Isaías 3 - Dios Iwene

Dios Jerusalen comunidadbi, Juda nijibi lȩebakwa̧ Isaias yöawina jawa

¹ Jerusalennö ju̧kwadöbi, ju'wedö Juda niji jojodöbi tjo̧'wo wana̧lö yöba̧ladö, —Otiwanö juna̧ladösa, lekwe möle otiwanö döpöjojodökwö dölakwabikwawakobetjö̧, —jö̧ba̧lö. Jo̧kwaijayonö, Isabenö Jo̧ okobe jwiinö juluwo̧ Diosma juluwanö 'döebakobe okobe jwiinö ja̧ tjo̧'wo tjöwana̧li̧ jawabi, tjo̧'wo tjöwana̧lawö̧nöbi, baikwö yötawa: Tju̧kwa kwakwawabi, tjowi̧ ojwiyobi 'döebakobe, jwitjenanö baibanö.

² Ja̧danö, jobadötjö inesö juluwadönöbi, ju'wedö ölakwabikwawa jojodönöbi, lȩekwa luwedönöbi, Dios yöawi̧ yöbawadönöbi, tupakwö baledakwa̧ yöbawadönöbi, waisadö damönöbi,

³ ölakwabikwawadö tjuluwedönöbi, otiwanö tjomukwatawö̧nöbi, waisanö tjomukwatobö pjabatadönöbi, mea boawa waisadönöbi, 'döebakobe Isabenö Jo̧ma, Jerusalennö ju̧kwadöbi, ju'wedö Juda niji jojodöbi bakobe pjabatadö deinö tjö̧jakobetjö̧.

⁴ Jobekwö 'döbebajo̧, ökwödötjö ina tjemubedönöda ujunakobe kwuluwedöduwi la'aka luwedö batjibanö, tjemu pjebadöda ökwödönö webö tjö̧jakwedö.

⁵ Ja̧danö wajwibadö jobekwö webö tjö̧jiawö̧, jojodöma sulabenö ja̧tjakwedö ju'wedönö, okobe deinö tjömöledökwö ölakwabikwawö tjö̧jakwedö. Ja̧ möle tjemuma sulabenö yötja̧lakwedö damönö, ja̧danö sulabedö okobe deinö tjöpöjödawö̧ma, otiwanö tjomukwatawö̧nö sulabenö yötja̧lakwedö.

⁶ Ja̧ möle, isabenö usula emawö, jwibö tjö̧jakwedö Juda jojodöma, baikwö yötawa: Bakwaso jojodö idöda tjömöledöso̧nö yötja̧lakwedö, —Ökwöda kwökamijido̧ wamesa̧do̧ juna̧lo̧ja, jo̧kwajabetjö̧ ökwöda duluwo̧ kwö̧jobö jo̧be, ökwöda bemi söbebö lotjinemi comunidad webö kwö̧jobö jo̧be, —jö̧ba̧lö yötja̧lakwedö.

⁷ Ja̧danö, jejenö yötja̧liökwe, öpöjödakwo̧, —La'aka kwuluwo̧duwi babibö, ökwödönö pjatatoböma jwibo̧sa, ökwödö kwö̧jaduwi̧danö, ötjö chejutjö chu̧kwa kwakwawabi, chitea kamijido̧ wamesa̧do̧bi jwibo̧sa, jojodö la'aka tjuluwo̧ batibanö kwujunaduwokotjö, —jö̧ba̧lö atadö öpöjödakwo̧.

⁸ Jau chömöledö, isabenö tjöpöjojodöma söbebö lotjakobe Jerusalen comunidadbi, ju'wi Juda niji comunidadteniabi, Isabenö Jo̧ Diosnö katjatibobetjö̧. Jau, yöba̧löbi, sulabenö yöba̧ladö Isabenö Jo̧nö, ja̧danö ja̧bö tjö̧ji̧bi, sulabenö Isabenö Jo̧ öpöjödi̧ jawa ja̧badö. Isabenö Jo̧ma inesö juluwo̧, salöinö dejato̧ ö̧jijayonö, yayonö jo̧banö öpöjödö, öba a'o yöba̧ladö, —Öpöjödö kadatibakwö, —jö̧ba̧lö.

⁹ Isabenö wene juna̧ladö Juda jojodöma, tjöba edöbi öwaetjöda öwawobe, wene tjujuna̧li̧ma. Jau, taba jwiinö, sulabenö ja̧bö tjö̧ji̧ i̧sebadö, inesö sulabedö Sodoma jojodö tji̧sȩbinadanö. Ayö, isabenö Dios lȩebakwawö̧ Juda jojodönö, jadanö jobadönö lȩebakwa̧ma baikwö yötawa, Idöda wene jwötjekwobetjö Dios lȩebakwa̧ tjemakwedö.

¹⁰ Dios wei̧ a̧ja̧kwö ja̧dönö yökawaduwo, —Kwö̧jaduwi̧ma, isabenö otiwanö kwö̧jaduwakwedöja, —jö̧ba̧lö. Jau, jobadöma otiwanö Dios wei̧ a̧ja̧kwö tjö̧jobetjö̧, a̧ja̧kwö tjö̧ji̧ mikwa isabenö otiwanö tjemakwedö, tjo'wo ösöwachibanö.

¹¹ Jejenömaökö sulabedöma, jobadöwe. Sulabenö Dios wei̧ a̧ja̧kwöködöma, isabenö sulabenö baledakwawö̧, baikwö yötawa: Jobadöbi ja̧bö tjö̧jina mikwa baibanö tjemawakwedö, tjemo jö̧tja̧li̧danö Dios lȩebakwa̧ tjemawakwedö, jobadöwe!

¹² Ötjö chömöledö Juda jojodöwe. Tjemu la'aka luwedö babibinadöma, sulabenö ja̧badö chömöledö Juda jojodönö, ja̧danö ya̧döda chömöledö israel jojodönö webö jadö. Chömöledöwe! Ökwödönö öbibö jwebebadöma, ö'öbönö ötjibawö̧ja, jweinö kwi̧'yaduwakwa̧ma wajwiköbaduwenanö baibanö.

Isabenö Jo̧ israel jojodönö lȩebakwa̧ Isaias yöawina jawa

¹³ Isabenö Jo̧ma ida̧ökö lȩekwa luwo̧ ö̧jemi ichibajabe, ja̧danö ichibajo̧ juluwanö tjöba a'o öjamatakwo̧, iteda ömöledö israel jojodönö lȩebakwa̧ jawa yöawakobetjö̧.

¹⁴ Lȩekwa yöbawö öjamatenama, iteda ömöledö Juda jojodötjö la'aka tjuluwedönöbi, ju'wedö luwedönöbi lȩbebö yöawakwo̧, baikwö: —Ökwödöma tjöbatjiju uba batjo suli̧ waedö kwönaukwaduwajabe, ja̧danö usula jojodötjö kwönaukwaduwaja̧ma, kwejuduwinö kwödaduwajabe, kwönaukwaduwaja̧ jawatjö kwejuduwi su̧'bȩ baibenanö kabatö.

¹⁵ Jobekwö ötjöda chömöledö juda jojodönö suli̧ kwöwaedaduwobö jwibadöja, ajayitjö bajalekwönönö usula jojodö usula tjemawinö kwöwaedaduwobö jwiobe, isabenö sulabedöja, —jö̧ba̧lö lȩbebö yöawakobe Okobe Jwiinö Juluwo̧ Isabenö Jo̧ Diosma, Juda jojodötjö luwedönö.

Dios Jerusalen comunidad jojodötjö ya̧dönö lȩebakwa̧ jawa, Isaias yöawina jawa

¹⁶ Tupakwö yöawajabe Isabenö Jo̧ma, baikwö: —Jerusalen comunidadnö ju̧kwadö ya̧döma, –Ju'wedötjö bajalekwönönö otiwadösa, –jö̧ba̧lö, tjuu möakwö kabekwö kwebachadö, ja̧danö kabatökönö tjösödawö̧nö obö edadö tjöbajalenö. Ja̧danö tjökesayunö nönawa jawa ökwöinö, yöne ja̧tö kwebachadö, ökwödöma otiwadösa, jö̧ba̧lö.

¹⁷ Ja̧danö jobekwö sulabenö ja̧tjitjö̧, ötjö Isabenö Jo̧ma lȩtebakwo̧sa jobadönö. Jerusalen ya̧dö tjuu ba̧kwemeachibanö wale'debiya saminö wetakwo̧sa, ja̧danö tjöba tjöwö'ye jwobö lotakwo̧sa, tabakwö tjö̧jakobetjö̧, —jö̧ba̧lö yöawajabe Isabenö Jo̧ma.

¹⁸ Jau chömöledö, ja̧ möle okobe jwiinö jobadö ya̧dö tjotikwi̧ jawa 'döebakobe Diosma, tjökesayu nönawa jawabi, tjöba nönawa jawabi, tjulume'anö nönawa jawabi,

¹⁹ sasiyu jawabi, tjime'isa̧ko̧ nönawa jawabi 'döebakobe. Ja̧danö tjöba muchekwa̧do̧ jawabi,

²⁰ tjuu butjawaka jawabi, tjökesayu nönawa osijubi, koleasö̧jȩ jawabi, omewi̧ jawa tjujuna̧li̧bi, tjösödawö̧ o̧'wo jawa nönawa jawabi,

²¹ tjötö'anö nönawa jawabi, tji̧su̧ nönawa jawabi 'döebakobe.

²² Ja̧danö ba'ali jawa 'dutjawa̧do̧bi, wamesa̧do̧ wajawado̧bi, ju'wi wamesa̧do̧bi, balada kweatakwawa'wobi,

²³ tjöbadekwawötebi, tja̧do̧ sayuwa̧do̧ 'dutjawa̧do̧bi, tjuu jwaekwa'wobi, tjöekwa̧do̧bi 'döebakobe Diosma. Jau, okobe jwiinö Jerusalen ya̧dö tjotikwi̧ jawa 'döebakobe Diosma, jwibadö batjibenanö kabatö.

²⁴ Ja̧danö, jobekwö 'döebiawö̧, omewi̧ jawa 'dö̧ekwinemi, woinö 'dö̧tjekwakwedö Jerusalen ya̧döma. Ja̧danö koleasö̧jȩ ötiwö̧je tjönawinemi, a̧la̧chi'bo ju'wedö tjujuluwajawö̧ tjönawa'bo tjönawakwedö. Ja̧danö tjöwö'ye otiwa'ye tjujuna̧linemi, tjöwö'ye jwobö lotjawö̧ tjö̧jakwedö. Ja̧danö kamisi otiwa̧do̧ 'dutjawinemi, a̧do epju̧yunö kalukaa̧do̧ 'dutjawakwedö. Ja̧danö otiwadö tjö̧jinemi, tjuluwo̧ imi tubedö dobö wȩyukwawö̧ tjö̧jakwedö̧.

²⁵ Ja̧danö Jerusalen comunidad ömadöma debö tji̧'yakwedö, jobadötjö inesö juluwadöbi ölakwabikwawö debö tji̧'yakwedö.

²⁶ Ja̧danö, ja̧ möle comunidad apjudetjö, jojodöma bakobe budekwöda tjubudekwakwedö, —Ayö, ökwödöwe, ditebo inesö otiwemi söbebö lotjajabe, —jö̧ba̧lö. Wanedö yötawa, ja̧ möle Jerusalen comunidadma bakwuju, ja̧do̧ 'yobekwö lotjinoko nijinö bu̧ju̧danö ichejekwakobe, jwiinö söbebö lotjakobetjö̧.