Isaías 38 - Dios Iwene

Ezequias jwiinö 'dö̧achina wene

¹ Ja̧ möle jenanö, la'aka luwo̧ Ezequiasma jwiinö 'dö̧achinobe, ö'wö baibo jö̧a̧lenanö. Ja̧danö, Dios yöawi̧ yöbawo̧ Isaiasma ichibö yöawinobe, —Baikwö yöawobe Isabenö Jo̧ma ökwönö, –Juluwanö ö'wö bakibakwo̧ja, bi̧ya kwö'wöchi̧tjö kwö̧bibajökakwo̧ja, jo̧kwajabetjö̧ ö'wö bakibaja̧ ikena jawa webö yökawo kwömöledönö, —jö̧ba̧lö yöawinobe Isaiasma.

² Jobekwö yöawiökwe, o̧'wo tjo̧achö, tjöekwemi jo̧bekwö edö öjalachibinobe Ezequiasma, ja̧danö o̧'wo tjo̧achö aebinobe Isabenö Jo̧nö:

³ —Chuluwo̧ Isabenö Jo̧, budekwö atebakwö, ökwönö ösödö cho̧ji̧ wene kwomukwatibobö. Jau chuluwo̧, ba̧kwelöjatebö weköbi̧ a̧jakwö jo̧sa, jwaikwöda ökwönöda ösödö jo̧sa̧, ja̧danö ökwö kwösödi̧ jawa ja̧bö jo̧sa, lȩlöjinö edö pjakatotjö, —jö̧ba̧lö aebinobe. Ja̧danö, jwiinö o̧'wo tjo̧achö, labinö ubudekwinobe Ezequiasma.

⁴ Jobekwö aebiökwe, Isabenö Jo̧ma Isaiasnö weinobe,

⁵ —Tjebachajö Ezequiasnö yökawajo baikwö: –Ezequias, baikwö yöawobe kwa'dömine David ösödinökwe Isabenö Jo̧ Diosma: -Ötjönö akebaja̧ cha̧ja̧kwajabe, ja̧danö chöba a'otjö kwubudekwaja̧ chedajabe. Jo̧kwajabetjö baikwö chatadakwö, bemi tupakwö ina quince o̧biya 'yaka̧lobö wetocha.

⁶ Ja̧danö ju'wibi ökwönöbi, bemi comunidad Jerusalennö ju̧kwadönöbi kwö̧jibaduwinö pjatatakwa̧ yötawakwö, Asiria la'aka luwo̧ ujuluwapji jö̧ba̧lö, bemi comunidad tjöbeba̧lö pjatatocha.

⁷ Ja̧danö yötawaja̧danö isabenö baledakwa̧ wene i̧sȩbö, baikwö wetakwo̧sa: Mölȩ jawo̧ ökömakwö kweachobö wetakwo̧sa, ja̧danö kwabe'do Acaz otidinaka, jawo̧ dejatena isadanemi hora ba̧ja̧daka edö, domulataja i̧sȩkwi̧ jawa kweachobe öwawinö kwedakwo̧ja, —jö̧ba̧lö.

⁸ Jemi ikenama Dios yöawaja̧danö jawo̧ma ökömakwo kweachinobe, ja̧danö ba̧ja̧daka edö, domulataja i̧sȩkwi̧ jawa ökömakwö kweachobe edinobe Ezequiasma, veinte minutos jenanö ökömakwö kweachobe i̧sȩkwi̧ma.

Ezequias Diosnö ösödö i̧wȩyudina jawa

⁹ Nöinö 'dö̧bachajo̧, Dios pjaatökwe ö̧bibajinobe Juda niji inesö la'aka luwo̧ Ezequiasma. Ja̧danö, ö̧bibajenama, Diosnö ösödö i̧wȩyudinobe:

¹⁰ Omukwatö yöta̧lijatö, —Ina juluwo̧ pöe waekwö̧kö̧ chö̧jemi ja'ötjö, isabenö ö'wö batibobö jo̧be. Ina pöe batibapji, ö'wö babibadö tju̧ju̧kwemi apjude tetachobö weökwesa, ina lekwe möle chö̧jo jö̧ta̧li̧ma, chö̧jökönö 'döebena Diosma, —jö̧ba̧lö chomukwatijatö.

¹¹ Omukwatö yöta̧lijatö, —Ina 'yaba̧ladö tju̧ju̧kwemi chö̧jayi, la'akatjöda yemidanö chedökakwo̧sa Isabenö Jo̧nö, ja̧danö la'akatjöda bö̧jȩnö ja̧nö, bö̧jȩ jojodönö chedökakwo̧sa.

¹² Wanedö yöta̧la, obejadönö teada̧lo̧ eju sabana'wotjö otikweju 'yebö jelobekwö tje'ewi̧danö, chö̧ji̧ 'yebö loobedanö ichejekwa. Jau, sabana'wo otido̧, sabana'wo o̧'bo̧di̧danö, chö̧ji̧ mölebiya otiwanö 'bo̧dö jo̧sa. Jo̧kwaijayonö ina chö̧ji̧ sabana'wo 'dö̧bö katatibököjayonö, sabana'wo 'dö̧awakatjö 'wibebö loobedanö ichejekwa. Jau chuluwo̧ Dios, yö̧te baibakwa̧ abönö, juluwanö chö̧ji̧ 'dö̧ibajobö weköbajobedanö ichejekwijatö.

¹³ Ja̧ möle ötjönö iyö loköbinobedanö ichejekwa, yöte baledibanö 'didiba ötjönö suli̧ öwaedobö, ja̧danö okobe jwiinö chiwe'iju cha'öinobedanö ichejekwa. Jau, jobekwö möle baledibanö, yö̧te baibenanö kabatö jobekwö usula chemawijatö.

¹⁴ Jwiinö inia tjöbö, pji̧yu jwötji̧ ökwöi̧danö budekwö chö̧jijatö, yunuku jwöi̧danö, ötjöwe jö̧ba̧lö usula chemawijatö. Lekwe mölȩjȩbekwö eda̧lö, Dios pjaatakwa̧ teada̧lö ja̧nö, chöbajale me'dawachibanö chö̧jijatö, —Chuluwo̧ Isabenö Jo̧, usula emawo̧sa, pjabatitjö, —jö̧ba̧lö. Jobekwö atebökwe, chö̧jibinö pjaatinobe Isabenö Jo̧ma,

¹⁵ ja̧danö inesö cho̧'wo tjo̧bekwö chö̧ji̧ma, 'döbebö loinobe, cho̧'wo ösöwachibanö.

¹⁶ Jau chuluwo̧ Isabenö Jo̧, inesö usula chemawi̧ wene kwa̧ja̧kwijatö, ja̧danö a̧ja̧kwajo̧, yemidanö 'yatibajinö pjakatijatö. Jobekwö pjakati̧tjö̧, cho̧'wo ösöwachibajabe chuluwo̧, ja̧danö yemidanö otiwanö jo̧sa.

¹⁷ Isabenö jobekwö usula chemawinama, pjaatakwawa jawa baibanö balewö loköbijatö chuluwo̧. Ökwöda chö̧ji̧binö pjakatijatö chuluwo̧, ökwöda chusula lȩbebökönö, okobe jwiinö chusula söbebö loköbijatö chuluwo̧, jo̧kwajabetjö̧ ina 'yaba̧lö jo̧sa.

¹⁸ Jau chuluwo̧, ö'wö batibinatjö̧ma, ökwönö ösödö yöta̧lobö jwiena, ö'wö babibinadöma ökwönö ösödö yötja̧lobö jwitjobetjö̧. Ö'wö babibadö tju̧ju̧kwemibe 'yi̧nadöma, lȩlöjinö edö pjakatakwa̧ tjiteada̧lobö jwibadö chuluwo̧,

¹⁹ ina 'yata̧li̧danö 'yaba̧ladöda babe ökwönö ösödö yöta̧li̧danö ösödö yö̧tja̧lobö jo̧be, isabenö otiwanö chö̧jibinö pjakatajabe, chuluwo̧. Isabenö otiwanö pjabato̧ja chuluwo̧, ja̧danö jobekwö pjakati̧tjö̧, chitji̧munö 'yatebakwo̧sa, ja̧danö jobadö tjö̧ji̧ma öwaetjöda öwawinö tji̧sȩkwakwedö, —Diosma isabenö jö̧a̧li̧danö ja̧bo̧, —jö̧ba̧lö.

²⁰ Chö̧ji̧binö pjabato̧ja chuluwo̧ Isabenö Jo̧, ja̧danö jobekwö chö̧jibinö pjakatobetjö̧, ba̧kwelöjatebö kwejutjö ökwönö ösödö lo̧dakwedösa, arpa pjebö ökwönö lo̧bö dösödakwedösa, jö̧ba̧lö i̧wȩyudinobe Ezequiasma.

²¹ Ezequias ö̧bibajina wene baikwö laeobe, Isaiasma weinobe, —Higo waji̧ opobiyatjö 'döbebö dalö, wale'denö kwöwanaduwo, ja̧danö jemi ikenama ja̧tjö ö̧bibajakwo̧, —jö̧ba̧lö.

²² Ja̧danö ö̧bibajakwa̧ yöawiökwe, abebö a̧ja̧kwinobe Ezequiasma, —Taji baledakwa̧ edö chöwaisakwa̧da, isabenö chö'wöchi̧tjö bi̧bajo̧, isabenö yemidanö Isabenö Jo̧ ejube chi̧'yakwo̧sa, —jö̧ba̧lö, ja̧danö abebö a̧ja̧kwiökwe, möle ja̧wo̧ ökömakwö kweachobö weinobe Diosma.