Isaías 30 - Dios Iwene

Egipto nijibe kwi̧'yaduwoko, jö̧ba̧lö Isaias yöawina jawa

¹ Baikwö yöawobe Isabenö Jo̧ma: —Chitji̧mu kwuuduwi 'dibadö, isabenö usula kwemawaduwakwedöja. Ökwödöma omukwatö kwujunaduwaja̧danö badekwachinö ja̧badöja, jo̧kwaijayonö ötjö omukwatö chujuninadanömaökö. Ja̧danö ju'wedökwö bakobe pjabatakwawö kwöjaduwakwa̧ wene yöbawö kwujunaduwajabe, jo̧kwaijayonö ötjö cho̧'wo luwo̧ weawö̧, jobekwö yöbawö junöködöja. Jau, ida̧ökö sulabenö ja̧bajadö, ajayitjö̧ bajalekwönönö tupakwö sulabenö jabadöja.

² Ökwödöma Egipto nijibe kwi̧'yaduwobö labebadöja, Faraon tjöeba̧lonö kwö̧jibaduwobö. Jau, wanedö yöta̧la, Egipto niji isadanemi kwu̧ju̧kwaduwobö isakwadöja, jo̧kwaijayonö ötjönö abebö aja̧kwöködöja, jobe kwi̧'yaduwobö wetojobö jö̧ba̧lö.

³ —Ja̧danö jobekwö ötjönö abebö a̧ja̧kwökönö kwi̧'yaduwobetjö̧, baikwö yötawaduwakwö, Faraon tjöbeba̧lö pjaatakwa̧ kwo̧'woduwi kwöwana̧laduwobetjö̧, tabakwö kwö̧jaduwakwedöja, —Otiwanö Egipto nijinö janö, döpöjojodötjö otiwanö du̧ju̧kwawakwedösa, —yöka̧laduwijayonö, kwöpöjojodöduwi tjujuluwawö̧, taba lö̧jakwawö̧ja.

⁴ Jau, kwuluwedöduwi Faraon ö̧jobekwö, Zoan nijibe tjichibijayonö, ja̧danö tjömöayedö yöbawadö Hanes comunidadbe tjichibijayonö,

⁵ yayonö okobe deinö tabakwö kwö̧jaduwakwedöja. —Egipto jojodöma pjatjatakwedö, —jö̧ba̧lö yöka̧laduwijayonö, pjatjatobö jwitjakwedö. Jobadötjö kwemaduwakwa̧ma, kwöpöjojodöduwitjö ji̧kwawama kwemaduwökakwedöja, ja̧danö ju'wi pjatjatakwa̧ jawabi kwemaduwökakwedöja. Jobadötjö kwemaduwakwa̧ma, taba lö̧ji̧ jawada, ja̧danö jojodöma ökwödönö öbö yötja̧lakwedö, —Israel jojodöma wajwibö Egipto jojodönö tjo̧'wo wana̧linadötö, —jö̧ba̧lö laebobe Isabenö Jo̧ yöawi̧ma.

⁶ Baikwö laebobe Dios yöawi̧, Juda niji Neguev ötjabobe ju̧kwadö tebonö ju̧kwadönö: —Inesö labobe niji Neguevma, nöinö wene jȩmi, ja̧danö nöinö usula emawemi, jobe didibadö ya̧döbi ömadöbi jobe tjö̧jobetjö̧, ja̧danö nibadö a̧ko̧'döbi, jwiinö nibadö köba̧ladö a̧ko̧'döbi tju̧ju̧kwobe. Jo̧kwaijayonö ja̧ nijibenö tjitea e'ewö tji̧'yobe Juda jojodöma, bu̧lu̧dö tjoma'anöbi, kameyodö tjoma'anöbi e'ewö tji̧'yobe, pjatjatobö juluwöködö tjitebobe tji̧'yakobetjö̧.

⁷ Jau, Egipto la'aka luwo̧ma pjaatakwo̧, jö̧ba̧lö omukwatö tji̧'yijayonö, Egipto niji la'aka luwo̧, –Pjatatakwo̧sa, —jö̧a̧li̧ma mikwawokobe. Jau, inesö juluwo̧ Rahab ötjabökwedanö juluwo̧ Egipto luwo̧ma, jö̧ba̧lö ichejekwijayonö, ja'yubebi pjabatö̧kö̧. Jo̧kwajabetjö̧ jo̧banö baikwö ötabocha, –Ba̧nöda bo̧ Rahab, –jö̧ba̧lö jo̧banö ötabocha, ja'yubebi pjaatokobetjö̧, —jö̧ba̧lö laebobe Dios yöawi̧ma.

Juda jojodöma Dios wei̧ a̧ja̧kwöködö, jö̧ba̧lö Isaias yöawina jawa

⁸ Diosma ötjönö weinobe, baikwö: —Ökwödönö yötawi̧ kwi̧wȩyudo, kwiyalu'yenö kwödo, Juda jojodö tjujuna̧lobö. Ja̧danö, jejenö kwiyiawö̧, baledakwa̧ jawa baledenama, i̧sȩkwa baibanö tjujuna̧lakwedö, ja̧danö tupakwöbi ba̧kwelöjateböbi tjujuna̧lakobetjö̧.

⁹ —Jau Isaias, Juda jojodöma isabenö weti̧ tja̧ja̧kwobö öpöjödadö, chitji̧mu omöna yöba̧ladö, ja̧danö ötjö Isabenö Jo̧ chö̧ba̧jadi̧ tja̧ja̧kwobö öpöjödadö.

¹⁰ Jobadöma tupakwö baledakwa̧ jawa tji̧'wi̧didanö edadönö sulabenö tjöbebö webadö, –Kwi̧'wi̧didanö edökönui, –jö̧ba̧lö, ja̧danö ötjö yötawi̧ yöbawadönö tjöbebö webadö, –Dios yöawi̧ jwei̧ wenema, ökwödönö yöbawökönui, –jö̧ba̧lö. Jobadönö webadö, –Otiwanö dö̧jakwa̧ jawada yöbawi, omöna jawada yökawo, -Chi̧'wi̧didanö chedajabe, -jö̧balö.

¹¹ –Di̧'yama manatjö labebaduwi, jweinö dösödi̧danö di̧'yakobetjö̧, Israel jojodö tjösödökwe Sulabe Jwibo̧ Diosnö da̧ja̧kwobö döpöjöda, jo̧ba yöawi̧ yökawi̧ma kabatibi, –jö̧ba̧lö sulabenö webadö, jobadönö yötawi̧ tjaja̧kwapji jö̧ba̧lö.

¹² —Ja̧danö, jobekwö tjöpöjödi̧tjö̧, ötjö Israel jojodö tjösödökwe Sulabe Jwibo̧ma, baikwö yötawadönö: Ökwödönö yötawaja̧ kwöpöjödaduwajabe, mikwa jwii̧ jö̧ba̧lö. Ja̧danö ötjö yötawi̧ öpöjödö, kwomukwataduwajabe, –Jojodönö usula tjemawinö webö, omöna yöbalö ja̧nö dö̧jitjö̧ma, otiwanö dö̧jakwedösa, –jö̧ba̧lö, jadanö jobekwö omukwatö badekwachinö sulabenö ja̧badöja, ja̧tjö otiwanö kwö̧jaduwotö jö̧ba̧lö.

¹³ Jo̧kwaijayonö ja̧ sulabenö ja̧köbaduwi̧ma ökwödönö suli̧ waedakwawa jawa jakobe, jobekwö sulabenö jaköbaduwi̧tjö̧ isabenö lȩtebakobetjö̧. Baikwö wanedö yötawa: Comunidad tjöekwemi möemima, ja'ö 'dainö, meakwa̧ wajwitjonö a̧petukwöchobe juluwanö meobe,

¹⁴ ja̧danö jobekwö baledenama, lete'otjö dado̧ ödadaja̧yu i̧sa̧yu labinö nijakwö ikwö loobedanö ichejekwobe, ja̧ tjöekwemi ji̧nama. Jau, bakwo̧ lete'otjö ödadaja̧yu 'dainö nijakwö ikwö loitjö̧ma, ajayinö otidaja̧yuma bakwainö mikwa jwiayu baibena, ökwöla ubö̧'abi ökwölatjö emoböma mikwawököyu, ja̧danö ojwese'dotjö ojwiyo waoböbi mikwawökuyu, jö̧tö? Jobekwö baledakobe ökwödö kwo̧'woduwi̧ kwö̧wa̧na̧laduwi̧ma, —jö̧ba̧lö laebobe Dios chi̧wȩyudobö weinama.

¹⁵ Jobekwö isabenö baledakwawö̧ja chömöledö, Dios yöawi̧ kwöpöjödinaduwobetjö̧. Jau chömöledö, Isabenö Jo, Israel jojodö tjösödökwe Sulabe Jwibo̧ Diosma ökwödönö yöawinobe, —Sulabenö kwomukwataduwi̧ kabatibö, tjebachajö ötjönö kwo̧'wo kwöwana̧laduwitjö̧ma, kwö̧jibaduwakwedöja. Kwujuluduwi̧ma, ökwödöda jawamaökö, wi̧inö ja̧nö, ötjönö ösödö kwo̧'wo kwöwana̧laduwitjö̧ma, ja̧ kwösödaduwi̧da kwujuluduwi̧danö ja̧kobe, —jö̧ba̧lö yöawinobe. Jo̧kwaijayonö yöawi̧ a̧ja̧kwajadö, kwösödaduwoböma öpöjödinadöja chömöledö.

¹⁶ Ja̧danö Dios kwö̧jibaduwobö wei̧ öpöjödö, yöka̧linaduwobe, —Ja̧maökö. Ökwödöma kabayudönö wa̧nö, döpöjojodö tjöba a'otjö dödibakwedösa, dö̧jibobö, —jö̧ba̧lö. Ja̧danö, isabenö dökibaduwakwedöja chömöledö. Yöka̧laduwajabe, —Kabayudö juluwanö ö'öbakwawadö tjoma'anö wanö, otiwanö dö̧jibakwedösa, —jö̧balö, jo̧kwaijayonö baikwö yötawaduwakwö, ökwödönö lubadöbi juluwanö lutjakwedö, ökwödönö tjichibenanö baibanö.

¹⁷ Isabenö yebabinö dökibaduwakwedöja chömöledö, kwöpöjojo bakwo̧da ichibiawö̧, milbedö dökibaduwakwedöja, ja̧danö kwöpöjojodöduwitjö bakwamubedöda tjichibiawö̧, okobe deinö dökibaduwakwedöja, kwiteboduwi nijinö, o̧bukwedöda okobe tjö̧jibenanö baibanö. Jau, sule o̧bukwedöda okobe tjö̧jibakwedö, baikwö wanedö yöta̧la, banderasa̧do̧ mösa'o wa̧pekwa'o tjujunaja̧do̧danö, ödö mösa'o wa̧pekwa'o banderasa̧do̧ tjujunaja̧do̧danö, jo̧dawa'ye tjö̧jakwedö, ina ditebonö tju̧ju̧kwakwedöma.

¹⁸ Jo̧kwaijayonö jobekwö baledoböma ösödö̧kö̧ Isabenö Jo̧ma. Jo̧bama o̧'wo 'dibachibö, lekwe teada̧lo̧, ökwödönö dösölö̧jinö pjaatobö ösödobetjö̧. Iteda ujulu i̧sȩbö, ökwödönö lȩlöjinö edobö ösödo̧ chömöledö. Jau chömöledö, Isabenö Jo̧ Diosma, otiwanö ja̧o jö̧a̧li̧danö ja̧bö jo̧, ja̧danö okobe deinö jo̧banö tjo'wo wana̧lö teada̧ladönö isabenö otiwanö pjabato̧, jo̧ba yöawi̧ kwa̧ja̧kwaduwo chömöledö.

Dios iteda ömöledönö pjaatakwa̧ Isaias yöawina jawa

¹⁹ Yadakwö isabenö Sion mösa'onö tjö̧jakwedö jojodöma, ja̧danö Jerusalennö ju̧kwadöma budekwö katjatibakwedö. Kwo'woduwi tjo̧bekwö pjaatobö jwökeba̧laduwiökwe, a̧ja̧kwakwo̧ Diosma, jadanö a̧ja̧kwajo̧, isabenö lȩlöjinö edö pjaatakwo̧. Jau, a̧ja̧kwenama, isabenö juluwanö atadö pjaatakwo̧.

²⁰ Jau chömöledö, babe ökwödönö lȩbebö, isabenö wene kwöbaledaduwobö webo̧ Diosma, ökwödönö ö̧ba̧jadakobetjö̧. Babe u̧ju̧kwawobedanö ichejekwa, jokwaijayonö tupakwö uju̧kwawökakwo̧ chömöledö, isabenö kwöbajaleduwinö kwedaduwakwedöja, ökwödönö ba̧ja̧do̧ Diosnö.

²¹ Isabenö otiwanö ökwödönö jweebakwo̧ chömöledö, baikwö yöta̧la: Kwölakwiyuduwinö ökömakwötjö kwa̧ja̧kwaduwakwedöja, —'Ya̧kwawa manama, bimada, bimanö kwekachaduwo, —jö̧ba̧lö. Jau, kwöwaisaduwakwöchobe jalachö kwi̧'yaduwobö jȩnabi, wajwiköbaduwakwöchobe jalachö kwi̧'yaduwobö jȩnabi, otiwanö jweebakwo̧.

²² Ja̧danö jobekwö ö̧ba̧jadiawö̧, o̧'wo jawa kwösödaduwi̧ma, kakatibaduwakwedöja. O'wo jawa orotjöbi, platatjöbi pöchö kwotidinawö̧nö suli̧ waedö, ikwö loköbaduwakwedöja, tjipjelekwachibanö ikwö loköbaduwakwedöja, —Yȩekwa ji̧, —jö̧ba̧lö. Jobadö ajayinö kwösödinaduwawö̧nö ikwö loköbaduwakwedöja, —Tjo̧wita, labebaduwi, —jö̧ba̧lö.

²³ Ja̧danö ja̧ möle, Diosma isabenö otiwanö pjaatakwo̧. Ojwiyo otiwanö o̧bobö weakwo̧, ödebiya kwödaja̧ otiwanö pokwakobetjö̧, ja̧danö batjo waji̧, pan otikwa jawama otiwanö kwujuna̧laduwakwedöja, isabenö nöinö pokwö wa̧ja̧kobetjö̧. Ja̧danö ju'wibi ja̧ möle kwajwimuduwi otiwanö meje'ye jalobenö ja̧nö tjukwakwedö.

²⁴ Kwajwimuduwi niji sobö otidadö pakayadöbi, buludöbi tju̧kwa sö̧i̧ kwakwawa tjukwakwedö, sula'wo jwii̧ baibanö otikwa batjo waji̧ma.

²⁵ Dios kwöpöjojodöduwinö lȩbebö, yelösöda ba̧jȩkwadönö söbebö lobö, tjitea tjöekwaka söbebö loakobe. Jemi ikenama, kwiteboduwitjö tjöekwa ökiya söbebö loinelö, mösa'iju möa'otjöbi, ju'wi mösa'oteniatjöbi ojwe otiwanö isuwobö weakwo̧.

²⁶ Ja̧danö yöte jawo̧ otiwanö idejatobö weakwo, möle jawo̧ idejati̧danö idejatenanö baibanö. Ja̧danö möle jawo̧ ajayitjö bajalekwönönö otiwanö idejatobö weakwo̧, ajayinö idejatinelö, jelemutjö dötölataja baibanö jwiinö salöinö idejatobö weakwo̧. Jobekwö baledakobe chömöledö, Dios ökwödö usula kwemawaduwi̧ otidö loenama. Jau chömöledö, a̧ja̧kwökönö kwö̧jaduwiökwe, ökwödönö lȩbebo̧ Isabenö Jo̧ma, inia tjöbö, 'debawadö bakibaduwanö. Jo̧kwaijayonö ja̧ möle inia tjököbaduwi̧ otidö loakobe, ja̧danö kwaina nii̧ ösöwachibanö otidö loakwo̧.

²⁷ Isabenö dameakwö lȩebakwo̧ Isabenö Jo̧ma chömöledö, jo̧ba ödötjö ichonö dedobedanö ichejekwa. Wanedö yöta̧la: Döpöjojodönö lȩbebö icho̧ma, jwiinö dameakwö icho̧, ödameakwobetjö̧ imiyu'wo yȩa'wonö icho̧. Jwiinö dameakwö yöba̧lo̧, ja̧danö Dios inenema, ökwöla jwiinö uboladanö ichejekwobe.

²⁸ O̧'wo emapjoma, ojwe okwatibö söbebö loödödanö ichejekwapjo, tjulume'a ichibanö da̧kwinö okwatibödöma, ja̧danö tjitebotenia jojodö döpöjojodönö ujuluwakwo̧. Jobadönö juluwö, chabö loakobobe tjitebotenia jojodönö, jwiinö söbebö loawaka chabö loawakanö. Ja̧danö kabayudö jweba̧laka tjaanö anö, jobadönö öbibö, söbebö loawemibe öibakwo̧.

²⁹ Jobekwö kwöpöjojodöduwinö ujuluwiawö̧, kwo̧'woduwi ösöwanö lo̧köbaduwakwedöja, yö̧te ba'ali kwujunaduwena kwo̧'wo ösöwanö lo̧köbaduwidanö. Ja̧danö flauta jawa pjutji̧ a̧ja̧kwö, tjo̧'wo ösöwachibanö Israel jojodö tjösödökwe Inawadanöbo̧ Isabenö Jo̧ Dios itea mösa'obe tjo'wo ösöwachibanö lo̧bö tji̧'yidanö, kwo̧'woduwi ösöwachibanö lo̧köbaduwakwedöja.

³⁰ Ja̧ möle iteda iwene kwa̧ja̧kwaduwinö, labinö jwöeba̧lakwo̧ Isabenö Jo̧ma, ja̧danö iteda inesö ujulu kwedaduwobö i̧sebakwo̧. Jwiinö dameakwö ja̧nö, ökwöla jwiinö ubola ubinö ichakwo̧, ja̧danö tiyuwaso pjei̧ öwiya tjoduwinö ichakwo̧, öpöjojodönö lȩebakobetjö̧.

³¹ Jobekwö ichibiawö̧, Isabenö Jo̧ iwene a̧ja̧kwö jwiinö yetjaibakwedö Asiria jojodöma, iteda itea otokwötenö kwaenama, jwiinö yetjaibakwedö.

³² Ja̧danö lȩebakwawöte otokwötenö Isabenö Jo̧ kwaenama, kwo̧'woduwi ösöwachibanö lo̧köbaduwakwedöja, panderos pjeböbi, arpas pjeböbi, kwo̧'woduwi ösöwachibanö lo̧köbaduwakwedöja. Jau, iteda inesö ujulu i̧sȩbö, iteda ömamu kabebö, Asiria jojodökwö ölakwabikwawakwo̧ Isabenö Jo̧ma.

³³ Wanedö yöta̧la: Damötjö Asiria la'aka luwo̧nö juwö loakwemi omudawö ujuninobe Diosma, jalemi ja̧danö da̧kwemi juwö loakwemima, ja̧danö ida̧ökö imi jobe ujunajabe, nöinö imi ko̧ko̧dajo̧ ujunajabe. Ja̧danö, jobe junajo̧, inesö ubinö ubola nötedö pjuakwo̧ Isabenö Jo̧ma, Asiria la'aka luwo̧nö lȩbebö juwö loakobetjö̧.