. Cedar niji comunidadtenia ju̧kwadöbi, Sela mösa'o ju̧kwadöbi lo̧köbaduwo, mösa'iju wa̧pekwa'otjö labinö jwöbeba̧lö kwösödaduwo, —Diosma otiwo̧, —jö̧ba̧lö.

¹² Ödö ju̧kwadö jwaibalawa ö'öbö ju̧kwadöbi Diosnö otiwanö omukwatö, jo̧banö kwösödaduwo, kwiteboduwi nijitjöbi yökawaduwo, —Diosma isabenö otiwo̧, —jö̧ba̧lö.

¹³ Isabenö juluwo̧ Isabenö Jo̧ma. Wanedö yöta̧la: Ölakwabikwawa jojo juluwo̧, ölakwabikwawotö jö̧ba̧lö, labinö jwöbeba̧lö, dameakwö laebi̧danö, iteda öpöjojodönö ölakwabikwawobö labebo̧ Diosma. Jwöbeba̧lö, labinö ökwöinö jwöbeba̧lo̧, ja̧danö iteda ujulu i̧sȩbo̧, iteda öpöjojodönö. Ölakwabikwawobö laebenama, baikwö yöa̧lakwo̧:

¹⁴ Lekwe möle wi̧inö ja̧nö chiteada̧lajabe, lȩtebobö ji̧najayonö, juluwanö lȩbebökönö chiteada̧lijatö. Jo̧kwaijayonö, babe ida̧ökö lȩtebakwa̧ möle badekwachajabe, baikwö wanedö yöta̧la: Metu'wo ju̧juma, lekwe metu'wo jö̧jaja̧ ikena, jitji̧nö jemobö badekwachenama, jwöbeba̧luju, ja̧danö juluwanö, labinö jo̧'wo emuju, jö̧tö? Ötjöbi ja̧danö, bajalianö lȩbebö latebakwa̧ möle badekwachajabe.

¹⁵ Ja̧danö, babema mösa'iju jwiinö söbebö lotocha, okobe jwiinö mösa'ijunö pokwi̧ köködö lotocha. Ojwebiyabi köködö lotocha, ojwe ö'wejenö ö'wejesa'o öwawachibenanö baibanö, ja̧danö o̧pesobubiyabi köködö lotocha.

¹⁶ Ja̧danö, chömöledö tjöbajale tjewawadödanöbedönö pjatatocha. Jobadönö ötibakwo̧sa, mana edajitjökö mananö kwetjachobö. Ötjöda jobadönö jwetebakwo̧sa, ja̧danö tjöba a'otjö yȩa'woma, dewi̧ baibanö balewö lotakwo̧sa, otiwanö tjedakobetjö̧. Ja̧danö niji ya̧likwaobe inakoobema, ba̧ba̧ladö chotidocha, ba̧ba̧lawamanö otiwanö kwetjachakobetjö̧. Jobekwö isabenö chömöledönö pjatatakwo̧sa, ja̧danö jobadönö le'dedö lotökakwo̧sa.

¹⁷ Jobekwö baledökakwawö̧ o̧'wo jawa ösödadönöma. Jobadöma 'dii jawatjö otikwa o̧'wo jawa ösödö, —Ökwödöma duluwedö diosbedöja, —jö̧ba̧lö ösödö yöba̧ladö, jo̧kwaijayonö tjösödawö̧ma la'akatjöda pjatjatökakwedö, ja̧danö waekwö, jwiinö tabakwö tjö̧jakwedö o̧'wo jawa ösödadöma, jö̧ba̧lö laebobe Dios yöa̧lakwa̧ma.

Israel jojodöma tjöbajale tjewawadödanöbi, tjölakiyu a̧ja̧kwöködödanöbi ichejekwadö, Isaias i̧wȩyudina jawa

¹⁸ Baikwö laebobe Dios Israel jojodönö yöa̧li̧ma: Ökwödö kwölakiyuduwi a̧ja̧kwöködöma, otiwanö kwa̧ja̧kwaduwo, ja̧danö ökwödö kwöbajaleduwi tjewawadöma, otiwanö edö kwomukwataduwo.

¹⁹ Ökwödöma ötjöda chömöayedöja, jo̧kwaijayonö kwöbajaleduwi tjewawadöja. Ja̧danö yötawi̧ yöbawadö bakibaduwanö wetawö̧ja, jo̧kwaijayonö a̧ja̧kwöködöja. Jau, isabenö sulabenö edöködöja, ökwödö edökönö kwö̧jaduwi̧danö ju̧kwadöma didöda? Deobe, ökwödö Isabenö Jo̧ ömöayedöda ju'wedötjö bajalekwönönö edökönö ja̧döja.

²⁰ Jau, ökwödö chömöayedö israel jojodöma, nöinö kwedaduwajabe, jo̧kwaijayonö wamenö kwedaduwijayonö, kwedaduwaja̧ okwa jawa omukwatöködöja. Ja̧danö kwölakiyuduwinö wamenö kwa̧ja̧kwaduwijayonö, okwa jawa omukwatö a̧ja̧kwöködöja, jö̧ba̧lö laebobe Dios israel jojodönö yöa̧li̧ma.

²¹ Jau chömöledö, Isabenö Jo̧ Suli̧ Jwibo̧ Diosma jwaikwöda lȩebo jö̧a̧li̧danö lȩbebo̧. Jo̧kwajabetjö̧ iteda wei̧ yöawobö ösödinobe, —Bi̧ya ökwödönö weti̧ma inesö mikwawi̧, a̧ja̧kwö kwö̧jaduwobö jo̧be, —jö̧ba̧lö.

²² Ja̧danö, weina wene laebi̧danö, wei̧ a̧ja̧kwökönö tjö̧jiökwe, tjöpöjojodö tjujuluwobö weinobe, ja̧danö babe israel jojodöma, tjöpöjojodö tjujuluwajawö̧, titea 'dötebajawö̧ tjö̧jobe. Ja̧danö israel jojodönö juluwajadö, ka̧lena tjö̧bobö tjödajabe, laju okwa tjö̧bajoböbi, ka̧lena ba̧kwaweju okwabi tjö̧bajobö tjödajabe. Jobekwö baledonö, bakwo̧bi israel jojodönö tjö̧jibinö pjabato̧ma deinobe, pjabato̧ deinö, tjöpöjojodö bakobe tjö̧naukwajawö̧ tjö̧jobe. Ja̧danö tjönaukwaja tjetjatobö webo̧bi deobe, —Israel jojodötjö kwönaukwaduwaja̧ma tjebataduwi, —jö̧ba̧lö webo̧ma.

²³ Ökwödö Israel jojodötjö, tida otiwanö yötawi̧ a̧ja̧kwakwo̧ma? Bemi tupakwö, ökwödötjö tida otiwanö omukwatö a̧ja̧kwakwa̧da?

²⁴ Ökwödönö baledina jawa, baikwö labebö lobö yötawaduwakwö chömöledö: Tida Jacob itji̧mu tupadanö jojodö Israel jojodönö iyö lobinama, döpöjojodö ökwödönö tjujuluwobö, ja̧danö juluwajadö, ditea 'döbebö tjemobe? Isabenö yötawaduwakwö chömöledö, Isabenö Jo̧ Diosda jobekwö iyö lobinama. Jau, jo̧ba Diosnöda sulabenö ja̧binadösa, jo̧bada ösödi̧danö ja̧bö dö̧jobö öpöjödinadösa, ja̧danö jo̧ba Diosda weina a̧ja̧kwö dö̧joböma öpöjödinadösa.

²⁵ Ja̧danö, jobekwö sulabenö döpöjödiökwe, jwiinö ödameakwinobe ökwödönö, ja̧danö dameakwö ja̧nö, labinö lȩbebö döpöjojodö mebibö tjölakwabikwawobö weinobe. Jobekwö baledi̧ma, baikwö wanedö yötawa, Dios inesö ödameakwi̧ma dö̧'da̧de ökwöla ubi̧danö ubinobe, jo̧kwaijayonö tajawedöjö jö̧ba̧löma domukwatijökötö. Jau, Dios ödameakwi̧ i̧sȩkwolatjö ubawö̧ döwaekwijayonö, yayonö otiwanö domukwatijökötö, ja̧danö, —Aaa, Dios wei̧ a̧ja̧kwökönö dö̧jobetjö̧ baledajabe, —jö̧ba̧lö okwa jawa döwaisachibijökötö. Isabenö tjöbajale tjewawadödanö, ja̧danö tjölakiyu a̧ja̧kwöködödanö ichejekwadösa, ökwödö israel jojodöma.