Isaías 32 - Dios Iwene

Inesö la'aka luwo̧ otiwanö ö̧jakwa̧ jawa, Isaias yöawina jawa

¹ Baikwö yötawaduwakwö chömöledö: Yadakwö inesö la'aka luwo̧ jwaikwöda Dios wei̧ a̧ja̧kwö jo̧ma webö ö̧jakwo̧, ja̧danö ömöayedö la'aka luwedöma, otiwanö lȩekwa yötjawo jö̧tja̧li̧danö, otiwanö yötjawakwedö.

² Jobekwö lȩekwa jweinö yöbawö, tjömöayedönö otiwanö tjöbeba̧lö pjatjatakwedö, baikwö wanedö yötawa pjatjatakwa̧ma: Jwa̧le'epjo labinö doibenama, tjöekwemidanö tjö̧jakwedö, ja̧danö ju'wibi kököelö tjö̧jenama, ojwedanö tjö̧jakwedö, jadanö tubemi kököemi tjö̧jenama, nöawa isadanemi tjö'wachobö otiwawadanö tjö̧jakwedö, otiwanö jojodönö tjöbeba̧lö lȩekwa yötjawobetjö̧.

³ Babema israel jojodötjö tjöbajale tjewawö̧kö̧wö̧ma, tjöbajale tjewawadödanö ichejekwadö, ja̧danö tjölakiyu a̧ja̧kwadöma, a̧ja̧kwöködödanö ichejekwadö, Dios yöawi̧ otiwanö tjomukwatokobetjö̧. Jo̧kwaijayonö ja̧ mölema isabenö wainö ja̧kobe. Ja̧ möle edadöma isabenö otiwanö edö, Dios yöawi̧ tjösödakwedö, jadanö a̧ja̧kwadöma, otiwanö a̧ja̧kwö Dios yöawi̧ tjösödakwedö.

⁴ Ja̧danö ja̧tja̧kwa̧ abönö otiwanö omukwatinöködöma, okwa jawa otiwanö omukwatö, isabenö wene tjösödakwedö, jadanö tjiwene tjöpöawö̧ma, otiwanö ökwöinö yötja̧lakwedö.

⁵ Ja̧danö ja̧ möle jweinö tjomukwatakwedö jojodönö, wajwibö jweinö omukwatöködönö, la'akatjöda, —Waisadö, da̧ja̧kwobö jo̧be, —jö̧ba̧lö tjomukwatökakwedö, ja̧danö suli̧ waedadönö, la'akatjöda, —Bidöma otiwanö domukwato jö̧da̧lawö̧, —jö̧ba̧lö tjomukwatökakwedö.

⁶ Isabenö wajwibö, jweinö omukwatöködönö otiwanö kwomukwataduwobö jwiobe chömöledö, jobadöjayedöma sulabenö yötja̧lobetjö̧, jadanö sulabenö jatjobö omukwatö isakwadö. Jobadöma Dios öpöjödi̧ jawa sulabenö jabadö, ja̧danö Isabenö Jo̧nö yötja̧lenama, jweinö yöba̧lökönö ö'öbönö sulabenö yöba̧ladö Isabenö Jo̧nö. Ja̧danö ju'wibi a̧wi̧chi̧ tjöbadönöma, kwakwawa iyöködö tjukwobö, ja̧danö o̧ti̧tjö tjöbadönö ojwiyo iyökönö, sulabenö a̧'dȩladö.

⁷ Suli̧ waedadöbi ja̧danö, jobadönöbi otiwanö tjomukwatobö jwiobe. Jobadöma sulabenö omöna yöba̧lö jojodönö suli̧ waedadö, ja̧danö sulabenö ja̧tjo̧bö omukwatö junadö. Usula emawadönö suli̧ tjöwaedotö jö̧ba̧lö, sulabenö omöna yöba̧ladö. Jwibo̧ma lȩekwa luwo̧ öba a'o ja̧nö, jweinö yöawenabi, yayonö jo̧banö suli̧ tjöwaedotö jö̧ba̧lö omöna yöba̧ladö, suli̧ waedadöma.

⁸ Jobekwö jabö jö̧kö̧dö, otiwanö tjomukwato jö̧tja̧lawö̧ma. Jobadöma otiwanö ja̧tjotö jö̧ba̧lö omukwatö junadö, jadanö otiwanö ja̧tjakwa̧ jawa omukwatö junajadö, 'diinö ja̧nö otiwanö ja̧bö ju̧kwadö.

Jerusalennö ju̧kwadötjö ya̧dönö Isaias yöawina jawa

⁹ Ja̧danö ökwödö ya̧dö, wene jwiinö ja̧dösa, jö̧ba̧ladönö, ökwödönö yötawi̧ kwa̧ja̧kwaduwo. Baikwö yötawaduwakwö ökwödö otiwanö ja̧dösa jö̧ba̧ladö ya̧dönö:

¹⁰ O̧ba bakwabada baledaja̧ ikena, juluwanö yebabinö tjö̧bawö kwö̧jaduwakwedöja. Jau, ja̧ möle uba waji̧ kwemaduwo jö̧ka̧laduwi̧ma, waekwakobe, ja̧danö ju'wi kwakwawa towi waji̧ kwemaduwo jö̧ka̧laduwi̧ma badekwachökakobe.

¹¹ Ja̧ baledakwa̧ omukwatö, tjö̧bawö kwö̧jaduwo ökwödö ya̧dö, —Wene jwia, otiwanö dö̧jakwedösa, —jö̧ba̧lö omukwatadöma, isabenö usula kwemaduwakobetjö̧. Jau, kwo̧'woduwi tjo̧bekwö kwö̧jaduwi̧ i̧sȩbö, kwökamisiduwi 'yobekwö loköbaduwo, ja̧danö 'yobekwö lobajadö, budekwadö 'dutjawa̧do̧ epju̧yunö kalukaa̧do̧ 'dukawaduwo.

¹² Kwomukoduwi 'do'dobakwawö kwö̧jaduwo, —Jwiinö o̧'wo tjo̧achadösa, —jö̧ba̧lö, ajayinö otiwanö wa̧jina'ba ubasa'ba ida̧ökö wa̧jökakobetjö̧,

¹³ ja̧danö chömöledö israel jojodö tjöbatjiju ji̧nayuma, bakwai̧ sȩakada, ja̧danö ju'wi sȩi̧ pokwi̧da pokwayu ji̧bakobetjö̧. Ja̧danö ju'wibi, ajayinö Jerusalen comunidad ju̧kwadö tjejubiya, babe tjo'wo ösöwachibanö tjö̧jemi comunidad o̧dijuma, jojodö dei̧ ejuda ji̧bakobetjö̧, kwo̧'woduwi tjo̧bekwö kwö̧jaduwo.

¹⁴ Jau, inesö la'aka luwo̧ eju otiwejuma, deeju ji̧bakobe, ja̧danö ba̧jȩkwadö tjuju̧kwemi comunidadma, jojodö dei̧ comunidad ji̧bakobe. Ja̧danö 'diinö tjöbebö tjotidina'o mösa'obi, mösaka mö wa̧nö eda̧lakwawakabi, lekwe möle tebonö ju̧kwadö tjö̧jemida jakobe, ja̧danö tjajikwököwö̧ bu̧lu̧döbi, obejadöbi jobe pjeanö tjukwobö tjösödakwedö.

¹⁵ Jobekwö lekwe möle ja̧kobe chömöledö, mölejȩbetjö Diosma iteda O̧'wo Luwo̧nö ökwödökwö ö̧jobö weenanö baibanö. Ja̧danö, ja̧ möle otiwanö pjaatobetjö̧, jojodö deobe kököemi nijima, batjo otiwanö pokwayu baibakobe, ja̧danö batjo otiwanö pokwayuma, ajayitjö̧ bajalekwönönö otiwanö pokwakobe, tebodanö ichejekwenanö baibanö.

¹⁶ Ja̧ möle jojodö deobetjö, ja̧bö tjö̧jo jö̧tja̧li̧danö otiwanö jabö tjö̧jakwedö jojodöma, ja̧danö batjo otiwanö pokwemi niji ju̧kwadöma, otiwanö Dios wei̧ a̧ja̧kwö tjö̧jakwedö.

¹⁷ Ja̧danö otiwanö Dios wei̧ a̧ja̧kwö tjö̧jiökwe, wene jwiinö ölakwabikwawökönö tjö̧jobö pjaatakobe. Okobe jwiinö ditebo ba̧kwemwachibanö, lekwe möle wene jwiinö tjö̧jakwedö, ja möle ju̧kwadö Dios wei̧ a̧ja̧kwö tjö̧jobetjö̧.

¹⁸ Jau, ja̧ möle chömöledö Juda jojodöma otiwanö ölakwabikwawa jwiinö otiwanö tjö̧jakwedö, wene jwiinö tjeju 'diejunö tjö̧jakwedö, otiwanö wi̧inö ö'wachö tjö̧jakwedö.

¹⁹ Ja̧danö tiyuwaso pjei̧ öwiya tjoduwinö tebo kwabibö meitjö̧bi, comunidad bakwainö nijakwö meitjö̧bi, yayonö otiwanö tjö̧jakwedö chömöledö Juda jojodöma, Dios otiwanö paatobetjö̧.

²⁰ Isabenö otiwanö Dios pjaatawö̧ kwö̧jaduwakwedöja chömöledö Juda jojodö. Ojwebiya otiwanö niji 'yoliwemi nijinö, kwöbatjoduwi otiwanö kwotidaduwakwedöja, ja̧danö kwajwimuduwi pakayadönöbi, buludönöbi wene jwiinö tjösödobekwö kwebachö, tju̧kwa otiwanö tjukwakwedö.