Isaías 36 - Dios Iwene

Biya̧ capitulo laebakwa̧ abönö, baikwö ja'yubenö labebö lobö yötawa: Ja̧ mölȩ Juda la'aka luwo̧ Ezequiasma otiwanö Dios wei̧ a̧ja̧kwö jo̧ ö̧jinobe. Ja̧danö, jo̧ba ö̧jemi ja'ötjö, öpöjojo Asiria la'aka luwo̧ Senaquerib mikwo̧ma jo̧banö ujuluwotö jö̧ba̧lö ichinobe, Jerusalen comunidadbe. Ezequiasma otiwanö Diosnö o̧'wo wana̧lö ji̧na, Diosda isabenö otiwanö pjaatakwo̧ jö̧ba̧lö, ja̧danö jwaikwöda Dios wei̧danö ja̧otö jö̧ba̧lö isakwö ji̧na.

Asiria jojodö Juda nijibe ölakwabikwawö tjichina jawa

¹ Ezequias mikwo̧ Juda nijitjö inesö la'aka luwo̧ ö̧jinobe, ja̧danö ida̧ökö catorce o̧bia baledibanö webö ö̧jaja̧ ikenama, öpöjojo Asiria jojodötjö la'aka luwo̧ Senaquerib mikwo̧ma ömöayedö ölakwabikwawa jojodönö öbibö ichibinobe Juda nijibe. Ichibajo̧, Jerusalen comunidad meibakwa̧ abönö, okobe jwiinö ju'wi Juda niji comunidad 'diinö tjöbebö tjotidina comunidadbiya mebibö ujuluwinobe.

² Ikenama, ja̧ comunidadbiya juluwajo̧, Asiria la'aka luwo̧ma iteda ömöayo̧, yöawi̧ yöbawo̧nö weinobe, ba̧jȩkwadö ölakwabikwawadönö öbibö, Jerusalenbe 'yanö Ezequiaskwö yöa̧lakwawobö. Ja̧danö, Jerusalenbe ichibajo̧, kamisi dichawemibe 'ya̧kwawama mananö öjamatinobe, möakwö ojwese'dotjö i̧sa̧la sotjinemi bajale ö'öbö.

³ Ichibiawö̧, Ezequias ömöayedöma jo̧bakwö yötja̧lakwawobö tji̧'yinobe, Ezequias eju teada̧lakwawa luwo̧ Eliaquin mikwo̧bi, wȩyukwa luwo̧ Sebna mikwo̧bi, weawa wȩyu̧kwa luwo̧ Joa mikwo̧bi.

⁴ Tjichibiökwe, Asiria luwo̧ yöawi̧ yöbawo̧ma jobadönö yöawinobe: —Baikwö yökawaduwo kwuluwo̧duwi Juda la'aka luwo̧ Ezequiasnö: Inesö juluwo̧ Asiria niji la'aka luwo̧ma baikwö yöa̧lobe ökwönö: –Tajawedö kwomukwatobeda, -Asiria jojodötjö chö̧jibobö jo̧be, -jö̧ba̧lö? Ko̧'wo kwöwana̧li̧ma, di̧yada?

⁵ Ökwöma yöba̧lo̧ja, -Asiria jojodökwö chölakwabikwawobö juluwo̧sa, chölakwabikwawakwa̧ma waisanö omukwatö chujunajabe, -jö̧ba̧lö, jo̧kwaijayonö jobekwö yöka̧li̧ma omöna. Tinö kwo̧'wo wa̧na̧lö, -Asiria luwo̧ wei̧ katatibobö jo̧be, -jö̧ba̧lö kwomukwatinada?

⁶ Chedemi Egipto la'aka luwo̧nö kwo̧'wo wa̧na̧lö kwö̧jena, -Chöjibobö pjaatakwo̧, -jö̧ba̧lö. Jo̧kwaijayonö baikwö yöta̧lakwö: Jobadönö tjo̧'wo wana̧ladönö pjabatökönö, suli̧ waedadö Egipto jojodöma, tokwöte juluwanö 'deawötedanö. Jau, bakwo̧ ja̧jaye tokwöte öwanawitjö̧ma, 'deawena, ja̧danö 'debawö, ömamunö söibena, jö̧tö? Jobekwö ichejekwo̧ Egipto la'aka luwo̧ Faraonma, jo̧banö tjo̧'wo wana̧ladönöma.

⁷ —–Ju'wibi yöka̧lena, -Ökwödöma dösödökwe Isabenö Jo̧ Diosnö do̧'wo wana̧lö ja̧dösa, dö̧jibinö pjaatakwo̧, -jö̧ba̧lö. Jobekwö kwataditjö̧ma baikwö yöta̧lena: Tajawedö Dios ökwödönö pjaatobö? Ökwö Ezequiasda Juda niji ba̧kwemeachibanö Diosnö ösödö iyawemitenia sulabenö söbebö lobinaja, ja̧danö söbebö lobajo̧, Jerusalennö ju̧kwadönöbi, ju'wedö Juda niji ju̧kwadönöbi weköbajabe, sule bipjo Jerusalennö ja̧pjo Diosnö iyawapjotjöda Diosnö kwiyaduwobö jo̧be, -jö̧ba̧lö. Jobekwö sulabenö ja̧köbiökwe, Isabenö Jo̧ Diosma ökwödönö pjaatenaji̧? –jö̧ba̧lö yöa̧lobe chuluwo̧ Senaqueribma, kwuluwo̧duwi Ezequiasnö.

⁸ —Jau, kwuluwo̧duwi Ezequiasnö yökawaduwo: –Chujuluwobö jo̧be, –jö̧ba̧lö yöka̧lijayonö, juluwö̧kö̧ja. Jau, inesö la'aka chuluwo̧ ömöayo̧ ja̧nö, jo̧ba iminö baikwö yötawakwö: Kwömöayedötjö kabayudönö wa̧nö ölakwabikwawadö dos milbedönö kwöbadekwaitjö̧ma, kabayudö dos milbedönö chiyakwo̧sa, ökwödökwö kwölakwabikwawobö.

⁹ Jo̧kwaijayonö chedemi kwömöayedötjö dos milbedö kabayudönö wanö ölakwabikwawadö deobe Ezequias, jo̧kwajabetjö̧ ökwödökwö kwölakwabikwawobö juluwö̧kö̧ja. Jau, chuluwo̧ ömöayedö ölakwabikwawa luwedötjö, ju'wedötjö baikwönönö juluwö̧kö̧nöbi kwujuluwobö jwibo̧ja. Ja̧danö, –Egipto jojodöma kolukiyanö ölakwabikwawadönöbi, kabayudönö wanö ölakwabikwawa jojodönöbi wetjakwedö, –jö̧ba̧lö kwo̧'wo kwöwana̧lobö jwiobe, isabenö ökwödötjö kwö̧jibobö jwibo̧ja.

¹⁰ —Ju'wibi yötawakwö, –Isabenö Jo̧ma pjaatakwo̧, –jö̧ba̧lö kwo̧'wo kwöwana̧loböma jwiobe, baikwö yöta̧la: Kwedemi Isabenö Jo̧ Dios weokonö, baikwö ökwödökwö dölakwabikwawobö dichinenaji̧? Ja̧maökö, Isabenö Jo̧ Diosda ökwödönö weinobe, –Juda nijibe 'ya̧nö, kwujuluwaduwo, –jö̧ba̧lö, isabenö ökwödö dujulutjö kwö̧jibobö pjaatökakwo̧, —jö̧ba̧lö yöa̧linobe Asiria la'aka luwo̧ ömöayo̧ yöawi̧ yöbawo̧ma.

¹¹ Jobekwö Juda jojodö tjiwenenö yöa̧liawö̧, Eliaquinbi, Sebnabi, Joabi yötja̧linobe, —Ökwödö kwömöayedöma, kwiwene arameo waisadösa, jo̧kwajabetjö̧ kwiwenenöda yöka̧lodönö. Ju'wedö Juda jojodö comunidad tjöekwemi ja̧dö tja̧ja̧kwa̧lonö, Juda jojodö diwenenö yöka̧loko, yöda̧lakwawi̧ tja̧ja̧kwapji jö̧ba̧lö, —yötja̧linobe.

¹² Yötja̧liökwe, —Ja̧maökö, ökwödökwöda yöta̧lakwawoböma weinokobe chuluwo̧ Asiria luwo̧ma, okobe deinö bai ju̧kwadökwö yöta̧lakwawobö weinökwesa, baikwö yöta̧la: Kwuluwo̧duwi Ezequias chuluwo̧ wei̧ a̧ja̧kwökötjö̧ma, jobadö tjöekwemi wame wa̧döbi usula tjemawakwedö, jwiinö usula kwemawaduwobetjö̧, ökwödöbi jobadöbi a̧wi̧chi̧ tjöbö, ökwödöda kwide'oduwi kwadö bakibaduwakwedöja, ja̧danö jwiinö ojwiyo o̧ti̧ tjöbö, kwibi̧esobu kwowaduwakwedöja. Jo̧kwajabetjö̧ isabenö jobadöbi yöda̧lakwawi̧ tja̧ja̧kwobö jo̧be, Ezequias chuluwo̧ yöawi̧ otiwanö a̧ja̧kwökötjö̧ma, jobadöbi usula tjemawakobetjö̧, —jö̧ba̧lö atadinobe Asiria la'aka luwo̧ yöawi̧ yöbawo̧ma.

¹³ Ikenama, jobekwö atadajo̧, Asiria luwo̧ yöawi̧ yöbawo̧ma a̧la̧ibö, labinö jwöeba̧li̧nobe Juda jojodö tjiwenenö: —A̧ja̧kwaduwi inesö juluwo̧ Asiria la'aka luwo̧ ökwödönö yöawi̧ma.

¹⁴ Baikwö laebobe inesö la'aka luwo̧ yöawi̧ma: –Kwuluwo̧duwi Ezequias omöna yöa̧li̧, -Kwö̧jibaduwinö pjatatakwo̧sa, -jö̧ba̧lö omöna yöa̧li̧ma kwa̧ja̧kwaduwoko, ö'öbönö ökwödönö öibapji jö̧ba̧lö, –yöawobe.

¹⁵ Jau, Ezequiasma ökwödönö yöa̧lena, –Isabenö Jo̧ma isabenö dö̧jibinö pjaatakwo̧, ditebo comunidad Asiria la'aka luwo̧ ujuluwapji jö̧ba̧lö, dö̧jibinö pjaatakwo̧, –jö̧ba̧lö yöa̧lena. Jobekwö yöa̧litjö̧ma, yöa̧li̧ kwösödaduwoko, isabenö waekwakobetjö̧.

^16-17 Jau, jobekwö yöawitjö̧ma, Ezequias yöawi̧ kwa̧ja̧kwaduwoko, omöna jawa yöawobetjö̧. Asiria la'aka luwo̧ yöawi̧da a̧ja̧kwö kwösödaduwo, baikwö yöawi̧ma: –Weti̧ öpöjödö kwö̧jaduwi̧ kabatibö, comunidadtjö labebö ötjönö kwiyawaduwitjö̧ma, lȩlöjinö chedocha. Ötjö chömöayedö bakibaduwanö kwiyawaduwitjö̧ma, ju'winö jelobekwö niji otiwobekwö ökwödönö ötibakwo̧sa, kwiteboduwidanö otiwi̧ niji̧nö kwö̧jaduwobö, trigo jawabi, uba jawabi otiwanö pokwö wa̧jobe nijibema. Ja̧danö, yemidanö ökwödönö emö chichibakwa̧ kwiteada̧laduwonö, ajayi kwiteboduwinö otiwanö wene jwiinö kwö̧jaduwobö wetocha, ja̧danö bakwo̧nökwena kwöbatjo uba waji̧bi, higo towi waji̧bi kwukwaduwakwedöja, ja̧danö bakwo̧nökwena kwitea ojwese'dotjö kwowaduwakwedöja.

¹⁸ Ezequias ökwödönö yöa̧li̧, -Isabenö Jo̧ma dö̧jibinö pjaatakwo̧, -jö̧ba̧lö yöa̧li̧ma, ö'öbönö öbibö omöna yöba̧lo̧, yöa̧li̧ kwa̧ja̧kwaduwoko. Jau, kwomukwataduwo, ju'wedö tjitebokwena jojodö tjösödawö diosbedötjö, bakwo̧bi ösödadönö pjabatö, tjö̧jibinö pjaatinaji̧? Jobadötjö jeleso jojodö ötjö Asiria la'aka luwo̧ chujulutjö tjö̧jibinaji̧? Kwöwaisaduwa, ja̧maökö.

¹⁹ Jamat comunidad jojodö tjösödawö̧bi, Arfad comunidad jojodö tjösödawö̧bi, Sefarvayin comunidad jojodö tjösödawö̧bi, dai tjö̧jobeda? Jobadöma israel niji comunidad Samaria jojodönö tjö̧jibinö pjatjatinaji̧?

²⁰ Ja̧danö okobe deinö ju'wedö tjitebotenia jojodö tjösödawö̧tjö, dite ömöledönö tjö̧jibinö pjaatinada, jobadönö chujuluwapji jö̧ba̧löma? Deobe, jö̧tö? Jo̧kwajabetjö̧ ju'wibi öwawinö öwawobe, Isabenö Jo̧ma la'akatjöda pjaatökakwo̧, Jerusalen comunidadbi chujuluwapji jö̧ba̧lö, –chuluwo̧ Asiria luwo̧ yöawi̧ yötawaduwakwö, —jö̧ba̧lö yöawinobe yöbawo̧ma.

²¹ Ja̧danö jobekwö yöa̧li̧awö̧, atadökönö tjö̧jinobe, Jerusalen jojodöma. Ajayinö la'aka luwo̧ Ezequiasma jweinö weinobe, —Yöbawo̧ yöawi̧ a̧ja̧kwajadö, kwatadaduwoko, —jö̧ba̧lö, ja̧danö wei̧ a̧ja̧kwö atadökönö wi̧inö tjö̧jinobe.

²² Jemi ikenama, Eliaquinbi, Sebnabi, Joabi, yöbawo̧kwö yöba̧lakwawajadö, tjuluwo̧ Ezequias ö̧jobekwö tjȩwa̧jinobe, yötja̧lakwawaja̧ yötjawobö. Jwiinö o̧'wo tjo̧achö, tjökamisi kȩekwö lotjinobe, ja̧danö kȩekwö lobajadö, Ezequias öba a'o ichibö yötjawinobe, yöbawo̧ yöa̧laja̧ jawama.