Isaías 26 - Dios Iwene

Dios pjaatiawö̧, Juda jojodö Diosnö ösödö lo̧tjakwa̧ Isaias yöawina jawa

¹ Ja̧danö, ja̧ möle bi̧ya lo̧awa lo̧tjakwedö Juda niji jojodöma: Ditebo comunidad Jerusalenma, otiwanö juluwemi comunidad. Diosma dö̧jibinö pjaatobetjö̧, ditebo comunidad tjöekwemi ujunobedanö ichejekwa, okwakwöchobe ji̧ tjöekwemibi, a̧petukwöchobe ji̧ tjöekwemibi.

² Comunidad apjude po̧kebaduwo, Dios wei̧ a̧ja̧kwö ju̧kwadö tetjachobö, Dios wei̧ jwaikwöda a̧ja̧kwadö tetjachakobetjö̧.

³ Ökwönö omukwatö jo̧nö, otiwanö teada̧lo̧ja duluwo Dios. Ökwönö o̧'wo wa̧na̧lö ösödö ö̧jobetjö̧, bakwainö wene jwiinö ö̧jobö pjabato̧ja.

⁴ Ba̧kwelöjatebö Isabenö Jo̧ Diosnö do'wo wa̧na̧lö dösödobö jo̧be, duluwo̧ Isabenö Jo̧ Diosma, inawa tjöeba̧lawa ba̧kwelöjatebö 'diinö ja̧wadanö ichejekwo̧obetjö̧.

⁵ Isabenö Diosnö do̧'wo döwana̧lobö jo̧be. Jo̧bama otiwadösa jö̧ba̧ladönö tabakwö tjö̧jobö webo̧, otiwadösa jö̧ba̧ladö tjitebo comunidad, möakwö kaekwobe comunidadma, meatö lobo̧ Diosma. Jwiinö nijakwö baibanö meatö lobo̧ Diosma, nijiso̧pja̧ jȩmi baibanö meatö lobo̧.

⁶ Jobekwö meatö loiawö̧, ajayinö otiwadösa jö̧ba̧ladö tjö̧jinemi comunidad ja̧takwö lobadö jojodöma, usula jojodöbi, jwibadöbi jatakwö lobadö, Dios pjolö loinemi comunidadma.

⁷ Jo̧kwaijayonö otiwadösa jö̧ba̧ladö tjitebo comunidad pjolö loijayonö, Dios wei̧ a̧ja̧kwö ja̧dönö pjabato̧ Diosma, ba̧ba̧lawobe kwetjachobö pjabato̧. Jau chuluwo̧ Dios, weköbi̧ a̧ja̧kwadönö pjabatö, mana ba̧ba̧lawamanö kwetjachobö pjabato̧ja.

⁸ Duluwo̧ Isabenö Jo̧, lȩekwa yökawakwa̧ teada̧ladösa, weköbi̧ a̧ja̧kwö, do̧'wo wana̧lö teada̧ladösa, —Duluwo̧ Diosma lȩekwa jweinö yöawakwo̧, —jö̧ba̧lö. Isabenö ökwönö ösödadösa duluwo̧ Dios, okobe deinö ökwönö tjaja̧kwobö ösödadösa, okobe deinö ökwönö tjomukwatibobö ösödadösa, —Isabenö Jo̧ Diosma otiwo̧, —jö̧ba̧lö.

⁹ Chuluwo Dios, jwiinö chösödakwö, yö̧tebi jwaikwöda ökwönö ösödo̧sa. Cho̧'wo luwo̧ma jwaikwöda ökwönö isakwö jo̧ chuluwo̧. Jau chuluwo̧, bö̧jȩtjö lȩekwa yöbawö, lȩkebenama, bö̧jȩ jojodöma otiwanö jabö ja̧kwawa, weköbi̧ a̧ja̧kwö ja̧kwawa waisachibadö, jo̧kwajabetjö̧ jwaikwöda ökwönö isakwö jo̧sa.

¹⁰ Jweinö lȩkebi̧ma isabenö otiwa chuluwo. Sulabedönö lȩbebökönö, jobadönö dösölö̧jinö kweditjö̧ma, sulabenö tjomukwati̧ kabatibökönö, weköbi̧ a̧ja̧kwökönö tjö̧jo jö̧tja̧lena. Weköbi̧ a̧ja̧kwö ju̧kwadö tjö̧'dade ja̧nö, jwaikwöda sulabenö jabö tjö̧jo jö̧tjalena. Jau, sulabedönö lȩkebökötjöma, ökwönö tjöwaisachibökena, —Isabenö Jo̧ Diosda inesö la'aka luwo̧ma, —jö̧ba̧lö tjöwaisachiboko jö̧tja̧lena.

¹¹ Chuluwo̧ Isabenö Jo̧, isabenö kwömamu kabebö jo̧ja, sulabedönö lȩkeboböma. Jo̧kwaijayonö lȩkebakwa̧ edö omukwatöködö sulabedöma. Jo̧kwajabetjö̧ lȩkebobö atebakwö chuluwo̧, jobadönö lȩbebö, inesö kwömöledönö kwösödi̧ kwi̧sebobö atebakwö, tabakwö tjö̧jakobetjö̧. Ökwö kwöpöjojodönö juwö lobo̧ja chuluwo̧, ja̧ lȩkebi̧ jawa ökwölanö jobadönö juwö lȩkebobö atebakwö chuluwo̧.

¹² Duluwo̧ Isabenö Jo̧, isabenö ökwöda wene jwiinö dö̧jobö pjakatakwo̧ja. Jau duluwo̧, okobe jwiinö belö otiwanö dotidina jawama, ökwöda kwotidinobetjö̧ dotidobö ji̧nobe duluwo, jo̧kwajabetjö̧ döwaisa, wene jwiinö dö̧jakwa̧ma, ökwöda weköbobetjö̧ otiwanö dö̧jakwedösa, jö̧ba̧lö.

¹³ Isabenö Jo̧, ökwödö Juda niji jojodö dösödökwe Dios, ju'wedö duluwedöbi ajayinö ökwödönö webö tjö̧jinobe, jo̧kwaijayonö jobadönö omukwatöködösa, ökwönöda domukwatibakwedösa, —Isabenö Jo̧ma isabenö duluwo̧ ökwödönö pjabato̧, —jö̧ba̧lö.

¹⁴ Jau duluwo̧ Dios, ju'wedö ökwödötjö duluwedöbinadöma debö tji̧'yajabe, ja̧danö wobaletjö tjetjachajökakwedö. Jobadöma, la'akatjöda yemidanö ökwödönö webö tjö̧jökakwedö. Ökwöda jobadö duluwedöbinadönö lȩbebinaja duluwo Dios, yemidanö ökwödönö webö tjö̧jö̧kakobetjö̧. Jobadönö söbebö lobinaja duluwo̧, jwiinö jobadönö söbebö lobinaja duluwo̧, bakwo̧bi jobadönö omukwatibökakobetjö̧.

¹⁵ Jo̧kwaijayonö ökwödönö söbebö lobökonö, ditebo ba̧jȩkwaso baibanö pjabatinaja duluwo̧ Isabenö Jo̧, ditebo ba̧jȩkwaso badibanö pjabatinaja, ja̧danö ditebo ajayitjö bajalekwönönö jalobe baibanö pjabatinaja̧. Jobekwö pjakatiawö̧, ökwönö ösödadö jojodöma, —Isabenö Juluwo̧ja, —jö̧ba̧lö.

¹⁶ Duluwo̧ Isabenö Jo̧, ökwödö Juda jojodönö lȩkebiawö̧, usula demawijatö, jadanö usula emawö ökwönö disakwijatö. Jwiinö usula emawö, tjo'omanö sewoba̧löda adebobö ji̧nobe duluwo̧, lȩkebawö̧ ökwönö bajaliyanö disakwenama.

¹⁷ Jau duluwo̧, ökwödönö lȩkebobetjö̧, nöinö usula demawijatö, metu'wo ju̧ju, jitjinö jemakwuju usula jemawi̧danö usula demawijatö. Jau, jitji̧nö juluwanö jemakwujuma, nioko pelebö jwöbeba̧luju, ja̧danö jobujuju usula jemawi̧danö usula demawijatö. Lȩkebiawö̧, jobekwö metu'wo ju̧ju usula jemawi̧danö usula demawijatö duluwo̧ Isabenö Jo̧,

¹⁸ jo̧kwaijayonö metu'wo ja̧ju usula jemawaja̧ ikena jo̧'wo ösöwachibanö jitji̧nö jemobedanö baledinokobe ökwödönö duluwo̧. Metu'wo ju̧ju pelebö usula jemawi̧danö usula demawijayonö, ditji̧nö emökönö, mikwa jwii̧ jawada demijatö, do̧'wo ösöwachibanö ditji̧nö demijökötö duluwo̧. Jau duluwo̧, usula demawijayonö, ja'yubebi dujuluwijökötö, dömöledö tjö̧jibinö pjadatoböma, ja̧danö döpöjojodö bö̧jȩnö ju̧kwadönö dujuluwoböma jwidijatö.

¹⁹ Jo̧kwaijayonö, Diosnö ösödadötjö ö'wö babibajadöma, isabenö a̧tjabayedö yemidanö 'yatjibakwedö. Jo̧kwajabetjö̧ ökwödö nijiso̧pjanö ba̧jadöma, wilubö kwo̧'woduwi ösöwachibanö lo̧köbaduwo. Jau, 'yakibaduwanö idejatakwo̧ Diosma, si̧li̧'idö tji'oli pokwi̧ pokwobö pjaati̧danö, Dios ökwödönö dejatima 'yakibaduwanö idejatakwo̧. Wanedö yöta̧la, jojosuju jitji̧nö jemi̧danö bö̧jȩma jojodönö emakobe ichejekwa, niji okwa ju̧kwadö ö'wö babibinadöma yemidanö 'yatjibajakobetjö̧. jö̧ba̧lö lo̧tjakwedö.

²⁰ Isabenö jobekwö pjaatakwo̧ yadakwö chömöledö. Jo̧kwaijayonö babema dameakwö lȩbebo̧ Diosma chömöledö, jo̧kwajabetjö̧ okwasȩko̧ tebachö, apjude kwutumataduwo chömöledö. Ja'yubenö lekwe kwu̧ju̧kwawaduwo, Dios dameakwö lȩebi̧ma 'dö̧ibajenanö kabatö.

²¹ Jau chömöledö, babe ö̧jelö labebo̧ Diosma, bö̧jȩnö ju̧kwadönö lȩebakobetjö̧. Bö̧jȩnö ju̧kwadö sulabenö ja̧bö tjö̧jiökwe, ö̧jelö labebo̧ Isabenö Jo̧ma, jobadönö lȩebakobetjö̧. Jobekwö lȩebobetjö̧, okobe deinö tjöwaisachibanö öwawakobe, bö̧jȩtjö sulabenö kwabö lotjina wenema. Kwabö lobajadö sulabenö jatja̧ja̧ tjotojinajayonö, öwawachibanö i̧sȩbakobe, bö̧jȩ jojodönö lȩebenama,