Isaías 27 - Dios Iwene

Dios israel jojodönö tjö̧jibinö pjaatakwa̧ Isaias yöawina jawa

¹ Ja̧danö, ja̧ möle Isabenö Jo̧ma Leviatan ötjabökwe jwaibalawanö jo̧nö lȩebakobe. Inesö nöbo̧ a̧ko'da Leviatanma, Dios öba a'otjö döibajakobe, öwali'bo wi̧su̧inö ja̧bö döibajakwo̧ Leviatanma, jo̧kwaijayonö Diosma iteda itea kwölöte'o, inesö nöa'o juluwa'onö kwabö loakobe jwaibalawanö jo̧ Leviatannö.

² Ja̧ möle, uba batjo lo̧awa, ösödakwawa jawa batjo lo̧awa lo̧köbaduwo. Baikwö laebobe Dios yöawi̧, iteda öbatjo badekwachawö̧nö:

³ —Ötjö Isabenö Jo̧ma, chöbatjo teada̧lo̧sa. Teada̧lönö, ba̧kwelöjatebo otiwanö ojwiyo sa̧sa̧bö otido̧sa, ja̧danö teada̧lönö tjöbeba̧lö jo̧sa, bakwo̧bi chöbatjo suli̧ öwaedapji jö̧ba̧lö. Yötebi, mölebi otiwanö teada̧lö jo̧sa,

⁴ dameakwö̧kö̧sa, chöbatjobedönö. —Chöbatjobedönö pjatatobö jö̧ta̧la, tjöpöjojodö sȩakadanö ichejekwadönöbi, ju'wi sula'wodanö ichejekwadönöbi chölakwabikwawobö jö̧ta̧la. Ja̧danö jobadökwö chölakwabikwawobö ji̧tjö̧ma, jobadönö ja̧tö lotena, ja̧danö juluwajo̧, jobadönö juwö lotena.

⁵ —Ju'wibi chösödena, sȩakadanö ichejekwadöbi, ju'wi sula'wodanö ichejekwadöbi, chöbatjo öpöjojodö tjö̧ji̧ kabatibö, chömöayedö batjibanö tjichobö chösödena. Ölakwabikwawa kabatibö, ötjökwö wene jwiinö tjöjakwa̧ yöbawö tjujunobö chösödena, —jö̧ba̧lö wanedö yöa̧lobe Diosma.

⁶ Chömöledö, yadakwö baledakwa̧ma baikwö wanedö yötawaduwakwö, israel jojodö otiwanö tjö̧ja̧kwa̧ma: Jacobnö wanekwachowi towima, bö'diya otiwanö yutinö ja̧kwowi, ja̧danö israel jojodönö wanekwachowi towima otiwanö bo̧akobe, ja̧danö öjiyama otiwanö pjoawakobe, ja̧danö waji̧ma otiwanö wa̧jakwowi, waji̧tjö bö̧jȩ su̧'be baibenanö baibanö.

⁷ Chömöledö Diosma isabenö israel jojodönö lȩebajabe, jo̧kwaijayonö baikwö abebö cha̧ja̧kwaduwakwö: Dios ökwödönö lȩbebö kwaenama, döpöjojodö ökwödönö ajayinö kwabinadönö lȩbebö kwainadanö kwainaji̧? Jobadö döpöjojodönö bakobe söbebö loinobe, jö̧tö? Jobadönö bakobe kwabö loinadanö, ökwödönöbi kwabö loinaji̧? Kwöwaisaduwa, ja̧maökö.

⁸ Ökwödönö lȩebinama, baikwö yöta̧la: Döwaisachibo jö̧ba̧lö, ditebotjö labebö jelobe dö̧jobö weinobe, jawo̧ laebobekwötjö ichi̧ jwa̧lȩ'epjo labinö jwa̧lȩ'ewi̧danö, labinö pjuinobedanö ichejekwa, ditebotjö a'dewö loakobetjö̧.

⁹ Ökwödönö söbebö lootö jö̧ba̧löma jobekwö weinokobe chömöledö. Sulabenö ja̧dina lȩbebö, ökwödö Jacob itji̧mu tupadanö jojodö wene dujuna̧li̧ söbebö lootö jö̧ba̧lö jobekwö weinobe. Ja̧danö jobekwö weinobetjö̧, ditebotjö ju'wedö tjösödawö̧nö iyawemi söbebö loakobe, ja̧ iyawemi inawiyama, i̧so̧pja baibanö 'dabö loakobe, Asera ötjaboko jo̧'wo jawabi, omewi̧ jawa juwawemibi ditebotjö bakobe jwiakobetjö̧.

¹⁰ Jau, ditebotjö 'diinö tjöbebö dotidina comunidadma, jojodö deakobe. Tjejubiyabi deeju ja̧kobe, ja̧danö jojodö tjö̧jinemi pakayadö tjitji̧mu meje'ye tjukwakwedö, jobe bamatö towi öjiya tjukwakwedö, towi öjiyabi jwienanö baibanö.

¹¹ Towi ötjebiya kököbachibö 'debawö meakobe, ja̧danö ya̧döma ko̧ko̧dö tjichakobe, imi baibanö tjujuwobö. Jobekwö baledakobe ditebo israeltjö, dömöledö israel jojodöma okwa jawa omukwatökönö tjö̧jobetjö̧. Jau, jweinö omukwatökönö, Dios wei̧ a̧ja̧kwöködö israel jojodöma, jo̧kwajabetjö̧ ökwödönö otidina Diosma lȩlöjinö edökakwo̧, ökwödönö dadö otidinama, dösölö̧jinö pjaatökakwo̧ ökwödönö.

¹² Jo̧kwaijayonö, yadakwö yemidanö pjaatakwo̧ israel jojodönö, Eufrate ojwetjö, Egipto ojwebe ichibanö jojodötjö israel jojodönö böjö, ko̧ko̧dö ichejebakobe ditebobema. Wanedö yötawa, okobe jwiinö ja̧ niji pokwi̧ trigo wa̧ji̧ ko̧ko̧dö, chabö otidakobe Isabenö Jo̧ma ichejekwa, israel jojodö israel jojodöböködötjö böjö emakobetjö̧. Jobekwö böjö emajo̧, okobe deinö israel jojodötjö böjö emajawö̧nö, bakwo̧nökwena öbibö ichejebakobe, yemidanö israel nijinö tjö̧jobö.

¹³ Jau, ja̧ möle badekwachenama, trompeta labinö ökwöakobe, ja̧danö israel jojodötjö jobe ju̧kwadöma tjitebobe israel nijibe tjetjachajakwedö. Jau, Dios lȩebajawö̧, ba̧jȩkwadö Asiria nijitjö tjile'dewakwedö israel jojodöma, ja̧danö ju'wedönö a'dewö loakobe, Egipto nijibe. Jo̧kwaijayonö ja̧ möle badekwachenama, ditebobe tjetjachajakwedö, ja̧danö tjebachajadö, Dios itea'o mösa'obe, Jerusalen comunidadbe tjichibakwedö, jobetjö Isabenö Jo̧ Diosnö tjösödakobetjö̧.