Isaías 41 - Dios Iwene

Dios tjitebokwena jojodönö abebö a̧ja̧kwina jawa

¹ Baikwö laebobe Dios yöa̧li̧ma: Ökwödö jwaibalawa ö'öbö niji ju̧kwadönö, wi̧inö ja̧nö kwa̧ja̧kwaduwo, ökwödönö abebö cha̧ja̧kwonö, ikenama atebiawö̧, kwujuluwaduwachibanö kwatadaduwo. Jau, bakobe yöda̧lakwawaduwo, ökwödötjö ti jweinö omukwatojobö jö̧ba̧lö öwawakobetjö̧.

² Baikwö abebö cha̧ja̧kwaduwakwö: Jawo̧ laebobekwötjö icho̧ la'aka luwo̧ juluwo̧ma, ti weökwe baikwö ichobeda? Ja̧danö tjitebotenia jojodönö ujuluwobö webo̧ma, tida? Tida tjitebokwena la'aka luwedönö ja̧tö loobö webo̧ma? Jawo̧ laebobekwötjö icho̧ma, inesö la'aka luwedönö jwiinö dȩdȩbö lobo̧, jwiinö söbebö lobo̧, nijiso̧pjadanö batjibenanö, ja̧danö öpöjojodönö 'böbö, jwa̧le'epjo e'ewa'ye meje'yedanö tjipjelekwachinö a'dewo lobo̧, jö̧tö? Tida weökwe jobekwö ujuluwobeda?

³ Jobadönö ujuluwenama, döbibajadönö lubo̧, ja̧danö wajwiama edajiokobe mananö jobadönö luijayonö, waekwökönö lubo̧.

⁴ Tida jobekwö ujuluwobö webo̧ma? Ajayitjö baikwö bajalenö, ja̧jaye webo̧ma tida? Ötjödasa jobekwö webo̧ma, ötjö Isabenö Jo̧ Diosda. Ötjödasa ajayinö jobekwö webinama, ja̧danö ötjödasa bajaleapo jobekwö wetakwo̧ma, jö̧ba̧lö laebobe Dios tjitebokwena jojodönö yöa̧li̧ma.

O̧'wo jawama mikwawöködö, jö̧ba̧lö Dios yöa̧lina jawa

⁵ Tupakwö laebobe Dios yöa̧li̧: Jobekwö wetökwe ichobe edö, jwiinö yebabidö jwaibalawa ö'öbö ju̧kwadöma, bö̧jȩ bakwachö̧je ju̧kwadöbi jwiinö yebabinö ko̧ko̧kwadö.

⁶ Bakobe tjujuluwachibanö, —Juluwachibi, —jö̧ba̧lö yöba̧lakwawadö.

⁷ O̧'wo jawa otidadöma, bakobe pjabatakwawö tjujuluwachibanö ja̧badö. Ajayi dadö otido̧ma, orotjö otido̧nö ujuluwachibanö yöba̧lo̧, ja̧danö martiyunö 'dobö pöchö otido̧ma, 'dii jawa 'da̧jökachibanö 'doawakanö bȩbö otido̧nö ujuluwachibanö yöba̧lo̧. Ja̧danö o̧'wo jawa tubedö tjotidaja̧ edö, —Otiwa, —jö̧ba̧lö yöba̧lakwawadö, jemi ikenama tjösödakwo̧ o̧'wo jawa otidö kabatibajadö, puasö'inö bȩbadö, 'diinö kwaibökönö ö̧jakobetjö̧, jö̧ba̧lö yöa̧lobe Diosma, o̧'wo jawa ösödadönö.

Israel jojodöma Dios omudawö ujuninawö̧ jö̧ba̧lö Dios yöa̧lina jawa

⁸ Tupakwö laebobe Dios yöa̧li̧: Ökwödö Israel jojodöma, isabenö ötjöda chömöayedöja. Ökwödöma omudawö chujuninökwe Jacob itji̧mu tupadanö jojodöja, ja̧danö chömöledöso̧ Abraham itji̧mu tupadanö jojodöja.

⁹ Ökwödöma bö̧jȩ bajaletjö baikwö chichejebinawö̧ja, bö̧jȩ bakwachö̧jetjö jwötinawö̧ja, —Ökwödöma ötjöda chömöayedöja, ökwödönö omudawö chujunajabe, ja̧danö ökwödönö kabatibö̧kö̧sa, —jö̧ba̧lö.

¹⁰ Yekabiduwoko ökwödö israel jojodö, ötjöda ökwödökwö jo̧chobetjö̧, ja̧danö kwo̧'wo tjo̧bekwö kwö̧jaduwoko, ötjöda kwösödaduwökwe Dioschobetjö̧. Jau, ötjöda kwujuluwaduwachibanö pjatatakwo̧sa, meköbaduwapji jö̧ba̧lö, ötjöda chömamu juluwamu chöwaisobekwöchobesamunö do̧balö pjatatakwo̧sa.

¹¹ Chömöledö israel jojodö, isabenö okobe deinö ökwödönö dameakwö öpöjödadöma, taba lö̧jawö̧ tjö̧jakwedö, okobe deinö ökwödökwö ölakwabikwawadöma debi babibö, ö'wö batjibakwedö.

¹² Jemi ikenama ökwödönö tjujuluwo jö̧ba̧linadönö kwisakwaduwitjö̧ma, kwöbadekwaduwökakwedöja, ida̧ökö debi batjibinobetjö̧, ökwödönö mebibö ölakwabikwawinadöma ida̧ökö deobetjö̧.

¹³ Jobekwö ja̧kobe chömöledö, ötjö kwösödaduwökwe Isabenö Jo̧ Diosda kwöwaisaduwobekwöchobesamu kwömamuduwinö do̧ba̧lö chö̧jobetjö̧, ja̧danö ötjödasa ökwödönö yöbawo̧ma, —Ötjöda ökwödönö pjatatobetjö̧, yebabökönaduwi, —jö̧ba̧lö.

¹⁴ Ökwödö Israel jojodöma, yekabiduwoko. Ökwödö Jacob itji̧mu tupadanö jojodöma, sa̧dö juluwöködö kwichejekwaduwijayonö, yekabiduwoko. Jau chömöledö, —Ötjödasa ökwödönö pjabato̧ma, —jö̧ba̧lö ötjö Isabenö Jo̧ma yötawaduwakwö, ökwödönö kwö̧jibaduwinö pjabato̧ma, ötjö Israel jojodö tjösödökwe Suli̧ Jwibo̧ Diosda, jo̧kwajabetjö̧ yekabiduwoko.

¹⁵ Isabenö kwujuluwaduwachibanö pjatatakwo̧sa, baikwö wanedö yötawa: Trigo chabö loawaka juluwakadanö, 'wiawa jawa sȩi̧ o'ye ja̧kadanö bakibaduwanö chotidocha, kwöpöjojodöduwi jwiinö söbebö loköbaduwakobetjö̧. Mösa'ijutjö, jwiinö 'wibö loköbaduwakwedöja, jwiinö söbebö loköbaduwakwedöja, trigo sula'wodanö batjibenanö baibanö.

¹⁶ Jau, trigo chabö lotji̧danö ja̧köbaduwakwedöja kwöpöjojodöduwinö, ja̧danö jwa̧le'epjo sula'wo e'ewö loi̧danö, jelobekwö e'ewö loakwawö̧ kwöpöjojodöduwinö. Ja̧danö, jobekwö kwujuluwaduwobö pjatatiawö̧, kwo̧'woduwi ösöwachibanö ötjö Isabenö Jo̧nö kwösödaduwakwedöja, ötjö Israel jojodö tjösödökwe Suli̧ Jwibo̧ Diosnö ösödö yöka̧laduwakwedöja, —Dösödökwe Diosma isabenö juluwo̧, —jö̧ba̧lö.

¹⁷ Ja̧danö ökwödötjö usula jojodöbi, ju'wedö jwibadöbi o̧ti̧ tjöbö tjö̧jena, ja̧danö ojwiyo jwibö ja̧nö, tjinene kököachibenama, ötjö Isabenö Jo̧ma jobadönö pjabatö chichakwo̧sa, ötjö Israel jojodö tjösödökwe Diosma, la'akatjöda jobadönö le'dedö lotökakwo̧sa.

¹⁸ Jau, ojwiyo tjujuna̧lakobetjö̧, mösa'iju kököelö, ojwe isuwobö wetocha, ja̧danö wabekijutjö, ojwese'diju pjuebobö wetocha. Jojodö deemima o̧pesobu baibanö wetocha, ja̧danö kököemi niji ö'wejenö, ojwe isuwobö wetocha.

¹⁹ Ja̧danö towibiya jwielö, jojodö deobetjö cedro towibiyabi, mirtos towibiyabi, olivos towibiyabi otiwanö pokwobö chujunocha, ja̧danö kököemi nijitjö cipres towibiyabi, pinos towibiyabi, Abetos towibiyabi otiwanö pokwobö wetocha.

²⁰ Jobekwö chotidakwo̧sa, chotidaja̧ edö, jojodö tjöwaisakobetjö̧, ja̧danö tjedaja̧ omukwatö, tjöwaisachibakobetjö̧, ötjö Isabenö Jo̧ Diosda jobekwö chotidajobetjö̧, baledobe jö̧ba̧lö. Jau, chotidaja̧ edö, tjöwaisachibobö chösöda, —Bi̧ya dedi̧ma, ökwödö israel jojodö dösödökwe Suli̧ Jwibo̧ Diosda otidajabe, —jö̧ba̧lö, laebobe Dios Israel jojodönö yöa̧li̧ma.

O̧'wo jawa tjösödawö̧nö obö Dios yöa̧lina jawa

²¹ Baikwö yöa̧lobe Isabenö Jo̧, Jacob itji̧mu tupadanö jojodötjö inesö la'aka luwo̧ Diosma: Kwösödaduwawö̧ o̧'wo jawama isabenö waisadö tjö̧jitjö̧ma, tjöwaisi̧ jawa i̧sȩbö yökawaduwo.

²² Jau, kwösödaduwawö̧ o̧'wo jawanö kwichejebaduwo, tupakwö baledakwa̧ jawa yötjawakobetjö̧. Ja̧danö belö yötjawina, —Tupakwö baikwö baledakobe, —jö̧ba̧lö yötjawina jawabi labebö lobö yötjawo, yötjawaja̧ a̧ja̧kwö domukwatakobetjö̧, jweinö yötjawinojobö, jö̧ba̧lö. Ajayi jawabi, tupakwö baledakwa̧bi yötjawo, yadakwö baledakwa̧ jawa otiwanö döwaisakobetjö̧.

²³ Jau, jobadö o̧'wo jawama, baledakwa̧ yötjawo, yötjawaja̧ a̧ja̧kwö, —Isabenö bidöma diosbedö, —jö̧ba̧lö döwaisakobetjö̧. Ja̧danö tjujulu tji̧sȩbo, tjösöditjö̧ma pjabatöbi otiwanö pjatjatena, ja̧danö tjösöditjö̧ma suli̧ tjöwaedena, tji̧sȩbaja̧ edö, döbajale jalaka baibanö jobadönö yedabikobetjö̧.

²⁴ Isabenö diosbedö tjö̧jitjö̧ma, jobekwö tji̧sȩbobö jȩna, jo̧kwaijayonö jobekwö tji̧sȩboböma juluwöködö, ja̧danö tjotidi̧ma, ja'yubebi otidöködö. Ja'yubebi mikwawöködö o̧'wo jawama, ja̧danö jobadönö tjösödobö omudawö junadönö öpöjödo̧sa, —Sulabedö, —jö̧ba̧lö.

²⁵ Jo̧kwaijayonö jobadö o̧'wo jawama tupakwö baledakwa̧ wajwitjonö, tupakwö baledakwa̧ waiso̧sa. Ötjöma bakwo̧nö wetajabe, u'dakwötjö ichobö, iteda itebo jawo̧ laebobekwötjö baikwö ichobö. Ötjöda chujulunö jo̧banö omudawö chujunajabe, ja̧danö jobekwö omudawö chujuniökwe, tjitebotenia la'aka luwedönö söbebö loakobe. Jwiinö jobadönö söbebö loakobe, baikwö wanedö yötawa, lete'otjö otidakwo̧ lete'o ja̧tö otidi̧danö, ja̧danö bloke 'diatakwawa otidadö ja̧tö tjotidi̧danö, la'aka luwedönö ja̧tö loakwo̧ omudawö chujunajökwema.

²⁶ Ja̧ baledakwa̧ma, ökwödö kwösödaduwawö̧tjö ti yöawinada? Bakwo̧bi damötjö yöawinaji̧? Yöawinatjö̧ma, jo̧banö dösödobö jȩna, —Isabenö jweinö yöbawina, isabenö yöawinadanö baledajabe, —jö̧ba̧lö. Jo̧kwaijayonö kwösödaduwawö̧tjö bakwo̧bi yöawinokobe, jö̧tö?

²⁷ Ötjödasa ja̧ baledakwa̧ yöbawinama, ötjöda Sion mösa'onö ju̧kwadönö yötawijatö, —Babeda tjichiba, —jö̧ba̧lö. Ja̧danö ötjöda Jerusalennö ju̧kwadönö yöbawo̧nö webo̧sa, otiwa jawa wene yöawobö.

²⁸ Jobekwö yöbawo̧sa chömöledö, jo̧kwaijayonö ju'wedö kwösödaduwawö̧ o̧'wo jawa chedemi, jobadötjö bakwo̧bi deobe waisanö yöbawo̧ma, abebö cha̧ja̧kwena otiwanö atado̧ma.

²⁹ Jau, jobadöma bakobe okwa luwo̧ debadö. —Bidöma diosbedö, —jö̧ba̧lö yötja̧li̧ma, omöna yötja̧lobe. Jobadöma ja'yubebi otidöködö, wamenö 'dii jawatjö otikwadö tjö̧jijayonö, okwama deobe yelösöda, jö̧ba̧lö laebobe Dios yöa̧li̧ma.