Isaías 25 - Dios Iwene

Isaias Diosnö ösödö yöa̧lina jawa

¹ Chuluwo̧ Diosnö ösödö, baikwö yöta̧la: —Isabenö Jo̧, chösödökwe Diosja. Ökwöma isabenö inesö otiwi̧ jojodö edajitjökö jawa i̧sȩbo̧ja chuluwo̧, jokwajabetjö ökwönö ösödö yöta̧locha, –Chösödökwe Isabenö Jo̧ma ju'wedötjö bajalekwönönö juluwo̧, –jö̧balö. Jau chuluwo̧, damötjö̧ kwotidakwa̧ jawa omukwatö juninaja̧, –Yadakwö baikwö chotidocha, –jö̧ba̧lö, ja̧danö omukwatö kwujuninadanö badekwachinö kwotidajabe.

² —Jau chuluwo̧, comunidadbiyatjö mö japopo pjolö loawemida baibanö webo̧ja, inesö 'diinö tjöbebö tjotidinemi comunidadbi pjolo loawemida baibanö webo̧ja. Ja̧danö ju'wedö tjitebo niji inesö la'aka luwo̧ eju comunidad, comunidad jwiemi baibanö webo̧ja, la'akatjöda tjotidökakwemi baibanö webo̧ja, isabenö juluwo̧ja chuluwo̧, omukwatö kwujunaja̧danö badekwachakobetjö̧.

³ —Jobekwö weköbobö kwujuluwiawö̧, tjitebosaso juluwaso jojodöma ökwönö yötja̧lakwedö, –Isabenö Jo̧ Diosma, isabenö juluwo̧, –jö̧ba̧lö, ja̧danö tjitebosaso juluwasö, ju'wedönö lȩlöinö edökönö suli̧ waedaso comunidad jojodöma ökwönö yetjabikwedö.

^4-5 Jau chuluwo̧, jobadö suli̧ waedaso jojodöma, jwa̧lȩ'epjo tjöekwemi do̧ibi̧danö ichejekwadö, ja̧danö jojodö deobetjö jawo̧ tubinö tubedi̧danö ichejekwadö. Jo̧kwaijayonö usula jojodönö tjöbeba̧lö̧ pjabato̧ja, ja̧danö jwibadö tjo̧'wo tjo̧bekwö ja̧dönö 'diinö tjöekwemidanö ichejekwo̧ja. Jau chuluwo̧, jwa̧le'epjo labinö doibapji jö̧ba̧lö tjöbeba̧lo̧ja, ja̧danö jawo̧ tubinö utubedapji jö̧ba̧lö, isadanö tjö'wachobö tjöbeba̧lo̧ja, jo̧kwajabetjö̧ ökwönö yebabinö omukwatadö, ju'wedönö suli̧ waedaso comunidad jojodöma, tjujulu jwiachibobö weköbobetjö̧. Jobadö jelobetjö ichajadö suli̧ tjöwaedotö jö̧ba̧lö labinö ökwöinö tjichibijayonö, ökwöi̧ jwiamachibobö webo̧ja, ja̧danö ojwiyo'wo jawo̧ tubö idejati̧ tjöeba̧li̧danö, juluwadö suli̧ waedadö tjo̧'wo ösöwanö lo̧tji̧ katjatibobö webo̧ja.

⁶ —Bi'o Jerusalen mösa'onö, Isabenö Jo̧ Okobe Jwiinö Juluwo̧ Diosma ba'ali ujunakobe, okobe deinö tjitebotenia jojodö tjukwobö. Inesö otiwi̧ ba'ali ujunakobe, söi̧ kwakwawabi tjukwobö, ja̧danö ubasobu o̧'dobu, jwiinö otiwi̧ lekwe möle tjo̧'omanö o̧'dibina ubasobu tjowobö. Jau, jwiinö tjösödi̧ 'wai̧ itebiyakwöbi, jwiinö otiwi̧ lekwe möle tjo̧'omanö o̧'dibina ubasobukwöbi ba'ali ujunakobe, tjitebo tenia jojodö tjukwobö.

⁷ Ja̧danö bi'o mösa'otjöda jojodö tjo̧'wo tjo̧achi̧ söbebö loakwo̧. Jau, okobe deinö bö̧jȩnö ju̧kwadöma woba jojodö dö̧jobe, ja̧danö wobinadönö jwaawa'wo muchekwadö dö̧jobe ichejekwa, bö̧jȩ ba̧kwemeachibanö tjitebotenia jojodö ja'wonö muchekwadö tjö̧jobe. Jo̧kwaijayonö bi'o Jerusalen mösa'otjö ja'wo kabebö loakobe Diosma.

⁸ Ö'wö baibakwawabi söbebö loakobe duluwo̧ Isabenö Jo̧ma, ja̧ möle tupakwö, la'akatjöda ö'wö batjibökakobetjö̧. Ja̧danö o̧'wo tjo̧achö tjubudesobuma, okobe deinö tjöbajaletjö 'do̧bebö loakobe. Ja̧danö, ökwödö israel jojodö, iteda ömöledö tabakwö dö̧ji̧bi söbebö loakobe, jemi tupakwö la'akatjöda tabakwö dö̧jökakobetjö̧. Jobekwö yöawajabe Isabenö Jo̧ma, ja̧danö isabenö yöawaja̧danö badekwachinö baledakobe.

⁹ —Ja̧ möle baikwö yötja̧lakwedö Isabenö Jo̧nö: –Bite Isabenö Jo̧ Diosda, dösödökwe Diosma. Jo̧banö o̧'wo wana̧lö, pjaatakwa̧ diteada̧lajabe, -Isabenö ökwödönö pjaatakwo̧, -jö̧ba̧lö, ja̧danö otiwanö pjaatajabe. Dösödökwe Isabenö Jo̧ Diosma jo̧bada, jo̧ba pjaatakwa̧ diteada̧lajabe, jadanö babe ökwödönö pjaatajobetjö̧, do̧'wo ösöwachibanö dösödaduwo, -Diosma otiwanö dö̧ji̧binö pjaatajabe, –jö̧ba̧lö yötja̧lakwedö ja̧ möle.

¹⁰ —Isabenö Jo̧ Diosma isabenö iteda ömamu bi'o Jerusalen mösa'onö 'bieba̧lakobe ichejekwa, bi'otjö iteda ujulu i̧sȩbö ökwödönö pjaatakobetjö̧. Jadanö ökwödö israel jojodönö pjabatö, Moab niji jojodönö lȩebakobe. Wanedö yöta̧la, tjide'o wame me'je'ye kököa'ye tjö̧ja̧tidanö, Moab niji jojodönö ja̧tö loakobe.

¹¹ Lȩebawö̧, Moab niji jojodöma lȩebi̧tjö latjebobö tjisakwakwedö, wanedö yöta̧la, ojwenö kwöbadö kwötjobö tjömamiju tjiwechi̧danö, latjebobö tjisakwakwedö, jo̧kwaijayonö waekwakobe. Moab jojodö otiwadösa jö̧ba̧lö tjomukwati̧ söbebö loakwo̧, ja̧danö waisanö suli̧ tjöwaedobö tjotidi̧bi söbebö loakwo̧.

¹² Ja̧danö tjitebo comunidadbiya 'diinö möakwö tjöbebö tjotidinajayonö, tjöekwemi söbebö loakwo̧ Diosma, tjöekwemi nijakwö ikwö loakwo̧, Moab comunidad tjöekwemi bakobe pjolachajibö nijiso̧pja jȩmi baibanö, jö̧ba̧lö Diosnö ösödö yöta̧la.