Isaías 34 - Dios Iwene

Dios tjitebokwena jojodönö lȩebakwa̧ Isaias yöawina jawa

¹ Ökwödö tjitebokwena jojodöma, yöne ichibö kwa̧ja̧kwaduwo, tjitebotenia jojodö otiwanö kwa̧ja̧kwaduwo. Bö̧jebi, okobe jwiinö bö̧jȩnö ji̧bi a̧ja̧kwobö jo̧be, okobe deinö bö̧jȩnö ju̧kwadö yötawi̧ tja̧jakwobö jo̧be.

² Isabenö Jo̧ma ödameakwobe tjitebotenia jojodönö, jwiinö dameakwo̧ tjitebokwena ölakwabikwawa jojodönö, ja̧danö dameakwö jobadönö söbebö loakobe, ö'wö batjibanö lȩbebö loakwo̧.

³ Dameakwö lȩebajawö̧, tjiteba'ijuma, tjo̧tjö̧köwö̧ nijinöda ba̧kobe, woinö sulabenö 'dö̧ekwakobe tjiteba'ijuma, ja̧danö tjökwösobuma ebawö, mösa'ijutjö isuwakobe.

⁴ Okobe deinö si̧li̧'idöma, tibibö tjöwawökakwedö, ja̧danö ösöja do̧la̧chibi̧danö, mölȩjȩma do̧lachibakobe. Okobe deinö si̧li̧'idöma, tibibö tjodutjakwedö, towi öjiya kököbachibö tjoduwi̧danö, ja̧danö higo waji̧ kököbachibö tjoduwi̧danö, mölȩjȩbetjö tjodutjakwedö si̧li̧'idöma.

⁵ Jau, baikwö wanedö yöa̧lobe Diosma: —Chitea kwölöte'oma, mölejenö lö̧jadönö söbebö lobö, nöinö tjökwösobu ida̧ökö owa̧lajabe ichejekwa, 'dukwacha'o baibanö. Ja̧danö babema chitea kwölöte'oma, mölejȩbetjö nijakwö jwiachakobe, Edom jojodönöbi lȩtebakobetjö̧. Jobadönö lȩbebö yötawajabe, bakobe jobadönö söbebö lotobö jo̧be, jö̧ba̧lö, ja̧danö babe jobadönö lȩtebakwo̧sa, —jö̧ba̧lö yöa̧lobe.

⁶ Jau chömöledö, wanedö yöta̧la: Isabenö Jo̧ma kwölöte'o juna̧lo̧, ja̧danö tjökwösobuma kwölöte'otjö to̧obe, ja̧danö kwabö loajawö̧ tjo̧tema jöte kwölöte'onö lö̧jibobe. Jau, obejadö tjökwösobubi, chivodö tjökwösobubi to̧obe kwölöte'oma, ja̧danö obejadö ömadö tjibiepja̧ ö'öbö tjo̧tema, kwölöte'onö lö̧jibobe. Jobekwö jo̧be chömöledö, Isabenö Jo̧ma jo̧banö iyawa Bosra comunidadtjö ujunajobetjö̧, ja̧danö Edom niji ba̧kwemeachibanö inesö dȩdȩbö loawa baibobetjö̧.

⁷ Ja̧danö obejadönöbi, chivodönöbi kwabö loidanö, tebonö ju̧kwadö pakayadönöbi, pakayadö tji̧tji̧munöbi, ödöbaedö pakayadö ömadönöbi kwabö loakwo̧. Jwiinö kwabö loobetjö̧, nijima tjökwösobutjö 'dukwibakobe, ja̧danö tjo̧tema nijinö ba̧kobe.

⁸ Jau chömöledö, Edom niji jojodöma isabenö sulabenö ja̧tjinobe Sion mösa'o ju̧kwadönö, ja̧danö jobekwö sulabenö ja̧tji̧ökwe, balekwa mikwa jobadönö lȩebakwo̧ Isabenö Jo̧ma, ja̧danö yöta̧laja̧ jawa baledakwa̧ mölȩ ida̧ökö badedö ujunajabe.

⁹ Ja̧ möle Edom niji ojwebiyama, yȩa'beda baibakobe, ja̧danö nijima, azufre baibakobe, ja̧danö niji ba̧kwemeachibanö, yȩa'beda babibö ubakobe, Edom niji bakobe suli̧ waekwinö.

¹⁰ Yö̧tebi baledibanö, mölebi baledibanö ubakobe, imiupjo kabatökönö möakwö kaaminö. Ba̧kwelöjatebö suli̧ waekobeda ja̧kobe ja̧ nijima, ja̧danö la'akatjöda jobe tjö̧jökakwedö jojodöma, jobe baledöbi tjöbaledökakwedö.

¹¹ Ja̧ nijinö tjö̧jakwedöma, tebonö ju̧kwadöda jobe tjö̧jakwedö, tumulu'ubi, ju'wedö pji̧yubi, ju'wedö tebonö ju̧kwadöbi. Jau, Isabenö Jo̧ma ja̧ niji otiwanö ö̧ba̧jadakobe ichejekwa, jakwölakwöbi, möakwöbi otiwanö ö̧ba̧ja̧dakwo̧, bakobe suli̧ öwaedakobetjö̧.

¹² Jwiinö söbebö loakwo̧. Edom niji inesö la'aka luwedöma, tjömöayedö debadö tjö̧jakwedö, ja̧danö okobe deinö Edom jojodötjö la'aka luwedöma, debi̧ batjibakwedö.

¹³ La'aka luwedö tjö̧jinejubiyabi, 'diinö tjöbebö tjotidina comunidadbi, sȩakabi, ju'wi sȩi̧ jawabi pokwemi ja̧kobe, ja̧danö jobe tjö̧jakwedö, tebo awili̧döbi chacales ötjabawö̧bi, nöbo̧ patudöbi.

¹⁴ Jojodö deobe ju̧kwadö tebonö ju̧kwadöbi, tebo awi̧li̧döbi jobe ko̧ko̧kwö tjö̧jakwedö, ja̧danö jobe tebo chivodö tjömöledönö jwötjeba̧lakobe. Ja̧danö jojodö yetjabiwö̧ yö̧te kö̧ba̧ladöbi jobe kwebachö, tjabakwemi tjujuna̧lakwedö.

¹⁵ Tumulu'udöbi jobetjö tja̧'do̧ otidö, tjiiyabia tjödakwedö, ja̧danö tji̧tji̧mu tjiyabiatjö 'dabö latjebenama, jobetjö tji̧tji̧munö tjöbeba̧lö tjiteada̧lakwedö. Bo̧lö̧bi jobe ko̧ko̧kwö tjö̧jakwedö, bakwujukwena jilekwekwena jobe ko̧ko̧kwö tjö̧jakwedö.

¹⁶ Jau chömöledö, otiwanö Isabenö Jo̧ yöawi̧ wȩyukwa'ye laebi̧ yöka̧laduwo, ja̧ yöta̧laja̧danö baledakwa̧ kwöwaisachibaduwakobetjö̧. Okobe deinö jobadö tebonö ju̧kwadöma jobe Edom niji comunidadbiyanö tjö̧jakwedö, ja̧danö jobe ju̧kwadö tebonö ju̧kwadötjö, bakwo̧bi ilekwo deinö ö̧jökakwo̧, jobe Edom jojodö tjö̧jinemi otiwanö tjö̧jobö Dios iyobetjö̧. Jau, jobekwö baledobö weajabe Isabenö Jo̧ma, ja̧danö iteda O̧'wo Luwo̧ öibawö̧, okobe deinö jobadöma jobe ko̧ko̧kwö tjö̧jakwedö.

¹⁷ Diosda bakwo̧nökwena tjö̧jakwemikwena omudawö juno̧ma, ja̧danö omudawö ujunaja̧danö, pjiyuwakwenabi, tebo luwo̧kwenabi jobe tjö̧jakwedö. Ja̧danö, jobekwö iyiawö̧, ba̧kwelöjatebö jobe tjö̧jakwedö, jobadöbi, tjitji̧mu tupadanöbedöbi.