Isaías 29 - Dios Iwene

Dios Jerusalen comunidad lȩebakwa̧ Isaias yöawina jawa

¹ Baikwö laebobe Dios yöawi̧, Jerusalen comunidad jawama: Ayö, Davidmine tjösawö ujuluwinemi comunidad Jerusalen jojodöwe. Isabenö usula kwemawaduwakwedöja ökwödö Jerusalen jojodöma, ökwödö ba̧kwelöjatebö o̧ba bakwabakwena ba'ali junadöma.

² Baikwö yötawaduwakwö ökwödönö baledakwa̧ma: Yadakwö isabenö Jerusalennö ju̧kwadönö usula tjemawobö lȩtebakwo̧sa, jobe ju̧kwadö jwiinö o̧'wo tjo̧achö tjubudekwabenanö baibanö. Jwiinö lȩtebakwo̧sa Jerusalen comunidadma, Diosnö juwö iyawemi ichejekwenanö baibanö.

³ Ja̧ lȩtebakwa̧ma, baikwö yötawa: Kwöpöjojodöduwi ichibö tjötjösawobö wetocha, ja̧danö isaka pjolö loawa ökiya tjujunobö wetocha, ja̧danö ju'wi tjöekwemi 'dobö loawa jawanö ökwödönö metjibobö wetocha.

⁴ Jobekwö baledenama, ökwö Jerusalenma, nijakwö bakibanö kwö̧jakwujuja, ja̧danö wanedö yötawa, tupakwö yöka̧lakwa̧ma, nijitjö yöka̧lakwujuja, nijiso̧pja̧ mebö kwöbamatajelö kwiwene ökwöakobe. Niji okwatjö, isapjonö kwebacho̧ iwene ökwöi̧danö kwiwene ökwöakobe, nijiso̧pja̧tjöda sewoba̧lö yötja̧li̧danö kwiwene ökwöakobe.

^5-6 Jemi ikenama, Isabenö Jo̧ Okobe Jwiinö Juluwo̧ Diosma kwöpöjojodöduwinö lȩebakwo̧, juluwanö ichibö söbebö loakwo̧ kwöpöjojodöduwinö. Jobekwö ichibö lȩebakwa̧, baikwö wanedö yötawa: Jelobetjö ichajadö kwöpöjojodöduwi tjö̧ba̧jȩkwijayonö, nijiso̧pja̧ ejeopja̧danö batjibakwedö, jadanö inesö ba̧jȩkwadö kwöpöjojodöduwi labidöma, trigo sula'wo jwa̧le'epjo e'ewibi̧danö tjichejekwakwedö. Jau, böba labinö ökwöinö, ja̧danö niji̧ tjö̧awinö, labinö ökwöinö ichakwo̧ Isabenö Jo̧ma. Ja̧danö jwa̧le'epjo labinö doibapjokwö ichibakwo̧, ja̧danö jwiinö ubola ökwölakwö ichibakwo̧, kwöpöjojodöduwinö söbebö loakobetjö̧.

⁷ Jobekwö ichibenama, juluwanö Jerusalen comunidad öpöjojodönö söbebö loakwo̧, jwiinö ba̧jȩkwadö tjitebotenia jojodö Jerusalen tjujuluwobö tjölakwabikwawijayonö, juluwanö debö tji̧'yakwedö. Jau, okobe deinö Jerusalen comunidad tjujuluwobö ölakwabikwawö, tjöekwemi pjolö lotjobö isakwadö, Jerusalen comunidad jojodö tjo̧'wo tjo̧tjȩkwinö ölakwabikwawadöma, juluwanö debö tji̧'yakwedö. Wanedö yöta̧la, tji̧'wi̧dinö tjedaja̧ juluwanö jwii̧danö, Jerusalen tjujuluwobö ölakwabikwawadöma juluwanö deinö batjibakwedö.

⁸ Wanedö yöta̧la tjitebotenia jojodö Jerusalen comunidad mösa'o Sion mösa'o tjujuluwotö jö̧ba̧lö omukwatadönö: A̧wi̧chi̧ tjöbo̧ma, i̧'wi̧dikwena, ja̧danö i̧'wi̧dinö ukwobekwö edena. Jo̧kwaijayonö wiluenama, ina jwaikwöda a̧wi̧chi̧ tjöbo̧. Ja̧danö ojwiyo o̧ti̧ tjöbo̧ma, i̧'widikwena, ja̧danö i̧'wi̧dinö owobekwö edena, jo̧kwaijayonö wiluenama, o̧ti̧tjö me'dawo̧, ina jwaikwöda ojwiyo o̧ti̧ tjöbo̧. Jobekwö baledakobe Sion mösa'o tjujuluwobö jö̧ba̧ladönö. Tji̧'wi̧dinö tjujuluwobekwö tjedakwedö ichejekwa, jo̧kwaijayonö la'akatjöda tjujuluwökakwedö.

⁹ Chömöledö, isabenö baledakwa̧ edö, kwöbajaleduwi jalaka baibanö kwö̧jaduwakwedöja, tajijö jö̧ba̧lö. Yötawi̧ kwa̧jakwaduwobö kwöpöjödaduwobetjö̧, ökwödöda kwöbajaleduwi tjewawadö bakibaduwanö jabadöja, ja̧danö tjewawadödanö kwö̧jaduwakwedöja. Ökwödö Jerusalen comunidad jojodöma 'dukwachawö̧ tjö̧jidanö ja̧döja, jo̧kwaijayonö ubasobu o̧wa̧lajadö 'dukwachawö̧ babiböködöja. Ja̧danö 'dukwachawö̧ kwebachadö tjö̧ji̧danö ja̧döja, jo̧kwaijayonö nio ojwiyo owa̧lajadö 'dukwachawö̧ kwebachöködöja.

¹⁰ Jau chömöledö, jobekwö kwö̧jaduwi̧ma, baikwö labebö lobö yötawaduwakwö: Isabenö Jo̧ma ökwödötjö iteda yöawi̧ yöbawadö tjöbajale yi̧tjatobö weajabe, jadanö tupakwö baledakwa̧ edadö tjuu umuchebajabe, ja̧danö jobekwö weobetjö̧, jwiinö bö̧ti̧ lö̧jinö kwö̧jaduwobö weajabe.

¹¹ Isabenö yötawaja̧danö baledakwa̧ chi̧'wi̧didanö chedobö weajabe Diosma, ja̧danö ökwödönö yötawajabe chömöledö. Jo̧kwaijayonö, otiwanö yötawijayonö, yötawaja̧ma kwiyalu tumatö sȩyu dotjajobedanö ichejekwobe ökwödönö, baikwö yöta̧la. Ja̧ tumatö sȩyu dotjaja̧ kwiyaluma yöa̧lakwawa waiso̧nö iyö, —Yöba̧li̧, —jö̧ba̧lö wetjitjö̧ma, —Dakwö yöta̧lobö, sȩyu dotjajabe, —jö̧ba̧lö atadakwo̧, jö̧tö?

¹² Ja̧danö kwiyalu wajwibo̧nö iyö, —Yöba̧li̧, —jö̧ba̧lö wetjitjö̧ma, —Dakwö yöta̧lobö, kwiyalu wajwibo̧sa, —jö̧ba̧lö atadakwo̧, jö̧tö? Jobadödanö ichejekwadöja chömöledö, yötawi̧ kwa̧ja̧kwaduwijayonö, okwa jawa do̧kataduwokobetjö̧.

¹³ Ja̧danö, Isabenö Jo̧ Diosma baikwö yöawajabe ökwödönö chömöledö: —Bidö jojodöma tjaanö yötja̧lobe, –Dioskwö yö̧ne ja̧dösa, –jö̧ba̧lö, ja̧danö tja̧jȩnö ötjönö ösödö yöba̧ladö, –Diosma otiwo̧, jo̧banö yebabinö ösödadösa, –jö̧balö. Jo̧kwaijayonö jobekwö yötja̧lijayonö, omöna, tjomajadenö yö̧ne jö̧kö̧nö chö̧jelö ödö ju̧kwadö. Ja̧danö, –Diosnö yebabinö ösödadösa, –jö̧ba̧lö yötja̧li̧ma, ötjöda weti̧ a̧ja̧kwö, jobekwö yöba̧löködö, jojodöda wetji̧ a̧ja̧kwö, jobekwö yöba̧ladö.

¹⁴ Jo̧kwajabetjö̧ yemidanö tjöbajale jalaka baibanö, jojodö edajitjökö jawa chi̧sebocha, yemidanöbi, yemidanöbi. Jobekwö i̧sȩbö, jobadötjö –Waisadösa, –jö̧ba̧ladö tjöwaisi̧ 'dö̧ibajobö ja̧takwo̧sa, jadanö jobadötjö, –Okwa jawa döwaisachibanö omukwatadösa, –jö̧ba̧lö yöba̧ladöma, labebö lobö yötjawobö jwitjakwedö, —jö̧ba̧lö yöawobe Diosma.

¹⁵ Ökwödö sulabenö ja̧köbaduwakwa̧ omukwatö kwujunaduwijayonö, kwomukwataduwi̧ Isabenö Jo̧ öwaisapji jö̧ba̧lö, tojö kwujunaduwobö isakwadöja. Ja̧danö ju'wedö tjedokonö, yȩa'wo okwatjö sulabenö ja̧badöja. Jobekwö sulabenö omukwatö, sulabenö ja̧köbaduwijayonö, yöba̧ladöja, —Bakwo̧bi sulabenö domukwati̧ wajwibo̧, ja̧danö bakwo̧bi sulabenö ja̧di̧ edö̧kö̧, —jö̧ba̧lö.

¹⁶ Jobekwö omukwatö, ökömakwö omukwatadöja chömöledö, baikwö wanedö yöta̧la: Lete'otjö otido̧ma, otidaja̧ jawadanö, bakwaibo̧ ö̧jenaji̧? Bakwo̧ otidaja̧ jawa, otidajo̧nö, —Ötjönö otidajokobe, —jö̧ba̧lö yöa̧lobö jȩnaji̧? Bakwo̧ otidaja̧ jawa, otidajo̧nö, —Ötjönö otidajo̧ma, otikwa wajwibo̧, —jö̧ba̧lö yöa̧lobö jȩnaji̧? Kwöwaisaduwa chömöledö, ja̧maökö, jo̧kwaijayonö yayonö jobekwö omukwatadöja ökwödönö otidina Diosnö.

¹⁷ Isabenö waisanö otido̧ Diosma chömöledö, ja̧danö otidakwa̧ baikwö yötawaduwakwö: Ja'yubenö lekwajabetjö̧ inesö towi jȩmi Libano nijima, batjo otiwanö wa̧jayu baibakobe, ja̧danö babe batjo otiwanö wa̧jayuma, juluwanö tebo towibiya jȩmi baibakobe.

¹⁸ Ja̧danö ja̧ möle badekwachenama, tjölakiyu a̧ja̧kwinöködöma, kwiyalu yötja̧lobe tja̧ja̧kwakwedö, ja̧danö o̧'wo tjo̧achö yȩa'wo tjö̧jinelö, tjöbajale ajayinö tjewawinadöma tjo̧'wo ösöwachibanö tjedakwedö.

¹⁹ Ja̧danö Isabenö Jo̧ pjaatiawö̧, usula emawinadöma tjo'wo ösöwachibanö tjö̧jakwedö, jadanö bö̧jȩ jojodötjö̧ usula jojodöma, tjo̧'wo ösöwachibanö yötja̧lakwedö, —Ökwödö israel jojodö dösödökwe Okobe Jwiinö Juluwo̧ Diosma, isabenö otiwo̧, —jö̧ba̧lö.

²⁰ Ja̧ möle jojodönö suli̧ waedadö deakobe, ja̧danö sulabenö obadöbi deakobe. Ja̧danö okobe deinö suli̧ tjöwaedotö jö̧ba̧lö isakwadönö söbebö loakobe Diosma,

²¹ tjömöledö sulabenö ja̧tjököjayonö, lȩekwa luwedö tjöba a'o, —Sulabenö ja̧bo̧, —jö̧ba̧lö omöna yöba̧ladönöbi, lȩekwa luwedö 'daliwanö tjö̧lobö suli̧ tjöwaedobö isakwadönöbi, omöna yöba̧lö sulabenö jaböködönö suli̧ waedadönöbi.

²² Jobekwö jo̧be chömöledö, jo̧kwajabetjö̧ baikwö yöawobe Abrahamnö ö̧jibinö pjabatina Isabenö Jo̧ma, Jacob itji̧mu tupadanö jojodönö baledakwa̧ma: —Babema damötjö ji̧na Jacobma iteda itji̧mu tupadanö jojodönö edö, öba dewinö baibanö tabakwö jo̧, –Chitji̧mu tupadanö jojodöma sulabenö ja̧batötö, –jö̧ba̧lö. Jo̧kwaijayonö, ja̧ möle badekwachaja̧ ikenama, jobekwö ötabökakwo̧ Jacobma.

²³ Jau, ja̧ möle itji̧mu tupadanö jojodö, ötjöda chotidinawö̧ israel jojodönö edakobe, itebö nijinö ja̧nö, ötjönö ösödö tjö̧jakwa̧ma. Ja̧ möle tja'dömine Jacob ösödinökwe Sulabe Jwibo̧ Diosnö ösödö, —Isabenö otiwo̧ da'dö ösödinökwe Diosma, —jö̧ba̧lö ösödö tjö̧jakwedö, ja̧danö ötjö Israel jojodö tjösödökwe Diosnö omukwatö, tjöbajale jalaka baibanö ösödö tjö̧jakwedö.

²⁴ Ja̧danö ja̧ möle ajayinö sulabenö omukwatinadöma, otiwanö isabenö wene tjöwaisakwedö, ja̧danö ajayinö tjome sulinö yöba̧linadöma, otiwanö ba̧ja̧dakwawa tjösödakwedö, jokwajabetjö̧ ja̧ möle tja'dö Jacobma, itji̧mu tupadanö jojodönö edö, tabakwö ö̧jökakwo̧, —jö̧ba̧lö yöawobe Isabenö Jo̧ma.