Isaías 24 - Dios Iwene

Okobe deinö bö̧jenö ju̧kwadönö Dios lȩebakwa̧ Isaias yöawina jawa

¹ Baikwö yötawaduwakwö: Ju'wi möle Isabenö Jo̧ma jwiinö lȩebakobe bö̧jȩ jojodönö. Jwiinö söbebö loakobe bö̧jȩma, jojodö deobe baibanö, niji yubatödanö ja̧akwo̧, ja̧danö bö̧jȩnö ju̧kwadönö tjipjelekwachinö a'dewö loakwo̧.

² Jobekwö lȩebenama, okobe deinö bö̧jȩnö ju̧kwadöma bakweminö usula tjemawakwedö, baikwö yöta̧la: Diostjö jojodötjö ö'weje pjabatadöbi, ju'wedö jojodö jo̧kwadabedöbi bakweminö usula tjemawakwedö. Ja̧danö bakwo̧ ömöayo̧bi, uluwo̧bi bakweminö usula tjemawakwedö. Ja̧danö bakwuju jömöayujubi, juluwujubi bakweminö usula tjemawakwedö. Ja̧danö tea emadöbi, tea iyadöbi bakweminö usula tjemawakwedö. Ja̧danö balada balewadöbi, tjöbalewawö̧bi bakweminö usula tjemawakwedö. Ja̧danö musido̧bi, umusidökwebi bakweminö usula tjemawakwedö.

³ Bö̧jȩ ba̧kwemeachibanö, okobe jwiinö mikwawi̧ jawa jwiakobe, ja̧danö jojodö deakobe bö̧jȩnöma. Isabenö Jo̧ma jobekwö baledakwa̧ yöawajabe, jo̧kwajabetjö̧ isabenö yöawaja̧danö baledakobe.

⁴ Jobekwö baledobetjö̧, bö̧jȩ ubudekwakobe ichejekwa, okobe jwiinö bö̧jȩma me'dawachibakobe ichejekwa, ja̧danö kököachibakobe. Bö̧jenö ju̧kwadötjö inesö mikwawadöbi me'dawachibö, mikwawöködö batjibakwedö ja̧ möle.

⁵ Ja̧ baledakwa̧ baikwö labebö lobö yöta̧la: Bö̧jȩnö ju̧kwadöma Dios wei̧ a̧ja̧kwökönö tjö̧jajabe, ja̧tjoko jö̧ba̧lö wei̧ a̧ja̧kwökönö sulabenö ja̧tjajabe, ja̧danö jobekwö sulabenö ja̧tji̧ma bö̧je samajabe, sulaböjȩ yȩöje baibanö. Jau, Diosma 'dö̧ibajökö ji̧ yöbawö junawa jawa jobadönö yöbawö ujuninobe, —Weti̧ a̧ja̧kwö kwö̧jaduwobö jo̧be, —jö̧ba̧lö, jo̧kwaijayonö wei̧ a̧ja̧kwökönö sulabenö ja̧bö tjö̧jajabe, bö̧jȩnö ju̧kwadöma.

⁶ Ja̧danö, a̧ja̧kwökönö sulabenö ja̧tjobetjö̧, bö̧jȩ lȩebakobe Diosma, ja̧danö bö̧jȩnö ju̧kwadöma usula tjemawakwedö, Dios öba a'otjö isabenö wene tjujuna̧lobetjö̧. Jau, Dios öba a'otjö wene tjujuna̧lobetjö̧, bö̧jȩnö ju̧kwadönö juwö loakwo̧ Diosma, ja̧danö jojodötjö o̧bukwedöda tjö̧jibakwedö.

⁷ Ubasobu o̧'dobubi ubudekwakobedanö ichejekwa, —Ja'yuwobuda batibajabe, —jö̧ba̧lö. Ubasa'ba kököachibakobe, ja̧danö ajayinö tjo̧'wo ösöwachibanö nöinö owa̧linadöma, —Ökwödöwe, —jö̧ba̧lö tjubudekwakwedö.

⁸ Jojodö tjo̧'wo ösöwanö lo̧tji̧bi 'dö̧ibajakobe, tjo̧'wo ösöwanö tambores kwaböma lo̧tjökakwedö, ja̧danö tjo'wo ösöwachibanö arpa pjeawama katjatibakwedö. Tjo̧'wo ösöwachibanö jwötjeba̧li̧ ökwöi̧ma, bakobe ökwöökönö 'dö̧ibajakobe.

⁹ Jemi tupakwö jojodö ubasobu o̧'dobu tjowenama, lo̧awa lo̧tjökakwedö, ja̧danö okobe jwiinö nio ojwiyo tjowi̧ma, lei̧ owawadanö leakobe jobadönö.

¹⁰ Jojodö tjitebo comunidad suli̧ waekwakobe, pjolö loawemida baibanö, ja̧danö okobe deinö tjejubiya 'diinö tjipje'datakwedö, bakwo̧bi teachapji jö̧ba̧lö.

¹¹ Ubasobu o̧'dobu jwiiawö̧, comunidad ö'wejetjö ko̧ko̧kwö, dameakwö jwötjeba̧lakwedö jojodöma. Bö̧jȩ jojodö ajayinö tjo̧'wo ösöwanö tjö̧jinama 'dö̧ibakobe, tjo̧'wo ösöwanö tjö̧ji̧ma, bakobe 'dö̧ibajakobe.

^12-13 Bö̧jȩ ba̧kwemeachibanö tjitebo comunidadbiyama, söbebö loawemida ji̧bakobe, comunidad apjubebi 'dobö loawadeda ji̧bakobe. Jo̧bekwö bö̧jȩ ba̧kwemeachibanö ja̧kobe, ja̧danö bö̧jȩnö ju̧kwadötjö o̧bukwedöda tjö̧jibakwedö, wanedö yötawa: Uba waji̧ emajitja möle baledaja̧ ikena, uba waji̧ ja'yubeda ji̧danö, ja̧danö olivo towi kwakwabajadö, e'dö tjemaja̧ ikena olivo waji̧ ja'yubeda wa̧ji̧danö, bö̧jȩnö ju̧kwadötjö sule o̧bukwedöda tjö̧jibakwedö.

¹⁴ Jemi ikenama, Dios lȩebi̧tjö ji̧binadöma tjo̧'wo ösöwanö tjö̧jakwedö. Tjo̧'wo ösöwachibanö, labinö lo̧tjakwedö. Jawo̧ meajobekwö ju̧kwadöbi tjo̧'wo ösöwanö jwö̧tjeba̧lakwedö, —Isabenö Jo̧ Diosma la'aka duluwo̧ otiwo̧, —jö̧ba̧lö.

¹⁵ Jawo̧ laebobekwö ju̧kwadöbi Isabenö Jo̧nö ösödö yötja̧lakwedö, ja̧danö jwaibalawa ö'öbö ju̧kwadöbi Diosnö tjösödakwedö, —Israel jojodö tjösödökwe, Isabenö Jo̧ Diosma jwiinö otiwo̧, —jö̧ba̧lö.

¹⁶ Bö̧jȩ bajaletjö jojodö Diosnö ösödö lo̧tji̧ da̧ja̧kwakobe, —Dösödökwe Sulabe Jwibo̧ Dios, dejatinö juluwo̧ja, —jö̧ba̧lö. Jobekwö otiwanö baledakobe, jo̧kwaijayonö ina badekwachökö ja̧ mölema. Jo̧kwajabetjö̧ babema baikwö yöba̧lo̧sa: —Ötjöwe, chime'dawachibanö jo̧sa, jwiinö chime'dawachibanö jo̧sa. Omöna yöba̧ladöma, omöna yöba̧lö suli̧ waedadö, omöna yöba̧lö suli̧ waedadöma, yelösöda nöinö suli̧ waedadö.

¹⁷ Jo̧kwajabetjö̧ ökwödö bö̧jȩ ba̧kwemeachibanö ju̧kwadöma, jwiinö yekabiduwakwedöja, 'daliwanö kwö̧la̧duwakwedöja, ja̧danö laju okwa meköbaduwakwedöja.

¹⁸ Jau, inesö yeabikwawa jawatjö yebabinö döbibajo̧ma, laju okwa meakwo̧, ja̧danö laju okwatjö nöchö labebo̧ma, 'daliwanö ö̧libakwo̧. Mölȩjȩ kȩachibi̧danö, yelösöda nöobu o̧bakobe, ja̧danö bö̧jȩ 'daakobe, ja̧danö labinö tjö̧awakobe bö̧jȩma.

¹⁹ Bö̧jȩma bakobe 'daakobe, 'dabö pjo̧'yachajakobe bö̧jema, ja̧danö labinö tjö̧awakobe.

²⁰ Bö̧jȩ tjö̧awi̧ma, 'dukwachökwe suliidanö tjö̧awakobe, jwa̧le'ewena löwöte 'ya̧'yȩa̧kwawi̧danö, labinö tjö̧awakobe bö̧jȩma. Jau, bö̧je jojodö Dios öba a'otjö sulabenö ja̧tji̧ma ömökobe, bö̧jȩ meenanö baibanö, ja̧danö inesö ömöki̧tjö meakobe bö̧jȩma, yemidanö a̧la̧ibobö jwiinö.

²¹ Ja̧ möle mölȩjebetjöbi, bö̧jȩtjöbi sulabenö ja̧badönö lȩebakobe Isabenö Jo̧ma. Mö̧lȩjȩbe ju̧kwadö angeledötjö sulabedönö lȩebakobe, jadanö bö̧jȩ la'aka luwedötjö sulabenö ja̧badönöbi lȩebakwo̧.

²² Mölȩjȩbe ju̧kwadötjö lȩebawö̧nöbi, bö̧jȩnö ju̧kwadötjö lȩebawö̧nöbi bakobe o̧ko̧kodakobe, bakobe laju okwa ikwö loakobetjö̧. Jobadönö bakobe ka̧lena tjö̧bobö ipje'datakobe, yadakwö jobadönö lȩebakobetjö̧.

²³ Ja̧ möle yö̧te jawo̧ idejati̧ma, salöökakobe, ja̧danö möle jawo̧ idejati̧ma, dejatökönö ötabakwobedanö jakobe. Jau, ja̧ möle Isabenö Jo̧ Okobe Jwiinö Juluwo̧ Diosma Jerusalennö ö̧jakwo̧, Sion mösa'otjö webö ö̧jakwo̧, jadanö iteda ömöledötjö la'aka luwedö tjöba a'o dewinö dejatinö ö̧jakwo̧, jawo̧ idejati̧ma, idejatokobedanö ichejekwinö.