Isaías 33 - Dios Iwene

Dios Asiria jojodönö lȩebakwa̧ Isaias yöawina jawa

¹ Isabenö Dios lȩebakwawö̧ döpöjojodönö, ökwödö Juda jojodönö söbebö lotjobö jö̧ba̧ladönö, jobadönö baikwö yöta̧la: —¡Ökwödö suli̧ waedadöwe, isabenö usula kwemawaduwakwedöja! Ökwödöma ju'wedö tjitebokwena jojodönö suli̧ waedadöja, ju'wedö ina söbebö lotjököwö̧ja. Ja̧danö ökwödöma ju'wedönö omöna yöba̧lö suli̧ waedadöja, ina ju'wedö ömöna yöba̧lö, suli̧ tjöwaedö̧kö̧wö̧ja. Jo̧kwaijayonö, ökwödönö baledakwa̧ wene, baikwö yötawaduwakwö, ju'wedönö söbebö lököbaduwakwa̧ 'dö̧ibajenama, ju'wedö söbebö lotjakwawö̧ bakibaduwakwedöja, ja̧danö ju'wedönö omöna yöba̧lö, suli̧ kwöwaedaduwakwa̧ 'dö̧ibajenama, ju'wedö omöna yöba̧lö suli̧ tjöwaedakwawö̧ bakibaduwakwedöja, ökwödöwe, —jö̧ba̧lö yöta̧la döpöjojodönö.

² Chuluwo̧ Isabenö Jo̧, ökwödönö lȩlöjinö edö pjakatobö atebakwö, lekwe möle pjakatakwa̧ diteada̧lajabe chuluwo̧, —Duluwo̧ Dios isabenö pjaatakwo̧, —jö̧ba̧lö. Mölekwena ökwöda kwujulunö, tjöbeba̧lö pjakatobö atebakwö, wene döbaledenama, dö̧jibinö pjakatobö atebakwö.

³ Chuluwo̧ Dios, ökwö kwiwene ökwöenama, döpöjojodöma a̧ja̧kwö döbibajadö, a̧la̧ibö kwujulu kwi̧sȩbenama, kwöba a'otjö tjitebo tenia jojodönö tjipjelekwachinö a'dewö lobo̧ja.

⁴ Döpöjojodönö kwujuluwenama, ökwödö kwömöledöma tjitea otiwanö 'döbebö emadösa, achuwabi, ma̧la̧kayubi okobe jwiinö pokwi̧ jawa tjukwi̧danö, kwujuluwajawö̧ tjiteaja̧ 'döbebö emadösa.

⁵ Isabenö ju'wedötjö bajalekwönönö jo̧, duluwo̧ Isabenö Jo̧ma. Jau, Mölȩjȩbe Jo̧ duluwo̧ma, ja̧danö Sion mösa'otjö webö ja̧nö, otiwanö ja̧bö tjö̧jobö webo̧, iteda wei̧ a̧jakwö tjö̧jobö webo̧.

⁶ Jo̧bada 'diinö kwö̧jaduwobö pjaatakwo̧ma chömöledö, jo̧bada kwö̧jibaduwinö pjaatakwo̧. Jobada waisakwawa jawa ba̧ja̧dö, waisanö kwomukwataduwobö pjaatakwo̧. Isabenö nöinö mikwawobe jo̧banö yebabinö kwösödaduwi̧ma, ju'wi mikwawi̧ jawatjö bajalekwönönö mikwawi̧, ökwödö Sion mösa'o ju̧kwadö Isabenö Jo̧nö yebabinö ösödö kwö̧jaduwi̧ma.

Juda jojodö usula tjemawi̧ jawa Isaias i̧wȩyudina jawa

⁷ Babe möle, isabenö usula emawadösa! Ditebo comunidad manatjö, ökwödötjö juluwadöma tjo̧'wo tjo̧bekwö jwöbeba̧ladö. Ja̧danö ölakwabikwawökönö dö̧jobö pjabatö yöbawadöma, o̧'wo tjo̧achö budekwadö, —Wene jwiinö dö̧jobö disakwi̧ma waekwobe, ökwödöwe, —jö̧ba̧lö.

⁸ Jalama manama, jojodö deama jo̧be, yebabinö kwebachöködö dömöledö Juda jojodöma. Döpöjojodökwö wene jwiinö dö̧jakwa̧ wene yöbawö dujuninajayonö, yöbawö tjujunina wene kabatibadö. Jau, ju'wedö tjöba a'otjö öwawinö yöbawö tjujuninajayonö, —Yöbawö dujuninama mikwawökö ji̧, —jö̧ba̧lö kabatibadö, ja̧danö —Ja̧kwawama mikwawökö ji̧, —jö̧ba̧lö, jojodönö kwabö lobadö sulabenö.

⁹ Ditebo nijima kököbachibö, suli̧ waekwobe, Libano niji towibiyabi, kököbachibö suli̧ waekwobe. Jwaibalawa ö'öbö niji̧ Saron ötjabemi nijima, kököobe jojodö deobe baibobe, ja̧danö Basan nijibi, Carmelo nijibi jwiinö kököachibobe.

Dios pjaatakwa̧ Isaias yöawina jawa

¹⁰ Baikwö yöawobe Isabenö Jo̧ma: —Babe cha̧la̧ibakwo̧sa, babe a̧la̧ibö chi̧sȩbocha, –Isabenö jwiinö juluwo̧sa, –jö̧ba̧lö.

¹¹ Ökwödö chömöledö tjöpöjojodöma, chöba a'otjö juluwöködöja, baikwö wanedö yötawa: Omukwatö kwujunaduwi̧ma meje'ye kököa'yedanö ichejekwa, trigo jawa sula'wodanö ichejekwa, ja̧danö ökwödö kwo'woduwi kwemaduwapjoma, ökwöla ubi̧danö ökwödönö juwö loakobe.

¹² Ökwödö tjitebokwena jojodöma, juwö lotakwawö̧ja, ökwölaso̧pja̧da bakibaduwanö, ösötje sȩötje 'wibö, juwö lotjidanö bakibaduwakwedöja.

¹³ —Ökwödö jelobe ödö ju̧kwadöbi, yöne ju̧kwadöbi, chujulu chi̧sȩbi̧ edö kwöwaisachibaduwo, –Isabenö Jo̧ Diosma isabenö jwiinö juluwo̧, –jö̧balö.

¹⁴ Jerusalennö ju̧kwadö sulabenö ja̧bö ju̧kwadöma, chujulu chi̧sȩbiawö̧ jwiinö yebabidö, –Ayö, Dioskwö dakwö dö̧joböjö? Jo̧bama ökwöla jwiinö ubola kwebato̧, tiibokola kwebato̧, ökwödötjö ditejö, jo̧bakwö ö̧jobö mikwawo̧ma? –jö̧ba̧lö.

¹⁵ —Baikwö yötawa, ötjökwö wene jwiinö ju̧kwadöma bidö: Weti̧ a̧ja̧kwö ja̧nö, yötja̧lo jö̧tja̧li̧danö yöba̧ladöda. Ja̧danö jojodönö usula tjemawinö webö, balada tjemotö jö̧ba̧lö isakwöködöda. Ja̧danö tjimidi̧ balada, –Sulabenö ja̧köbitjö̧ma dimidakwö, –jö̧ba̧lö tjimidobö jö̧tja̧li̧ balada emökönö, ja̧tjo̧ jö̧tja̧lidanö ja̧bö ju̧kwadöda. Ja̧danö ju'wedönö kwabö lotjoböma omukwatö junöködöda. Ja̧danö ju'wedönö suli̧ tjöwaedobö isakwö jö̧ködöda.

¹⁶ Jobadöjayedöma, otiwanö wene jwiinö tjö̧jakwedö. Wene baledenama, jobadöma mösa'otjö, inawa ötöla 'diinö tjöekwemi tjö̧jobö tjöbadekwakwedö, ja̧danö otiwanö kwakwawabi, owawabi tjujuna̧lakwedö, —jö̧ba̧lö yöawobe Isabenö Jo̧ma.

¹⁷ Chömöledö, ju'winö kwuluwo̧duwi inesö otiwo̧nö kwedaduwakwedöja, ja̧danö kwiteboduwi inesö jalemi niji kwedaduwakwedöja.

¹⁸ Ja̧danö ja̧ möle kwomukwatibaduwakwedöja, ajayinö inesö yekabinaduwi̧ma, ja̧danö yöka̧ladukwedöja, baikwö: —Ökwödönö usula demawinö webinadö, döpöjojo ömöayo̧ wȩyukwa luwo̧bi, uluwo̧nö midawa balada baibanö ditea 'döbebö eminabi, ditebo tjöbebö dotidina dokwa juluwojobö jö̧ba̧lö kwebachö edinabi, dai tju̧ju̧kwobeda?

¹⁹ Ja̧ möle kwiteboduwitjö deakobe, ajayinö jelobetjö ichinadö usula kwemawaduwinö webinadö juluwadöma. Jobadö, wajwiköbaduwi̧ tjiwene, jwiinö wainö ökwöinö tjiwene yöba̧ladöma deakobe.

²⁰ Ja̧danö ja̧ möle Sion mösa'o kwedaduwakwedöja, Dios öba a'o ba'ali dukwemi mösa'oma. Ja̧danö Jerusalen comunidad kwedaduwakwedöja, wene jwiinö wi̧inö tjö̧jemi comunidadma. Otiwanö 'diinö ja̧kobe Jerusalen comunidadma, sabana'wotjö otikweju, 'diinö pjolachibökönö di̧batö tjotidinejudanö. Ja̧ kwedaduwakwa̧ma, baikwö wanedö yötawa, jeju di̧batö bö'ödö ö̧sö̧'ama, pjolachibönö 'diinö ja̧kwö̧'a ja̧kobe, ja̧danö a̧la̧chi'obijuma, bakwa'bobi 'döawökakobe, isabenö 'diinö ja̧kweju.

²¹ Jau, jobe pjolachibökemi comunidadtjö inesö la'aka duluwo̧ ja̧nö, iteda ujulunö webö ö̧jakwo̧ Isabenö Jo̧ma. Isabenö otiwanö teada̧lö pjaatakwo̧ Diosma, batjo otiwanö pokwemi, ojwebiya otiwanö isuwemi, jalödö otiwanö isuwemi dö̧jobö weakwo̧. Jo̧kwaijayonö ojwe jalödö ö'öbönö kwö̧jaduwijayonö, yekabiduwoböma jwiakobe, ölakwabikwawadö tjisowi isowisötenö 'yobachö kwetjachowi isowibi, ölakwabikwawa jawa isowi nöowibi la'akatjöda jobe ichibökakobetjö̧.

²² Jau chömöledö, Isabenö Jo̧ Diosda duluwo̧ ö̧jakwo̧, Isabenö Jo̧ Diosda ökwödönö webö ö̧jakwo̧, Isabenö Jo̧ Diosda inesö la'aka duluwo̧ ö̧jakwo̧, ja̧danö jo̧bada dö̧jibinö pjaatakwo̧, döpöjojodö tjichibapji jö̧ba̧lö.

²³ Isabenö döpöjojodö isowinö ichadöma tjujulu jwitjakwedö. A̧la̧chi'bobiya, otiwanö kwetjachobö sabana'wo do̧a̧la'boma, 'wa̧akobe, ja̧danö okwi'o sabana'wo do̧a̧la'oma, 'deawakobe, ja̧danö sabana'wo sedatö kwetjachobö jwitjakwedö. Ja̧danö nöinö tjitea, ju'wedötjö 'döbebö tjemina jawama, ökwödö Dios ömöledö kwiteaduwi baibakobe. Jwiinö nöinö kwemaduwakwedöja, ökwödötjö kwebachöködöbi nöinö döbebö tjemakwedö batjibanö.

²⁴ Ja̧danö okobe deinö ditebonö ju̧kwadöma, bakwo̧bi —'Döbacho̧sa̧, —jö̧ba̧lö yöa̧lökakwo̧, Diosma isabenö ökwödönö pjaatobetjö̧. Ja̧danö Diosma okobe deinö jobe ju̧kwadönö lȩlöjinö edö, sulabenö ja̧tjina lȩbebökönö, tjusula söbebö loakobe.