Isaías 31 - Dios Iwene

Egipto nijibe tji̧'yakwedö usula tjemakwa̧ Isaias yöawina jawa

¹ Ayö, isabenö usula tjemawakwedö, Egipto niji jojodö pjatjatakwa̧ tjo̧'wo wana̧ladöma. Jobadöma Egipto nijibe 'ya̧dö, —Isabenö otiwanö pjatjatakwedö Egipto jojodöma, —jö̧ba̧lö. Ja̧danö ju'wibi kabayudönö tjo̧'wo wana̧lö tjö̧jobe, —Egipto jojodöma nöinö ölakwabikwawa jawa kolukiya tjujuna̧lobetjö̧, ja̧danö jobadötjö kabayudönö wa̧nö ölakwabikwawadöma juluwadötjobetjö̧, dö̧jibinö pjatjatakwedö, —jö̧ba̧lö tjomukwatobe. Isabenö tjo̧'wo tjöwana̧lo jö̧tja̧lökwema, Israel jojodö tjösödökwe Sulabe Jwibo̧ Diosda. Abebö tja̧ja̧kwo jö̧tja̧lökwema, Isabenö Jo̧ Diosda, jo̧kwaijayonö jo̧banö omukwatökönö, wajwibö Egipto jojodönöda tjo̧'wo wana̧ladö, sulabenö.

² Isabenö Diosnö kwomukwataduwo jö̧ka̧laduwobe chömöledö. Diosma isabenö waisanö omukwato̧, ja̧danö waisanö omukwatö, söbebö lobö lȩebakwo̧. Jo̧bama isabenö jö̧a̧li̧danö ja̧bo̧, ida̧ökö yöawajabe, sulabenö ja̧badönö lȩebakwa̧ wenema, ja̧danö sulabenö ja̧badönö pjabatadönö lȩebakwa̧ wenema, ja̧danö isabenö yöawaja̧danö ja̧akwo̧, la'akatjöda yöawajöködanö ja̧ökakwo̧.

³ Diosdanöböködö, tjo̧'wo tjöwana̧lawö̧ Egipto jojodöma. Jobadö Egipto jojodöma, diosböködö, sule bö̧jȩ jojodöda, ja̧danö tja̧jwi̧mu kabayudöma, mölȩjȩbe ju̧kwadö juluwadöböködö, sule bö̧jȩ kabayudö juluwöködöda. Ja̧danö, jobadönö lȩebobö, Isabenö Jo̧ iteda ömamu kabebö i̧sȩbenama, pjatjatakwedö jö̧tja̧linawö̧ Egipto jojodöma töbö metjakwedö, ja̧danö pjatjato jö̧tja̧lawö̧ Juda jojodöma metjakwedö. Jau, Dios lȩebenama, pjatjato jö̧ba̧ladöbi, pjatjato jö̧tja̧lawö̧bi bakobe debö tji̧'yakwedö.

⁴ Chömöledö, baikwö laebobe Isabenö Jo̧ ötjönö yöawima: —Lȩbebö chichakwa̧ma, baikwö wanedö yötawa: Didiba juluwo̧, obejanö ujuluwajo̧, ukwotö jö̧ba̧lö tuluwenama, obejadönö teada̧ladö ko̧ko̧kwö jo̧banö jwötjeba̧li̧jayonö yebabö̧kö̧, jö̧tö? Jau, labinö ökwöinö jwötjeba̧li̧tjö̧bi, döbibajö̧kö̧ didibama. Ötjö lȩbebö chichakwa̧bi ja̧danö. Ötjö Isabenö Jo̧ Okobe Jwiinö Juluwo̧ Dios Sion mösa'otjö chölakwabikwawobö chichenama, yebabökönö ölakwabikwawö chö̧jakwo̧sa,

⁵ ja̧danö isabenö Jerusalen comunidad tjöbeba̧lö chiteada̧lakwo̧sa. Pji̧yu tji̧tji̧mu tja̧'do̧nö ju̧kwadönö tjöbeba̧lö, wame kwöbö tjiteada̧li̧danö, isabenö tjöbeba̧lö chiteada̧lakwo̧sa, ja̧danö tjö̧jibinö pjatatakwo̧sa. Jau, Jerusalen comunidad wame baledö, isabenö tjöpöjojodö tjujulutjö tjö̧jibobö pjatatakwosa, —jö̧ba̧lö laebobe Isabenö Jo yöawi̧ma.

⁶ Chömöledö israel jojodö, baikwö yöta̧laduwakwö, ökwödöma sulabenö Dios wei̧ kabatibinadöja, jo̧kwajabetjö̧ sulabenö kwomukwataduwi̧ kabatibö, tjebachajö kakatibinaduwökwe Diosnö kwösödaduwo.

⁷ Tjebachajö, Dioskwö kwichibaduwakwa̧ möle, baikwö yötawaduwakwö: Ja̧ möle, isabenö otiwanö ja̧köbaduwakwedöja chömöledö, ja̧ möle okobe deinö o̧'wo jawa kwösödaduwawö̧nö ikwö loköbaduwakwedöja. Ökwödöma jwiinö sulabenö ja̧bö, plata jawatjöbi, oro jawatjöbi o̧'wo jawa kwösödaduwakwawö̧nö otidinadöja chömöledö, jokwaijayonö tjebachajö Dioskwö kwö̧jaduwakwa̧ mölema, okobe deinö jobadönö ikwö loköbaduwakwedöja.

⁸ Ja̧danö kwöpöjojodöduwi Asiria jojodönö, baikwö laebobe Dios yöawi̧ma: —Isabenö dȩdȩbö lotjajawö̧ debö tji̧'yakwedö Asiria jojodöma, jo̧kwaijayonö jobadönö dȩdȩbö lotjakwedöma, bö̧jȩ jojodömaökö. Ja̧danö kwölöte'o, jobadönö dȩdebö loakwa'oma, bö̧jȩ jojodö tjitea kwölöte'omaökö, Dios itea kwölöte'oda jobadönö dȩdȩbö loakwa'oma. Ja̧danö, Dios itea kwölöte'o öba a'otjö dötjibakwedö Asiria jojodöma, ja̧danö jobadötjö möayedöma, tjömöayedö 'diinö otidadö batjibakwedö.

⁹ Jobadökwö chölakwabikwawenama, Asiria ölakwabikwawadö inesö juluwadöma jwiinö yebabinö tjö̧bawö tjö̧jakwedö, ja̧danö ölakwabikwawadö tjuluwedöma, banderasa̧do̧ jȩlö yebabinö dötjibakwedö, —jö̧ba̧lö yöawobe inesö ökwöla kwebato̧ Isabenö Jo̧ma. Jau, Isabenö Jo̧ ö̧ji̧ i̧sȩkwola ubemi comunidadma, Jerusalen comunidadda, ja̧danö Jerusalen mösa'o Sion mösa'otjö ubobe, Dios ö̧ji̧ i̧sekwolama.